Jesús tejmoꞌótaka pajluwaja ritami yukuna marí
8
E kaja Jesús witúkaꞌari yenuri jiꞌiwátaya. Kajrú inaꞌukena iꞌijnaká rápumichu.
2 E pajluwaja iphari rinaku. Ritami riꞌimaká, rinapona nakiyana patákaꞌataro rijló. Ramaka aú Jesús, ritáraꞌo riꞌirúpachi aú rijimaje, rimá rijló:
—Wawakáraꞌajeri, piwátajika ee, paꞌapata nuliyá nuyaripune.
3 Raú Jesús jápari rinaku riyátheꞌela aú, rimá rijló:
—Noꞌopátaje piliyá riká. Kaja pinapona paliꞌichó pijló.
—Piꞌimaniña nuyukuna ajopánajlo. Chuwa piꞌijná sacerdote ejo, ramachi piká. Rejomi paꞌá Tupánajlo nakaje pinapona paliꞌichako wemí, Moisés michú wakáraꞌaka ke. Raú naweꞌepeje kaja pinapona palaꞌakó palá pijló.
Jesús tejmoꞌótaka romano nakiyana waꞌaté jápajeri yukuna marí
5 Jesús iꞌijnari pajimila Cafarnaúm ejo. Re pajluwaja romano nakiyana, suráana wakáraꞌajeri riꞌimajika, iphari rinaku.
6 Rimá Jesusjlo:
—Wawakáraꞌajeri, ritami wani nujwaꞌaté jápajeri. Unká méñoꞌojo rikawitala rinapona, kajrú wani ramaka kewini yajwé. Re ritami toꞌoró nuñakaré chu.
7 Jesús kemari rijló.
—Nuꞌujnajé pijwaꞌaté ritejmoꞌótaje.
8 Raú suráana wakáraꞌajeri kemari rijló:
—Wawakáraꞌajeri, unká nuwátala pinaku kawílaꞌakana. Unká kaja nuwátala pimujlúkaꞌaka nuñakaré chojé, mapeja iꞌimaká nuká. Ñakele maáreya iꞌimajémija piwakáraꞌa ritejmoꞌotako, raú ritejmoꞌotajo.
9 Re kaja nuwakáraꞌajeño. Suráana wakáraꞌajeri nuká, ñakele numakachu pajlúwajlo: “Piꞌijná ají ñoꞌojó”, ke, riꞌijná rejo. Eyá numakachu apujlo: “Majó piꞌijná”, ke, riꞌijná nuká ejo. Nuwakáraꞌakachu nujwaꞌaté jápajeri laꞌaká nakaje, rilaꞌá riká numaká rijló ke.
10 Ilé ke rimaká rijló aú Jesús pechu iꞌimá: “¡Meke kaphí wani ripechu Tupana chojé!” Raú rimá rápumichu chiraꞌajéñojlo:
—Kaphí wani ripechu Tupana chojé raꞌakáloje riñathé penaje. Unká nuphátala apú Israel lakénami nakiyana eꞌiyá riká ke wani péchuri.
11 Kajrú ajopana iꞌimajika aꞌajútaya michuna waꞌaté jeꞌechú chu. Ajopana teꞌeré eyájena neꞌemajika; Abraham, Isaac, Jacob, kele waꞌaté neꞌemajé.
12 Eꞌiyonaja judíona nakiyana rikaꞌajé yaꞌajnaje kalajeruni chojé. Re kajrú neyájika. Kewini akuwaná najmaꞌajé naiwá kamachá —ke Jesús kemaká najló.
13 E rimá piño suráana wakáraꞌajerijlo:
—Chuwa pipaꞌó. Kaphí pipechu iꞌimakale nochojé, nutejmoꞌótaje pijló riká.
Ilé ke rimaká rijló, waꞌató ke rijwaꞌaté jápajeri tejmoꞌotako.
Jesús tejmoꞌótaka Pedro yajneru yukuna marí
14 E kaja Jesús iꞌijnari Pedro ñakaré ejo, mujlúkaꞌari richojé, amari Pedro yajneru toꞌokó. Jeloꞌokajo nakú ruꞌumá.
15 E rijapa ruyátheꞌela nakú, waꞌató ke jeloꞌokajo mataꞌaká runakiyá. E róchoꞌo rutamákaꞌatakaloje aꞌajnejí najló.
Jesús tejmoꞌótaka kajrú natámina yukuna marí
16 E kaja najúwaꞌa re. Rejéchami neꞌiyajena wáꞌaka kajrú jiñana pechu iꞌimakárena eꞌiyá Jesús ejo. Ripurákaꞌalo aú ja riwakáraꞌa jiñana pechu jáchoꞌoko neꞌiyayá, ritejmoꞌota kaja piyuke natámina.
17 Tupana purákaꞌalo jaꞌapátajeri Isaías michú kemaká iꞌimaká, ke rilaꞌaká natejmoꞌótakana aú. Ripiyá rilanaꞌá marí ke iꞌimaká: “Ritejmoꞌótaje weká wayaripune liyá”.
