Inaꞌuké kupaka piyá naluna yukuna marí
10
E kaja Jesús jáchoꞌoro Cafarnaúm eyá, ají ke Judea teꞌeré ejo, iphari juni Jordán paꞌanajo pitá. Rejé kajrú inaꞌukena awakako piño rinakojé. Richape rewíñaꞌata piño neká.
San Marcos 10.1-31
2 Fariséona nakiyana iphaño kaja rinaku rejé. Mapeja nawátaka yuku kejáꞌakana riliyá, nemaꞌakáloje mékeka rimaká najló, raú nemá rijló:
—¿E palani Tupánajlo iná yajalo yuríkana mapeja, iná wátaka kéchami?
3 Rimá najló:
—¿Meke chi Moisés michú kemaká rinaku iꞌimaká?
4 Nemá rijló:
—Riká michú kemari: iná yurijla iná yajalo, iná aꞌakachu rojló purákaꞌaloji lanaꞌakéjami. Richu iná kemá na pachaka iná yurika ruká, rejomi iná yurijla ruká.
5 Rimá najló:
—Riwakajé ijnú wani nemaꞌaká Tupana jaꞌapiyá iꞌimaká, akuwaná nawátake naluna yuríkana. Raú Moisés yurí najló rinakojé nayuríkaloje naluna penaje.
6 Tupana keñoꞌótaka ejaꞌawá iꞌimaká wakajé, rikeñoꞌota achiñá, inanaru waꞌaté iꞌimaká.
7 Ñakele achiñá wáꞌakako ejomi, ranúkaꞌo richiꞌiná liyá riꞌimakáloje riyajalo waꞌaté.
8 Unká iyamá inaꞌukena ke kalé wáꞌakajeñomi. Pajluwa japi keja neká pajwaꞌatéchaka.
9 Ilé ke neꞌemakale, unká paala nayurika pekowáaka. Kaja Tupana laꞌá neꞌemaká, neꞌemakáloje pajluwa japi keja pajwaꞌatéchaka —ke rimaká najló.
10 E namujlúkaꞌa pají chojé. Re raꞌapiyatéjena kemaño rijló:
—¿Meke kemakana chi kele pimíchaje nakú wajló wajé?
11 Rimá najló:
—Pajluwa kaꞌajná yuríkachu riyajalo, riwáꞌakakoloje apaꞌawelo waꞌaté rulanakiya penaje, laꞌarí rimanáicho raú. Apaꞌawelo waꞌaté laꞌakana keja Tupánajlo riká.
12 Ñaké kaja apú lanakiya kaꞌajná, riyajalo yuríkachu ruyajná, laꞌayó kaja rumanáicho raú. Apú waꞌaté laꞌakana keja Tupánajlo riká —ke Jesús kemaká najló.
Jesús puraꞌakó palá yuwaná nakú yukuna marí
13 Neꞌiyajena wáꞌaño yuwaná Jesús ejo, ritoꞌotákaloje riyátheꞌela nanakojé, ripuraꞌakóloje Tupana waꞌaté nanaku palá. Eꞌiyonaja raꞌapiyatéjena awíyoꞌoño najló richá, nawáꞌaka piyá richaje neká.
14 Raú Jesús yúchaꞌaro nachá, rimá najló:
—Reja yuwaná iꞌijnareja nuchaje, awíyoꞌoniña najló richá. Yuwaná ke iꞌimakaño iꞌimaño Tupana waꞌatéjena, nawakáraꞌajeri riꞌimakale.
15 Iweꞌepí marí: unká méñoꞌojo inaꞌuké iꞌimalajla Tupana waꞌatéjena, unkachu napechu iꞌimalá yuwaná pechu ke kaja rinaku. Yuwaná wátaño Tupana nañathé aꞌajerí penaje. Unká wátala Tupana riñathé aꞌajerí penaje, unká méñoꞌojo iꞌimalajla rijwaꞌatéjena nakiyana, rimujlúkaꞌakaloje jeꞌechú chojé penaje —ke rimaká najló.
