Jesús puraꞌakó Nicodemo waꞌaté yukuna marí
3
Pajluwaja inaꞌuké iꞌimari, rií iꞌimari Nicodemo. Fariséona nakiyana riꞌimaká; judíona nakiyana wakáraꞌajeri riꞌimaká.
2 Riká iꞌijnari Jesús chaje lapí. Riphaka rinaku ee, rimá rijló:
—Wewíñaꞌatajeri, waweꞌepí Tupana wakáraꞌaka majó piká, pewíñaꞌatakaloje weká penaje. Kajrú kaja pilaꞌaká nakaje Tupánaja kalé weꞌepíkare laꞌakana. Unká meke laꞌajé iná laꞌalá nakaje pilaꞌaká ke, unkachu Tupana aꞌalá iná ñathé rilaꞌakana aú. Nakaje, pilaꞌakare palá wani aú, waweꞌepí re Tupana pijwaꞌaté.
Jesus habla con Nicodemo (Juan 3.1-21)
3 E Jesús kemari rijló:
—Pemaꞌá marí: Unkájika ee iná mothoꞌó piño wajé ke, unká meke laꞌajé iná iꞌimalaje Tupana waꞌatéjena nakiyana.
4 Raú Nicodemo kemari:
—Eta, ¿meke laꞌajé chi iná mothoꞌojla piño, ñaké kaja phíyuꞌuke iná? Unká meke laꞌajé kalé iná paꞌojla piño iná jaló wo chojé, iná mothoꞌokáloje piño.
5 Jesús kemari rijló:
—Pemaꞌá marí: Unkájika ee iná mothoꞌó piño wajé ke Tupana Pechu aú, unká meke laꞌajé iná iꞌimalaje Tupana waꞌatéjena nakiyana. Rijwaꞌaté iꞌimakaño wakáraꞌajeri riká.
6 Inaꞌuké yaní mothoꞌoñó, raú neká keja kaja neká inaꞌuké. Eyá Tupana Pechu aú mothoꞌokaño, Tupana yaní kaja neká.
7 Pipechu kechíraꞌaniño pijló numíchaka aú inaꞌuké nakú, namothoꞌokáloje piño wajé, ke.
8 Riwátaka ejo karená aphoꞌó. Iná jemaꞌá rimejé, eꞌiyonaja unká iná weꞌepila mere eyaka rikeñoꞌótako. Unká kaja iná weꞌepila méñoꞌojoka raꞌapaka. Ñaké kaja Tupana Pechu, aꞌarí wajé iꞌimakaje inaꞌukejlo, unká kaja iná amala riká.
9 Nicodemo kemari piño rijló:
—¿Meke chi kele pimá nakú nojló?
10 Raú Jesús kemari rijló:
—Kajrú pewíñaꞌataka Israel lakénami, ¿eꞌiyonaja chi unká piweꞌepila meke kemakánaka nakaje numakare nakú pijló?
11 Pemaꞌá, palá nuꞌumaká riyukuna pijló: Nuká, Tupana waꞌaté, weꞌepiño palá nakaje wapuraꞌakaro nakojé. Nakaje wamákare nakú wapuraꞌó ijwaꞌaté, eꞌiyonaja unká inakiyana wátala raꞌakana nanakojó.
12 Nakaje, marí ejaꞌawá chu iꞌimakare, nakú nupuraꞌó kaja ijwaꞌaté, eꞌiyonaja unká jemaꞌalá noꞌopiyá riká. Eta, ¿meke laꞌajé chi jemaꞌajla noꞌopiyá, nuꞌumakela ijló nakaje, jeꞌechú chu iꞌimakare, yukuna?
13 Unká na jáchoꞌolo jeꞌechú chojé iꞌimaká; nukaja kalé witúkaꞌari reyá majó, nuká iꞌimakeri rewá. Inaꞌuké iꞌimakáloje nupalamane penaje iꞌimaká nuká.
14 Jesús kemari piño rijló:
—Júpimi Moisés michú iꞌimaká wakajé, ritáraꞌata aꞌawaná yaꞌajná desierto eꞌiyá iꞌimaká. Rinakojé ripatoꞌotá jeí jenami, pejruꞌuwá kaje nakiyá laꞌakanami. Ñaké kaja natáraꞌatajika piño aphela aꞌawaná. Rinakojé nephaje nuká, re nutakaꞌakáloje inaꞌukena chaya penaje,
15 raú piyuke kaphí nochojé péchuruna iꞌimakáloje matajnako jeꞌechú chu.
16 Íkiꞌija wani Tupana wátaka inaꞌuké, ñakele riwakáraꞌa Riꞌirí majó ejaꞌawá nakojé iꞌimaká. Pajluwaja Riꞌirí. Kaphí iná pechu iꞌimakachu richojé, riꞌimatá iná kapichákajo liyá raú iná iꞌimakáloje matajnako rijwaꞌaté jeꞌechú chu.
17 Unká Tupana wakáraꞌala Riꞌirí majó ejaꞌawá nakojé riwajákaloje inaꞌuké penaje. Riwakáraꞌa riꞌimaká riꞌimatákaloje neká Tupánajlo kapichákajo liyá.
18 Kaphí iná pechu iꞌimakachu Tupana iꞌirí chojé, unká Tupana wajálaje iná. Eyá unká pechu iꞌimalaje kaphí richojé riwajaje, unká pachá rilaꞌalá kewaka ke nakaje rimakare Riꞌirí nakú.
