Jesús akhaꞌaká fariséona nakiyana, Tupana purákaꞌalo nakú jewíñaꞌatajeño waꞌaté, yukuna marí
16
E kaja fariséona nakiyana, Saducéona nakiyana waꞌaté iphaño Jesús nakú. Nawata rinaku kulákatakano, raú nemá rijló mapeja rilaꞌakáloje najló nakaje Tupánaja kalé weꞌepíkare laꞌakana, rená keꞌená penaje.
2 Raú rimá najló: “Laínchu amákachu kerani jeꞌechú jimá, imá: ‘Pujiꞌiní iꞌimajeri’, ke.
3 Lapiyami, amákachu kerani jeꞌechú jimá, kajrú juni juwákaꞌala waꞌaté, imá: ‘Unká paala chuwajá iꞌimajika’, ke. Palá iweꞌepika mékeka nakaje iꞌimajika jeꞌechú jimá amákana aú. Eta, ¿naje unká iweꞌepila palá wakáraꞌari nulaꞌaká nakaje eꞌiyowá nakojé?
4 ¡Unká inaꞌukélaruna ta iká, laꞌañó inakuwá mapeja palá laꞌajeñó ke, inaꞌuké ijlú chu, unká ñaké laꞌajeñó kalé iꞌimaká eꞌiyonaja! Iwata nulaꞌaká ijló nakaje Tupánaja kalé weꞌepíkare laꞌakana, eꞌiyonaja unká nulaꞌalaje na ijló. Nuwata iweꞌepika mékeka rilaꞌaká ripurákaꞌalo jaꞌapátajeri Jonás michú iꞌimaká. Ñaké kaja rilaꞌajika nuká”, ke Jesús kemaká najló.
Rejomi raꞌapáñaa neká.
Naꞌaká piyá nanakojó fariséona purákaꞌalo yukuna marí
5 Jesús, raꞌapiyatéjena waꞌaté, kuwáꞌaño kaéja paꞌanajo pitá. Nephaka rejo ee, naweꞌepí unká najñaꞌalá najwaꞌató pan.
6 Jesús kemari najló:
—Eko amá ikó palá fariséona, eyá saducéona, kele leꞌejé pan amúraꞌatajona (levadura) liyá.
7 Raú raꞌapiyatéjena kemaño pajlokaka nekámika:
—¿E jemiꞌichaka mékeka rimaká wajló, unká pachá wajñaꞌalacha wajwaꞌató pan?
8 Riweꞌepí mékeka napuraꞌakó pajwaꞌatéchaka, raú rimá najló:
—¿Naje chi imá: “Unká wajñaꞌalacha wajwaꞌató pan”, ke? ¡Meke wejápaja wani ipechu nochojé kaphí!
9 ¿Unká wani chi iweꞌepila meke itamákaꞌataka pajluwa théꞌela kaꞌalá ñani pan cinco mil inaꞌukénajlo iꞌimaká? ¿Mékaꞌala kuwáꞌala imanoꞌotá rijlupemí aú iꞌimaká?
10 ¿Unká kaja chi iweꞌepila meke itamákaꞌataka iyamá kuwáꞌata kaꞌalá ñani pan cuatro mil inaꞌukénajlo iꞌimaká? ¿Mékaꞌala kuwáꞌala imanoꞌotá rijlupemí aú iꞌimaká?
11 Numicha ijló iꞌimichaka: Eko amá ikó palá fariséona, eyá saducéona, kele leꞌejé pan amúraꞌatajona liyá. Unká pan wani nakú kalé numicha ijló ilé ke kemakana aú. ¿Naje unká wani iweꞌepila rinakojé?
12 Ilé ke rimaká najló aú naweꞌepí unká rimalá najló, namákaloje nekó naleꞌejé pan amúraꞌatajona liyá. Rimá najló naꞌaká piyá nanakojó fariséona, eyá saducéona, kele purákaꞌalo nemakare nakú.
Pedro weꞌepika na inaꞌukeka Jesús iꞌimaká yukuna marí
13 Rejomi nephá Cesarea de Filipo teꞌeré nakojé. E Jesús kemari raꞌapiyatéjenajlo:
—Inaꞌuké iꞌimakáloje nupalamane penaje iꞌimaká nuká. ¿Meke jemaꞌaká ajopana inaꞌukena kemaká nunaku, na inaꞌukeka nuká nemaká?
14 Nemá rijló:
—Neꞌiyajena kemaño pinaku: “Juan el Bautista riká”, ke. Eyá ajopana kemaño: “Elías riká”, ke. Ajopana kemaño kaja pinaku: “Jeremías riká”, ke. Eyá ajopana kemaño pinaku: “Tupana purákaꞌalo jaꞌapátajeño, júpimi iꞌimakaño, nakiyana kaꞌajná riká”, ke.
