Jesús napona apiyákako najimaje yukuna marí
17
Pajluwa kuwáꞌata ke (6) kala jaꞌapaka ejomi, Jesús jáchoꞌoro ipuré jiꞌiwátaje. Riwaꞌa rijwaꞌató Pedro, Santiago, eyá reꞌewé Juan, keleja. Nephaka rejo ejéchami,
2 Jesús jimá apiyákako najimaje. Kamú kamaré pataká ke rijimá amako. Jareni wani, sereni ke raꞌarumaká amako rejéchami.
La transfiguración (Mateo 17.1-13)
3 E manaꞌí chiyó namá Moisés, Elías waꞌaté, iphaka rawaꞌajé rejé. Neká puraꞌañó Jesús waꞌaté.
4 E Pedro kemari Jesusjlo:
—Wawakáraꞌajeri, ¡meke palá wani weká maare! Piwátajika ee, walaꞌajé weji kele kaꞌapejé maare: pajlúwaꞌala walaꞌajé pijló, eyá apaꞌalá Moisesjlo, eyá apaꞌalá Elíasjlo.
5 Ilé ke Pedro kemaká ejéchami, juni juwákaꞌala wapuruka nachá. Reꞌiyá nemaꞌá Tupana kemaká najló:
—Ilé Nuꞌurí, íkiꞌija nuwátakare, palá wani nupechu rinaku: jemaꞌá raꞌapiyá.
6 Ilé ke rimaká aú, raꞌapiyatéjena lámaꞌaño pajimaꞌaló teꞌerí eꞌiyajé, kajrú wani nakeroꞌokole.
7 E Jesús iphari nawaꞌajé, tujlaꞌarí neká wejápaja riyátheꞌela aú, rimá najló:
—Jáchoꞌo, ikeroꞌoniño.
8 E náchoꞌo yakáꞌajo, amaño unká na iꞌimalá. Rikaja kalé Jesús namá.
9 Nawitúkaꞌaka ipuré nakiyá nakuwá, Jesús puraꞌaró najwaꞌaté, rimá najló:
—Iꞌimaniña ajopánajlo nakaje amíchaje wajé yukuna. Numakápoꞌojiko ejómiko, iꞌimá najló riyukuna. Inaꞌuké iꞌimakáloje nupalamane penaje iꞌimaká nuká.
10 E raꞌapiyatéjena kemaño rijló:
—Tupana purákaꞌalo nakú jewíñaꞌatajeño kemaño Elías michú nakú: “Riká waícha piño majó, Tupana wakáraꞌajikare inaꞌuké iꞌimatájeri penaje tukumá”, ke. ¿Naje chi nemá ilé ke?
11 Rimá najló:
—Ilé ke joꞌó nemaká. Elías iphájeri majó paineko, rilamáꞌatakaloje piyuke nakaje rapumí chuwá.
12 Eyá nuká kemari ijló: kaja Elías iphá majó nutukumá iꞌimaká, eꞌiyonaja unká naweꞌepila na inaꞌukeka riꞌimaká, raú nalaꞌá riꞌimaká chapú. Ñaké kaja nalaꞌajika nuká chapú. Inaꞌuké iꞌimakáloje nupalamane penaje iꞌimaká nuká, ñaꞌajeri chapú kaje yajwé panaku.
13 Ilé ke rimaká najló aú naweꞌepí rimaká Juan el Bautista michú nakú: “Kaja Elías iphá majó iꞌimaká”, ke.
Jesús wakáraꞌaka jiñá pechu jáchoꞌoko yuwají eꞌiyayá yukuna marí
14 E kaja nephá kajrú inaꞌukena iꞌimaká ejé. E pajluwaja nanakiyana iꞌijnari Jesús jimajo. Riká táraꞌaro riꞌirúpachi aú rijimaje, rimá rijló:
15 —Piweꞌepí nuꞌurí muꞌují. Apú eyá ke kajrú wani ritakaꞌatako; kajrú wani ramákano chapú kaje yajwé. Ritakaꞌatako kewá raꞌakono jiyá chojé, apú eyá ke raꞌó kaja junápeje.
