Jesús iphaka Jerusalén ejo yukuna marí
21
1-2 E kaja nephá Jerusalén awaꞌajé, pajimila Betfagé ejé. Yenuri Olivos awaꞌá riká. Jesús wakáraꞌari iyamá raꞌapiyatéjena:
—Jaꞌapá pajimila ejo watukumá. Iphájikaja rejo ee, amaje burra, ruꞌurí waꞌaté. Namukú chu neꞌemajé. Eko ikarákaꞌa ruká iwáꞌakaloje ruká, ruꞌurí waꞌaté, majó.
3 Nemájika ee ijló: “¿Naje chi ikarákaꞌa neká?”, ke, imaje najló: “Wawakáraꞌajeri wátari neká meketánaja, rejomi wapaꞌataje piño neká napumí chuwá”, ke.
4 Rimaká najló keja nephátaka neká. Tupana purákaꞌalo jaꞌapátajeri michú kemaká rinaku keja riꞌimaká. Ripiyá rilanaꞌá marí ke riyukuna iꞌimaká:
5 “Imá pajimila Jerusalén eyájenajlo marí ke:
‘Iyakaꞌo, iwakáraꞌajeri waícha pajimila eꞌiyajé mapéjari keja.
Burro iꞌirí nakú raꞌapá.
Kachini ñaꞌajeri iꞌirí nakú raꞌapá’ ”,
ke rilanaꞌaká riyukuna júpimi iꞌimaká.
6 E kaja raꞌapiyatéjena iꞌijnaño Jesús kemaká najló ke laꞌajé.
7 Nawaꞌa burra, ruꞌurí waꞌaté, Jesús ejo. E nayúmaꞌa naꞌarumaká nakiyana riwajlé chojé. E kaja Jesús jáchoꞌoro riwajlé chojé yáꞌajo.
8 Kajrú inaꞌukena iꞌimaká re. Neká ayúmaꞌaño kaja naꞌarumaká nakiyana raꞌapaka ewá. Palá napechu iꞌimakale Jesús nakú, nalaꞌá ilé ke. Ajopana mataꞌañó wejirí paná kaje, nakaꞌakáloje riká iñeꞌepú chojé, palá ramákoloje raú penaje.
9 Ritukumá jaꞌapákaño, eyá rápumichu jaꞌapákaño, awíyoꞌoño kajrú. Marí ke nemaká nawíyoꞌoko rinaku:
—¡Wephákare wani jaꞌapí, David michú lakemi! ¡Wapuraꞌachó palá riká, Tupana wakáraꞌakare majó inaꞌuké iꞌimatájeri penaje, nakú! ¡Wephákare wani jaꞌapí, Tupana! —ke nawíyoꞌoka.
10 Ilé ke Jesús iphaka Jerusalén eꞌiyajé, raú kajrú inaꞌukena awakako richaje yakáꞌajo. Nemá:
—¿Na chi kele?
11 —Jesús, Tupana purákaꞌalo jaꞌapátajeri riká. Pajimila Nazaret, Galilea teꞌeré nakú iꞌimakare, eyaje riká.
Jesús jaꞌapaka Tupana ñakaré chu iꞌimakaño nakú yukuna marí
12 Rejomi Jesús mujlúkaꞌari Tupana ñakaré chojé, amari kajrú inaꞌukena iꞌimaká richu. E rikeñoꞌó nanaku jaꞌapákana. Nakaje aꞌajeño riwemí aú, eyá nakaje warúwaꞌajeño, neká kajena nakú raꞌapá richiyá piyuke. Liñeru apiyákajeño mesané ripajnoꞌotá; túkuꞌuchina pirakana aꞌajeño ñákaꞌaru ripajnoꞌotá kaja.
