2 E rikeñoꞌó newíñaꞌatakana marí ke:

3 “Puꞌují péchuruna weꞌepiño puꞌuwaré laꞌajeñoka neká. Raú unká meke laꞌajé nalaꞌalajla palá nekó, raú nawata Tupana aꞌaká nañathé. Ilé ke péchuruna nanakuwá, iꞌimajeño Tupana yaní nakiyana.

4 “Puꞌují péchuruna laꞌañó kamuꞌují napéchuwa, puꞌuwaré nalaꞌakare pachá, Tupana palaꞌatájikale napechu najló.

5 “Puꞌují péchuruna, unká laꞌalaño nanakuwá weꞌepéjeño wani ke. Neká iꞌimajeño Tupana teꞌeré nakú rijwaꞌaté, rimaká nanaku ke.

6 “Puꞌují péchuruna, wechi wátakaño Tupana wátaka ke nakaje laꞌakana, riká aꞌajíkale nañathé rilaꞌakana aú.

7 “Puꞌují péchuruna weꞌepiño ajopana muꞌují, ñaké kaja Tupana weꞌepíjika namuꞌují.

8 “Puꞌují péchuruna unká wátalaño puꞌuwaré laꞌakaná. Neká amájeño Tupana.

9 “Puꞌují péchuruna wátaño palá pajwaꞌatéchaka iꞌimakana. Nanaku Tupana kemaje: ‘Nuyani neká’, ke.

10 “Puꞌují péchuruna amaño chapú kaje yajwé, Tupana wátaka ke laꞌakana jimaje. Neká iꞌimajeño ñakeja wani rijwaꞌaté.

11 “Puꞌují péchuruna, puꞌuwaré napuraꞌakárona nakú, napáñaꞌatakaloje nanaku penaje. Nalaꞌá kaja kaꞌajná iká chapú, jemaꞌakale noꞌopiyá; napajlá kaꞌajná mapeja inaku.

12 Eꞌiyonaja ipechu puꞌují, palá wani nakaje iꞌimajíkale ijló jeꞌechú chu. Ñaké kaja nalaꞌajika aꞌajútaya michuna nakiyana chapú, Tupana purákaꞌalo jaꞌapátajeño neꞌemajíkale.

13 “Yukira ke iká, noꞌopiyá jemaꞌajeño. Palani yukira, iná kaꞌakachu riká aꞌajnejí eꞌiyajé, eꞌiyonaja rilaꞌakochu uwiꞌichí, unká méñoꞌojo iná laꞌalajla piño kajiparé riká rapumí chuwá piño. Palani rijlámaꞌakanaja kalé teꞌerí eꞌiyajé, inaꞌuké payákatakaloje richá penaje.

14 “Kamareji ke iká, noꞌopiyá jemaꞌajeño, marí ejaꞌawá chu iꞌimakaño. Puꞌuwaká iná amaka pajimila, yenuri jiꞌiwata nakú iꞌimakare.

15 Unká iná lukúnaꞌala iná kamaró, rejomi iná yáꞌatakaloje riká iꞌichí lámaꞌatakejami jaꞌapejé. Yenoje iná yáꞌata riká, piyuke pají chu iꞌimakaño amákaloje rikamaré chojé palá.

16 Ñakele iká, noꞌopiyá jemaꞌajeño, ilaꞌá palá, ajopana amákaloje ilaꞌaká palá noꞌopiyá jemaꞌakana aú. Raú napuraꞌajó palá Tupana, jeꞌechú chu iꞌimakare nakú”, ke Jesús jewíñaꞌataka neká.

17 Jesús kemari piño najló: “Ipechu iꞌimaniña nunaku: ‘Riká kaꞌajná kemájeri wajló, wemaꞌaká piyá Tupana purákaꞌalo Moisés lanaꞌakare, eyá ajopana Ripurákaꞌalo jaꞌapátajeño michuna, kele lanaꞌakare iꞌimaká jaꞌapiyá, ke. Rimaje kaꞌajná wajló, wemaꞌaká piyá raꞌapiyá’, ke kaꞌajná ipechu nunaku. Unká ilé kaje penaje kalé nuphá majó iꞌimaká. Nakaje numakare nakú aú, iweꞌepeje palá meke kemakánaka riká; nakaje nulaꞌakare aú, iweꞌepeje kaja rinakojé.

18 Jeꞌechú, marí teꞌerí waꞌaté iꞌimajika ketana, piyuke nakaje iꞌimajika Tupana purákaꞌalo, Moisés lanaꞌakare iꞌimaká kemaká ke.

19 Unká aꞌalá rinakojó rimaká ke laꞌakana piyukeja, eyá jewíñaꞌatari kaja ajopana inaꞌukena, naꞌaká piyá nanakojó riká, iꞌimajeri mapéjari ke jeꞌechú chu, rewájena wakáraꞌajeri Tupana iꞌimakale.

