2 E Jesús wáꞌari pajluwaja yuwajijlo, rejomi ritáraꞌata riká neꞌiyajó.

3 Rimá raꞌapiyatéjenajlo:

4 Unká laꞌalá rinakuwá kajrú laꞌaká ke, iꞌimajeri ajopana nujwaꞌatéjena chaje. Marí yuwají pechu iꞌimaká rinakuwá, ke kaja ripechu iꞌimakale rinakuwá.

5 Wátajeri marí yuwají, nujwaꞌateje riꞌimakale, wátajeri kaja nuká —ke rimaká najló.

6 E rimá piño najló: “Chapú wani nakaje iꞌimajika amátaño noꞌopiyá jemaꞌajeño puꞌuwaré laꞌakaná aujlo. Palani nakaꞌakela namátajeño junápeje kajruni jipa jepoꞌokeja nanúrupi nakú ke. Palani najló ilé ke nalaꞌakana iꞌimakajla, chapú kaje yajwé namájikare ijlunami chojé.

7 “Re kajrú wani nakaje marí ejaꞌawá chu, kaꞌátari iná eꞌiyajé iná laꞌakáloje puꞌuwaré raú penaje. Ñaké riká, eꞌiyonaja kalé chapú wani riꞌimajika amátajeri apú puꞌuwaré laꞌakaná aujlo.

8 “Ñakele piyátheꞌela pachá kaꞌajná, piꞌimá pachá kaꞌajná, pilaꞌakachu puꞌuwaré, palani rimataꞌakana pinakiyó pikaꞌakáloje riká penaje. Palani ilé ke laꞌakana iꞌimakajla pijló, pikapichako piyá ripachá keraꞌathani unká yakálare chojé.

9 Eyá pijlú pachá kaꞌajná pilaꞌakachu puꞌuwaré, palani kaja rikaꞌakana pinakiyó. Palani ilé ke laꞌakana iꞌimakajla pijló, pikapichako piyá ripachá keraꞌathani unká yakálare chojé”, ke Jesús kemaká najló.

10 Jesús kemari piño najló: “Ipechu iꞌimaniña yuwaná nakú: ‘Mapéjaruna neká’, ke. Tupana waꞌatéjena, jeꞌechú chiyájena iꞌimakale nawaꞌaphena. Noraꞌapá, jeꞌechú chu iꞌimakare, awaꞌá neká.

11 Inaꞌuké iꞌimakáloje nupalamane penaje iꞌimaká nuká. Nuꞌumatákaloje inaꞌuké kapichákajo liyá penaje nuphá majó iꞌimaká.

12 “Re kaꞌajná pajluwaja inaꞌuké pirana cien ovéjana. Nanakiyana kaꞌajná kapicharo pajluwaja. Paminá amíchaka aú unká riꞌimalacha najwaꞌaté, riyuricha ajopana noventa y nueve naꞌajnewá ajñakana nakú riꞌijnakáloje kapicharo neꞌiyayá kulaje.

13 Riphátiyaka riká aú puꞌují ripechu liꞌichako. Ajopana chaje ripechu iꞌimichaka puꞌují kapicharo nakú, riphátiyakale riká.

14 Ñaké kaja jaraꞌapá, jeꞌechú chu iꞌimakare. Unká riwátala pajluwa mariruna yuwaná nakiyana kapichako”, ke rimaká najló.

15 E rimá piño najló: “Pajluwa Tupana jaꞌapiyá jemaꞌajeri laꞌajika ee piká chapú, pipuraꞌó rijwaꞌaté rinaku ikó. Pimá rijló na aú ka rilaꞌaká piká chapú. Raꞌajika ee pipurákaꞌalo rinakojó, ipalaꞌajó piño pajwaꞌatéchaka.

16 Unkaja ke raꞌá rinakojó pipurákaꞌalo, piwaꞌa pijwaꞌató pajluwa kaꞌajná, iyamá kaꞌajná, nemaꞌakáloje mékeka rimaká pijló. Raú naweꞌepeje kaja mékeka rimaká pijló.

17 Unkaja ke raꞌá rinakojó pipurákaꞌalo ajopana waꞌaté, piꞌimá riyukuna Tupana jaꞌapiyá jemaꞌajeño rawakákarono waꞌatejlo. Unkaja ke raꞌá rinakojó napurákaꞌalo, ikaꞌá eꞌiyayó riká. Iweꞌepí kaja rinaku: ‘Unká jemaꞌalaño Tupana jaꞌapiyá nakiyana’, ke. Iweꞌepí kaja rinaku: ‘Liñeru ñaꞌajeño neꞌemakánajlo, unká nawátalarena nakiyana’, ke.

18 “Jemaꞌá marí: Jeꞌechú chu iꞌimakaño wakáraꞌajeri Tupana. Ñakele riyurí ijló rinakojé, iwakáraꞌakaloje rijwaꞌatéjena marí teꞌerí nakú. Nakaje unká iyurílaje nalaꞌaká marí ejaꞌawá chu, unká kaja Tupana yurílaje nalaꞌalaká riká jeꞌechú chu. Eyá nakaje iyuríjikare nalaꞌaká marí teꞌerí nakú, riyureje kaja nalaꞌaká riká jeꞌechú chu.”