16 E kaja riwaꞌa yuwaná pajluwano ke rituꞌuwejo. E ritoꞌotá riyátheꞌela nanakojé. Ripuraꞌó Tupana waꞌaté nanaku rilaꞌakáloje neká palá penaje.
Kajrú leꞌejepelari puraꞌakó Jesús waꞌaté yukuna marí
17 Jesús jaꞌapaka reyá eꞌiyowá ke, pajluwa iphaka jechoꞌokelo rinaku. Riká táraꞌaro riꞌirúpachi aú rijimaje, rimá rijló:
—Wewíñaꞌatajeri, palá laꞌajerí piká. ¿Na chi nulaꞌajla nuꞌumakáloje ripalamane Tupana waꞌaté matajnako jeꞌechú chu?
18 Jesús kemari rijló:
—¿Naje chi pimá nunaku: “Palá laꞌajerí”, ke? Tupánaja kalé, pajluwaja, palá laꞌajerí.
19 Kaja piweꞌepí naka Tupana wakáraꞌaka iná laꞌaká: “Pinóniña inaꞌuké; pilaꞌaniña kaja pimanáicho apaꞌawelo waꞌaté; pataꞌaniña kaja; pipajlániña kaja apú nakú mapeja, raú nalaꞌakáloje chapú riká; piphá kaja pichiꞌiná jaꞌapí palá”, ke.
20 E rimá Jesusjlo:
—Wewíñaꞌatajeri, nujyuwako eyá maárejecha nulaꞌá piyukeja ilé pimíchaka ke.
21 Raú Jesús yakáꞌaro richaje, íkiꞌija riwátaka riká. E rimá piño rijló:
—Re joꞌó kaja nakaje yuriro pijló pilaꞌakáloje penaje. Eko paꞌatá piyuke pinane riwemí aú, rejomi paꞌakáloje raú kamuꞌují laꞌakaño ñathé. Ilé ke pilaꞌajika ee, kajrú nakaje iꞌimajika palá pijló jeꞌechú chu. Rejomi pipaꞌajó piño majó, piꞌimakáloje nujwaꞌateje penaje.
22 Ilé ke Jesús kemaká rijló aú, ripaꞌó reyá. Kamuꞌují wani ripechu laꞌakó. Unká raꞌalá rinakojó ripurákaꞌalo, kajrú leꞌejepelari riꞌimakale.
23 Jesús yakáꞌaro riyámojo raꞌapiyatéjena chaje, rimá najló:
—Puwichani wani kajrú leꞌejepelárunajlo nachó yuríkana iꞌimajika Tupánajlo, riꞌimakáloje nawakáraꞌajeri penaje.
24 Ilé ke rimaká najló aú, neꞌejnatá napéchuwa nakaje rimakare najló nakú, raú rimá piño najló:
—Nujwákeꞌena, re neꞌiyajena pechu kaphí naleꞌejépela chojé, raú puwichani najló nachó yuríkana iꞌimajika Tupánajlo, riꞌimakáloje nawakáraꞌajeri penaje.
25 Puwichani caméllonajlo luwirí aphú ñani chuwá jaꞌapákana. Richaje puwichaka kajrú leꞌejepelárunajlo nachó yuríkana iꞌimajika Tupánajlo, riꞌimakáloje nawakáraꞌajeri penaje. a
26 Ilé ke rimaká najló aú, nemá pajlokaka:
—¿Mékajena chi kaꞌajná Tupana iꞌimataje rijluwa kapichákajo liyá?
27 Raú Jesús yakáꞌaro nachaje, rimá najló:
—Unká méñoꞌojo inaꞌuké iꞌimatálaje nekó kapichákajo liyá. Tupánaja kalé iꞌimatájerijla neká, riweꞌepíkale piyukeja nakaje laꞌakana.
28 E Pedro kemari Jesusjlo:
—Wawakáraꞌajeri, weká yuriño piyukeja wanane iꞌimaká weꞌejnakáloje pijwaꞌaté penaje.
