Jesús jewíñaꞌataka neká palá laꞌakaná nakú yukuna marí
6
Rimá piño najló: “Ilaꞌaniña nakaje palá, iwátakare laꞌakana kajrú inaꞌukena jimaje, nemakáloje inaku raú: ‘¡Meke palá wani nalaꞌaká!’, ke. Ilé ke ilaꞌajika ee, unká Jaraꞌapá jeꞌechú chu iꞌimaká aꞌalaje ijló riwemí.
2 Ñakele aꞌajika ee kamuꞌují laꞌakáñojlo nakaje, iꞌimaniña riyukuna ajopánajlo. Laꞌañó nekó palá laꞌajeñó ke inaꞌuké ijlú chu, aꞌañó kamuꞌují laꞌakáñojlo nakaje nawakákaꞌalo ñakarelana chu ajopana jimaje. Leꞌejepelaji ñakarelana kopi, kajrú inaꞌukena eꞌiyá, naꞌá najló riká, inaꞌuké puraꞌakóloje palá nanaku penaje. Numá ijló: Palá inaꞌuké puraꞌakaro nanaku, rikaja kalé iꞌimajeri najló ilé ke nalaꞌakare wemí.
3 Paꞌajika ee kamuꞌují laꞌakaño ñathé, piꞌimaniña riyukuna ajopánajlo. Pijwákeꞌenajlo waꞌató, piꞌimaniña kaja riyukuna.
4 Paꞌajika ee ajopana ñathé, pilaꞌá riká meꞌechú, palá paraꞌapá jeꞌechú chu iꞌimaká amaka mékeka pilaꞌaká. Riká aꞌajeri pijló palá pilaꞌakare wemí”, ke rimaká najló.
Jesús jewíñaꞌatari neká Tupana waꞌaté puraꞌakano nakú. Riyukuna marí
5 E rimá piño: “Ipuraꞌajiko ee Tupana waꞌaté, ilaꞌaniña ajopana laꞌaká ke kaja. Neká puraꞌañó rijwaꞌaté nawakákaꞌalo ñakarelana chu kajrú inaꞌukena jimaje. Napuraꞌó kaja rijwaꞌaté leꞌejepelaji ñakarelana kópiwa, ajopana amákaloje neká penaje. Nanaku numá ijló: Ilé ke nalaꞌakare pachá kaja nakana najluwa wajákaje.
6 Ñakele pipuraꞌajiko ee rijwaꞌaté, pimujlúkaꞌa ukapú chojé pikoja pipuraꞌakóloje rijwaꞌaté. Palá paraꞌapá Tupana jemaꞌajika pipuraꞌakó rijwaꞌaté, re riꞌimajíkale pijwaꞌaté. Riká aꞌajeri pijló riwemí.
7 Iná puraꞌakochu rijwaꞌaté, unká iná kemalá rijló rikaja nakaje nakú. Keꞌiyapejé nakaje nakú iná puraꞌó rijwaꞌaté. Unká weꞌepílaño rinakojé puraꞌañó pajluwaja nakuja rijwaꞌaté, napechu iꞌimakale, ‘Riká nakuja wapuraꞌajiko ee Tupana waꞌaté, remaꞌajé waꞌapiyá riká’, ke.
8 Iꞌimaniña neká ke. Unká chiyó ikejaꞌa nakaje jaraꞌapá Tupana liyá, kaja riweꞌepí naka iwátaka riliyá.
9 “Ñakele marí nakojé ipuraꞌajó rijwaꞌaté:
‘Waraꞌapá, jeꞌechú chu iꞌimakare,
iná iphákare wani jaꞌapí piká.
10 Wawata piwakáraꞌaka pijwaꞌatéjena marí teꞌerí nakú iꞌimakaño, piwakáraꞌaka pijwaꞌatéjena jeꞌechú chu iꞌimakaño, ke kaja.