13 Rimá najló:
—Tupana purákaꞌalo lanaꞌakéjami kemari: “Re nuñakaré piyukeja inaꞌuké puraꞌakóloje nujwaꞌaté richu penaje”. Eꞌiyonaja apichata riká, aꞌakale nakaje ajopánajlo richu riwemí aú. Richuwaja jataꞌano pekowáaka. Jataꞌajeño ñakaré ke wani ilaꞌaká ijluwa riká —ke Jesús kemaká najló.
14 Tupana ñakaré chu ajopana iꞌijnaño rawaꞌajé. Neꞌiyajena iꞌimaño mejluruna, ajopana unká jaꞌapálaño palá. Raꞌapata mejluruna liyá mejlukaji; ritejmoꞌota kaja unká jaꞌapálaño.
15 Eyá sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, amaño rilaꞌaká kajrú nakaje Tupánaja kalé weꞌepíkare laꞌakana. Nemaꞌá kaja yuwaná awíyoꞌoka Tupana ñakaré chu. Marí ke nemaká Jesús nakú: “Wephákare wani jaꞌapí piká, Tupana wakáraꞌakare majó inaꞌuké iꞌimatájeri penaje”, ke. Ilé kaje aú nayúchaꞌo.
16 E nemá Jesusjlo:
—¿E pemaꞌaká mékeka nemaká pinaku?
—Aꞌa, nomaꞌá. ¿Unká chi iweꞌepila mékeka Tupana purákaꞌalo lanaꞌakéjami kemaká? Rimá:
“Yuwaná kapajareruna,
puraꞌajeño palá wani Tupana nakú”, ke.
17 E raꞌapáñaa neká, iꞌijnari ají ke pajimila Betania ejo. Rejé rajúwaꞌa, re rikamato.
Jesús yerúkaꞌaka paijí higuera chaje yukuna marí
18 Muní ke lapiyami Jesús paꞌaró piño Jerusalén ejo. Rapunana chu kewí rijló meꞌepijí iꞌimaká.
19 Iñeꞌepú awaꞌá aꞌajnare ke, ramá paijí higuera táraꞌako. Raú riꞌijná rejo richa kulaje, amari mecharú riꞌimaká. Ripánaja kalé iꞌimá rinaku, raú rimá rinaku:
—Kaja keja piꞌimajika mecharú.
Ilé ke rimaká rinaku aú, riyuró kuwichila ke.
20 Ilé ke raꞌapiyatéjena amaka aú, napechu iꞌimá: “¡Meke piyuke wani rilaꞌalaka!” E nemá Jesusjlo:
—¿Meke laꞌajé chi riyuricho kuwichila ke kiñaja wani?
21 Jesús kemari najló:
—Jemaꞌá marí: Kaphí ipechu iꞌimajika ee Tupana chojé, ilaꞌajé kaja nakaje nuliꞌichaka paijí higuera nakú ke. Unkájika ee ipechu iꞌimá kaphí Tupana chojé, imajla kaꞌajná: “Unká riꞌimalaje ñaké”, ke. Raú ñaké riꞌimakajla. Richaje puwicha nojé ilaꞌajé nakaje, ipechu iꞌimajika ee Tupana chojé kaphí. Imakela marí ipurejlo: “Páchoꞌo, pikojnoꞌó juni jalomi jakojé”, ke, ñaké riꞌimakajla.
22 Piyukeja nakaje ikejáꞌajikare Tupana liyá rijwaꞌaté puraꞌakano kewá, raꞌajé ijló riká, ipechu iꞌimajika ee kaphí richojé —ke Jesús kemaká najló.
Nawata weꞌepíkana naka wakáraꞌari Jesús iꞌimaká. Riyukuna marí
23 E kaja Jesús mujlúkaꞌari piño Tupana ñakaré chojé. Re rewíñaꞌata inaꞌuké Tupana nakú. E sacerdótena wakáraꞌajeño, pheñawilana waꞌaté, iphaño rinaku. Nemá rijló:
—¿Na purákaꞌalo aú chi pilaꞌá nakaje? ¿Na chi wakáraꞌari pilaꞌaká ñaké?
