Jesús iꞌimaká najló nawáꞌakako yukuna marí
22
Jesús jewíñaꞌatari piño neká yuku kaje aú, rimá najló:
2 “Chuwa nuꞌumajika yuku ijló, raú iweꞌepíkaloje mékajenaka iꞌimajeño Tupana waꞌaté jeꞌechú chu: Pajluwa inaꞌuké iꞌimichari. Neꞌemakana riꞌimichaka. Riꞌirí wáꞌakichako wakajé riwakáriꞌicha rijwaꞌaté jápajeño laꞌaká kajrú aꞌajnejí.
3 Rejomi riwakáriꞌicha riyukupéraꞌakarena wáꞌaje. Raú neꞌejichá nawáꞌaje, eꞌiyonaja unká nawátalacha fiesta jaꞌapátakana rijwaꞌaté. Raú napiꞌichó riyukuna iꞌimajé rijló.
4 Kéchami riwakáriꞌichaka ajopana, rijwaꞌaté jápajeño nakiyana, iꞌijnaká piño riyukupéraꞌakarenajlo kemaje. Imá najló: ‘Kaja aꞌajnejí ñapicha. Kaja nenó jémana pirakana ñópoꞌojloruna nakiyana ajñákaloje neꞌimi penaje. Riꞌirí wáꞌakajero, ñakele riwata iꞌijnaká fiesta jaꞌapátaje rijwaꞌaté’, ke imájika najló.
“E neꞌejichá najló kemaje.
5 Eꞌiyonaja unká naꞌalacha napurákaꞌalo nanakojó. Pajluwa iꞌijichari rimena eꞌiyajé jápaje; apú iꞌijichari leꞌejepelaji aꞌajé.
6 Ajopana liꞌichaño chapú neꞌemakana waꞌaté jápajeño. Nenocha nakiyana.
7 Ilé kaje aú neꞌemakana yúchiꞌicharo kajrú, raú riwakáriꞌicha rileꞌejena suráana nakapichátaje. Riwakáriꞌicha kaja nakáraꞌataka pajimila nañakaré iꞌimakare eꞌiyá.
8 Ilé ke naliꞌichaka. E kaja rimicha rijwaꞌaté jápajeñojlo: ‘Chuwa nuꞌurí wáꞌakajiko, kaja lamáꞌatakeja ripé piyuke nakaje. Unká inaꞌukélaruna neká, nuyukupéraꞌakarena paineko iꞌimaká.
9 Ñakele chuwa iꞌijná mapeja iñeꞌepú chuwá pajimila eꞌiyowá. Imá piyukeja iphátajikarenajlo neꞌejnakáloje majó fiesta jaꞌapátaje nujwaꞌaté’.
10 Raú neꞌejichá pajimila eꞌiyowá, apú iñeꞌepú chuwá, apú iñeꞌepú chuwá ke inaꞌuké wáꞌaje. Raú nawakátiya neká palájneꞌekena, chapújneꞌekena waꞌaté, neꞌemakana ñakaré chojé. Kaja namanoꞌotiya riñakaré.
11 “E neꞌemakana iphicha rejé, amíchari pajluwaja najwaꞌaté. Puꞌuwareni raꞌarumaká iꞌimichaka.
12 Raú neꞌemakana kemíchari rijló: ‘¿Meke pimujlúkiꞌichaka majó mapeja puꞌuwareni paꞌarumaká waꞌaté. Fiesta wáꞌakakajo wakajé unká iná jaꞌapátala riká puꞌuwareni iná aꞌarumaká waꞌaté. ¿Meke pimujlúkiꞌichaka ta majó?’, ke rimíchaka rijló. Unká raꞌajipalacha rijló.
13 E neꞌemakana kemíchari aꞌajnejí tamákaꞌatajeñojlo: ‘Jepoꞌotá riká ta ritajné nakiyá, raꞌanapitá nakiyá waꞌaté, kéchami ikiꞌichaka riká wakaꞌapojo kalajerúwaka. Re inaꞌuké iyájeño kajrú. Kamachá najmaꞌajika naiwá re, namákale chapú kaje yajwé’, ke rimíchaka najló”, ke Jesús iꞌimaká yuku najló.
14 E rimá piño najló: “Kajrú Tupana yukupéraꞌaka inaꞌukena neꞌemakáloje rijwaꞌatéjena penaje, eꞌiyonaja nanakiyánaja kalé jemaꞌañó raꞌapiyá.”
