Iwakajílomi iꞌijnaká purákaꞌaloji lamáꞌatajeri chaje yukuna marí
18
Jesús iꞌimari yuku najló rewíñaꞌatakaloje neká, nayurika piyá Tupana waꞌaté puraꞌakano, napechu laꞌakó piyá kaja ujwí riliyá.
San Lucas 18.1-17
2 Raú riꞌimá marí yuku najló: “Pajluwaja inaꞌuké iꞌimichari pajimila e. Purákaꞌaloji lamáꞌatajeri inaꞌuké waꞌaté riꞌimichaka. Unká riphálacha Tupana jaꞌapí; unká kaja riphálacha inaꞌuké jaꞌapí.
3 Rikaja kaja pajimila eꞌiyá pajluwájaru iꞌimichayo. Iwakajílomi ruꞌumichaka. Chapú pajluwa inaꞌuké laꞌajika ruká, raú methú ke ruꞌujichákano riyukuna iꞌimajé rijló. Mawó ruliꞌichaka riká rilamáꞌatakaloje rojló riká.
4 Ruphákeno rinaku, eꞌiyonaja unká raꞌaké rinakojó ruká. Júpija unká riwátalacha rilamáꞌatakana rojló. Kaja ewaja ripechu iꞌimichá: ‘Unká nuphala Tupana jaꞌapí; unká kaja nuphala inaꞌuké jaꞌapí.
5 Eꞌiyonaja noꞌojé ilerú iwakajílomi ñathé, rukawílaꞌakale wani nunaku. Nupuraꞌajó ruchaya, ruꞌujnaká piyá methú ke wani majó, royaꞌátaka piyá nuká’, ke ripechu iꞌimichaka”, ke Jesús iꞌimaká yuku.
6 Rejomi rimá piño najló: “Unká inaꞌukélari ilé purákaꞌaloji lamáꞌatajeri iꞌimaká, eꞌiyonaja rimá: ‘Noꞌojé ruñathé’, ke.
7 Ñakeja Tupana aꞌajika neká, riꞌiwapakárena ajopana inaꞌukena eꞌiyayá rijluwa, ñathé. Kaja nakaje riliyá kejáꞌajeño neká. Weꞌechú, lapí waꞌató, nemá rijló raꞌakáloje nañathé. Ñakele unká rimaláraꞌatalaje jupi rikó nañathé aꞌakana aú.
8 Kiñaja raꞌajika nañathé. Ilé ke ijló riká, eꞌiyonaja nupaꞌajiko majó wakajé, apala unká nuphátalaje kaphí Tupana chojé péchuruna. Inaꞌuké iꞌimakáloje nupalamane penaje iꞌimaká nuká”, ke rimaká najló.
Iyamá inaꞌukena puraꞌakó Tupana waꞌaté yukuna marí
9 Marí ke neꞌiyajena inaꞌuké pechu nanakuwá: “Ajopana chaje palá iꞌimakaño weká, eyá ajopana wejápuruna ta neká”, ke napechu nanakuwá.
Ñakele Jesús iꞌimari najló marí yuku, raú rewíñaꞌatakaloje neká Tupana nakú:
10 “Iyamá inaꞌukena iꞌijichaño Tupana ñakaré chojé Tupana waꞌaté puraꞌajó. Pajluwa iꞌimichari fariséona nakiyana, eyá apú iꞌimichari liñeru ñaꞌajeri neꞌemakánajlo.
11 Riká fariseo puriꞌicharo rijwaꞌaté marí ke: ‘Tupana, palá pilaꞌaká nuká. Re neꞌiyajena unká wani inaꞌukélaruna; re kaja piroꞌokéjina; re kaja kalúyuna nakú kawílaꞌajeño. Unká neká kaje kalé nuká, raú pilaꞌá nunaku palá. Unká kaja kele táraꞌaro, liñeru ñaꞌajeri weꞌemakánajlo, ke kalé nuká.
12 Nuká iꞌitarono noꞌojné liyá iyaampeno ke pajluwaja jápakaje japi, pipechu iꞌimakáloje nunákuja palá raú. Liñeru nukánakare aú nulaꞌá marí ke: Iyamá théꞌela (10) keta nukánakachu, noꞌono pijló rinakiyana pajluwátano ke’, ke ripuriꞌichako Tupana waꞌaté.
13 “Eyá liñeru ñaꞌajeri neꞌemakánajlo táriꞌicharo juká pani ajopana awaꞌayá. Riwó liꞌicharo jeꞌechú chojé yakáꞌakano piyá. Ritujliꞌichá rikó peꞌekuya, ujwí ripechu iꞌimichákale rinakuwá. E marí ke rimíchaka Tupánajlo: ‘Tupana, piweꞌepí numuꞌují. Puꞌuwaré laꞌajerí wani nuká, unká inaꞌukélari kaja nuká’, ke rimíchaka rijló”, ke rimaká najló.
