Jesús akhaꞌaká fariséona, eyá Tupana purákaꞌalo nakú jewíñaꞌatajeño, kele maná yukuna marí
23
Jesús kemari raꞌapiyatéjenajlo, ajopánajlo waꞌaté, marí ke:
2 “Tupana purákaꞌalo nakú jewíñaꞌatajeño, eyá fariséona, kele pechu nanakuwá: ‘Wekaja kalé weꞌepiño palá meke kemakánaka Tupana purákaꞌalo Moisés lanaꞌakare iꞌimaká nakojé’, ke napechu. Newíñaꞌata kaja iká rinaku.
3 Ñakele jemaꞌá napurákaꞌalo jaꞌapiyá, eꞌiyonaja ilaꞌaniña nalaꞌaká ke. Palá napuraꞌakó, eꞌiyonaja unká nalaꞌalá ñaké.
4 Nawakáraꞌa inaꞌuké laꞌaká nakaje puwicha nojé wani, eyá neká unká wani wátala ñaké laꞌakana.
5 Nalaꞌá nakaje, piyukeja inaꞌuké amákaloje neká penaje. Nachútaꞌa kaja napulá nakojé, eyá naꞌanapitá nakojé waꞌaté, Tupana purákaꞌalo lanaꞌakéjami nakiyana. Waphereni naꞌarumaká chu nachiraꞌó, ajopana amákaloje neká neꞌiyá penaje.
6 Najñákachu naꞌajnewá ajopana inaꞌukena waꞌaté, nawata nawakáraꞌajeño ñákaꞌaru chu yáꞌakano. Ajopana cháꞌatajeño ke nayáꞌako nawakákaꞌalo ñakarelana chu.
7 Nawata inaꞌuké iphaka naꞌapí; nawata kaja najalákaka neká palá. Nachiraꞌakó ewá nawata nemaká najló: ‘Wewíñaꞌatajeri’, ke.
8 “Iwátaniña inaꞌuké kemaká inaku: ‘Wewíñaꞌatajeri’, ke. Pajluwa yaní keja iká pajwaꞌatéchaka, raú pajluwaja kaja jewíñaꞌatajeri. Nukaja kalé jewíñaꞌatajeri wani.
9 Imaniña inaꞌuké marí teꞌerí nakú iꞌimakaño nakú: ‘Jaraꞌapaji’, ke. Re pajluwaja jaraꞌapá wani jeꞌechú chu.
10 Iwátaniña kaja ajopana kemaká inaku: ‘Wawakáraꞌajeño’, ke, nukaja kalé pajluwa iꞌimatájeri iꞌimajeri iwakáraꞌajeri wani.
11-12 Mapeja laꞌaká rinakuwá ajopana cháꞌatajeri ke, ajopana jaꞌapejé riká Tupánajlo. Eyá laꞌarí rikó mapeja ajopana ñathé aꞌajeri keja, cháꞌatajeri eꞌiyayá”, ke Jesús kemaká najló.
13 E rimá piño najló: “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. Mapeja wani ilaꞌaká inakuwá palá laꞌajeñó ke inaꞌuké ijlú chu, unká ñaké laꞌajeñó kalé iꞌimaká eꞌiyonaja. Iká jitaño kaja ajopana liyá Tupana jaꞌapiyá jemaꞌakana apu. Unká jemaꞌalá raꞌapiyá, eyá unká kaja iyurila ajopana inaꞌukena jemaꞌaká raꞌapiyá.
14 Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo, pajlákachina wani iꞌimakale. Mapeja ipajlaka iwakajílomina waꞌaté, ikaꞌakáloje naliyá nañakaré. Rejomi ipuraꞌó Tupana waꞌaté jupi, raú naweꞌepika piyá mapeja ipajlaka najwaꞌaté. Ilé ke ilaꞌaká pachá, ajopana chaje wani Tupana wajájika iká.
