Iná puraꞌakó piyá mapeja ajopana nakú, meke laꞌajeñoka neká. Riyukuna marí
(Lc 6.37-38, 41-42)
7
Jesús kemari piño najló: “Imaniña ajopana nakú meke laꞌajeñoka neká Tupánajlo. Raú unká kaja rimalaje inaku meke laꞌajeñoka iká rijló.
2 Ilé imaká ajopana nakú, ke kaja Tupana kemájika inaku. Palá ilaꞌaká ajopana nakú, ke kaja rilaꞌajika inaku palá.
3 ¿Naje paꞌá pinakojó wejápaja puꞌuwaré apú laꞌakare? ¿Naje unká paꞌalá paineko pinakojó puꞌuwaré wani pilaꞌakare?
4 Puꞌuwaré laꞌajerí wani piká. Eta, ¿meke laꞌajé chi pimajla apú pinakiyánajlo: ‘Piyurí piliyó puꞌuwaré laꞌakaná’, ke?
5 ¡Pajlákachi ta piká! Paineko piyurí piliyó puꞌuwaré wani laꞌakaná, rejomi pimakáloje peꞌewejlo riyuríkaloje riliyó wejápaja puꞌuwaré laꞌakaná”, ke Jesús jewíñaꞌataka neká.
6 Rimá piño najló: “Pipuraꞌaniño Tupana leꞌejé nakaje nakú, unká wátalaño riká waꞌaté. Apala napuraꞌajó puꞌuwaré wani pinaku rijimaje. Iná aꞌakachu yawi yurí wánijlo nakaje kawemí nojé, najmaꞌatajla iná rijimaje. Ñaké kaja aꞌakachu kawemí nojé murewa jeꞌerujlo, mapeja ripayákatajika richá teꞌerí eꞌiyajé. Ke kaja unká wátalaño Tupana jaꞌapiyá jemaꞌakana laꞌaká iná”, ke rimaká najló.
Tupana aꞌaká riliyá kejáꞌajeñojlo nakaje yukuna marí
(Lc 11.9-13; 6.31)
7 Jesús kemari piño najló: “Ikejaꞌa Tupana liyá nakaje, raú raꞌajé ijló riká; ikulá riliyá nakaje, raú iphátaje riká; imá rijló rijmeꞌetachi ijló nakaje apu, raú rijmeꞌetaje ijló riká.
8 Riliyá nakaje kejáꞌajeñojlo, raꞌajé nakaje; riliyá kulájeño, iphátajeño nakaje; rijló kemájeñojlo, rijmeꞌetaje rapu.
9 “Unká na kalé aꞌá riꞌirijlo jipa, rikejáꞌakachu riliyá kujnú.
10 Unká kaja na kalé aꞌá riꞌirijlo jeí, rikejáꞌakachu riliyá jiña.
11 Puꞌuwaré laꞌajeñó iká, eꞌiyonaja iweꞌepí iyánijlo nakaje aꞌakaná palá. Chaje wani jaraꞌapá, jeꞌechú chu iꞌimakare, weꞌepika palá nakaje aꞌakaná riliyá kejáꞌajeñojlo.
12 “Ilaꞌá palá ajopana inaꞌukena nakú, iwátaka nalaꞌaká inaku ke kaja. Tupana purákaꞌalo, Moisés, eyá Ripurákaꞌalo jaꞌapátajeño michuna, kele lanaꞌakare iꞌimaká, wakáraꞌari iná laꞌaká ñaké kaja”.
Jesús iꞌimari najló iyamá tamákaꞌako iñeꞌepú yukuna marí ke
13 “Re iyamá iñeꞌepú: pajluwa kamuꞌujini, eyá apú chiꞌitaje. Ilé chiꞌitaje iñeꞌepú iꞌijnari kapichákajo ejo. Malakaꞌaphénaru richuwá iꞌijnakana. Kajrú inaꞌukena iꞌijnaká richuwá.
14 “Eyá apú kamuꞌujini ñani iꞌijnari matajnako iná iꞌimaká ejo. Jápakaje richuwá iꞌijnakana, ñakele mekeleja iꞌijnaño richuwá”, ke rimaká najló.