14 Rejomi Jesús kemari piño najló: “Liñeru ñaꞌajeri neꞌemakánajlo paꞌaró palá riñakaré chojé, palá Tupana pechu iꞌimakale rinaku. Eyá apú, fariséona nakiyana, nakú unká Tupana pechu iꞌimalá palá. Unká paala rijló, iná pechu iꞌimakachu iná nakuwá: ‘Nuká cháꞌatari ajopana’, ke, Tupánajlo iná iꞌimá ajopana jaꞌapejé ke. Iná pechu iꞌimakachu iná nakuwá: ‘Ajopana cháꞌataño nuká’, ke, rijló iná iꞌimá ajopana chaje ke”, ke Jesús kemaká najló.
Jesús puraꞌakó palá yuwaná nakú yukuna marí
15 Neꞌiyajena wáꞌaño yuwaná Jesús ejo, ritoꞌotákaloje riyátheꞌela nanakojé, ripuraꞌakóloje Tupana waꞌaté nanaku palá. Raꞌapiyatéjena amaka aú nawáꞌaka neká rejo, nawíyoꞌo najló richá, nawáꞌaka piyá richaje neká.
16 Eꞌiyonaja Jesús wáꞌari yuwanajlo neꞌejnakáloje richaje penaje. Rimá raꞌapiyatéjenajlo:
—Reja yuwaná iꞌijnareja nuchaje, awíyoꞌoniña najló richá. Yuwaná ke iꞌimakaño iꞌimaño Tupana waꞌatéjena, nawakáraꞌajeri riꞌimakale.
17 Iweꞌepí marí: Unká méñoꞌojo inaꞌuké iꞌimalajla Tupana waꞌatéjena, unkachu napechu iꞌimalá yuwaná pechu ke kaja rinaku. Yuwaná wátaño Tupana nañathé aꞌajerí penaje. Unká wátala riká riñathé aꞌajerí penaje, unká méñoꞌojo iꞌimalaje rijwaꞌatéjena nakiyana rimujlúkaꞌakaloje jeꞌechú chojé penaje —ke rimaká najló.
Kajrú leꞌejepelari puraꞌakó Jesús waꞌaté yukuna marí
18 Pajluwaja nawakáraꞌajeño nakiyana kemari Jesusjlo:
—Wewíñaꞌatajeri, palá laꞌajerí piká. ¿Na chi nulaꞌajla nuꞌumakáloje ripalamane Tupana waꞌaté matajnako jeꞌechú chu?
San Lucas 18.18-43
—¿Naje pimá nunaku: “Palá laꞌajerí”, ke? Tupánaja kalé, pajluwaja, palá laꞌajerí.
20 Kaja piweꞌepí naka riwakáraꞌa iná laꞌaká: “Pinóniña inaꞌuké; pilaꞌaniña kaja pimanáicho apaꞌawelo waꞌaté, apaꞌawelo waꞌaté ke; pataꞌaniña kaja; pipajlániña kaja apú nakú mapeja, raú nalaꞌakáloje chapú riká; piphá kaja pichiꞌiná jaꞌapí palá”.
21 E rimá Jesusjlo:
—Nujyuwako eyá maárejecha nulaꞌá piyukeja ilé pimíchaka ke.
22 Ilé ke rimaká aú, Jesús kemari rijló:
—Re joꞌó kaja nakaje yuriro pijló pilaꞌakáloje penaje. Eko paꞌatá piyuke pinane riwemí aú, rejomi paꞌakáloje raú kamuꞌují laꞌakaño ñathé. Ilé ke pilaꞌajika ee, kajrú nakaje iꞌimajika palá pijló jeꞌechú chu. Rejomi pipaꞌajó piño majó piꞌimakáloje nujwaꞌateje penaje.
23 Ilé ke Jesús kemaká rijló aú, kamuꞌují wani ripechu laꞌakó. Unká raꞌalá rinakojó ripurákaꞌalo, kajrú leꞌejepelari riꞌimakale.
24 Jesús amaka kamuꞌují ripechu iꞌimaká aú, rimá ajopánajlo:
—Puwichani wani kajrú leꞌejepelárunajlo nachó yuríkana Tupánajlo riꞌimakáloje nawakáraꞌajeri penaje.
25 Puwichani caméllonajlo luwirí aphú ñani chuwá jaꞌapákana. Richaje puwichaka kajrú leꞌejepelárunajlo nachó yuríkana iꞌimajika Tupánajlo riꞌimakáloje nawakáraꞌajeri penaje. a
26 Raú ripurákaꞌalo jemaꞌajeño kemaño:
—¿Mékajena chi kaꞌajná Tupana iꞌimataje rijluwa kapichákajo liyá?
