Napajnoꞌotákaloje napéchuwa puꞌuwaré nalaꞌakare liyá yukuna marí
13
E kaja re iꞌimakaño nakiyana iꞌimaño yuku Jesusjlo. Mékeka Pilato noka ajopana inaꞌukena iꞌimaká yukuna neꞌemá rijló marí ke:
—Kajrú wani Pilato nótaka Galilea eyájena iꞌimaká. Puꞌuwaré nalaꞌakare chaya nenó Tupánajlo napirana nakiyana iꞌimaká. Ilé ke nalaꞌaká aú Pilato wakáraꞌa nenótakana. Rejomi rikechípaꞌa nérami napirana michuna írami waꞌaté.
San Lucas 13.1-21
2 Jesús kemari najló:
—Apala ipechu Pilato nótakarena nakú: “Ajopana chaje wani kaꞌajná nalaꞌajika puꞌuwaré iꞌimaká, pachá kaꞌajná nalaꞌá ñaké neꞌemaká”, ke.
3 Unká ripachá kalé nakapichó iꞌimaká. Unkájika ee ipajnoꞌotá ipéchuwa puꞌuwaré ilaꞌakare liyá Tupana ejo, ñaké kaja ikapichájiko.
4 Siloé e pají iꞌimari, yenoje wani. Riká kojnoꞌorí manaꞌí chiyó. Dieciocho inaꞌukena cha rikojnoꞌó iꞌimaká, raú nakapichó piyukeja. Apala ipechu nakú iꞌimá: “Ajopana Jerusalén eyájena chaje kaꞌajná nalaꞌajika puꞌuwaré iꞌimaká, pachá kaꞌajná nakapichó”, ke.
5 Numá ijló unká ripachá kalé nakapichó. Unkájika ee ipajnoꞌotá ipéchuwa puꞌuwaré ilaꞌakare liyá, ñaké kaja ikapichájiko —ke Jesús kemaká najló.
Jesús iꞌimaká najló paijí mecharú yukuna marí
6 Jesús iꞌimari najló marí ke yuku: “Pajluwa iꞌimichari. Rimena eꞌiyá pajluwánaja paijí táriꞌicharo. Higuera rií iꞌimichaka. Riweꞌepíchakaja richa ñaꞌakana jená iphíchaka wakajé, riꞌijichá rejo. E rikulíchajla ripaná eꞌiyowá richa, amíchari unká richa iꞌimalacha.
7 Raú rimicha rimena eꞌiyá jápajerijlo: ‘Kaja weji kele jarechí ketana cha iꞌimajemi nuꞌujichá majó richa kulaje, eꞌiyonaja unká richa ta iꞌimalá. Eko piꞌiká riká. Unká na penaje kalé aꞌawaná mecharú ta táraꞌo numena eꞌiyá mapeja’, ke rimíchaka rijló.
8-9 Eꞌiyonaja rijwaꞌaté jápajeri kemicha rijló: ‘Reja riꞌimareja pajluwaja jarechí ketana re joꞌó kaja. Eko nuchá riꞌilaya, nukaꞌakáloje riꞌilaje aꞌawaná, jimichi tami kaje patákaꞌalomi, raú kaꞌajná rarúkaꞌaje. Unkájika ee rarúkaꞌa, nuꞌukajé riká’, ke rimíchaka rikariwátejlo”, ke Jesús iꞌimaká najló riyukuna.
Jesús tejmoꞌótaka pajluwájaru inanaru watánaꞌakaje iꞌimaká wakajé yukuna marí
10 Apú watánaꞌakaje iꞌimaká wakajé Jesús jewíñaꞌatari inaꞌuké nawakákaꞌalo ñakarelana chu.
11 Pajluwájaru inanaru iꞌimayo re najwaꞌaté. Dieciocho jarechí ketana cha ruꞌumaká rutami kaje waꞌaté. Jiñá pechu iꞌimakeri roꞌiyá, riká laꞌakeri rutami ruká. Kúwaꞌakano roꞌopájika. Rinakojé unká méñoꞌojo rutáraꞌako puꞌukú.
12 Jesús amaka ruká aú, riwaꞌa rojló. Raú ruꞌujná rawaꞌajé, rimá rojló:
—Chuwa kaja pitami kaje jaꞌapájika pinakiyá.