Meke Jesús kemaká wátaño rijwaꞌaté iꞌijnakánajlo yukuna marí
18 Jesús amaka aú kajrú wani inaꞌukena awakako rinakojé, rimá raꞌapiyatéjenajlo nakuwáꞌatakaloje riká kaéja paꞌanajo pitá.
19 Re pajluwa Tupana purákaꞌalo nakú jewíñaꞌatajeri iꞌijnari rawaꞌajé, rimá rijló:
—Wewíñaꞌatajeri, nuwata pijwaꞌaté iꞌijnakana méñoꞌojoka piꞌijnajika ewá.
20 Jesús kemari rijló:
—Re kamejérinajlo pukunaji nakamátakoloje richu penaje; kupiraꞌaphánajlo re kaja nañakaré; eyá nojló unká pukunaji iꞌimalá nuwatánaꞌakaloje richu penaje. Inaꞌuké iꞌimakáloje nupalamane penaje iꞌimaká nuká.
21 E apú raꞌapiyateje nakiyana kemari rijló:
—Wawakáraꞌajeri, piyurí nupaꞌakó nuñakaré ejo paineko. Nuwata noraꞌapá tami jáꞌakana ritakaꞌajika wakajé.
22 Jesús kemari rijló:
—Piꞌijná nujwaꞌaté. Unká weꞌepílaño Tupana nakojé, kaja takaꞌakaño ke neká nojló. Neká jáꞌajeño kaja takaꞌakaño tami.
Jesús kemaká karenajlo raꞌapákaloje penaje yukuna marí
23 Muní ke Jesús witúkaꞌaka wapuru chojé raꞌapiyatéjena waꞌaté.
24 Rejéchami manaꞌí chiyó karená iꞌimaká nachá kaphí wani. Riká yokoꞌorí kajrú juni, raú kajrú juni jamoꞌokó wapuru chojé, eꞌiyonaja manaꞌija Jesús kamátako.
25 Rejéchami napótaka riká, nemá rijló:
—¡Wawakáraꞌajeri, piꞌimatá weká wejaká, chuwaka wakapichako junápeje!
26 Rimá najló:
—¿Naje ikeroꞌó kajrú wani? ¿Naje unká wani ipechu iꞌimalá kaphí nochojé?
Raú ráchoꞌo; rimá karená, eyá juni yokólajlo waꞌaté:
—¡Paꞌapá!
Raú karená jaꞌapari, waꞌató ke unká juni yokoꞌoló. Manaꞌija riꞌimaká piño rapumí chuwá.
27 Ilé ke Jesús kemaká aú raꞌapiyatéjena pechu iꞌimá rinaku: “¿Na kaꞌajná kari? Karená, eyá juni yokola waꞌató jemaꞌarí raꞌapiyá”.
Jesús wakáraꞌaka jiñana pechu jáchoꞌoko inaꞌuké eꞌiyayá yukuna marí
28 E kaja nephá paꞌanajo pitá, Gerasa teꞌeré ejo, amaño iyamá inaꞌukena iꞌijnaká najimajo. Támijimina kaꞌakelana eyá nephá. Jiñana pechu iꞌimaño neꞌiyá, raú yuriná wani neꞌemaká. Unká na jaꞌapake rewá, chapú nalaꞌajika rewá jaꞌapájikaño.
29 Nephaka nanaku ee, nawíyoꞌoko nemaká Jesusjlo:
—¿Naje pikawílaꞌa wanaku? Tupana iꞌirí piká. ¿Pilaꞌakáloje weká chapú, unká chiyó riphá rená chojé wajló, penaje chi piꞌijichá majó?
30 Aꞌajnare ke kajrú jeꞌeruna pirakana chiraꞌakó naꞌajnewá kulákana nakú.
31 Mawó jiñana pechu kemaká Jesusjlo:
—Páchoꞌotajika ee weká neꞌiyayá, piyurí weꞌejnaká aꞌajnáruna jeꞌeruna eꞌiyajé.
32 Raú riwakáraꞌa jiñana pechu jáchoꞌoko neꞌiyayá. Rejéchami náchoꞌoko, jaꞌañó jeꞌeruna pirakana eꞌiyajé. Naꞌakó aú neꞌiyajé, jeꞌeruna jechoꞌoñó ají ke yenuri jiꞌiwátaje, reyá naꞌó kaéja jakojé. Rejeja nakapichó piyukeja junápeje.
33 Jeꞌeruna lamáraꞌajeño penájemina amaka aú nakapichako, nakeroꞌó kajrú, raú neñaó reyá. E neꞌemá riyukuna pajimila eyájenajlo.
34 Raú piyukeja pajimila e iꞌimakaño iꞌijnaño rejo Jesús amaje. Nephaka rinaku ee, mawó nemaká rijló:
—Páchoꞌo wateꞌeré nakiyá.