Na aú ka iná laꞌaká puꞌuwaré yukuna marí
15
E kaja fariséona nakiyana, eyá Tupana purákaꞌalo nakú jewíñaꞌatajeño, kele iphaño Jesús nakú. Jerusalén eyájena neꞌemaká, nemá rijló:
2 —¿Naje chi unká paꞌapiyatéjena jemaꞌalá pheñawilana michuna purákaꞌalomi jaꞌapiyá? Unká nepalá nayátheꞌela chiyá najñaka naꞌajnewá piyá, wachiꞌiná michuna laꞌajika ke.
3 Raú rimá najló:
—Eta iká, ¿naje iyurí iliyó Tupana purákaꞌalo kemaká ke laꞌakana, rilanakiya ilaꞌakáloje pheñawilá michuna purákaꞌalomi kemaká ke?
4 Tupana purákaꞌalo kemari: “Iphá ichiꞌiná jaꞌapí; ipuraꞌaniño puꞌuwaré nanaku. Puraꞌajero puꞌuwaré richiꞌiná nakú, nókana iꞌimajeri”.
5 Eyá iyani nakiyana kemaño ijló: “Unká méñoꞌojo noꞌolá iñathé liñeru aú, kaja noꞌokale Tupánajlo riká”, ke.
6 Mapeja nemaká ijló ñaké, unkale nephala jaꞌapí. Kaja nayurí naliyó Tupana purákaꞌalo kemaká ke laꞌakana, nalaꞌakáloje pheñawilá michuna purákaꞌalomi kemaká ke penaje.
7 Pajlákachina wani iká. Mapeja ilaꞌaká inakuwá palá laꞌajeñó ke ajopana ijlú chu, unká ñaké laꞌajeñó kalé iꞌimaká eꞌiyonaja. Tupana purákaꞌalo jaꞌapátajeri Isaías iꞌimari iyukuna júpimi marí ke iꞌimaká:
8 “Mariruna puraꞌañó nunaku palá nanuma chiyaja kalé,
eyá napechu nakú unká wani nawátala nuká.
9 Unká na penaje kalé nalaꞌá puꞌují napéchuwa nojló.
Kaja inaꞌuké purákaꞌalo nakuja kalé newíñaꞌata neká, rinaku napechu iꞌimakale Tupana purákaꞌalo japi riká ke”.
10 E Jesús kemari najló neꞌejnakáloje rawaꞌajé penaje, rimá najló:
—Chuwa jemaꞌá meke kemakánaka marí:
11 Piyukeja nakaje iná ajñakare iná numá chiyá aú, unká iná laꞌalá puꞌuwaré. Rikaja kaja iná numá iná puraꞌó chiyá puꞌuwaré, riká laꞌarí iná puꞌuwaré laꞌajerí.
12 E Jesús jaꞌapiyatéjena iꞌijnaño rawaꞌajé, nemá rijló:
—¿E piweꞌepíchaka fariséona yúchiꞌichako kajrú wani pichá, ilé ke pimíchaka aú?
13 Raú rimá najló:
—Noraꞌapá, jeꞌechú chu iꞌimakare, kaꞌajeri piyuke inaꞌukena, unká rileꞌejena kalé iꞌimakaño.
14 Reja neꞌemareja. Mejluruna ke neká. Eyá jemaꞌañó napurákaꞌalo naꞌapiyá, mejluruna ke kaja neká. Unká meke laꞌajé pajluwa mejlurú pakoꞌotálajla apú mejlurú, iyamano naꞌakojla ulawí chojé.
15 E Pedro kemari rijló:
—Piꞌimá wajló palá meke kemakánaka kele pimíchaje nakú wajló yukuna.
16 Jesús kemari rijló:
—¿Unká kaja chi iweꞌepila rinakojé?
17 Piyukeja nakaje iná ajñakare iná numá chiyá witúkaꞌari ají ke iná julá chojé, rejomi raꞌapá iná eꞌiyayá.
18 Rikaja kaja iná numá chiyá iná puraꞌó nakaje nakú, iná pechu nakú riꞌimaká ke. Riká laꞌarí iná puꞌuwaré laꞌajerí.
19 Puꞌuwaré péchuri iná iꞌimakale, iná iꞌijnatá iná péchuwa puꞌuwaré laꞌakaná nakú: apala ajopana nókana nakú kaꞌajná; iná manáicho laꞌakana ajopana waꞌaté nakú kaꞌajná; ajopana nane jataꞌakana nakú kaꞌajná; najwaꞌaté pajlakana nakú, eyá chapújraꞌakajo, kaje nakú iná iꞌijnatá iná péchuwa.
20 Ilé kaje laꞌakaná laꞌarí iná puꞌuwaré laꞌajerí. Unkachu iná ipalá iná yátheꞌela chiyá, iná ajñaka iná aꞌajnewá piyá, ichiꞌiná michuna kemájika rinaku ke, unká iná laꞌalá puꞌuwaré raú —ke Jesús jewíñaꞌataka neká.