13 E ritoꞌotá riyátheꞌela runakojé. Rejéchami rutáraꞌako puꞌukú, rupuraꞌó palá Tupana nakú.
14 Eꞌiyonaja nawakákaꞌalo ñakarelana chiyá wakáraꞌajeri yúchaꞌaro Jesús cha, ritejmoꞌótakale inaꞌuké watánaꞌakaje iꞌimaká wakajé japi. Raú rimá najló:
—Re pajluwa kuwáꞌata ke (6) kala weꞌechú, riká japi iná laꞌakáloje iná jápakaꞌala penaje. Riwakajé japi iká itámina iꞌimakaño iꞌijnajé richaje, ritejmoꞌótakaloje iká penaje. Eyá watánaꞌakaje iꞌimajika wakajé re natámina tejmoꞌótakana nakojé iꞌimajé.
15 Raú Jesús kemari rijló:
—¡Pajlákachina wani iká! Iká laꞌañó inakuwá mapeja palá laꞌajeñó ke inaꞌukejlo, unká ñaké laꞌajeñó kalé iꞌimaká eꞌiyonaja. Ipirana, jema pirakana kaꞌajná, kawarú kaꞌajná, iꞌimakela nañakarelana chu watánaꞌakaje iꞌimaká wakajé, jáchoꞌotajla kaja neká richiyá riwakajé juni iꞌirajé.
16 Eyá marirú, Abraham michú lakélomi, kaja dieciocho jarechí ketana cha roꞌopaka kúwaꞌakano, Jiñá Chiꞌinárikana wakáraꞌakale rutami kaje rojló ruꞌumakáloje ñaké penaje. Ñakele palani raꞌapátakana ruliyá watánaꞌakaje iꞌimaká wakajé eꞌiyonaja.
17 llé ke rimaká aú, rapáñaꞌata chapú péchuruna rinaku nakú. Ajopana inaꞌuké pechu laꞌaró puꞌují rijwaꞌaté, namaka aú palá wani ritejmoꞌótaka ruká.
Mostaza icha ijí yukuna marí
18 Jesús iꞌimari piño najló yuku marí ke: “Chuwa nuꞌumajika ijló marí yuku iweꞌepíkaloje mékeka Tupana waꞌatéjena iꞌimajika. Inaꞌuké nakiyana wakáraꞌajeri Tupana. Wejápaja rijwaꞌatéjena meꞌetení, aꞌajná ñoꞌojó chami richaje neꞌemajika.
19 Mostaza icha ijí ñani, nejátakare neꞌekakapere eꞌiyowá, ke neká. Kapajé nojé wani richa ijí, eꞌiyonaja jímaꞌalami yenuna nojé ketana kaja ritawáꞌako. Ripaná eꞌiyowá kupiraꞌaphana laꞌañó nañakaró”, ke rimaká najló.
Pan amúraꞌatajona yukuna marí
(Mt 13.33)
20 Jesús kemari piño najló: “Inaꞌuké nakiyana wakáraꞌajeri Tupana. Wejápaja rijwaꞌatéjena meꞌetení, aꞌajná ñoꞌojó chami richaje rijwaꞌatéjena iꞌimajika. Chuwa nuꞌumajika ijló apú yuku, raú iweꞌepíkaloje rinakojé:
21 Wejápaja inaana kaꞌaká pan amúraꞌatajona (levadura) kajrú harina eꞌiyajé, eꞌiyonaja kajrú ramúraꞌatako. Ñaké kaja Tupana yukuna jemaꞌakó kajrú inaꞌukena eꞌiyowá nemaꞌakáloje raꞌapiyá penaje, neꞌemakáloje rijwaꞌatéjena raú”, ke Jesús jewíñaꞌataka neká.
Kamuꞌujini rinumaná yukuna marí
(Mt 7.13-14, 21-23)
22 Jesús iꞌijnajika Jerusalén ejo wakajé, raꞌapake kajrú nojé pajimila eꞌiyowá, eyá kapajé nojé pajimila eꞌiyowá waꞌató. Raꞌapájika ewá rewíñaꞌatake inaꞌuké Tupana nakú.
San Lucas 13.22-35
—Wawakáraꞌajeri, ¿mekeleja chi inaꞌuké Tupana iꞌimataje kapichákajo liyá?