27 E Jesús kemari najló:
—Unká méñoꞌojo inaꞌuké iꞌimatala nekó kapichákajo liyá. Tupánaja kalé iꞌimatájerijla neká, riweꞌepíkale piyuke nakaje laꞌakana.
28 E Pedro kemari rijló:
—Wawakáraꞌajeri, weká yuriño piyukeja wanane iꞌimaká weꞌejnakáloje pijwaꞌaté penaje.
29 Jesús kemari rijló:
—Nalaꞌakáloje nuwakáraꞌaka ke penaje neꞌiyajena yuriño nañakaré kaꞌajná. Neꞌiyajena unká kaja wáꞌakalo. Nayurí kaja nejena kaꞌajná, nachiꞌiná kaꞌajná, nateꞌeré kaꞌajná, kaje. Neꞌejnañáa kaja kaꞌajná nayani kaja ñapákaño.
30 Palá wani nakaje iꞌimajika ilé ke laꞌakáñojlo. Kajrú kaja Tupana aꞌajika nañathé nakaje laꞌakana aú marí ejaꞌawá chu. Kaja penaje nakaje iꞌimajé palá wani najló, Tupana waꞌaté neꞌemajíkale jeꞌechú chu matajnako —ke rimaká najló.
Jesús iꞌimaká piño najló ritakaꞌajika yukuna marí
31 Jesús wáꞌari raꞌapiyatéjena juká pani ajopana liyá. E rimá najló:
—Chuwa weꞌejichaka Jerusalén ejo. Rejo nalaꞌajé nuká chapú Tupana purákaꞌalo jaꞌapátajeño michuna lanaꞌaká nuyukuna iꞌimaká ke. Inaꞌuké iꞌimakáloje nupalamane penaje iꞌimaká nuká.
32 Re naꞌajé nuká ajopana teꞌeré eyájena, unká judíona kalejlo. Neká laꞌajeño namákaja nuká; napuraꞌajó nunaku puꞌuwaré; nathupaje kaja nuká;
33 kajrú nañaꞌatájika nuká. Rejomi nenoje nuká, eꞌiyonaja kalé weji ke kala iꞌimajemi numakápoꞌojo piño nopumí chuwá —ke rimaká najló rinakuwá.
34 Eꞌiyonaja unká raꞌapiyatéjena weꞌepila meke kemakánaka nakaje rimakare nakú najló iꞌimaká. Meꞌechú riꞌimaká najló, unká riphala napechu nakojé.
Jesús jaꞌapátaka pajluwaja mejlurú liyá mejlukaji yukuna marí
35 E kaja Jesús iphari pajimila Jericó ejé. Re iñeꞌepú turená pajluwaja inaꞌuké yáꞌaro liñeru kejáꞌakana nakú ajopana inaꞌukena liyá. Mejlurú wani riꞌimaká.
36 E remaꞌá kajrú inaꞌukena jaꞌapaka rawaꞌayá iñeꞌepú chuwá mejé, raú rimá najló:
—¿Naje chi inaꞌuké jaꞌapá maárowa kajrú wani?
37 Raú nemá rijló:
—Jesús, Nazaret eyaje, jaꞌapari marí iñeꞌepú chuwá.
38 Raú rawíyoꞌoko riwáꞌaka rijló:
—Jesús, David michú lakemi, piweꞌepí numuꞌují.
39 Jesús tukumá jaꞌapákaño akhaꞌañó riká:
—¡Pimanúmaꞌo ta!
Eꞌiyonaja richaje wani rawíyoꞌoka:
—David michú lakemi, piweꞌepí numuꞌují.
40 Raú Jesús tajnaro rejé. Rimá najló nawáꞌakaloje riká rawaꞌajé. Riphaka rinaku ee, rimá rijló:
41 —¿Meke piwátaka nulaꞌaká piká?
Mejlurú kemari rijló:
—Wawakáraꞌajeri, paꞌapata nuliyá mejlukaji, nomachi piño.
42 Jesús kemari rijló:
—Piyakaꞌo chuwa. Kaja noꞌopátiya piliyá mejlukaji, pipechu iꞌimichákale kaphí nochojé noꞌopátakaloje piliyá riká.
43 Rejéchami mejlurú penájemi amaka palá, raú riꞌijná Jesús waꞌaté. Palá ripuraꞌakó Tupana nakú. Ñaké kaja piyukeja Jesús waꞌaté chiraꞌakaño puraꞌakó Tupana nakú palá.