Inaꞌuké kupaka piyá naluna yukuna marí
19
Riñapátaka najló yuku iꞌimakana ejomi, riꞌijná Galilea teꞌeré eyá ají ke Judea teꞌeré ejo, iphari juni Jordán paꞌanajo pitá.
2 Kajrú inaꞌukena chiraꞌakó rijwaꞌaté. Re ritejmoꞌota natámina.
3 Eyá fariséona nakiyana iꞌijnaño Jesús chaje. Mapeja nawátaka yuku kejáꞌakana riliyá nemakáloje rinaku: “Mapeja ripajlaka”, ke, raú nemá rijló:
—¿E palani Tupánajlo iná yajalo yuríkana mapeja, iná wátaka kéchami?
4 Rimá najló:
—Tupana purákaꞌalo iweꞌepíkare nakojé kemari: Tupana keñoꞌótaka ejaꞌawá iꞌimaká wakajé, rikeñoꞌota kaja achiñá, inanaru waꞌaté iꞌimaká.
5 Ñakele achiñá wáꞌakako ejomi, ranúkaꞌo richiꞌiná liyá riꞌimakáloje riyajalo waꞌaté. Reyá kaja pajluwa japi keja neká pajwaꞌatéchaka.
6 Raú unká iyamá inaꞌukena ke kalé wáꞌakajeñomi, pajluwa japi keja neká pajwaꞌatéchaka. Ilé ke riꞌimakale, unká paala nayurika pekowáaka. Kaja Tupana laꞌarí neꞌemaká neꞌemakáloje pajluwa japi keja pajwaꞌatéchaka —ke Jesús kemaká najló.
7 E nemá piño rijló:
—Eta, Moisés kemari iꞌimaká iná yurijla iná yajalo, iná aꞌaká rojló purákaꞌaloji lanaꞌakéjami ejomi. Richu iná kemá na pachaka iná yurika ruká. ¿Na penaje chi rimá ilé ke iꞌimaká?
8 Jesús kemari najló:
—Riwakajé ijnú wani nemaꞌaká Tupana jaꞌapiyá iꞌimaká, akuwaná Moisés yurí najló rinakojé nayuríkaloje naluna. Paineko chiyó, unká ñaké kalé riꞌimaká inaꞌukejlo.
9 Eyá nuká kemari rinaku: Pajluwa kaꞌajná yuríkachu riyajalo mapeja, unká rulaꞌalá rumanáicho apú waꞌaté eꞌiyonaja, riwáꞌakakoloje apaꞌawelo waꞌaté rulanakiya penaje, rilaꞌá rimanáicho raú. Apaꞌawelo waꞌaté laꞌakana keja Tupánajlo riká. Apú kaꞌajná wáꞌakajiko riyajalo penájemiru waꞌaté, rilaꞌajé kaja rimanáicho raú. Apaꞌawelo waꞌaté laꞌakana keja Tupánajlo riká, apú yajalo joꞌó ruꞌumakale rijló —ke Jesús kemaká najló.
10 E kaja raꞌapiyatéjena kemaño rijló:
—Ilé ke riꞌimajika ee, palani kaꞌajná unká iná wáꞌakalo.
11 Jesús kemari najló:
—Unká piyukeja kalé inaꞌuké weꞌepíjika meke kemakánaka kele numíchaje nakú ijló. Tupana aꞌakárena ñatheja kalé weꞌepéjeño meke kemakánaka riká.
12 Re neꞌiyajena achiñana mothoꞌoñó apichákaꞌalo. Ripachá unká meke laꞌajé nawáꞌakalo. Eyá re kaja neꞌiyajena apichátaño nanapona, pachá unká kaja meke laꞌajé nawáꞌakalo. Eyá neꞌiyajena achiñana unká wáꞌakalaño, naweꞌepíkale natukumó Tupana purákaꞌalo yukuna iꞌimakana ajopánajlo. Wátari marí numakare nakú jemaꞌakana noꞌopiyá, jemaꞌajeri riká —ke Jesús kemaká najló.
Jesús puraꞌakó palá yuwaná nakú yukuna marí
13 Neꞌiyajena wáꞌaño yuwaná Jesús ejo, ritoꞌotákaloje riyátheꞌela nanakojé, ripuraꞌakóloje Tupana waꞌaté nanaku palá. Raꞌapiyatéjena amaka aú nawáꞌaka neká rejo, nawíyoꞌo najló richá, nawáꞌaka piyá richaje neká.
14 Raú Jesús kemari najló:
—Reja yuwaná iꞌijnareja nuchaje, awíyoꞌoniña najló richá. Yuwaná ke iꞌimakaño iꞌimaño Tupana waꞌatéjena, nawakáraꞌajeri riꞌimakale.
15 Ritoꞌotaka riyátheꞌela nanakojé Tupana laꞌakáloje palá neká ejomi, ráchoꞌo reyá.
Kajrú leꞌejepelari puraꞌakó Jesús waꞌaté yukuna marí
16 Pajluwa inaꞌuké iꞌijnari Jesús chaje, rimá rijló:
—Inaꞌuké jewíñaꞌatajeri piká, palá laꞌajerí piká. ¿Na chi nulaꞌajla nuꞌumakáloje Tupana waꞌaté matajnako jeꞌechú chu?