Raú Jesús kemari rijló, ajopánajlo waꞌaté:
24 —Ilaꞌá kaphí ipéchuwa imujlúkaꞌakaloje kamuꞌujini rinumaná chuwá jeꞌechú chojé. Numá ijló, kajrú inaꞌukena atáꞌajikajla richuwá mujlúkaꞌakana, eꞌiyonaja unká méñoꞌojo namujlúkaꞌalaje richuwá.
25 Pají miná ke Tupana. Riká jáchoꞌojero rinumaná jitaje. Rejomi ikeñoꞌojé awakákano wakaꞌapeje rinumaná awaꞌajé. E iwáꞌaje rijló rijmeꞌetákaloje ijló rinumaná penaje. Imaje rijló: “Wawakáraꞌajeri, pijmeꞌetá wajló rinumaná”, ke. Raú rimaje ijló: “Unká nuweꞌepila mere eyájenaka iká”.
26 Rejéchami imájika piño rijló: “Wajñake waꞌajnewá pijwaꞌaté; weꞌeraké kaja nakaje jalá pijwaꞌaté iꞌimajika; pewíñaꞌatake kaja weꞌemajika pajimila e”, ke imájika rijló.
27 Eꞌiyonaja rimaje piño ijló: “Kaja numicha ijló: ‘Unká nuweꞌepila mere eyájenaka iká’, ke. ¡Iꞌijná nuliyá aꞌajná ñoꞌojó, puꞌuwaré laꞌajeñó ta iká!”
28 Tupana waꞌatéjena iꞌimajeño rijwaꞌaté jeꞌechú chu. Abraham, eyá Isaac, Jacob waꞌaté, piyuke Tupana purákaꞌalo jaꞌapátajeño penájemi iꞌimajika re. Amájika ee neká re, kajrú iyájika. Kajrú kaja ajmaꞌajika aiwá. Neká iꞌimajeño jeꞌechú chu, eyá iká iꞌimajeño kupákejanami ke wakaꞌapé naliyá.
29 Ajopana, ajopana ke, piyukeja marí ejaꞌawá chu iꞌimakaño nakiyana, iꞌimajika jeꞌechú chu nawakáraꞌajeri Tupana waꞌaté. Re najñaje naꞌajnewá Tupana jaꞌapiyá jemaꞌajeño waꞌaté.
30 Ajopana inaꞌuké jaꞌapejé iꞌimakaño meꞌetení, iꞌimajeño riwakajé ajopana chaje —ke Jesús kemaká najló.
Jesús iyaka puꞌuwaré laꞌajeñó michuna waꞌaté yukuna marí
31 Jesús jewíñaꞌataka neká ee, fariséona nakiyana iphaño rinaku, nemá rijló:
—Páchoꞌo maáreya, Herodes wátari pinókana chuwa.
32-33 Raú Jesús kemari najló:
—Chuwajá, eyá muní waꞌaté wakajé, nuꞌumajé jiñana pechu wakáraꞌakana nakú náchoꞌokoloje inaꞌuké eꞌiyayá. Nutejmoꞌótaje kaja natámina aꞌajná apakala ejená. Ilé kaje laꞌakana nakú nuꞌujnajé Jerusalén ejo. Rewá nenó Tupana purákaꞌalo jaꞌapátajeño michuna iꞌimaká. Apú pajimila ewá unká nenola ñaké neꞌemaká. Ñaké kaja nenójika nuká rejo. Chuwa ipaꞌó, iꞌimichá riyukuna Heródesjlo —ke Jesús kemaká.
34 Marí ke rimaká Jerusalén e iꞌimakaño nakú: “Tupana wakáraꞌajikano Ripurákaꞌalo jaꞌapátajeño michuna Jerusalén eyájena ejo, eꞌiyonaja nenoke nanakiyana. Neꞌiyajena cha nakaꞌaké jipa. Pulapé nuwátakajla awakátakana iꞌimakáloje noꞌopiyá jemaꞌajeño penaje. Kapere awakátaka ruyani ruyuphé jaꞌapejé, ke kaja nuwátakajla awakátakana iꞌimakáloje noꞌopiyá jemaꞌajeño penaje, eꞌiyonaja unká iwátala.
35 Ñakele chuwa unká na iꞌimalaje amájeri penaje. Meñaru amájika nopumí chuwa. Kaja numá inaku: ‘Unká amálaje nuká’, ke. Amájika piño nuká wakajé, imaje nunaku: ‘Palájneꞌeke wani riká Tupana wakáraꞌakare majó iꞌimaká’ ”, ke Jesús kemaká najló.