Jesús tejmoꞌótaka pajluwa kamachá napona takaꞌaká rijló iꞌimaká, yukuna marí
9
E kaja Jesús witúkaꞌari wapuru chojé. Nakuwaꞌa paꞌanajo pitá ají ke riñakajela ejo.
2 E nawaꞌa rejo kuwana nakú pajluwaja kamachá napona takaꞌaká rijló. Jesús weꞌepika aú kaphí napechu iꞌimaká richojé ritejmoꞌótakaloje riká penaje, rimá ritámijlo:
—Pipechu iꞌimá kaphí; kaja nomicho pichaje puꞌuwaré pilaꞌakare liyá.
3 Ilé ke rimaká rijló aú, Tupana purákaꞌalo nakú jewíñaꞌatajeño nakiyana pechu iꞌimá: “¡Meke unká wani paala rimaká ta! Tupánaja kalé amárojla iná chaje, puꞌuwaré iná laꞌakare liyá. Unká Tupana kalé riká”, ke napechu iꞌimaká rinaku.
4 Jesús weꞌepiri mékeka napechu iꞌimaká rinaku, raú rimá najló:
—¿Naje chi iꞌijnatá ipéchuwa ilé ke wani?
5 Mapeja apujlo kemakana: “Kaja nomicho pichaje puꞌuwaré pilaꞌakare liyá”, ke. Eyá puwichani inajlo, iná wakáraꞌakaloje ritami jáchoꞌoko raꞌapákaloje penaje.
6 Ñakele iweꞌepíkaloje penaje Tupana wakáraꞌaka nomako inaꞌuké chaje puꞌuwaré nalaꞌakare liyá aú, nulaꞌajé nakaje meꞌetení iweꞌepíkaloje kewaka numaká nunakuwá.
E rimá kamachá napona takaꞌakajlo:
—Chuwa páchoꞌo, pijñaꞌá pikuwanare pijwaꞌató, pipaꞌachó.
7 Rejéchami ráchoꞌoko, e ripaꞌó riñakaré ejo.
8 Ráchoꞌoko aú ramájeño pechu iꞌimá Jesús nakú: “¡Meke piyuke wani rilaꞌalaka!”, ke. Palá napuraꞌakó Tupana nakú, raꞌakale Jesús ñathé kajrú wani.
Jesús kemaká Matéojlo riꞌijnakáloje rijwaꞌaté yukuna marí
9 E kaja Jesús jaꞌapari piño reyá, amari Mateo yáꞌako rijápakaꞌala laꞌakana nakú. Liñeru ñaꞌakana nakú inaꞌuké liyá neꞌemakánajlo penaje nakú riꞌimá. E Jesús iphari rinaku rejé, rimá rijló:
—Piꞌijná nujwaꞌaté.
Raú ráchoꞌo riyáꞌako eyá, iꞌijnari rijwaꞌaté.
10 Rejomi riwakáraꞌa nalaꞌaká kajrú aꞌajnejí, ajopana ajñákaloje naꞌajnewá Jesús waꞌaté riñakaré chu. Re kaja liñeru ñaꞌajeño neꞌemakánajlo, eyá ajopana nemakárena nakú: “Unká inaꞌukélaruna”, ke, iꞌimaño najwaꞌaté re. Jesús jaꞌapiyatéjena iꞌimaño kaja najwaꞌaté.
11 Ilé ke fariséona nakiyana amaka aú rajñaka raꞌajnewá najwaꞌaté, nemá raꞌapiyatéjenajlo:
—¿Naje chi jewíñaꞌatajeri ajñá raꞌajnewá ilé kajena inaꞌukena, unká inaꞌukélaruna ta waꞌaté?
12-13 Jesús jemaꞌarí nemaká ilé ke najló, raú rimá najló:
—Peyajwéruna iꞌimakaño unká iꞌijnalaño pujánaꞌajeri ejo, natámina iꞌimakáñoja kalé iꞌijnaño richaje. Ñaké kaja nuká inaꞌukejlo: re inaꞌuké, natámina ke neká Tupánajlo puꞌuwaré nalaꞌakare pachá; re neꞌiyajena pechu nanakuwá: “Kewaka, puꞌuwaré laꞌajeñó weká”, ke. Ilé ke péchuruna iꞌimakaño nanakuwajlo nuꞌujná majó Tupana yukuna iꞌimajé, napajnoꞌotákaloje napéchuwa puꞌuwaré nalaꞌakare liyá Tupana ejo.