Nakaje inaꞌuké laꞌakare aú iná weꞌepí mékajenaka neká. Riyukuna marí
15 Jesús kemari piño najló: “Amá ikó palá pajlákachina liyá, kemaño nanakuwá: ‘Tupana purákaꞌalo jaꞌapátajeño weká’, ke. Aꞌaniña inakojó napurákaꞌalo. Namákana aú iná pechu nanaku: ‘Palájneꞌekena japi neká’, ke, eꞌiyonaja unká wani ñaké kalé neká. Chapú wani péchuruna neká.
16 Nakaje nalaꞌakare aú iná weꞌepí mékajenaka neká. Unká méñoꞌojo lukú arúkaꞌalajla kajmú icha ke; unká kaja kukuná arúkaꞌalajla pipirí icha ke.
17 Palani aꞌawaná aꞌarí richawá palá, eyá puꞌuwareni aꞌawaná aꞌarí richawá puꞌuwaré kaja.
18 Unká méñoꞌojo palani aꞌawaná aꞌalajla richawá, puꞌuwareni aꞌawaná aꞌaká richawá ke kaja. Unká kaja méñoꞌojo puꞌuwareni aꞌawaná aꞌalajla richawá, palani aꞌawaná aꞌaká richawá ke kaja.
19 Unkachu iná paijí aꞌalá palá richawá, iná iꞌiká riká, iná kaꞌakáloje riká keraꞌathani chojé.
20 Ñakele nakaje inaꞌuké laꞌakare aú iweꞌepeje mékajenaka neká: pajlákachina kaꞌajná, palá péchuruna kaꞌajná”, ke rimaká najló.
Mékajenaka unká iꞌijnalájeño jeꞌechú chojé yukuna marí
21 E rimá piño najló: “Unká piyukeja kalé kemaño nunaku: ‘Wawakáraꞌajeri riká’, ke iꞌijnalaje jeꞌechú chojé. Laꞌañó Noraꞌapá wátaka ke, nekaja kalé iꞌijnajeño rejo.
22 Nuphájika kaja penaje majó wakajé, neꞌiyajena kemájeño nojló: ‘Wawakáraꞌajeri, weká iꞌimaño piyukuna ajopánajlo; pipurákaꞌalo aú wawakáraꞌa jiñana pechu jáchoꞌoko neꞌiyajena eꞌiyayá; pipalamane walaꞌá kajrú nakaje Tupánaja kalé weꞌepíkare laꞌakana’, ke nemájika nojló riwakajé.
23 Eꞌiyonaja numaje najló: Unká nuweꞌepila mere eyájenaka iká. Iꞌijná nuliyá, puꞌuwaré laꞌajeñó iꞌimakale”, ke rimaká najló.
Iyamá pají laꞌajeñó yukuna marí
24 Rejomi rimá piño najló: “Ñakele jemaꞌajeri nupurákaꞌalo rilaꞌakáloje numaká ke penaje, iꞌimajeri pajluwa inaꞌuké kapechuni wani, laꞌarí palá riñakaró jipa nakojé iꞌimaká, ke kaja.
25 Kajrú juni jaꞌakó wakajé kaphí taꞌakheni juni iphaka riñakaré jaꞌapejé. Kajrú kaja karená aphoꞌoká rinakojé, eꞌiyonaja unká riñakaré kojnoꞌolá raú, jipa nakú ripana táraꞌakole. Ilé ke rilaꞌakale riká palá, unká rikapichalo raú.
26 Eyá jemaꞌañó nupurákaꞌalo, eꞌiyonaja unká nalaꞌalá rimaká ke, iꞌimaño inaꞌuké mapechuru, laꞌarí riñakaró keꞌepé eꞌiyajé iꞌimaká. Ke kaja nalaꞌaká chapú nekó raú.
27 Kajrú juni jaꞌakó wakajé, kaphí taꞌakheni iphaka riñakaré jaꞌapejé. Kaphí kaja karená aphoꞌoká rinakojé, raú riñakaré kojnoꞌó junápeje. Keꞌepé eꞌiyá ripana iꞌimakale aú rikapichó piyukeja”.