29 Jesús kemari najló:
—Nalaꞌakáloje nuwakáraꞌaka neká ke penaje neꞌiyajena yuriño nañakaré kaꞌajná, nejena kaꞌajná, nachiꞌiná kaꞌajná, nateꞌeré kaꞌajná. Neꞌejnañáa kaja kaꞌajná nayani kaja ñapákaño. Ilé kaje nayurí nayámojo, neꞌemakáloje nupurákaꞌalo yukuna ajopánajlo.
30 Palá wani nakaje iꞌimajika ilé ke laꞌakáñojlo; kajrú kaja Tupana aꞌajika nañathé nakaje laꞌakana aú marí ejaꞌawá chu. Nañakaré, nejena, eyá nateꞌeré nayuríkare iꞌimaká, chaje palaka nakaje iꞌimajika najló. Ajopana kaꞌajná laꞌajeño neká chapú nupurákaꞌalo jimaje. Kaja penaje nakaje iꞌimajé palá wani najló, Tupana waꞌaté neꞌemajíkale jeꞌechú chu matajnako.
31 Re kajrú inaꞌukena, meꞌetení iꞌimakaño, pechu nanakuwá: “Ajopana chaje Tupana laꞌajika wanaku palá”, ke. Eꞌiyonaja unká ñaké kalé riꞌimajika najló, ajopana jaꞌapejé wani rilaꞌajíkale nanaku palá. Re kaja kajrú inaꞌukena, meꞌetení iꞌimakaño, pechu nanakuwá: “Ajopana jaꞌapejé kaꞌajná Tupana laꞌajika wanaku palá”, ke. Ilé ke péchuruna nanakuwajlo, unká ñaké kalé riꞌimajika, ajopana chaje wani rilaꞌajíkale nanaku palá —ke Jesús kemaká najló.
Jesús iꞌimaká piño najló ritakaꞌajika yukuna marí
32 Jesús jaꞌapari raꞌapiyatéjena waꞌaté ají ke Jerusalén ejo. Riká iꞌijnatari nekó. Kajrú raꞌapiyatéjena iꞌijnataka napéchuwa nakaje rimakare najló nakú. Ajopana, nápumichu jaꞌapákaño, iꞌimaño keroꞌokajo nakú. E Jesús wáꞌari iyamá iphata jiꞌimaji nakojé (12) kele raꞌapiyatéjena aꞌajná ñoꞌojó pani ajopana liyá, riꞌimakáloje najló mékeka inaꞌukena nakiyana laꞌajika riká chapú yukuna.
San Marcos 10.32-52
33 Rimá najló: “Chuwa weꞌejichaka Jerusalén ejo. Re sacerdótena wakáraꞌajeño, eyá Tupana purákaꞌalo nakú jewíñaꞌatajeño, kélejlo naꞌajé nuká nenókaloje nuká penaje. Rejomi naꞌajé nuká ajopana teꞌeré eyájena, unká judíona kalejlo.
34 Neká laꞌajeño namákaja nuká; nañaꞌataje nuká; nathupaje nunakojé; rejomi nenoje nuká. Eꞌiyonaja kalé weji ke kala iꞌimajemi numakápoꞌojo piño nopumí chuwá”, ke rimaká najló rinakuwá.
Santiago, Juan, kele kejáꞌaka nakaje Jesús liyá yukuna marí
35 Raꞌapiyatéjena nakiyana iꞌimaño Santiago, eyá Juan. Zebedeo yaní neꞌemaká. Neká iꞌijnaño Jesús awaꞌajé rijló kemaje:
—Wewíñaꞌatajeri, wawata pilaꞌaká wajló nakaje.
36 Rimá najló:
—¿Na chi iwata nulaꞌaká ijló?
37 Nemá rijló:
—Piꞌimajika inaꞌuké wakáraꞌajeri wakajé, wawata piyurika wayáꞌako pawaꞌá. Pajluwaja piyureje yáꞌako pawaꞌá kaꞌañá chojó pitá, eyá apú pajrú chojó pitá.
38 Raú rimá najló:
—Unká iweꞌepila naka kele ikejaꞌa nuliyá. Chapú wani nalaꞌajika nuká. ¿E chi ijñaꞌakajla panaku riká ñaké, nalaꞌakela iká chapú?