Ñakele chuwa jewíñaꞌo meke kemakánaka ijló marí Tupana purákaꞌalo kemakare nakú: “Iká noño pirájina, ikáraꞌatakaloje nojló puꞌuwaré ilaꞌakare chaya. Eꞌiyonaja nojló chaje wani palaka inaꞌuké muꞌují weꞌepíkana”.
Eyá ajopana kaꞌajná pechu nanakuwá: “Palá laꞌajeñó weká”, ke, eꞌiyonaja unká ñaké kalé neká. Ilé ke péchuruna nanakuwajlo unká nuꞌujnalá majó Tupana yukuna iꞌimajé —ke rimaká najló.
Napuraꞌakó Jesús waꞌaté aꞌajnejí liyá iꞌitakano nakú yukuna marí
14 E kaja Juan el Bautista jaꞌapiyatéjena iphaño Jesús nakú, nemá rijló:
—Methú ke weká, fariséona waꞌaté, iꞌitakono waꞌajné liyá, riwakajé wapechu iꞌimakáloje Tupana nakuja. Eta, ¿naje unká paꞌapiyatéjena laꞌalá ñaké kaja?
15 Jesús kemari najló:
—Nawáꞌakako wakajé piyuke nayukupéraꞌakarena pechu puꞌují waja. Unká neꞌetaló aꞌajnejí liyá, ruwáꞌakajikaro waꞌaté iꞌimakale re najwaꞌaté. Ñaké kaja riká nujwaꞌatéjenajlo: najwaꞌaté nuꞌumajika ketana, unká na penaje neꞌetaló aꞌajnejí liyá. Tupana wáꞌajikaja nuká naliyá ejomi, neꞌetajó naꞌajné liyá —ke rimaká najló.
Jesús jewíñaꞌatari neká nemaꞌakáloje ripurákaꞌalo jaꞌapiyá penaje. Riyukuna marí
16 Rimá najló: “Unká na kalé mataꞌarí wajé aꞌarumakaji nakiyana jupichumi tepé penaje. Reꞌiyayá jipakana ejéchami, jupichumi jiyoꞌotako wajé liyá. Kaja penaje jiyoꞌotákeja piyukeja aꞌarumakaji yuriko.
17 Unká kaja iná akhoꞌolá nakaje jalá wajé amúraꞌatakanami jupichumi raꞌakuná chojé, iná lamáꞌatakaloje riká richojé penaje. Kamejeri ímami nakiyá laꞌakanami riká raꞌakuná, ñakele iná akhoꞌokachu wajé nakaje jalá jupichumi raꞌakuná chojé, rijiyoꞌotá riká riñapaka ejéchami. Rejeja rikapichó piyuke. Eyá wajé raꞌakuná chojé iná akhoꞌokachu wajé nakaje jalá amúraꞌatakanami, unká rijiyoꞌotala riká, wajé raꞌakuná ñaꞌakale panaku riká, raú unká na kapichalo”, ke riꞌimaká najló yuku.
Jesús makápoꞌoka Jairo itu, eyá apaꞌawelo tejmoꞌotako raꞌarumaká nakú jápakana aú, yukuna marí
18 Jesús iꞌimaká najló yuku ketana, pajluwa iphaka nanaku. Judíona wakáraꞌajeño nakiyana riꞌimaká. Riphá Jesús nakú, e rijlámaꞌo riꞌimá nakojé, rimá rijló:
—Wajé nutu takiꞌichaka. Piꞌijná nujwaꞌaté nuñakaré ejo pijápakaloje runaku piyátheꞌela aú, rupalaꞌakóloje raú penaje.
19 Raú Jesús, raꞌapiyatéjena waꞌaté, iꞌijnaño rijwaꞌaté riñakaré ejo.
20-21 Najwaꞌaté apaꞌawelo jaꞌapayo kaja. Iyamá iphata jiꞌimaji nakojé kele (12) jarechí ketana cha ruꞌumaká rutami. Jirá jaꞌapákeri runakiyá. Rupechu iꞌimá Jesús nakú: “Raꞌarumaká nakú jápakana aú ja nutejmoꞌotajo”, ke. Ñakele roꞌopá rápumichu, rujapa raꞌarumaká jiꞌimá nakú.
