Jesús tejmoꞌótaka pajluwaja ritami yukuna marí
14
1-2 E pajluwa watánaꞌakaje iꞌimaká wakajé Jesús iꞌijnari apú fariséona wakáraꞌajeri ñakaré ejo raꞌajnewá ajñaje rijwaꞌaté. Re pajluwa iꞌimari ritami. Raꞌanapitá, ritajné waꞌaté, jenátaro rijló, nakú riꞌimá ritami. Ajopana re iꞌimakaño yakáꞌaño Jesús chaje, namákaloje mékeka rilaꞌajika riká watánaꞌakaje iꞌimaká wakajé.
San Lucas 14.1-24
—¿Meke chi Moisés purákaꞌalomi lanaꞌakeja kemaká natámina tejmoꞌótakana nakú? ¿E chi iná laꞌaká neká chapú iná tejmoꞌótakachu neká watánaꞌakaje iꞌimaká wakajé japi?
4 Unká naꞌajipalá rijló, raú ripatá ritami iꞌimaká riyátheꞌela nakiyá. Ritejmoꞌota riká, ejomi rimá rijló:
—Chuwa piꞌijná palá kaꞌajnó.
5 E rimá najló:
—Re kaꞌajná ulawí juniphuni, re kaja juni richu. Piꞌirí kaꞌajná, pematé nakiyana kaꞌajná, jaꞌakelo richojé watánaꞌakaje iꞌimaká wakajé, ¿unká chi jáchoꞌotalajla riká richiyá riwakajé?
6 Raú namanúmaꞌo rijló.
Jesús kemari najló nalaꞌaká piyá nekó cháꞌatajeño ke wani yukuna marí
7 Pajluwa yukupéraꞌari neꞌiyajena neꞌejnakáloje richaje, raú neꞌejná riñakaré ejo. Re neꞌemaká ee, Jesús amari nakulaka najluwa palá nojé ñákaꞌajori, raú rilaꞌá nenakú marí ke:
8 “Apala nayukupéraꞌaje kaꞌajná iká iꞌijnakáloje aꞌajnewá ajñaje najwaꞌaté nawáꞌakajiko wakajé. Iphájika ee rejo, ikulániña ijluwa palá nojé ñákaꞌajori iyáꞌakoloje richu penaje. Apala nawátaje riká ñákaꞌajori apú ichaje iꞌimakáñojlo.
9 Apala yukupéraꞌari iká kemaje kaꞌajná ijló: ‘Nujwákeꞌena, aꞌajná apú ñákaꞌajori chu iyaꞌo, unká ijló penaje kalé kele ñákaꞌajori iyáꞌicho chu’, ke. Raú paí kaje waꞌaté iꞌijnajé mapéjarunajlo penaje ñákaꞌajori chu yáꞌajo.
10 Lanakiya iká laꞌajeño apoꞌojó marí ke: Iphájika ee, iyáꞌajo mapéjaruna iꞌimakaño ñákaꞌaru chu paineko. Puꞌuwaká rikoja, paminá kemájika ijló: ‘Nujwákeꞌena, aꞌajná ñákaꞌajori chu iyáꞌicho. Íkiꞌija nuphákarena jaꞌapijlo kele ñákaꞌajori, raú ijwaꞌaté yáꞌakaño iphájeño jaꞌapí’, ke.
11 Iná pechu iꞌimakachu iná nakuwá: ‘Nuká cháꞌatari ajopana’, ke, Tupánajlo naꞌapejé ke iná pechu. Eyá iná pechu iꞌimakachu iná nakuwá: ‘Ajopana cháꞌataño nuká’, ke, Tupánajlo ajopana chaje ke iná pechu”, ke Jesús laꞌaká nenakú.
12 E Jesús kemari piño paminajlo:
—Piwakáraꞌajika ee kajrú aꞌajnejí laꞌakana ajopana inaꞌukénajlo, piyukupéraꞌaniña marí kajena: piwátakarena, pejena, pawaꞌá ñakajélaruna, kajrú leꞌejepeláruna, kajena. Pimaniña ilé kajénajlo, neꞌejnakáloje naꞌajnewá ajñaje pijwaꞌaté. Rejomi neká yukupéraꞌajeño piño piká pajñákaloje paꞌajnewá najwaꞌaté. Ilé ke apiyákajika aꞌajnewá ajñakana pajwaꞌatéchaka.