11 Paꞌá wajló aꞌajnejí chuwajajlo iꞌimakare, wajñákaloje penaje.
12 Pamó wachaje puꞌuwaré walaꞌakare liyá, wamako ajopana chaje chapú nalaꞌakare weká liyá, ke kaja.
13 Piyuríniña puꞌuwaré laꞌakaná aꞌaká wameꞌé rijluwa, walaꞌakáloje ñaké penaje.
Piꞌimatá kaja weká puꞌuwaré laꞌajeñó wakáraꞌajeri liyá.
Pamá palá pileꞌejena inaꞌukena, piyukeja laꞌajerí piꞌimakale.
Piká weꞌepiri piyukeja nakaje laꞌakana nakojé.
Matajnako piꞌimajika; palá piwakáraꞌajika piyukeja; ñaké riꞌimajika’ ”,
ke Jesús jewíñaꞌataka neká Tupana waꞌaté puraꞌakano nakú.
14 Rimá piño najló: “Amájiko ee ajopana chaje, chapú nalaꞌakare iká liyá ee, ñaké kaja jaraꞌapá, jeꞌechú chu iꞌimakare, amájiko ichaje puꞌuwaré ilaꞌakare liyá.
15 Eyá unkájika ee amó ajopana chaje, chapú nalaꞌakare iká liyá ee, unká kaja jaraꞌapá, jeꞌechú chu iꞌimakare, amálajo ichaje puꞌuwaré ilaꞌakare liyá”.
Jesús jewíñaꞌataka neká naꞌajné liyá iꞌitakano nakú yukuna marí
16 Rimá najló: “Iꞌitajiko aꞌajné liyá wakajé, ipechu iꞌimakáloje Tupana nakuja riwakajé, ilaꞌaniña ajopana laꞌaká ke kaja. Neká laꞌañó najimawa apoꞌojó, kamuꞌují péchuruna ke, inaꞌuké weꞌepíkaloje raú neꞌetakó naꞌajné liyá, napechu iꞌimakáloje nanaku: ‘Meke kajrú wani napechu Tupana nakú’, ke. Numá ijló: Ilé ke nemakare nanákuja kalé iꞌimajeri najló palá nalaꞌakare wemí. Unká Tupana aꞌalaje najló riwemí, unká pachá nalaꞌalá palá.
17-18 Ñakele piꞌitajiko paꞌajné liyá wakajé, pilamáꞌata palá pikó; pipá kaja palá pijimá chiyá, ajopana weꞌepika piyá piꞌitakó paꞌajné liyá. Rikaja kalé paraꞌapá, jeꞌechú chu iꞌimakare, weꞌepéjeri piꞌitakó paꞌajné liyá, raú raꞌajé pijló palá pilaꞌakare wemí”, ke Jesús kemaká najló.
Nakaje awakátakana jeꞌechú chojé yukuna marí
19 Rimá piño najló: “Awakátaniña ijluwa kajrú nakaje marí ejaꞌawá chu iꞌimakare. Kajrú piꞌiréjina apichátaka iná nane maare; kiñaja kaja ritajnáñaaka iná; jataꞌakáchina mujlúkaꞌaño kaja iná ñakaré chojé rataꞌajé.
20 Ñakele ilaꞌá piyuke Tupana wátaka ke, raú rilaꞌajé palá inaku jeꞌechú chu iꞌimajika wakajé. Re unká piꞌiréjina iꞌimalá apichátaño nakaje; re unká kaja nakaje tajnálajo iliyá; unká kaja jataꞌakáchina mujlúkaꞌalaje rejo nakaje jataꞌajé iliyá.
21 Palá iná iꞌijnataka iná péchuwa nakaje íkiꞌija iná wátakare nakú. Iná wátakachu íkiꞌija nakaje jeꞌechú chu iꞌimakare inajluwa, iná iꞌijnatá kaja iná péchuwa rinaku. Eyá iná wátakachu íkiꞌija nakaje marí ejaꞌawá chu iꞌimakare inajluwa, iná iꞌijnatá kaja iná péchuwa rinaku”, ke rimaká najló.
Iná pechu yukuna marí
22 Rimá piño najló: “Iná pechu lokópaꞌala iná laꞌá nakaje. Palá iná pechu iꞌimakachu, iná laꞌá kaja palá nakaje. Unkachu iná pechu iꞌimalá palá, unká kaja iná laꞌalá palá nakaje.