19 Rimá piño najló: “Iyamá inakiyana kaꞌajná puraꞌañó pajwaꞌatéchaka marí teꞌerí nakú, ipechu iꞌimakáloje rejenowaja nakaje ikejáꞌajikare Tupana, jeꞌechú chu iꞌimakare, liyá nakú. Riká aꞌajeri ijló riká.

20 Iyamá kaꞌajná, weji kele kaꞌajná, noꞌopiyá jemaꞌajeño awakákochu, napuraꞌakóloje nujwaꞌaté penaje, re nupechu najwaꞌaté”, ke rimaká najló.

21 E Pedro iꞌijnari Jesús awaꞌajé, rimá rijló:

22 —Unká —ke Jesús kemaká—. Unká iná amalo richaje iyamá kuwáꞌata ke pe ejenaja. Ñakeja iná amako richaje.

23 Jesús kemari piño najló: “Chuwa nuꞌumajika yuku, iweꞌepíkaloje raú meke Tupana laꞌaká nakaje nakojé. Marí ke riká: Neꞌemakana iꞌimichari. Rijwaꞌaté jápajeño lewérichaño rijló kajrú liñeru. Ñakele riwáꞌicha namaná, rilamáꞌatakaloje najwaꞌaté riká penaje.

24 Kaja rilamáꞌatiya neꞌiyajena waꞌaté. eyá apú rijwaꞌaté jápajeri iphíchari rinaku. Riká lewérichari rijló kajrú wani.

25 Unká meke laꞌajé raꞌaláchajla rijló rilewérikare wemí. Raú rikariwate kemíchari ajopana rijwaꞌatéjenajlo: ‘Marí inaꞌuké lewérika nojló kajrú wani. Eko aꞌá riká riwemí aú, rijápakaloje mawemíwaka ajopánajlo. Ñaké kaja aꞌajika ajopánajlo rinane riwemí aú. Ñaké kaja aꞌajika riyajalo, riyani, kele nawemí aú, najápakaloje mawemíwaka najló penaje. Ilé kaje aú liñeru jáchoꞌojo rijló, rilewérikare nojló wemí penaje’, ke rimíchaka najló.

26 Ilé ke rimíchaka rinaku aú, rijwaꞌaté jápajeri táriꞌicharo riꞌirúpachi aú rikariwate jimaje. Mawó rimíchaka rijló: ‘Nukariwate, piyúchaꞌaniño nuchá. Rejómiko noꞌó pijló riwemí’, ke rimíchaka.

27 Ilé kaje aú rikariwate weꞌepíchari rimuꞌují. Ramicho richaje; rilamáꞌatiya riká rilewérikare rijló aú. Kaja reyá aꞌajná ñoꞌojó unká rilewérika iꞌimalacha rijló.

28 “Rejéchami ripiꞌichako rikariwate eyá. Meketana iꞌimajemi riphátiya apú. Riká lewérichari rijló wejápaja. Rikariwate waꞌaté jápajeri kaja riꞌimichaka. Ramíchaka riká aú, ripatiya riká rinúrupi nakiyá kamachá. Rikeñoꞌochá rinúrupi ajñoꞌokana, rimicha rijló: ‘Chuwa ta paꞌá nojló piyuke pilewérikare nojló wemí’.

29 Eja apú táriꞌicharo rijimaje riꞌirúpachi aú. Mawó rimíchaka rijló: ‘Piyúchaꞌaniño nuchá. Kéchamiko noꞌó pijló riwemí’.

30 ‘Unká’, ke rimíchaka. E riꞌijichá ajopánajlo riyukuna iꞌimajé, nakaꞌakáloje riká inaꞌuké wajákelana chojé penaje, nawajákaloje riká, raꞌakáloje rijló piyuke rilewérikare wemí.

31 Ajopana, rikariwate waꞌaté jápajeño, amíchaño meke riliꞌichaka riká. Chapú wani riꞌimichaka nanaku, raú neꞌejichá riyukuna iꞌimajé nakariwátejlo.

32 Raú rikariwate wáꞌichari rimaná. Riphicha rinaku, e rimicha rijló: ‘¡Meke piká nujwaꞌaté jápajeri ta, unká wani inaꞌukélari! Nuká amaro pichaje, nulamáꞌata piká pilewérikare aú. Mawó pimaká aú nojló iꞌimaká aú nomó pichaje pilewérikare nojló aú.

33 Palani kaja piweꞌepíkajla kele leweri pijló muꞌují, nuweꞌepika pimuꞌují ke kaja’, ke rimíchaka rijló.

34 Íkiꞌija wani rikariwate yúchiꞌichako richá, raú riwakáriꞌicha riwajákana aꞌajná raꞌatajika rijló kajrú wani rilewérikare rijló wemí ejená”, ke Jesús iꞌimaká najló riyukuna.

35 Kaja penaje rimá: “Ñaké kaja Noraꞌapá, jeꞌechú chu iꞌimakare, laꞌajika neká unká amálaño ajopana chaje chapú nalaꞌakare neká liyá”.