24 Jesús kemari najló:
—Nukejáꞌaje kaja iliyá nakaje yukuna. Aꞌajipajika ee nojló palá riká, numaje kaja ijló naka nuwakáraꞌajeri.
25 Rimá piño najló:
—¿Na wakáraꞌari Juan michú laꞌaká bautizar inaꞌuké iꞌimaká: Tupana kaꞌajná, inaꞌuké kaꞌajná?
Raú napuraꞌó pajwaꞌatéchaka nekámika ke, nemá pajlokaka:
—Wemájika ee rijló: “Tupana wakáraꞌari riꞌimaká”, ke, rimaje kaꞌajná wajló: “Eta, ¿naje kalé ta unká jemaꞌalá raꞌapiyá iꞌimaká?”
26 Eyá wemájika ee kaꞌajná rijló: “Inaꞌuké purákaꞌalo aú”, ke, e mariruna yúchaꞌajeño wachá raú. Napiyá wakeroꞌó, napechu iꞌimakale Juan nakú: “Tupana purákaꞌalo jaꞌapátajeri riꞌimaká”.
27 Raú nemá Jesusjlo:
—Kaapí, unká waweꞌepila na purákaꞌalo aú ka rilaꞌaké bautizar inaꞌuké.
Jesús kemari najló:
—Ñakele unká kaja numalaje ijló naka wakáraꞌari nulaꞌaká nakaje.
Nemaꞌakáloje Tupana jaꞌapiyá penaje Jesús iꞌimari najló marí yuku
28 Jesús kemari najló:
—¿Meke ijló marí yuku? Pajluwa inaꞌuké iꞌimichari. Riyani iꞌimichaño iyamá. Rimicha pajlúwajlo: “Nuꞌurí, chuwa pijápicha wamena eꞌiyá”.
29 “Unká”, ke rimíchaka rijló. Júpichami riꞌijnatiya ripéchuwa: “¿Naje chi numicha rijló unká, ke, maapami?” Raú riꞌijichá jápaje.
30 E raraꞌapá iꞌijichari piño apú riꞌirijlo kemaje: “Chuwa pijápicha wamena eꞌiyá”. “Je”, ke rimíchaka rijló, eꞌiyonaja unká riꞌijnalacha jápaje.
31 Ilé ke Jesús iꞌimaká najló yuku. Rejomi rimá najló:
—¿Mékaje chi laꞌarí raraꞌapá wátaka ke?
Nemá rijló:
—Paineko riwakáraꞌakare.
Raú Jesús kemari najló:
—Jemaꞌá marí: Ñaké kaja unká inaꞌukélaruna, liñeru ñaꞌajeño nawakáraꞌajeñojlo, eyá inaana namanáicho laꞌajeñó, kele cháꞌataka iká, nemaꞌakale palá Tupana purákaꞌalo jaꞌapiyá, neꞌemakáloje rijwaꞌatéjena penaje.
32 Juan el Bautista jewíñaꞌatari iká palá laꞌakaná nakú iꞌimaká, eꞌiyonaja unká jemaꞌalá raꞌapiyá. Eyá unká inaꞌukélaruna, liñeru ñaꞌajeño nawakáraꞌajeñojlo, inaana namanáicho laꞌajeñó, kele jemaꞌañó raꞌapiyá iꞌimaká. Ilé ke amaka iꞌimaká, eꞌiyonaja unká ipajnoꞌotala ipéchuwa puꞌuwaré ilaꞌakare liyá Tupana ejo jemaꞌakáloje raꞌapiyá penaje —ke rimaká najló.