16 Majó nuwáꞌicha riká paꞌapiyatéjena ejo, natejmoꞌotákaloje riká, eꞌiyonaja unká meke nalaꞌalacha riká.
17 E Jesús kemari raꞌapiyatéjenajlo:
—¡Meke unká wani ipechu iꞌimalá Tupana chojé kaphí! ¿Unká joꞌó chi iweꞌepila naka laꞌakana palani, eyá naka laꞌakana unká paala? ¿Meketana júpika nuꞌumajika ijwaꞌaté, iweꞌepíkaloje rinakojé nuliyá penaje? Iwáꞌicha riká majó.
18 Raú nawaꞌa riká rejo. E Jesús akhaꞌarí jiñá pechu reꞌiyá iꞌimakare, raú ráchoꞌo reꞌiyayá, rejomi peyajweni riꞌimaká reyá aꞌajná ñoꞌojó.
19 Rejomi raꞌapiyatéjena puraꞌañó Jesús waꞌaté nekámika ke, nemá rijló:
—¿Naje unká méñoꞌojo wawakáraꞌalacha jiñá pechu jáchoꞌoko reꞌiyayá?
20 Rimá najló:
—¡Meke unká wani ipechu iꞌimalá Tupana chojé kaphí! Raú unká méñoꞌojo iwakáraꞌalacha ráchoꞌoko reꞌiyayá. Ipechu iꞌimakela wejápaja ñani kaphí richojé, imajla marí ipurejlo: “Patató aꞌajná ñoꞌojó”, ke. Raú ratatojla aꞌajná ñoꞌojó. Ipechu iꞌimajika ee kaphí Tupana chojé, ilaꞌajé piyukeja nakaje ñaké.
21 Iná wakáraꞌakaloje ilé kaje jiñá pechu jáchoꞌoko inaꞌuké eꞌiyayá yámona, iná puraꞌó Tupana waꞌaté, iná iꞌitaó kaja iná aꞌajné liyá —ke rimaká najló.
Jesús iꞌimaká najló mékeka ritakaꞌajika yukuna marí
22-23 Jesús chiraꞌaró raꞌapiyatéjena waꞌaté Galilea teꞌeré nakuwá. Riwakajé rimá najló:
—Inaꞌuké iꞌimakáloje nupalamane penaje iꞌimaká nuká. Naꞌajé nupinánajlo nuká nenókaloje nuká penaje, eꞌiyonaja weji ke kala iꞌimajemi numakápoꞌojo piño nopumí chuwá.
Ilé ke rimaká najló aú, kamuꞌují wani napechu laꞌakó.
Jesús aꞌaká liñeru Tupana ñakaré chojé penaje yukuna marí
24 E kaja Jesús iphá rijwaꞌatéjena waꞌaté Cafarnaúm ejo. Re ajopana kejáꞌaño liñeru inaꞌuké liyá Tupana ñakaré chojé penaje. Neká iphaño Pedro nakú, nemá rijló:
—¿E jewíñaꞌatajeri aꞌaká liñeru Tupana ñakaré chojé penaje?
25 —Aꞌa, raꞌá kaja liñeru —ke Pedro kemaká.
E rimujlúkaꞌa pají chojé. Jesús kemari rijló:
—¿Meke chi pipechu rinaku? ¿Na liyá chi marí ejaꞌawá chu iꞌimakaño wakáraꞌa liñeru ñaꞌakana? ¿Najwaꞌatéjena liyá kaꞌajná, ajopana teꞌeré eyájena liyá kaꞌajná?
26 Pedro kemari rijló:
—Ajopana teꞌeré eyájena liyá najñaꞌá riká.
Jesús kemari rijló:
—Ke joꞌó riká. Unká najwaꞌatéjena kalé aꞌañó najló liñeru.
27 Unká naje kalé noꞌó najló liñeru, Tupana waꞌateje nuꞌumakale. Eꞌiyonaja kalé noꞌojé najló liñeru, napechu iꞌimaká piyá chapú nunaku. Ñakele piꞌijná kaéja ejo, pikiꞌichá janaꞌajori junápeje. Chíraꞌajeri paineko, pijñaꞌajé. Rinuma chu piphátaje liñeru nakejáꞌakare nuliyá, piliyá waꞌaté, wemí lokópaꞌala. Riká pijñaꞌajé, rejomi paꞌachá najló riká.