20 Palá numaká ijló: Re ijwaꞌaté Tupana purákaꞌalo nakú jewíñaꞌatajeño, eyá fariséona, kajena. Unká wani iꞌijnalaje jeꞌechú chojé, unkájika ee icháꞌata neká, Tupana wátaka ke laꞌakana aú”, ke Jesús jewíñaꞌataka neká.

21 “Kaja iweꞌepí mékeka Tupana purákaꞌalo, riyuríkare pheñawilana michúnajlo kemaká: ‘Inóniña inaꞌuké. Nójeri inaꞌuké, wajákana iꞌimajeri’, ke rimaká.

22 Eyá nuká kemari: Yúchaꞌajero kaꞌajná apú inakiyana cha, wajákana iꞌimajeri. Puraꞌajero puꞌuwaré wani inakiyana nakú, iwáꞌaje iwakáraꞌajeño ejo, nawajákaloje riká penaje. Kemájeri kaꞌajná apú inakiyánajlo: ‘¡Mapechuru wani piká ta!’, amájeri keraꞌathani unká yakálare yajwé.

23 “Apala piꞌijnajé Tupana ñakaré ejo pipirana nakiyana noje rijló, puꞌuwaré pilaꞌakare chaya. Piphájika rejo ee kaꞌajná, piweꞌepeje re pileꞌejé puraꞌakajo, chapú pinaku péchuri waꞌaté.

24 Ilé ke riꞌimajika ee pijló, piyurí rejeja piraji piwátakare nókana Tupánajlo. Paineko pilamáꞌata purákaꞌaloji chapú pinaku péchuri waꞌaté, rejomi pipaꞌajó piño nakaje aꞌajé Tupánajlo.

25 “Apú kaꞌajná arukátari piká, unká pachá paꞌalá pilewérikare wemí rijló, raú kaꞌajná riwata piwáꞌakana iwakáraꞌajeri ejo. Pilamáꞌata rijwaꞌaté riká iñeꞌepú chuwá iꞌijnajika nakuwá. Apala iwakáraꞌajeri aꞌajeri piká policíanajlo, nakaꞌakáloje piká inaꞌuké wajákelana chojé.

26 Numá pijló, unká páchoꞌolajo richiyá, aꞌajná paꞌatájika pilewérikare wemí rijló ejená.

27 “Kaja iweꞌepí mékeka Tupana purákaꞌalo kemaká kalúyunajlo: ‘Ilaꞌaniña imanáicho ajopana waꞌaté’.

28 Eyá nuká kemari ijló: Yakáꞌaro apaꞌawelo inanaru chaje kakámeꞌe rujwaꞌaté iꞌimakana aú, laꞌarí puꞌuwaré, riꞌijnatákale ripéchuwa runaku ñaké.

29 “Ñakele apala pijlú pachá kaꞌajná pilaꞌajika ee puꞌuwaré, palani rikawíchaꞌakana pinakiyá, pikaꞌakáloje riká pinakiyó, piꞌijnaká piyá ripachá keraꞌathani yajwé amaje. Pikawíchaꞌakela pijlú majó, pikaꞌakáloje pinakiyó riká penaje, palani riꞌimakajla pijló, piꞌijnaká piyá keraꞌathani chojé. Pinapona nakiyánaja kalé kapichárojla raú. Piyuke pinapona kapichákelo, chapú wani riꞌimakajla pijló.

30 Pilaꞌakachu puꞌuwaré nakaje pilaꞌakare piyátheꞌela aú pachá, piyurí piliyó rilaꞌakana. Palani riyuríkana piliyó, piꞌijnaká piyá ripachá keraꞌathani yajwé amaje. Pimataꞌakela pinakiyó piyátheꞌela kaꞌañá chojori, pilaꞌakare aú puꞌuwaré, pikaꞌakáloje riká pinakiyó, palani riꞌimakajla pijló. Pilaꞌakela ilé ke, palani riꞌimakajla pijló, piꞌijnaká piyá keraꞌathani chojé. Pinapona nakiyánaja kalé kapichákojla raú. Piyuke pinapona kapichákelo, chapú wani riꞌimakajla pijló.

31 “Nemaké kaja marí ke: ‘Iná wátakachu iná yajalo yuríkana kaja penaje, iná aꞌá rojló purákaꞌaloji lanaꞌakéjami, ruweꞌepíkaloje na pachaka iná yurika ruká. Rejéchami iná yurika ruká’.

32 Eyá nuká kemari: Apala pajluwa yurí riyajalo, unká rulaꞌalá rumanáicho apú waꞌaté eꞌiyonaja, raú rilaꞌá rimanáicho. Apú wáꞌakajiko ee riyajalo penájemiru waꞌaté, laꞌajeri kaja rimanáicho, Tupana pechu iꞌimakale runaku: ‘Apú yajalo joꞌó ruká’, ke.