Liñeru naꞌakare neꞌemakánajlo yukuna nakejáꞌaka Jesús liyá yukuna marí
15 E fariséona nakiyana puraꞌañó pajwaꞌatéchaka, nakulákatakoloje Jesús nakú, rijimaje nemakáloje rinaku: “Apoꞌojó wani ripechu wateꞌeré eyá wakáraꞌajeño liyá”, ke.
16 Raú nawakáraꞌa fariséona nakiyana, eyá Herodes waꞌatéjena nakiyana, kele iꞌijnaká Jesús chaje. Nemá rijló:
—Wewíñaꞌatajeri, waweꞌepí kewákaje nakaje pewíñaꞌatakare nakú. Nakaje Tupana wátakare iná laꞌaká, kaje nakú pewíñaꞌata inaꞌuké. Re wawakáraꞌajeño nakiyánajlo unká paala pipurákaꞌalo, eꞌiyonaja unká paꞌalá pinakojó napuraꞌakaro nakaje pewíñaꞌatakare nakú. Waweꞌepí unká napechu iꞌimakáloje palá pinaku penaje kalé pewíñaꞌatala neká.
17 Chuwa pimá wajló meke pipechu nakú liñeru nakejáꞌakare waliyá, naꞌakáloje riká weꞌemakana Césarjlo penaje. Romano nakiyana riká. ¿E chi palani liñeru aꞌakana rijló, unká kaꞌajná?
18 Jesús weꞌepiri mékeka napechu iꞌimaká rinaku, nawátakale rimaká najló apoꞌojó neꞌemakana liyá, nalaꞌakáloje raú riká chapú. Raú rimá najló:
—Pajlákachina iká. ¿Naje iwata numaká ijló ilé kaje nakú, rejomi imakáloje nunaku: “Apoꞌojó wani ripechu weꞌemakana liyá”, ke?
19 Iyaꞌatá nojló kele liñeru aꞌakare iꞌimakánajlo, nomachi.
—¿Na jenami chi kari liñeru nakú? ¿Na ií chi lanaꞌakéjami rinaku?
21 Nemá:
—Weꞌemakana César jenami rinaku. Rií kaja rinaku.
Raú rimá najló:
—Aꞌá iꞌimakánajlo nakaje rijló penaje iꞌimakare. Eyá Tupánajlo aꞌá kaja nakaje rijló penaje iꞌimakare.
22 Ilé ke rimaká najló aú, napechu iꞌimá: “¡Meke kapechú wani raꞌajipichaka wajló!”, ke. E naꞌapáñaa riká reyá.
Kaja takaꞌakaño makápoꞌojiko piño yukuna nakejaꞌa Jesús liyá. Riyukuna marí
23 Riwakajé saducéona nakiyana iꞌijnaño Jesús chaje. Neká kemakeño kaja takaꞌakaño nakú: “Unká namakápoꞌolajo piño”, ke. Raú nemá rijló:
24 —Wewíñaꞌatajeri, Moisés purákaꞌalomi chu kemari: “Pajluwa kaꞌajná takaꞌañáakachu riyajalo mayanikeru, palani reꞌewemi raꞌapiyajé wáꞌakakojla rujwaꞌaté, reꞌewé michú yanimínami yuríkoloje rapumí chojé ripalamane aú”, ke rimaká.
25 Ñaké riká. Maare pajluwaja inaꞌuké iꞌimari wajwaꞌaté. Iyamá kuwáꞌata kele neꞌemaká rejena waꞌaté, achiñana waja. Pheꞌejrí iꞌimaká wáꞌakaro paineko. Riká tajnáñaari ruká mayanikéruja.
26 Rejomi raꞌapejé iꞌimaká wáꞌakaro riyajálomi waꞌaté. Ñaké kaja rikapicháñaaka ruká mayanikeru kaja. Ají ke waja iyamá kuwáꞌata kele neꞌemaká wáꞌakako rujwaꞌaté iꞌimaká.
27 Neká piyukeja kapichaño ruliyá mayanikéruja. E kaja penaje nayajalo penájemiru kapichayo nápumichu.
28 Eta, Tupana makápoꞌotajika piño piyuke inaꞌukena kaja takaꞌakaño wakajé, ¿mékaje yajalo chi ruꞌumajika riwakajé? Iyamá kuwáꞌata kele achiñana yajálomi ruꞌumaká.
29 Raú Jesús kemari najló:
—Meke unká wani iweꞌepila rinakojé. Unká pachá iweꞌepila Tupana purákaꞌalo lanaꞌakéjami nakojé, raú unká kaja iweꞌepila nakaje rilaꞌakare nakojé.