Ajopana teꞌeré eyájeru pechu iꞌimaká kaphí Jesús chojé yukuna marí
21 Reyá Jesús jaꞌapari ají ke Tiro, eyá Sidón, kele teꞌeré ejo.
22 Re pajluwájaru, Canaán teꞌeré eyájeru ruꞌumaká, iphayo Jesús amaje. Ruphaka rinaku ee, rowíyoꞌoko rumaká rijló:
—Wawakáraꞌajeri, Tupana wakáraꞌari piꞌimaká majó iná iꞌimatájeri penaje. Piweꞌepí numuꞌují. Kajrú wani nutu amaka chapú kaje yajwé, jiñá pechu iꞌimakale roꞌiyá.
23 Unká Jesús aꞌajipalá rojló. E raꞌapiyatéjena iꞌijnaño rawaꞌajé, nemá rijló:
—Piwakáraꞌa rupaꞌakó, kajrú wani rowíyoꞌoka wápumi chu.
24 E Jesús kemari rojló:
—Tupana wakáraꞌari nuká majó, noꞌokáloje Israel lakénami nakiyana ñathé, kapichájeño Tupana liyá penájena neꞌemakale.
25 Eꞌiyonaja ruꞌujná rijimaje. Rutáraꞌo ruꞌurúpachi aú rijimaje, rumá rijló:
—Wawakáraꞌajeri, paꞌá nuñathé.
26 Rimá rojló:
—Unká paala pan kaꞌakana iná yaní liyá, iná aꞌakáloje riká yawi pirakánajlo penaje. a
27 —Ke joꞌó, wawakáraꞌajeri, eꞌiyonaja kalé yáwina ajñá kaja pan mujrumi teꞌerí eꞌiyajé jaꞌakaro.
28 Raú Jesús kemari rojló:
—¡Meke kaphí wani pipechu nochojé! Piwátaka nakaje iꞌimaká pijló, keja riꞌimajika pijló.
Ilé ke rimaká rojló, aꞌapona ke jiñá pechu jáchoꞌoko rutu eꞌiyayá ejéchami rutejmoꞌotako.
Jesús tejmoꞌótaka kajrú natámina yukuna marí
29 Jesús jáchoꞌoro reyá, jaꞌapari piño ají ke kaéja Galilea ejo. Reyá ráchoꞌo yenuri jiꞌiwata nakojé, rejé riyaꞌo.
30 Kajrú inaꞌukena wáꞌakarena najwaꞌató natámina iphaka rinaku rejé. Neꞌiyajena unká méñoꞌojo jaꞌapálaño palá, ajopana mejluruna, neꞌiyajena unká puraꞌalaño, eyá ajopana apichákaꞌalona. Keꞌiyapejé nayaripune iꞌimaká nawaꞌa richaje. Neká natoꞌotá riꞌimá awaꞌajé ritejmoꞌótakaloje neká penaje. Ritejmoꞌota piyukeja neká keꞌiyapejé nayaripune liyá.
31 Unká puraꞌalaño, puraꞌañó palá; apichákaꞌalona iꞌimakaño, palaꞌañó kaja palá; unká jaꞌapálaño palá, jaꞌapaño kaja palá; mejluruna iꞌimakaño, amaño kaja palá. Ilé kaje aú napechu iꞌimá: “¡Meke piyuke wani rilaꞌalaka!” Palá wani napuraꞌakó Tupana, Israel michú pechu iꞌimakare chojé kaphí, nakú.
Jesús aꞌaká cuatro mil inaꞌukénajlo aꞌajnejí yukuna marí
32 E Jesús wáꞌari raꞌapiyatéjenajlo neꞌejnakáloje richaje, rimá najló:
—Kajrú wani nuweꞌepika mariruna muꞌují. Kaja weji ke kala cha nujwaꞌaté neká, eyá kaja naꞌajné tajnó. Unká nuwakáraꞌalaje napaꞌakó nañakaré ejo meꞌepijí waꞌaté, apala unká natejmú iphálajla nephákaloje palá penaje.
33 Raú raꞌapiyatéjena kemaño rijló:
—Eta, ¿méreya chi wephátajla najló aꞌajnejí maárowa? Íkiꞌiruna wani neká, unká na ñakaré iꞌimalá maárowa.
34 Rimá najló.
—¿Mékaꞌala pan ikapi maare?
—Iyamá kuwáꞌata kaꞌalá (7), eyá jíñana leꞌepé mekeleja.
35 E riwakáraꞌa nayáꞌako teꞌerí eꞌiyajé.
36 Kéchami rijñaꞌaká rikápojo iyamá kuwáꞌata kaꞌalá pan, jiña waꞌaté. E ripuraꞌó Tupana waꞌaté, rimá rijló:
—Palá pilaꞌaká weká marí aꞌajnejí aú.
Rejomi ritupaꞌatá pan nakiyana najló. Raꞌá raꞌapiyatéjenajlo riká natamákaꞌatakaloje riká inaꞌukénajlo.
37-38 Cuatro mil ewá achiñana iꞌimaká. Nekaja kalé nalapaꞌatá iꞌimaká, unká nalapaꞌatala inaana, yuwaná waꞌaté. Piyuke neká ajñaño naꞌajnewá namanoꞌoká ejená. Rejomi nawakata rijlupemí yuríkaro, iyamá kuwáꞌata kaꞌalá kuwáꞌala puꞌutheno waja.
39 Najñaka naꞌajnewá ejomi, Jesús iꞌimari riyukuno najló. Rejomi riwitúkaꞌa wapuru chojé, iꞌijnari ají ke Magadán teꞌeré ejo.