15 “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. Piyukeja teꞌeré nakuwá jaꞌapá. Jaꞌapá kaja juni jalomi chuwá ipurákaꞌalo yukuna iꞌimakana nakú, nemaꞌakáloje raꞌapiyá penaje. Eyá pajluwaja kaꞌajná jemaꞌakachu raꞌapiyá, chapú wani ilaꞌaká riká raú, ichaje wani ramájikale chapú kaje yajwé keraꞌathani unká yakálare chu.
16 “Chapú wani riꞌimajika ijló. Mejluruna ke iká. Kaja imá marí ke: ‘Iná kemakachu nakaje laꞌakana nakú Tupana ñakaré ií aꞌakana aú, unká meke riꞌimalá inajlo, unkachu iná laꞌalá iná kemaká ke’. Eyá iná kemakachu nakaje laꞌakana nakú: ‘Oro Tupana ñakaré chu iꞌimakare ií aꞌakana aú, unká wani paala iná laꞌaká, unkachu iná laꞌalá iná kemaká ke’.
17 ¡Meke mapechúruna wani iká! ¡Mejluruna ke wani iká! ¿Na chi ijló richaje wani: oro kaꞌajná, Tupana ñakaré kaꞌajná? Tupana ñakaré chu oro iꞌimakale, iweꞌepí rinakojé: ‘Richaje japi riká’, ke, eꞌiyonaja unká ñaké kalé riká.
18 Imá kaja: ‘Kemari kaꞌajná nakaje laꞌakana nakú altar ií aꞌakana aú, unkachu rilaꞌalá rimaká ke, unká meke riꞌimalaje rijló’. Eyá rimájika ee kaꞌajná nakaje laꞌakana nakú piraji nenókare altar nakojé ií aꞌakana aú, unká paala rilaꞌajika, unkájika ee rilaꞌá riká rimaká ke.
19 ¡Meke mapechúruna wani iká! ¿Na chi ijló richaje wani: piraji nenókare altar nakojé kaꞌajná, altar kaꞌajná? Altar nakojé natoꞌotákale piraji tami, riyuró Tupánajlo aꞌakanami ke.
20 Kemari nakaje laꞌakana nakú altar ií aꞌakana aú, unká kemalá altar ií nakuja kalé. Rimá kaja piraji natoꞌotákare richaje ií nakú.
21 Eyá kemari nakaje laꞌakana nakú Tupana ñakaré ií aꞌakana aú, unká Tupana ñakaré ií nakuja kalé rimá. Rimá kaja Tupana ií nakú, Tupana ñakaré riꞌimakale.
22 Eyá kemari kaꞌajná nakaje laꞌakana nakú jeꞌechú ií aꞌakana aú, kemari kaja Tupana ií nakú, richu riꞌimakale.
23 “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. ¡Pajlákachina wani iká! Palani iyuríkano Tupánajlo iyamá théꞌela kaꞌalá ipaijí icha nakiyá pajlúwaꞌala. Eꞌiyonaja unká wani aꞌalá inakojó Nupurákaꞌalo, apú chaje wani iꞌimakare, ilaꞌakáloje rimaká ke penaje, raú ilaꞌakáloje palá, iweꞌepíkaloje kaja ajopana inaꞌukena muꞌují, ilaꞌakáloje kaja rimaká ke penaje.
24 ¡Mapechúruna wani iká! Iká aꞌañó mapéjari purákaꞌaloji inakojó, eyá iná iꞌimakare wani palamane, unká aꞌalá inakojó.
25 “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. ¡Pajlákachina wani iká ta! Iká jipañono iꞌirakaꞌakú, eyá iparatune, kele wajlé chiyaja. Paineko ikaꞌá ipechu nakiyá puꞌuwaré laꞌakaná. Mapeja kaja ilaꞌaká inakuwá palá laꞌakaño ke, puꞌuwaré péchuruna iꞌimaká eꞌiyonaja. Iká jataꞌañó kaja ajopana inaꞌukena liyá nakaje, kanakújeꞌekena wani iꞌimakale.
26 ¡Mapechúruna wani iká ta! Paineko ipá itiyélane chiyá richojó. Rejomi riwajlé chiyá, rejenowaja riꞌimakáloje mapijaru.