30 Piyukeja kaja takaꞌakaño makápoꞌojiko piño wakajé, unká neꞌemalaje pajwaꞌatéchaka wáꞌakajeñomi ke. Unká kaja nawáꞌakalajo piño pajwaꞌatéchaka. Tupana waꞌatéjena, jeꞌechú chiyájena, ke waja neꞌemajika riwakajé.
31 Re kaja takaꞌakaño makápoꞌojiko piño yukuna Tupana purákaꞌalo lanaꞌakéjami, iweꞌepíkare nakojé, eꞌiyá. ¿Unká chi ipuraꞌaló rijwaꞌaté? Riká kemari:
32 “Nuká Tupana, Abraham, Isaac, Jacob, kele pechu iꞌimakare chojé kaphí. Unká méñoꞌojo kaja takaꞌakaño penájemina pechu iꞌimalá nochojé kaphí. Kajmuruna joꞌó iꞌimakáñoja kalé pechu iꞌimárijla kaphí nochojé”, ke Jesús kemaká najló naweꞌepíkaloje raú kewaka rijwaꞌatéjena kaja takaꞌakaño iꞌimaká kajmuruna jeꞌechú chu. a
33 Ilé ke Jesús kemaká najló aú, napechu iꞌimá: “¡Meke palá wani rewíñaꞌataka inaꞌuké!”
Nakaje Tupana wátaka iná laꞌaká apú nakaje chaje yukuna marí
34 Kaja fariséona jemaꞌañó Jesús manúmaꞌataka saducéona yukuna, raú nawakó nekámika ke.
35 E kaja pajluwaja Tupana purákaꞌalo nakú jewíñaꞌatajeri iphari Jesús nakú nakaje yukuna kejáꞌaje riliyá, remaꞌakáloje mékeka rimájika rijló apoꞌojó kaꞌajná, raú rimá rijló:
36 —Wewíñaꞌatajeri, Tupana purákaꞌalo lanaꞌakéjami wakáraꞌari iná laꞌaká kajrú nakaje. ¿Na riwata walaꞌaká apú rimakare nakú chaje wani?
37 Jesús kemari rijló:
—Piwata íkiꞌija wani piwakáraꞌajeri Tupana, pichiꞌinárikana riꞌimakale. Piꞌijnatá palá pipéchuwa rinaku. Pewíñaꞌo kaja nakaje nakú riꞌimakáloje palá Tupánajlo penaje. Pilaꞌá rijló piyukeja nakaje palá, íkiꞌija piwátakale riká.
38 Ilé kaje riwata iná laꞌaká apú nakaje riwakáraꞌakare iná laꞌaká chaje wani.
39 Eyá re kaja apú nakaje ñakeja kemachi Tupana wátakaja iná laꞌaká. Riká kemari: Piwata íkiꞌija piyukeja inaꞌuké, piwátaka pikó ke kaja.
40 Iná laꞌakachu ilé iyamá rimakare nakú aú, iná laꞌajla piyuke Tupana purákaꞌalo kemaká ke, waꞌaté Ripurákaꞌalo jaꞌapátajeño michuna kemakare nakú iꞌimaká, ke kaja —ke rimaká rijló.
Riká Tupana wakáraꞌakare inaꞌuké iꞌimatájeri penaje, yukuna marí
—¿Meke chi ipechu riká, Tupana wakáraꞌakare majó inaꞌuké iꞌimatájeri penaje, nakú? ¿Na lakénami nakiyana chi riká?
Nemá rijló:
—David michú lakénami nakiyana riká.
43 Jesús kemari najló:
—Tupana Pechu wakáraꞌaka ke David lanaꞌaká riyukuna iꞌimaká. Riká kemari rinaku: “Nuwakáraꞌajeri riká”, ke. Ñakele unká rilakénami nakiyana wani kalé riká. Marí ke rilanaꞌaká riyukuna iꞌimaká:
44 “Wawakáraꞌajeri wani Tupana kemari Nuwakáraꞌajeri nakú marí ke:
‘Palá wani nupechu pinaku.
Piꞌimá nawakáraꞌajeri nujwaꞌaté.
Maare piꞌimajé nowaꞌá aꞌajná nucháꞌatajika chapú pinaku péchuruna ejená’, ke rimaká”.
45 Jesús kemari piño najló:
—David kemari: “Nuwakáraꞌajeri riká”, Tupana wakáraꞌajikare inaꞌuké iꞌimatájeri penaje nakú. Ñakele unká rilakénami nakiyana wani kalé riká, nemaká rinaku ke —ke rimaká najló.
46 Unká naweꞌepila mékeka rapiyákakana raú. Reyá aꞌajná ñoꞌojó nawó laꞌaró raꞌapí nakaje yukuna kejáꞌakana riliyá nakú.