19 Unká jemaꞌalaño Jesucristo jaꞌapiyá Tupana wajaje, unká pachá nawátala Riká neꞌematájeri penaje. Puꞌuwaré laꞌajeñó neꞌemakale, unká nawátala kewákaje purákaꞌaloji nakú puraꞌajero, puꞌuwaré laꞌakaná nakuja nawátakale iꞌimakana.
20 Puꞌuwaré laꞌajeñó unká wani wátalaño kewákaje purákaꞌaloji. Unká kaja nawátala remaꞌakana, puꞌuwaré nalaꞌakare iꞌimaká piyá najló puꞌuwaká.
21 Eyá palá laꞌajeñó wátaño kewákaje purákaꞌaloji jemaꞌakana. Nawata raꞌapiyá iꞌimakana, raú Tupana aꞌakáloje nañathé nakaje nalaꞌakare aú, raú ajopana amákaloje mékeka nalaꞌaká palá wani raꞌapiyá jemaꞌakana aú —ke Jesús kemaká Nicodémojlo.
Mékeka Juan el Bautista kemaká piño Jesucristo nakú yukuna marí
22 Apú wakajé Jesús iꞌijnari piño raꞌapiyatéjena waꞌaté ají ke Judea teꞌeré ejo. Re raꞌapiyatéjena laꞌañó bautizar inaꞌuké.
Juan testifica acerca de Jesús (Juan 3.22-36)
23 Naꞌapona ke Juan laꞌaká bautizar inaꞌuké Enón e, pajimila Salim awaꞌá. Rewá rilaꞌaké bautizar neká, kajrú juni iꞌimajíkale re. Kajrú inaꞌukena iꞌijnajika richaje rilaꞌakáloje neká bautizar.
24 Ilé kaje laꞌakana nakú Juan iꞌimaké rewá, unká chiyó nakaꞌá riꞌimaká inaꞌuké wajákelana chojé.
25 E Juan jaꞌapiyatéjena nakiyana akhaꞌákaño judíona nakiyana waꞌaté, apoꞌojó napechu iꞌimakale bautismo nakú.
26 Ilé kaje aú neꞌejná riyukuna iꞌimajé Juanjlo, nemá rijló:
—Wewíñaꞌatajeri, Jordán paꞌanajo pitá weꞌemaká wakajé, pajluwaja inaꞌuké iphari pinaku iꞌimaká. Rinaku pimá wajló na inaꞌukeka riꞌimaká. Chuwa riká penájemi wakáraꞌari raꞌapiyatéjena laꞌaká bautizar inaꞌuké. Kajrú neꞌejnaká richaje nalaꞌakáloje bautizar neká penaje.
27 Raú Juan kemari najló:
—Unká na laꞌalajla palá nakaje rikoja, unkachu Tupana aꞌalá riñathé.
28 Kaja jemaꞌá mékeka numaká ijló palá nunakuwá iꞌimaká. Numá ijló iꞌimaká: Unká nuká kalé Tupana wakáraꞌakare majó inaꞌuké iꞌimatájeri penaje. Ritukumaja kalé Tupana wakáraꞌa nuꞌujnaká riyukuna iꞌimajé inaꞌukejlo, ke numaká ijló iꞌimaká.
29 Nawáꞌakako wakajé, pajluwaja achiñaja wáꞌakaro riꞌiwapaniperu waꞌaté. Eyá patarí riká, jemaꞌarí palá nakaje ripuraꞌakaro nakú rujwaꞌaté, raú puꞌují ripechu laꞌakó. Ñaké kaja nupechu laꞌakó puꞌují meꞌetení, kajrú inaꞌukena iꞌimakale Jesucristo waꞌaté.
30 Nuweꞌepí weꞌechú kaꞌalá keja kajrú inaꞌukena aꞌajika nuchaje nanakojó riká, lanakiya namaje nuká mapéjari keja —ke Juan kemaká najló.
Jesucristo iphaka jeꞌechú chiyá majó yukuna marí
31 Piyukeja inaꞌukena chaje wani riká, iphari jeꞌechú chiyá majó iꞌimaká. Rijlunami chojé mapéjaruna keja marí ejaꞌawá chu iꞌimakaño. Neká puraꞌañó marí ejaꞌawá chu iꞌimakana nakuja, eyá jeꞌechú chiyá iphaka majó, puraꞌaró nakaje ramákare nakú Tupana iꞌimaká e.
32 Nakaje ramákare rewá, eyá remaꞌakare rewá, nakú ripuraꞌó wajwaꞌaté, eꞌiyonaja unká wani na wátala raꞌapiyá jemaꞌakana.
33 Jemaꞌarí ripurákaꞌalo jaꞌapiyá, kemari Tupana purákaꞌalo nakú: “Kewákaje riká”, ke.
34 Riká, Tupana wakáraꞌakare majó, puraꞌaró Ripurákaꞌalo nakú inaꞌuké waꞌaté, Tupana Pechu jaꞌapiyá wani ripuraꞌakole.
35 Íkiꞌija wani Tupana wátaka Riꞌirí. Raꞌá riká piyuke nakaje wakáraꞌajeri penaje.
36 Iná pechu iꞌimajika ee kaphí Tupana iꞌirí chojé, iná iꞌimajé matajnako rijwaꞌaté jeꞌechú chu. Eyá unkájika ee iná jemaꞌá Tupana iꞌirí jaꞌapiyá, unká raꞌalaje inajlo kajmuchaji, raú unká kaja iná iꞌimalaje matajnako jeꞌechú chu. Unká pachá iná jemaꞌalá raꞌapiyá, chapú wani Tupana wajájika iná.