33 “Jemaꞌá kaja meke nemájika iꞌimaká: ‘Iná kemakachu kewaka, ke Tupana ií aꞌakana aú, ajopana weꞌepíkaloje raú rilaꞌajika rimaká ke, richuwaja rilaꞌajé riká’.

34 Eyá nuká kemari ijló: Unká na penaje imalá apú nakaje ií nakú, ajopana weꞌepíkaloje raú ilaꞌajika imaká ke. Imaniña kaja Tupana, jeꞌechú chu iꞌimakare nakú, reyá iꞌimajemi riwakáraꞌakale rijwaꞌatéjena.

35 Aꞌaniña kaja ejaꞌawá ií, kamuꞌujini wani ejaꞌawá iꞌimakale Tupánajlo. Nakaje nakojé iná toꞌotaka iná jiꞌimá, ke rijló riká. Aꞌaniña kaja pajimila Jerusalén ií, iꞌimakana wani leꞌejé pajimila riꞌimakale.

36 Aꞌaniña kaja iwílaꞌaru ií, unkale iweꞌepila pajluwélano iwilá lajnere apiyákakana kameni aú, jareni aú.

37 Marí ke imájika: ‘Nulaꞌajé riká’, ke kaꞌajná; ‘Unká nulaꞌalaje riká’, ke kaꞌajná. Rejeja imaje rinaku; ilaꞌá imaká ke. Jiñá Chiꞌinárikana liyaje riká, kemari richaje ke nakaje nakú.

38 “Jemaꞌá kaja meke nemájika iꞌimaká: ‘Pajluwa kaꞌajná laꞌajika ee iká chapú, ñaké kaja ilaꞌajika piño riká chapú inakojó. Apú kaꞌajná apichátajika ee ijlú, ñaké kaja apichátajika rijlú. Rapichátajika ee kaꞌajná aí nakiyana, ñaké kaja apichájika raí nakiyana’, ke nemájika.

39 Eyá nuká kemari: Pipuraꞌaniño pileꞌejé jakumi nakú, nalaꞌajika piká chapú kewá. Marí ke pilaꞌajika: Pajluwa ñaꞌajika ee kaꞌajná piká pajimaya, pajluwa pitanó kaꞌajná, pipajnoꞌotá kaja rijló apoꞌojó pitari, riñaꞌakáloje piká reyá ñaké kaja penaje.

40 Pajluwa kaꞌajná arukátajeri piká mapeja, raú riwáꞌaje piká iwakáraꞌajeño ejo, nalamáꞌatakaloje pijwaꞌaté riká penaje. E kaꞌajná najñaꞌajé pikamichare pinakiyá multa wemí penaje. Apú paꞌarumaká, richari iꞌimakare waꞌató, paꞌajé rijló.

41 Pajluwaja, ajopana leꞌejena suráana nakiyana, wakáraꞌajika ee pijñaꞌaká nakaje rijló pajluwela ejaꞌawá eꞌiyowá ketana, pijñaꞌá rijló riká iyajmela ejaꞌawá eꞌiyowá ketana.

42 Pajluwa kemájika ee kaꞌajná pijló, paꞌakáloje rijló nakaje rilaꞌakare nakú kamuꞌují, paꞌá rijló riká. Pajluwa kemájika ee kaꞌajná pijló, piyaꞌatákaloje rijló nakaje, piyurí rijló riká”, ke Jesús kemaká najló.

43 Jesús kemari piño najló: “Jemaꞌá kaja meke nemájika: ‘Palá péchuruna inákuja kalé iwátaje íkiꞌija. Eyá chapú péchuruna inaku, amaje kaja chapú’.

44 Eyá nuká kemari ijló: Iwata íkiꞌija chapú péchuruna inaku, laꞌañó iká chapú. Ipuraꞌó kaja Tupana waꞌaté nanaku.

45 Ilé ke ilaꞌajika aú, iꞌimajé Tupana yaní. Jaraꞌapá, jeꞌechú chu iꞌimakare laꞌaká, ke kaja ilaꞌajika raú. Riká wakáraꞌari kamú pataká palá laꞌakáñojlo, puꞌuwaré laꞌakáñojlo waꞌaté; riwakáraꞌa kaja juni jaꞌakó palá laꞌakáñojlo, puꞌuwaré laꞌakáñojlo waꞌaté.

46 Iwátakachu íkiꞌija wátaño kaja ikaja kalé, unká Tupana aꞌalaje ijló riwemí, unkale ilaꞌalá palá raú. Liñeru ñaꞌajeño neꞌemakánajlo waꞌató wátaño kaja íkiꞌija palá péchuruna nanaku.

47 Ajalákakachu ejénaja kalé, unká na ilaꞌalá palá raú; unká weꞌepílaño Tupana nakojé waꞌató ajalákaño ñaké kaja.

48 Iꞌimá palá laꞌakaná nakuja, Jaraꞌapá jeꞌechú chu iꞌimakare laꞌaká ke kaja”, ke rimaká najló.