Jesús iꞌimari yuku naweꞌepíkaloje raú mékeka nalaꞌajika riká chapú. Riyukuna marí
33 Jesús kemari najló: “Jemaꞌá marí yuku: Pajluwaja inaꞌuké ejátiyari kajmú kaje icha ijí riꞌikakapere eꞌiyowá. Rejomi richipúkaꞌatiya kurara tujlá ke rinakuwá. Riliꞌichá kaja ralá apákaꞌaruna. Rejomi riliꞌichá rikaꞌapó yenoje, richiyá riwaꞌaphena amákaloje riká palá penaje. E riyuricha rijwaꞌaté jápajeño nakiyánajlo riꞌikakapere e, namákaloje rijló riká. Riꞌijichaka yámona, rimicha najló: ‘Chuwa nuꞌujichaka, eko amá palá nojló riká. Kajmú kaje icha nakiyana noꞌojé ijló ramákana wemí’. E riꞌijichá yaꞌajnaje reyá. Júpija riꞌimichaka rewá.
34 “E kaja waja kajmú icha ñaꞌakana iphicha rená chojé, raú paminá wakáriꞌicha rijwaꞌaté jápajeño iꞌijnaká richa ñaꞌajé rijló.
35 Raú neꞌejichá rejo, iphíchaño rimena amájeño nakú. Nephíchaka nanaku ee, napatiya neká. Pajluwa nañaꞌatiya, apú nenocha, eyá apú neꞌekatiya riwilá jipa aú.
36 Raú paminá wakáriꞌichari ajopana rijwaꞌaté jápajeño rejo, apú wakajé chaje íkiꞌirunaka neꞌemichaka. Ñaké kaja rimena amájeño liꞌichaka neká chapú.
37 “Raú riwakáriꞌicha kaja penaje riꞌirí wani rejo, ripechu iꞌimichákale: ‘Nuꞌurí riká, raú nephaje raꞌapí’.
38 Eꞌiyonaja rimena amájeño amíchaka aú riká waíchaka, nemicha pajlokaka: ‘Ilé riꞌirí ta waícha, kélejlo riyureje rimena piyuke. Iꞌijná wenótachi riká ta, rimenami yuríkoloje wajló’.
39 E kaja riphicha nanaku. E napatiya riká, nawáꞌicha riká rimena yámojo, rejé nenocha riká”, ke Jesús iꞌimaká najló riyukuna.
40 Rejomi rimá najló:
—¿Meke ipechu nakú paminá laꞌajika keleruna, rimena amájeño, riphájika nanaku wakajé?
41 Nemá rijló:
—Rinótaje neká, unká inaꞌukélaruna neꞌemaká pachá. Unká wani riweꞌepílaje namuꞌují. E riyureje ajopánajlo rimena namákaloje riká penaje. Neká aꞌajeño rijló palá richa riphájika rená chojé wakajé kewá.
42 Jesús kemari piño najló:
—Kaja iweꞌepí mékeka Tupana purákaꞌalo kemaká marí ke:
“Pajluwaja inaꞌuké iꞌimajeri.
Neꞌiyajena kemájeño rinaku: ‘Unká inaꞌukélari riká’, ke.
Eꞌiyonaja ajopana chaje riꞌimajika,
ilé kaje penaje Tupana aꞌajíkale riká.
Palani waja nakaje Tupana laꞌakare”, ke rimaká.
43 Ijló numá: Tupana jáchoꞌotajeri iká rijwaꞌatéjena, judíona nakiyana, raꞌakáloje apumí chojé ajopana teꞌeré eyájena rijwaꞌatéjena penaje. Ileruna laꞌajeño palá Tupana wátaka ke.
44 Chapú wani riꞌimajika unká wátalaño nukajlo. Kajrú wani namájika chapú kaje yajwé —ke Jesús kemaká najló.
45 Sacerdótena wakáraꞌajeño, fariséona waꞌaté, jemaꞌañó ripurákaꞌalo. Yúkuja riꞌimá najló, eꞌiyonaja naweꞌepí rimaká nanaku raú meke laꞌajeñoka neꞌemaká.
46 Ñakele nawata ripatakana nawajákaloje riká penaje, eꞌiyonaja nakeroꞌó ajopana inaꞌukena piyá, napechu iꞌimakale rinaku: “Tupana purákaꞌalo jaꞌapátajeri riká”, ke.