13 Marí kajena piyukupéraꞌa najñákaloje naꞌajnewá pijwaꞌaté: Kamuꞌují laꞌakaño, apichákaꞌalo mothoꞌokaño, unká méñoꞌojo jaꞌapálaño palá, mejluruna, kajénajlo pimá najñákaloje naꞌajnewá pijwaꞌaté.
14 Ilé ke laꞌakana aú Tupana laꞌajé pinaku palá. Tupana makápoꞌotajika piño palá laꞌajeñó michuna wakajé, raꞌajé pijló palá pilaꞌakare nanaku wemí —ke Jesús kemaká rijló.
Tupana yukupéraꞌaka inaꞌuké neꞌemakáloje rijwaꞌatéjena penaje yukuna marí
15 Naꞌajnewá ajñakana nakú neꞌemá re. Rawaꞌá yáꞌako jemaꞌarí mékeka rimaká najló, raú rimá Jesusjlo:
—Puꞌují péchuruna, ajñájeño naꞌajnewá Tupana waꞌaté jeꞌechú chu iꞌimajika.
16 Raú Jesús iꞌimari rijló marí yuku:
—Pajluwa wakáriꞌichari ajopana iꞌijnaká kajrú inaꞌukena yukupéraꞌaje, neꞌejnakáloje naꞌajnewá ajñaje rijwaꞌaté.
17 Kaja ewaja riphicha rená chojé, raú riwakáriꞌicha rijwaꞌaté jápajeri riyukupéraꞌakarenajlo kemaje, rimakáloje najló. “Kaja aꞌajnejí ñapicha”, ke.
18 Raú riꞌijichá najló kemaje, eꞌiyonaja ijnú nawátiyaka rejo iꞌijnakana. Paineko riphíchaje nakú kemíchari rijló: “Wajé nuwarúwiꞌichaka apú liyá rimena, raú nuꞌujnajé ramaje meꞌetení. Ñakele unká nuꞌujnalaje rejo”, ke.
19 E raꞌapicha piño apú chaje. Riká kemíchari rijló: “Iyamá théꞌela kele (10) jémana pirakana nuwarúwiꞌicha, raú nuwata natáꞌakana nomákaloje e kaꞌajná nachíraꞌaka palá nakaje. Ñakele riwátaniña nuká kaꞌajnó”, ke.
20 Apú kemíchari piño rijló: “Wajé wani nuwáꞌakichako, ñakele unká méñoꞌojo nuꞌujnalá rejo”, ke.
21 “Unká nuꞌujnalaje”, ke waja nemíchaka rijló. Raú ripiꞌichó rikoja riwakáraꞌajeri ñakaré ejo. Riꞌimichá rijló mékeka nemíchaka rijló yukuna, raú riyúchiꞌicho nachá. E rimicha rijwaꞌaté jápajerijlo: “Chuwa piꞌijná kiñaja apú pajimila ejo chiꞌitaje iñeꞌepú chuwá, kamuꞌujini iñeꞌepú chuwá waꞌató. Piwáꞌicha majó kamuꞌují laꞌakaño, apichákaꞌalo mothoꞌokaño, unká méñoꞌojo jaꞌapálaño palá, mejluruna, kajena piwáꞌaje majó”, ke rimíchaka rijló.
22 Raú riꞌijichá piño ajopana wáꞌaje. Neká iꞌijichaño rijwaꞌaté. Rejomi rijwaꞌaté jápajeri kemíchari rijló: “Kaja nuliꞌichá pimíchaka ke, re joꞌó kaja kalé pukunaji ajopánajlo”, ke rimíchaka.
23 Raú riwakáraꞌajeri kemíchari rijló: “Piꞌijná piño ilé iñeꞌepú pajimila yámojo toꞌokó chuwá. Pimicha ajopánajlo, neꞌejnakáloje majó, namanoꞌotákaloje nuñakaré.
24 Numá pijló, ileruna nuyukupéraꞌakarena paineko iꞌimaká, unká wani najñálaje naꞌajnewá nujwaꞌaté maáreya watukumá”, ke rimíchaka rijwaꞌaté jápajerijlo —ke Jesús iꞌimaká yuku najló.
