Jesús jewíñaꞌataka juni kajmú jalá amúraꞌatakanami penaje yukuna marí
2
1-2 Rejomi iyamá kala jaꞌapari, eyá weji ke kala laꞌaká wakajé Jesús iꞌimari pajimila Caná e. Galilea teꞌeré nakú riká pajimila. Re riꞌimaká ee, nayukupéraꞌa riká, raꞌapiyatéjena waꞌaté, neꞌejnakáloje nawáꞌakako amaje. Raló María iꞌimayo kaja najwaꞌaté re.
3 Reꞌiyowá ke neꞌerakala tajnáñaaka neká, raú Jesús jaló kemayo rijló:
—Nuꞌurí, kaja neꞌerakala tajicho.
4 Rimá rojló:
—Amí, ¿naje chi piꞌimá nojló riyukuna? Unká joꞌó wani nakaje laꞌakana jená iphala nojló.
El milagro en Caná (Juan 2.1-12)
5 Eꞌiyonaja rumá pají chiyá jápajeñojlo:
—Eko ilaꞌá piyukeja nakaje rimájika ijló ke.
6 Pajluwa kuwáꞌata kaꞌalá naleꞌejé iꞌichí iꞌimari re. Jipa nakiyá laꞌakanami riꞌimaká. Judíona lamáꞌatajika napéchuwa puꞌuwaré nalaꞌakare liyá wakajé, nakhoꞌoké juni richojé. Pajlúwaꞌala iꞌichí ñaꞌakeri juni cincuenta litros ewá, eyá apaꞌalá setenta litros ewá kaꞌajná.
7 Rejéchami Jesús kemaká pají chiyá jápajeñojlo:
—Chuwa imanoꞌotá kele iꞌichí puꞌutheno waja juni aú.
—Chuwa jamoꞌó richiyá wejápaja rinakiyana, rejomi aꞌachá riká wayukupéraꞌajerijlo.
Raú namoꞌó rinakiyana neꞌejnatákaloje rijló riká.
9 E nayukupéraꞌajeri atáꞌari juni jewíñaꞌatakanami, iꞌirakaje amúraꞌatakanami (vino) penaje. Palani wani riꞌimaká rijló, unká riweꞌepila mere eyaka najñaꞌaká riꞌimaká. Pají chiyá jápajeñoja kalé weꞌepiño mékeka riꞌimaká, namoꞌokale juni iꞌimaká. Riꞌirá rinakiyana wejápaja, rejomi riwaꞌa ruꞌuwapanipé maná.
10 Rimá rijló:
—Piyuke inaꞌuké aꞌañó paineko palá nojé iꞌirakaje nayukupéraꞌakarenajlo. Riká tajnako ejomi, naꞌá najló mapeja raꞌapichalami kajeja, eyá piká aꞌarí kaja penaje patá nojé wani.
11 Ilé ke Jesús keñoꞌoká nakaje laꞌakana Tupánaja kalé weꞌepíkare laꞌakana Galilea teꞌeré nakú, pajimila Caná e. Riwakajé rikeñoꞌó nakaje laꞌakana ilé ke, raú naweꞌepí piyuke weꞌepika riꞌimaká. Raú kaja raꞌapiyatéjena weꞌepiño Tupana wakáraꞌakare majó riꞌimaká.
12 Ilé ke rilaꞌaká ejomi, riꞌijná ají ke pajimila Cafarnaúm ejo raló, rejena, raꞌapiyatéjena, kele waꞌaté. Re neꞌemá meke kálaja.
Jesús jaꞌapaka Tupana ñakaré chu iꞌimakaño nakú yukuna marí
13 Yewicha naleꞌejé fiesta Pascua iphaka rená chojé, raú Jesús iꞌijnari Jerusalén ejo,
Jesús en el patio del templo (Juan 2.13-25)
14 iphari Tupana ñakaré chojé. Re ramá richu iꞌimakaño aꞌaká rejo iphákañojlo pirájina nawemí aú, nakánakaloje ñaké liñeru najluwa penaje. Jémana pirakana, ovéjana, túkuꞌuchina pirakana, kaje maká naꞌá. Ramá kaja re liñeru apiyákajeño yáꞌako liñeru apiyákakana nakú inaꞌukejlo.
15 Ilé ke ramaka neꞌemaká re aú, rijñaꞌá nañaꞌatájona penaje tupajuma nakiyá. Rejomi raꞌapá nanaku piyuke Tupana ñakaré chiyá. Raꞌapá kaja napirana, jémana pirakana, ovéjana, kajena nakú. Piyuke re iꞌimakaño nakú raꞌapá. Rejomi riꞌijná liñeru apiyákajeño ejo. Rikaꞌá piyuke naliñérute naliyá teꞌerí eꞌiyajé. Rejomi ripajnoꞌotá namesané.
16 Eyá túkuꞌuchina pirakana aꞌajéñojlo rimá:
—¡Imujlúkaꞌata neká piyukeja wakaꞌapojo! ¡Ilaꞌaniña Noraꞌapá ñakaré leꞌejepelaji ñakarelana penaje!
17 Raꞌapiyatéjena amaño mékeka raꞌapaka nanaku Tupana ñakaré chiyá. Raú riphá napechu nakojé mékeka Tupana purákaꞌalo lanaꞌakéjami kemaká rinaku iꞌimaká: “Íkiꞌi nuwátaka inaꞌuké iphaka Tupana ñakaré jaꞌapí”, ke.
18 E meketana iꞌimajemi, judíona nakiyana kemaño Jesusjlo:
—¿Na chi aꞌarí piká wawakáraꞌajeri penaje, pilaꞌakáloje weká ilé ke wani?
19 Rimá najló:
—Ikajyaꞌatá marí Tupana ñakaré, eyá weji ke kala iꞌimajemi nóchoꞌotaje piño riká rapumí chuwá.
20 Raú nemá rijló:
—Cuarenta y seis jarechí ketana najápaka rilaꞌakana nakú iꞌimaká, eta, ¿piká chi jáchoꞌotarijla riká weji ke kala iꞌimajémija?
21 Rinapona nakú Jesús kemá najló “Tupana ñakaré”, ke. Riwakajé unká naweꞌepila meke kemakánaka riꞌimaká.
22 Ritakaꞌaká ejomi, rimakápoꞌo piño iꞌimaká, rejéchami raꞌapiyatéjena weꞌepika mékeka rimaká rinakuwá iꞌimaká. Raú riwakajé nalaꞌá kewaka ke piyuke Tupana purákaꞌalo lanaꞌakéjami. Ñaké kaja nalaꞌaká kewaka ke Jesús purákaꞌalo, rimájikare nakú najló iꞌimajika.
Palá Jesús weꞌepika inaꞌuké pechu yukuna marí
23 Naleꞌejé fiesta Pascua wakajé, Jesús iꞌimari Jerusalén e. Kajrú inaꞌukena jemaꞌajika raꞌapiyá, namájikale rilaꞌaká kajrú nakaje Tupánaja kalé weꞌepíkare laꞌakana.
24 Eꞌiyonaja Jesús weꞌepiri unká raꞌapiyá jemaꞌajeño wani penájena kalé neꞌemaká, riweꞌepíkale mékeka inaꞌuké pechu nakú nakaje.
25 Unká meke laꞌajé na kemalajla rijló ajopana nakú: “Marí ke laꞌajeñó neká”, ke, riweꞌepíkale piyukeja pechu palá.