39 Raú nemá:
—Aꞌa, wajñaꞌakárejla riká panaku.
Rimá piño najló:
—Kewaka joꞌó. Nalaꞌajé kaja iká chapú, nalaꞌajika nuká ke kaja.
40 Eꞌiyonaja kalé unká nuká kalé aꞌajeri inaꞌuké, nayáꞌakoloje nowaꞌá nukaꞌañare ejo pitá kaꞌajná, eyá nupajrure ejo pitá kaꞌajná. Tupana aꞌajeri neká, rikaja kalé weꞌepíkale mékajenaka yáꞌajiko nowaꞌá —ke rimaká najló.
41 Ajopana, iyamá théꞌela kele (10) raꞌapiyatéjena kaja iꞌimakaño, jemaꞌañó mékeka nemaká rijló. Raú nayúchaꞌo Santiago, Juan waꞌaté cha.
42 E Jesús kemari najló nawakákoloje rawaꞌajé, rimá najló:
—Kaja iweꞌepí palá ajopana teꞌeré eyájena wakáraꞌajeño nakojé. Najwaꞌatéjena minaná keja neká najwaꞌaté. Kaphí wani nachaje wakáraꞌakaño wakáraꞌaka najwaꞌatéjena.
43 Eyá ijló, unká ñaké kalé riꞌimajika. Iwata kaꞌajná inakiyana chaje iꞌimakana. Aꞌajeri inakiyana ñathé, cháꞌatajeri iká piyukeja.
44 Iwata kaꞌajná inakiyana chaje iꞌimakana. Laꞌajeri rinakuwá inakiyana waꞌaté jápajeri ke, iꞌimajeri ajopana chaje.
45 Inaꞌuké iꞌimakáloje nupalamane penaje iꞌimaká nuká. Unká nuphala majó inaꞌuké laꞌakáloje nojló nakaje penaje. Nulaꞌakáloje najló nakaje penaje nuꞌujná majó. Noꞌojé nokó kajrú inaꞌukena chaya penaje, neꞌemakóloje kapichákajo liyá raú —ke rimaká najló.
Jesús jaꞌapátaka mejlukaji Bartimeo liyá yukuna marí
46 Iñeꞌepú chuwá naꞌapá pajimila Jericó eꞌiyowá. Jesús jaꞌapiyatéjena, kajrú ajopana waꞌaté, jaꞌapaño kaja rijwaꞌaté. Náchoꞌoko pajimila eyá ee, nephata pajluwa inaꞌuké. Rií iꞌimari Bartimeo, Timeo iꞌirí riꞌimaká. Mejlurú wani riꞌimaká. Re riyaꞌo iñeꞌepú turená liñeru kejáꞌakana nakú ajopana inaꞌukena liyá.
47 Remaꞌaká aú nemaká: “Jesús jaꞌapari iñeꞌepú chuwá”, ke, rawíyoꞌoko rimaká:
—¡Jesús, David michú lakemi, piweꞌepí numuꞌují!
48 Raú chaꞌapá re iꞌimakaño nakiyana akhaꞌañó riká, nemá rijló:
—Pimanúmaꞌo ta.
Eꞌiyonaja richaje wani rawíyoꞌoka:
—¡Jesús, David michú lakemi, piweꞌepí numuꞌují!
49 Raú Jesús tajnaro rejé, rimá:
—Majó iwáꞌicha riká.
Raú neꞌejná Bartimeo wáꞌaje, nemá rijló:
—Pilaꞌá kaphí pipéchuwa, páchoꞌo. Rimicha piꞌijnakáloje rejo.
—¿Meke piwátaka nulaꞌaká piká?
—Wewíñaꞌatajeri, paꞌapata nuliyá mejlukaji, nomachi piño.
52 Jesús kemari rijló:
—Chuwa piꞌijná. Kaja mejlukaji jaꞌapicha piliyá, pipechu iꞌimakale kaphí nochojé.
Richuwaja mejlukaji jaꞌapaka riliyá, e riꞌijná Jesús waꞌaté rápumichu.