Jesucristo waꞌatéjena wátakaloje riká apú nakaje chaje, yukuna marí
25 Kajrú inaꞌukena jaꞌapájika Jesús waꞌaté riꞌijnajika ejo. E ripajnoꞌó ají ke riyámojo yakáꞌajo, rimá najló:
San Lucas 14.25-35
26 “Wátaño nujwaꞌatéjena iꞌimakánajlo numá: Iwata nuká íkiꞌija, apú nakaje chaje; iwata nuká íkiꞌija, ichiꞌiná chaje; iwata kaja nuká íkiꞌija, iyajalo, iyani, kele chaje; iwata kaja nuká íkiꞌija, ejena chaje; iwata nuká íkiꞌija, iwátaka ikó chaje. Unkájika ee iwata nuká íkiꞌija ileruna chaje, unká meke laꞌajé iꞌimalajla nujwaꞌatéjena.
27 Apala nenoje kaꞌajná nujwaꞌatéjena nakiyana, nemaꞌakale noꞌopiyá. Weꞌepiri khaí rinakuwá, unká meke laꞌajé riꞌimalajla nujwaꞌateje”, ke Jesús kemaká najló.
Iná iꞌijnatákaloje iná péchuwa palá paineko mékeka inajlo rijwaꞌateje iꞌimakana, penaje riꞌimá najló yuku marí ke
28 Rimá najló: “Pajluwa kaꞌajná wátari pají laꞌakana. Raú riꞌijnatá palá ripéchuwa rinaku, ramákaloje mérejeka riwemí jáchoꞌojiko piyuke rijló. Raú riweꞌepí e kaꞌajná riliñérute iphájika riñapátakana lokópaꞌala, unká kaꞌajná.
29 Unkachu riꞌijnatala ripéchuwa palá, rikaꞌá kaꞌajná piyuke riliñérute jipa ayúmaꞌakana raꞌapiwá wemija. Rejomi unká riliñérute iphala riñapátakana lokópaꞌala. Ñaké ajopana amájika ee riká mañapátakanaru, neꞌechajé rinaku.
30 Nemaje rinaku: ‘Rikeñoꞌó pají laꞌakana eꞌiyonaja unká riliñérute iphala riñapátakana lokópaꞌala’, ke.
31 “Ñaké kaja apú iꞌijnataka ripéchuwa. Ajopana teꞌeré eyájena wakáraꞌajeri wátakela ajopana teꞌeré eyájena waꞌaté nókakano, riꞌijnatajla paineko palá ripéchuwa rinaku. Apala rileꞌejé suráana diez mil ja kaꞌajná. Eyá, ¿meke laꞌajé chi riꞌijnajla veinte mil leꞌejena suráana waꞌaté nókajo? Ilé ke riꞌimajika ee, palani nalamáꞌataka purákaꞌaloji pajwaꞌatéchaka.
32 Rimá kaꞌajná: ‘Unká méñoꞌojo wacháꞌatalajla neká’, ke. Palani apú wakáraꞌakana rejo rijwaꞌaté puraꞌajó, yaꞌajná joꞌó neꞌemanoja. Palani rijwaꞌaté puraꞌakano, nakeñoꞌoká pajwaꞌatéchaka nókakano piyá. Ilé ke riꞌijnataka ripéchuwa palá.
33 Ñaké kaja riká piyukeja wátaño nujwaꞌatéjena iꞌimakánajlo. Paineko neꞌejnatá palá napéchuwa mékeka nawátaka laꞌakana nakú. Unkájika ee nawata piyuke nakaje yuríkana naliyó neꞌemakáloje nujwaꞌatéjena penaje, unká méñoꞌojo neꞌemalaje nujwaꞌatéjena”, ke Jesús kemaká najló.
Yukira iꞌimaká aꞌajnejijlo, ke kaja Jesucristo jaꞌapiyá jemaꞌajeño iꞌimaká ajopana inaꞌukénajlo, nalaꞌaká aú neká palá. Riyukuna marí
34 “Palani yukira kaꞌakana aꞌajnejí eꞌiyajé, eꞌiyonaja rilaꞌakochu uwiꞌichí, unká méñoꞌojo iná laꞌalá piño kajipareni riká rapumí chuwá.
35 Unká na penaje kalé nakaje uwiꞌichini. Iná kaꞌakachu riká teꞌerí eꞌiyajé, unká kaja na penaje riꞌimalaje, unkale raꞌalá teꞌerí ñathé. Nakaje mujrumi eꞌiyajé rikaꞌakana, unká kaja paala. Rikupákanaja kalé palani. Iká kapechúruna, jemaꞌá riká”, ke Jesús kemaká najló.