27 “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. Jareni aú inaꞌuké eꞌejatá támijimina kaꞌakelana ramákoloje palá penaje, ke kaja iká. Majó ramó palá, eꞌiyonaja richojó kajrú támijimina aphinami, kajrú nakaje richu puꞌuwaré.
28 Ilé ke iká. Mapeja ilaꞌaká inakuwá inaꞌukejlo palájneꞌekena ke, chapú iꞌijnataka ipéchuwa eꞌiyonaja, chapújneꞌekena iꞌimakale.
29 “Chapú wani riꞌimajika iká Tupana purákaꞌalo nakú jewíñaꞌatajeñojlo, ñaké kaja fariséonajlo. Pajlákachina iká. Iká wakáraꞌaño nalaꞌaká Tupana purákaꞌalo jaꞌapátajeño, ichiꞌiná michuna nókarena michuna tami pajré iꞌimaká. Iwakáraꞌa kaja natáraꞌataka jipa rawaꞌá, inaꞌuké pechu kapicháñaaka piyá neká, palá laꞌajeñó neꞌemakale.
30 Rejomi imá: ‘Weꞌemakela wachiꞌiná michuna iꞌimaká wakajé, unká waꞌalajla nañathé Tupana purákaꞌalo jaꞌapátajeño nókana aú’.
31 Ilé ke imakale inakuwá, iná weꞌepí raú ichiꞌiná michuna iꞌꞌimaká ke kaja iká.
32 Ñakele iñapata nakaje unká ichiꞌiná michuna ñapátalare laꞌakana iꞌimaká.
33 “¡Unká wani inaꞌukélaruna iká! ¿Meke laꞌajé chi iꞌimajó keraꞌathani unká yakálare liyá?
34 Nuwakáraꞌaje piño ijló Tupana purákaꞌalo jaꞌapátajeño. Kapechú wani newíñaꞌatajika iká, eꞌiyonaja inoje nanakiyana. Neꞌiyajena inoje aꞌawaná apiyákakanami nakojé iphakeja. Eyá neꞌiyajena iñaꞌataje nawakákaꞌalo ñakarelana chu. Kajrú ilaꞌajika neká chapú, apú pajimila ewá, apú pajimila ewá ke.
35 Ilé ke ilaꞌajika pachá palá laꞌajeñó, kajrú wani amájika chapú kaje yajwé. Abel michú nókana eyá rikeñoꞌó iꞌimaká, ajopana, ajopana ke, nenójika palájneꞌekena. Kaja penaje nenó Zacarías, Berequías michú iꞌirimi, iꞌimaká.
36 Ilé ke nalaꞌaká iꞌimaká pachá, Tupana wajájeri meꞌetení iꞌimakaño waꞌató ripachá”, ke Jesús kemaká najló.
Jesús iyaka Jerusalén e iꞌimakaño waꞌaté yukuna marí
37 Jesús kemari Jerusalén e iꞌimakaño nakú: “Jerusalén eyájena, iká noño Tupana purákaꞌalo jaꞌapátajeño michuna iꞌimaká. Ikaꞌá kaja jipa nanakiyana cha inókaloje neꞌemaká raú. Tupana wakáraꞌakarena michuna, neká ilaꞌaké chapú wani. Pulapé nuwátakajla awakátakana iꞌimakáloje noꞌopiyá jemaꞌajeño penaje. Kapéreru awakátaka ruyani ruyuphé jaꞌapejé, ke kaja nuwátakajla awakátakana iꞌimakáloje noꞌopiyá jemaꞌajeño penaje, eꞌiyonaja unká iwátala.
38 Ñakele chuwa unká na iꞌimalaje amájeri penaje. Ikoja iꞌimajika chuwa.
39 Ñakele numá ijló: Meꞌetení eyá unká amálaje nuká, aꞌajná imájika nunaku: ‘Wephákare wani jaꞌapí, kele Tupana wakáraꞌakare majó inaꞌuké iꞌimatájeri penaje’ ”, ke ejená Jesús kemaká najló.