Jesús iphaka Jerusalén ejo yukuna marí
11
E kaja nephá Jerusalén awaꞌajé, pajimila Betfagé, eyá Betania, kele awaꞌayá naꞌapá, iphaño yenuri Olivos jaꞌapejé. Rejéchami Jesús wakáraꞌaka iyamá raꞌapiyatéjena nakiyana iꞌijnaká pajimila ejo, rimá najló:
San Marcos 11.1-14
2 —Jaꞌapá pajimila ejo watukumá. Iphájikaja rejo ee, amaje burrito, unká joꞌó wani na jaꞌapálare nakú, táraꞌako aꞌakeja rimukú ke. Eko ikarákaꞌa riká iwáꞌakaloje riká majó.
3 Nemájika ee ijló: “¿Naje chi ikarákaꞌa riká?”, ke, imaje najló: “Wawakáraꞌajeri wátari riká meketánaja, rejomi wapaꞌataje piño riká rapumí chuwá”, ke.
4 E kaja neꞌejná ají ke pajimila ejo. Jesús kemaká najló keja nephátaka riká. Re ritáraꞌo pajimila numaná awaꞌá, iñeꞌepú punúmakana. Nephaka rejé ee, nakarákaꞌa riká.
5 Rawaꞌá lapaꞌakaño amaka aú nakarákaꞌaka riká, nemá najló:
—¿Meke chi ilaꞌaká riká, kele? ¿Naje chi ikarákaꞌa riká?
6 Raú nemá najló Jesús wakáraꞌaka nemaká najló ke, raú nayurí najló riká.
7 E nawaꞌa riká Jesús ejo. Nephátaka rinaku riká ee, nayúmaꞌa naꞌarumaká nakiyana burrito wajlé chojé. E Jesús jáchoꞌoro riwajlé chojé yáꞌajo raꞌapákaloje rinaku ají ke iñeꞌepú chuwá.
8 Kajrú inaꞌukena iꞌimaká re. Neká ayúmaꞌaño kaja naꞌarumaká nakiyana raꞌapaka ewá. Eyá ajopana mataꞌañó wejirí wirulá paná, nakaꞌakáloje riká iñeꞌepú chojé ripé penaje, palá ramákoloje penaje.
9 Ritukumá jaꞌapákaño, eyá rápumichu chiraꞌakaño, awíyoꞌoño kajrú. Nawíyoꞌoko nemaká Jesús nakú:
—¡Wephákare wani jaꞌapí, Tupana! ¡Wapuraꞌachó palá riká, Tupana wakáraꞌakare majó weꞌematájeri penaje, nakú!
10 ¡Palá wani riwakáraꞌaka weká. David michú wakáraꞌajika waꞌajútaya michuna iꞌimajika, ke kaja riwakáraꞌaka weká! ¡Wephákare wani jaꞌapí, Tupana! —ke nawíyoꞌoka.
11 Ilé ke Jesús iphaka Jerusalén eꞌiyajé. E rimujlúkaꞌa Tupana ñakaré chojé. Ripalamata piyuke nakaje re iꞌimakare richu. Kaja najúwaꞌa, raú riꞌijná ají ke Betania ejo raꞌapiyatéjena waꞌaté.
Jesús yerúkaꞌaka paijí higuera chaje yukuna marí
12 Muní ke náchoꞌoko Betania eyá, napaꞌakóloje piño Jerusalén ejo. Iñeꞌepú chu kewí Jesusjlo meꞌepijí iꞌimaká.
13 E ramá aꞌajnare ke paijí higuera táraꞌako, raú riꞌijná rejo richa kulaje ripaná eꞌiyowá. Riphaka raꞌapejé ee, ramá mecharú riꞌimaká, ripánaja kalé iꞌimari kajrú rinaku. Unká joꞌó riphala rarúkaꞌaka jená chojé.
14 E rimá rinaku:
—Maáreya watukumá, unká na ñaꞌalaje pichá iꞌimajika.
Raꞌapiyatéjena jemaꞌañó mékeka rimaká rinaku.
Jesús jaꞌapaka nanaku Tupana ñakaré chiyá yukuna marí
15 Nephá piño Jerusalén ejo. E rimujlúkaꞌa Tupana ñakaré chojé, e rikeñoꞌó richu iꞌimakaño nakú jaꞌapákana. Nakaje aꞌajeño riwemí aú, eyá nakaje warúwaꞌajeño, neká kajena nakú raꞌapá richiyá piyuke. Liñeru apiyákajeño mesané ripajnoꞌotá; túkuꞌuchina pirakana aꞌajeño ñákaꞌaru ripajnoꞌotá kaja.