23 Ñaké palá péchuri piꞌimajika ee, piyukeja nakaje pilaꞌajíkare iꞌimajika palá waja ajopánajlo. Kamareji chojé palá iná amaka nakaje, ke kaja ajopana amájika palá nakaje pilaꞌajíkare.
24 “Unká meke laꞌajé iná jemaꞌalá palá iyamá iná wakáraꞌajeño jaꞌapiyá. Apala pajluwa kaꞌajná piwata apú chaje, lanakiya unká piwátala apú. Apala pajluwa jaꞌapiyá kaꞌajná pemaꞌajé palá, eyá apú jaꞌapiyá unká. Ñaké kaja unká pemaꞌalaje palá Tupana jaꞌapiyá, kajrú piwátajika ee pijluwa liñeru”, ke rimaká najló.
Tupana aꞌaká rinakojó riyani yukuna marí
25 Jesús kemari raꞌapiyatéjenajlo: “Iwó kaꞌaniño aꞌajnejí, iꞌirakaje, kaje waꞌaté iꞌimakáloje ripalamane penaje. Iwó kaꞌaniño kaja aꞌarumakaji aꞌajíkare inakuwá waꞌaté. Aꞌajnejí chaje inajlo kajmuchaji, eyá aꞌarumakaji chaje inajlo iná napona.
26 Iweꞌepí meke kupiraꞌaphana: Yenuwa najrá; unká nejátala nakaje icha ijí najluwa; unká kaja nalamáꞌatala nakaje icha ijí najluwa. Eꞌiyonaja jaraꞌapá jeꞌechú chu iꞌimakare aꞌarí najló aꞌajnejí. Kupiraꞌaphana chaje íkiꞌika riwátaka iká.
27 Iwó kaꞌajiko ee nakaje nakú, unká raꞌalaje iñathé, iꞌimakáloje júpija marí ejaꞌawá chu penaje.
28 “¿Naje iwó kaꞌó aꞌarumakaji kaje waꞌaté? Iweꞌepí mékeka aꞌawaná iwí. Unká rijápala, unká kaja rilaꞌalá rijluwa aꞌarumakaji raꞌakáloje rinakuwá penaje.
29 Kajrú wani leꞌejepelari neꞌemakana Salomón michú iꞌimaká, eꞌiyonaja unká richáꞌatala aꞌawaná iwí palacha raꞌarumaká aú iꞌimaká.
30 Ilé ke Tupana laꞌaká palá aꞌawaná iwí nakú, meketánaja penaje riꞌimaká eꞌiyonaja. Aꞌawaná iwí raꞌaká rinakojó, chaje íkiꞌika raꞌaká rinakojó iká, aꞌarumakaji iꞌimakáloje ijló penaje. ¡Meke wejápaja wani ipechu Tupana chojé kaphí!
31 Ñakele iwó kaꞌaniño nakaje nakú. Ipechu iꞌimaniña kaja: ‘¿Na wajñaje? ¿Na weꞌerajé? ¿Mérowa wephátaje wajluwa aꞌarumakaji?’, ke.
32 Unká weꞌepílaño Tupana nakojé, nekaja kalé weꞌepiño ilé kaje natukumó. Eyá iká, palá Tupana weꞌepika, raꞌakáloje ijló nakaje ilaꞌakare nakú kamuꞌují.
33 Iweꞌepí itukumó paineko Tupana wakáraꞌaka ke laꞌakana, riwátaka ke laꞌakana kaje. Raú raꞌajé ijló aꞌajnejí, aꞌarumakaji, kaje maká piyuke.
34 Iwó kaꞌaniño nakaje akijñojo iꞌimajíkare ijló waꞌaté. Riwakajé re kaja nakaje iꞌimajé piño iná wo kaꞌajona penaje. Weꞌechú kaꞌalá keja re inajlo nakaje, apala unká paala kaꞌajná, iná aꞌakáloje iná nakojó riká penaje”, ke Jesús kemaká najló.