22 Rejéchami Jesús pajnoꞌokó ruchaje yakáꞌajo, amari ruká, rimá rojló:
—Pipechu iꞌimá palá. Kaja pitejmoꞌotiyo pitami kaje chiyá, pipechu iꞌimakale kaphí nochojé.
Raú ja rutejmoꞌotó.
23 E kaja naꞌapá, iphaño Jairo ñakaré ejo. Kajrú inaꞌukena iꞌimaká re. Kewirí kaje chojé aphoꞌojeño iꞌimaño kaja re. Támijimi jáꞌakana yale naphoꞌó kewirí kaje chojé. Re kaja nawinano laꞌajeñó iꞌimaño, raú kajrú namejé iꞌimaká, kajrú nalaꞌaká nawinano.
24 E kaja Jesús kemari najló:
—Iꞌijná aꞌajná ñoꞌojó. Unká ilerú yuwaló takaꞌalacha, rukamátakoja.
Raú neꞌechá rinaku.
25 Eꞌiyonaja Jesús wakáraꞌari náchoꞌoko pají chiyá, rejomi rimujlúkaꞌa ukapú támijimi iꞌimakare chu chojé. Ripatá rutami ruyátheꞌela nakiyá, raú róchoꞌo.
26 Rejomi rimakápoꞌoka piño ruká yukuna mothoꞌó kajrú wani nateꞌeré ewá.
Jesús jaꞌapátaka naliyá mejlukaji yukuna marí
27 E kaja Jesús jaꞌapari piño. Iyamá mejluruna iꞌijnaño rápumichu. Nawíyoꞌoko nemaká rijló:
—Piká, Tupana wakáraꞌakare majó inaꞌuké iꞌimatájeri penaje, piweꞌepí wamuꞌují.
28 Jesús mujlúkaꞌari pají chojé, rápumichu ke neká, e rimá najló.
—¿E chi ipechu nakú noꞌopátakajla iliyá mejlukaji?
—Aꞌa, wawakáraꞌajeri.
29 E rijapa nejlú nakú, rimá najló:
—Ipechu iꞌimaká kaphí nochojé lokópaꞌala riꞌimajé ijló.
30 Rejéchami namaka palá. E Jesús kemari najló:
—¡Pa! Iꞌimaniña riyukuna ajopánajlo.
31 Raú napaꞌó, eꞌiyonaja neꞌemá piyuke nañakajela ewájenajlo palá Jesús laꞌaká neká yukuna.
Jesús wakáraꞌaka jiñá pechu jáchoꞌoko pajluwaja manumarú eꞌiyayá yukuna marí
32 Kaja mejluruna iꞌimakaño penájemina paꞌañó. Nayámojo ajopana piño iphaño Jesús nakú. Nawaꞌa najwaꞌató pajluwa jiñá pechu iꞌimakare eꞌiyá, nakojé unká méñoꞌojo ripuraꞌaló.
33 Jesús wakáraꞌaka jiñá pechu jáchoꞌoko reꞌiyayá ejomi, palá ripuraꞌakó. Piyuke ramájeño kemaño:
—¡Meke piyuke wani laꞌaká Jesús! Unká wani wamala apú laꞌaká ñaké maare Israel lakénami teꞌeré nakú.
34 Eyá fariséona nakiyana kemaño rinaku:
—Jiñana wakáraꞌajeri aꞌarí riñathé, riwakáraꞌakaloje jiñana pechu jáchoꞌoko neꞌiyayá.
Jesús weꞌepika ripurákaꞌalo jemaꞌajeño muꞌují yukuna marí
35 Jesús jaꞌapákeri apú pajimila ewá, apú pajimila ewá ke, newíñaꞌatakana nakú nawakákaꞌalo ñakarelana chuwá. Riꞌimaké Tupana iꞌimataka inaꞌuké kapichákajo liyá yukuna najló, raú neꞌemakáloje rijwaꞌatéjena nakiyana penaje. Ritejmoꞌótake kaja natámina piyukeja nayaripune liyá. Kewini yajwé amájeño neꞌemajika, keꞌiyapejé nayaripune iꞌimajíkale.