15 E Jesús kemari najló:
—Eta iká, ¿meke imaká nunaku?
16 Simón Pedro kemari rijló:
—Weꞌematájeri penaje piká. Tupana, matajnako iꞌimajika, iꞌirí piká.
Raú Jesús kemari rijló:
17 —Pedro, Jonás iꞌirí, palá piweꞌepika naka nuká. Unká inaꞌuké liyá kalé piweꞌepí nunakojé. Noraꞌapá, jeꞌechú chu iꞌimakare, liyá piweꞌepí riká.
18 Piká Pedro. Jipa, ke kemakana pií. Kaphí noꞌopiyá jemaꞌajeño pechu iꞌimajika nochojé, pipechu iꞌimaká nochojé ke kaja, raú unká takaꞌakaje cháꞌatalaje neká. Matajnako neꞌemajika nujwaꞌaté jeꞌechú chu.
19 Nuyurí pijló rinakojé, piwakáraꞌakaloje nujwaꞌatéjena marí ejaꞌawá chu. Nakaje, unká piyurílaje nalaꞌaká marí teꞌerí nakú, unká kaja nuyurílaje nalaꞌaká riká jeꞌechú chu. Eyá nakaje, piyuríjikare nalaꞌaká marí teꞌerí nakú, nuyureje kaja nalaꞌaká riká jeꞌechú chu —ke rimaká Pédrojlo.
20 Rejomi Jesús kemari najló:
—¡Pa! Imaniña ajopánajlo nuyukuna naka nuká, Tupana wakáraꞌakare majó iná iꞌimatájeri penaje.
Jesús kemaká najló mékeka ritakaꞌajika yukuna marí
21 Rejomi Jesús kemari raꞌapiyatéjenajlo mékeka nalaꞌajika riká chapú nakú, rimá:
—Tupana wakáraꞌari nuꞌujnaká Jerusalén ejo, nomákaloje re chapú kaje yajwé. Re pheñawilana, eyá sacerdótena, Tupana purákaꞌalo nakú jewíñaꞌatajeño waꞌaté, laꞌajeño nuká chapú. Nawakáraꞌaje nonókana, eꞌiyonaja weji ke kala iꞌimajemi numakápoꞌojo piño nopumí chuwá.
22 Rejomi Pedro wáꞌari Jesús apoꞌojó naliyá. Rakhaꞌakó rimaká rijló:
—Eko Tupana weꞌepí pimuꞌují. ¡Unká wani nalaꞌalaje ilé ke piká!
23 Raú Jesús pajnoꞌoró riyámajo, rimá Pédrojlo:
—¡Piꞌijná nuliyá, Jiñá Chiꞌinárikana pechu ke wani pipechu! Raú unká piwátala nulaꞌaká nakaje Tupana pechu nakú riꞌimaká ke. Piyukeja inaꞌuké iꞌijnataka napéchuwa ke wani pipechu.
24 Rejomi rimá piyuke raꞌapiyatéjenajlo:
—Iwátajika ee nujwaꞌatéjena iꞌimakana, iyureje iliyó piyuke nakaje laꞌakana ipechu keja. Unká kaja iweꞌepílaje khaí inakuwá, nenójika iká nupurákaꞌalo yukuna iꞌimakana jimaje.
25 Eyá unká yurílaje riliyó nakaje laꞌakana ripechu keja, kapichájero. Eyá nenójikare nuwátaka ke laꞌakana jimaje nujwaꞌateje riꞌimakale, iꞌimajero.
26 Unká na penaje inajlo kajrú nakaje marí ejaꞌawá chu iꞌimakare wátakana iꞌimalá, iná kapichájikole Tupana liyá rilanakiya.
27 Inaꞌuké iꞌimakáloje nupalamane penaje iꞌimaká nuká. Ejaꞌawá tajnájiko wakajé nuphaje majó Noraꞌapá waꞌatéjena, jeꞌechú chiyájena waꞌaté. Kajrú mejámaꞌatani eꞌiyowá wephaje majó. Riwakajé noꞌojé piyuke inaꞌukénajlo nakaje nalaꞌakare wemí.
28 Unká chiyó inakiyana, maare iꞌimakaño nakiyana, takaꞌá, riꞌimajé ilé numaká rinaku ke. Neká amájeño nujwaꞌatéjena laꞌaká Tupana wakáraꞌaka ke. Inaꞌuké iꞌimakáloje nupalamane penaje iꞌimaká nuká —ke Jesús kemaká najló.