17 Jesús kemari rijló:
—¿Naje chi pimá nunaku: “Palá laꞌajerí”, ke? Tupánaja kalé pajluwaja, palá laꞌajerí. Eyá piwátajika ee matajnako jeꞌechú chu iꞌimakana, pilaꞌá riwakáraꞌaka ke.
E rimá Jesusjlo:
18 —¿Na chi Tupana wakáraꞌa iná laꞌaká?
Jesús kemari rijló:
—Pinóniña inaꞌuké; pilaꞌaniña kaja pimanáicho apaꞌawelo waꞌaté, apaꞌawelo waꞌaté ke; pataꞌaniña kaja; pipajlániña kaja apú nakú mapeja;
19 piphá kaja pichiꞌiná jaꞌapí palá; piwata ajopana inaꞌukena piwátaka pikó ke kaja.
20 E rimá Jesusjlo:
—Nujyuwako eyá maárejecha nulaꞌá piyukeja ilé pimíchaka ke. ¿Na chi yuriro re joꞌó kaja nupé nulaꞌakáloje penaje?
21 Jesús kemari rijló:
—Piwátajika ee nuwátaka ke laꞌakana, eko paꞌatá piyuke pinane riwemí aú, rejomi paꞌakáloje raú kamuꞌují laꞌakaño ñathé. Ilé ke pilaꞌajika ee, kajrú nakaje iꞌimajika palá pijló jeꞌechú chu. Rejomi pipaꞌajó piño majó piꞌimakáloje nujwaꞌateje penaje.
22 Ilé ke Jesús kemaká rijló aú, ripaꞌó reyá. Kamuꞌují wani ripechu laꞌakó. Unká raꞌalá rinakojó ripurákaꞌalo, kajrú leꞌejepelari riꞌimakale.
23 E Jesús kemari raꞌapiyatéjenajlo:
—Puwichani wani kajrú leꞌejepelárunajlo nachó yuríkana Tupánajlo riꞌimakáloje nawakáraꞌajeri penaje.
24 Puwichani caméllonajlo luwirí aphú ñani chiyá jaꞌapákana. Richaje puwichaka kajrú leꞌejepelárunajlo nachó yuríkana Tupánajlo riꞌimakáloje nawakáraꞌajeri penaje. a
25 Ilé ke rimaká najló aú, napechu iꞌimá: “Unká na kalé kaꞌajná riꞌimatajla kapichákajo liyá”, ke. Nemá pajlokaka:
—¿Mékajena kaꞌajná Tupana iꞌimataje rijluwa kapichákajo liyá?
26 Raú Jesús yakáꞌaro nachaje, rimá najló:
—Unká méñoꞌojo inaꞌuké iꞌimatálaje nekó kapichákajo liyá. Tupánaja kalé iꞌimatájerijla neká, riweꞌepíkale piyukeja nakaje laꞌakana.
27 E Pedro kemari rijló:
—Wawakáraꞌajeri, weká yuriño piyukeja wanane weꞌejnakáloje pijwaꞌaté penaje. ¿Meke nakaje iꞌimajika wajló ilé ke walaꞌakale?
28 Jesús kemari najló:
—Inaꞌuké iꞌimakáloje nupalamane penaje iꞌimaká nuká. Wajé ejaꞌawá iꞌimajika piño wakajé, nuká iꞌimajeri nawakáraꞌajeri. Palá wani nuwakáraꞌajika neká riwakajé. Iká, noꞌopiyatéjena, wakáraꞌajeño kaja nujwaꞌaté. Re ñákaꞌajori nawakáraꞌajeñojlo, iyamá iphata jiꞌimaji nakojé kele (12). Richu iyáꞌajo, imakáloje ikáꞌana nakú mékajenaka neká penaje. Iyamá iphata jiꞌimaji nakojé kele Israel lakénami aꞌajútaya michuna iꞌimaká, nakú imaje.
29 Neꞌiyajena nakiyana yuriño nañakaré, nejena kaꞌajná, nachiꞌiná kaꞌajná, nateꞌeré kaꞌajná, kaje, nalaꞌakáloje nuwakáraꞌaka ke penaje. Neꞌejnañáa kaja kaꞌajná nayani kaja ñapákaño. Palá wani nakaje iꞌimajika ilé ke laꞌakáñojlo. Kajrú kaja Tupana aꞌajika nañathé. Riká aꞌajeri kaja neká neꞌemakáloje matajnako jeꞌechú chu rijwaꞌaté.
30 Re kajrú inaꞌukena, meꞌetení iꞌimakaño, pechu nanakuwá: “Ajopana chaje Tupana laꞌajika weká palá”, ke. Eꞌiyonaja unká ñaké kalé riꞌimajika najló. Ajopana jaꞌapejé wani rilaꞌajika nanaku palá. Re kaja kajrú inaꞌukena, meꞌetení iꞌimakaño, pechu nanakuwá: “Ajopana jaꞌapejé kaꞌajná Tupana laꞌajé wanaku palá”, ke. Ilé ke péchuruna nanakuwajlo, unká ñaké kalé riꞌimajika, ajopana chaje wani rilaꞌajíkale nanaku palá —ke Jesús kemaká najló.