San Marcos 11.15-33
16 Rejomi unká riyurila najñaꞌaká najwaꞌató nakaje Tupana ñakaré chojé.
17 E rewíñaꞌata neká meke Tupana kemaká riñakaré nakú iꞌimaká, rimá najló:
—Tupana purákaꞌalo lanaꞌakéjami kemari: “Re nuñakaré piyukeja inaꞌuké puraꞌakóloje nujwaꞌaté richu penaje”. Eꞌiyonaja apichata riká, aꞌakale nakaje ajopánajlo richu riwemí aú. Richuwaja jataꞌano pekowáaka. Jataꞌajeño ñakaré, ke wani ilaꞌaká ijluwa riká —ke rimaká najló.
18 Eyá sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, jemaꞌañó Jesús jaꞌapaka nanaku yukuna. Raú neꞌejnatá napéchuwa naweꞌepíkaloje meke laꞌajémika nenókajla riká. Nawata rinókana, eꞌiyonaja nakeroꞌó ajopana piyá, kaja piyuke inaꞌuké pechu iꞌimajíkale puꞌují rinaku, rewíñaꞌatajikale neká palá wani.
19 E kaja najúwaꞌa, raú Jesús jáchoꞌoro piño pajimila eyá.
Nephátaka paijí higuera kuwichílami yukuna marí
20 Muní ke lapiyami naꞌapá piño paijí higuera awaꞌayá, amaño kaja kuwichila rínami iꞌimaká piyuke raꞌapare waꞌató.
21 Riká awaꞌayá naꞌapá. Rejéchami riphaka Pedro pechu nakojé lalemi ke Jesús yerúkaꞌaka richaje, raú rimá rijló:
—Wewíñaꞌatajeri, pamá higuera piyerúkaꞌakare chaje, kaja kuwichila riká.
22 Jesús kemari najló:
—Palá Tupana laꞌaká nakaje kaphí richojé péchurunajlo.
23 Jemaꞌá marí: Iná kemakela marí ipurejlo: “Páchoꞌo, pikojnoꞌó juni jalomi jakojé”, ke, ñaké riꞌimakajla, kaphí Tupana chojé péchuruna kemakela ñaké. Unkachu iná pechu iꞌimalá kaphí Tupana chojé, iná kemajla kaꞌajná: “Unká riꞌimalaje ñaké”, ke. E ñakeja riꞌimajika.
24 Ñakele numá ijló: Piyukeja nakaje ikejáꞌajikare Tupana liyá, rijwaꞌaté puraꞌakano kewá, raꞌajé ijló riká, ipechu iꞌimajika ee kaphí richojé
25 Tupana waꞌaté ipuraꞌakó aú, amó inaꞌuké chaje chapú nalaꞌakare iká liyá. Raú ñaké kaja jaraꞌapá, jeꞌechú chu iꞌimakare, amájiko ichaje puꞌuwaré ilaꞌakare liyá.
26 Unkachu amalo apú chaje chapú rilaꞌakare iká liyá, unká kaja jaraꞌapá, jeꞌechú chu iꞌimakare, amálajo ichaje puꞌuwaré ilaꞌakare liyá —ke rimaká najló.
Nakejaꞌa Jesús liyá riyukuna na purákaꞌalo aú ka rilaꞌá nakaje. Riyukuna marí
27 E kaja napaꞌó piño Jerusalén ejo. E Jesús mujlúkaꞌari piño Tupana ñakaré chojé. Rejéchami sacerdótena wakáraꞌajeño, eyá Tupana purákaꞌalo nakú jewíñaꞌatajeño, pheñawilana waꞌaté, awakako rinakojé.
28 Nemá rijló:
—¿Na purákaꞌalo aú chi pilaꞌá nakaje? ¿Na chi wakáraꞌari pilaꞌaká ñaké?
29 Rimá najló:
—Nukejáꞌaje kaja iliyá nakaje yukuna. Aꞌajipajika ee nojló palá riká, numaje kaja ijló naka nuwakáraꞌajeri.
30 Rimá piño najló:
—¿Na wakáraꞌari Juan michú laꞌaká bautizar inaꞌuké iꞌimaká: Tupana kaꞌajná, inaꞌuké kaꞌajná?
31 Raú napuraꞌó pajwaꞌatéchaka nekámika ke, nemá pajlokaka:
—Wemájika ee rijló: “Tupana wakáraꞌari riꞌimaká”, ke, rimaje kaꞌajná wajló: “Eta, ¿naje kalé ta unká jemaꞌalá raꞌapiyá iꞌimaká?”
32 Eyá wemájika ee kaꞌajná rijló: “Inaꞌuké purákaꞌalo aú”, ke, e mariruna yúchaꞌajeño kaꞌajná wachá raú.
Raú nakeroꞌó ilé ke rijló kemakana piyá, ajopana pechu iꞌimakale Juan michú nakú: “Tupana purákaꞌalo jaꞌapátajeri riꞌimaká”, ke.
33 Raú nemá rijló:
—Kaapí, unká waweꞌepila na purákaꞌalo aú ka rilaꞌaké bautizar inaꞌuké.
Jesús kemari najló:
—Ñakele unká kaja numalaje ijló naka wakáraꞌari nulaꞌaká nakaje.