Inaana aꞌaká Jesús ñathé yukuna marí
8
Jesús jaꞌapákeri pajimila kajrú nojé eꞌiyowá; raꞌapake kaja pajimila kapajé nojé eꞌiyowá. Ilé ke raꞌapájika Tupana iꞌimataka iná kapichákajo liyá yukuna iꞌimakana nakú najló, raú neꞌemakáloje rijwaꞌatéjena penaje. Iyamá iphata jiꞌimaji nakojé kele (12) raꞌapiyatéjena iꞌimaká waꞌaté raꞌapake.
San Lucas 8.1-21
2 Inaana nakiyana jaꞌapákeño kaja rijwaꞌaté. Riwakáraꞌakarena eꞌiyayá jiñana pechu jáchoꞌoko penájemiruna neꞌemaká. Ñaké kaja ajopana ritejmoꞌótakarena nakiyana iꞌijnaká rijwaꞌaté. María Magdalena iꞌimayo kaja najwaꞌaté, Jesús wakáraꞌakare eꞌiyayá iyamá kuwáꞌata kele jiñana pechu jáchoꞌoko penájemiru ruꞌumaká.
3 Apaꞌawelo iꞌimayo Juana, Cuza yajalo ruꞌumaká. Cuza iꞌimari Herodes waꞌaté jápajeri. Apaꞌawelo iꞌimayo Susana. Ajopana iꞌimaño kaja najwaꞌaté, chaꞌapá neꞌemaká. Neká piyukeja aꞌakeño Jesús ñathé. Naꞌaké rijló, raꞌapiyatéjenajlo waꞌaté, aꞌajnejí mapeja napechu keja.
Nakaje icha ijí ejátajeri yukuna marí
4 Apú pajimila eyá, apú pajimila eyá ke inaꞌuké iphájika Jesús nakú. Kajrú cha nawakako rinakojé rejé. E riꞌimá najló yuku rewíñaꞌatakaloje neká Tupana nakú. Rimá najló:
5 “Pajluwaja inaꞌuké iꞌijichari nakaje icha ijí ejátaje. Teꞌerí mojyoꞌokéjami eꞌiyowá riꞌijichá rejátaje. Rikaꞌakana nakú riꞌijichá. Richa ijí rikiꞌichaje nakiyana jaꞌacharo iñeꞌepú chojé. Richuwá inaꞌuké jaꞌapíchaño. Neká payakátaño richá, eyá kupiraꞌaphana iphíchaño kaja rajmíloꞌotaje piyuke.
6 “Apú richa ijí rikiꞌichaje nakiyana jaꞌacharo jipa nakojé. Wejápaja teꞌerí iꞌimichákale rinaku aú kiñaja reñoꞌochákajla, eꞌiyonaja kamú meríyaꞌatiya riká kiñaja, unkale raꞌapare iꞌimalacha palá.
7 Eyá apú richa ijí rikiꞌichaje nakiyana jaꞌacharo puꞌuwareni jimichi eꞌiyajé. Riká jimichi iphíchari nakaje icha ijí rejátiyaje waꞌaté. Riká tawáñaꞌichari riká, raú riwajriꞌichá reꞌiyajé, unká rarúkaꞌalacha.
8 Eyá apú richa ijí rikiꞌichaje nakiyana jaꞌacharo palani teꞌerí eꞌiyajé. Ilé iphíchari palá; palá kaja ritawáꞌichako; palá kaja rarúkiꞌichaka; keꞌiyapé rarúkiꞌichaka. Reꞌiyajé aꞌachari cien kaꞌalá ewá richawá”.
Ilé ke Jesús iꞌimaká yuku najló, rejomi rimá kaphí remaꞌajéñojlo:
“Jemaꞌá palá, aꞌá inakojó riyukuna”.
Jesús kemari neꞌiyajénajlo nájeka riꞌimaká yuku najló. Riyukuna marí
9 Riñapátakaja najló yuku iꞌimakana ejomi, raꞌapiyatéjena kemaño Jesusjlo:
—¿Meke kemakánaka chi kele yuku piꞌimichá yukuna wajló?
10 Rimá najló:
—Ijló Tupana aꞌarí puꞌuwaká nakaje meꞌechú iꞌimakare, iweꞌepíkaloje rinakojé penaje. Eyá ajopánajlo meꞌechú joꞌó riká meꞌetení. Yuku aú nowíñaꞌata neká meꞌetení. Nemaꞌajla riyukuna, eꞌiyonaja unká naweꞌepílajla nakaje namákare nakojé. Unká kaja naweꞌepila meke kemakánaka riká.
11 E rimá najló: “Marí ke kemakana kele yuku nuꞌumichaje ijló: Nakaje icha ijí rejátakare teꞌerí jimawa, Tupana purákaꞌalo yukuna naꞌapátakare inaꞌukejlo, ke riká.
12 Nakaje icha ijí iñeꞌepú chojé jaꞌakaro, ke kaja Tupana purákaꞌalo neꞌiyajénajlo. Nemaꞌá riyukuna, eꞌiyonaja kalé kiñaja Jiñá Chiꞌinárikana kaꞌaká napechu nakiyá Ripurákaꞌalo nemaꞌakare, napechu iꞌimaká piyá kaphí richojé neꞌematájeri penaje.
13 “Eyá richa ijí jipa wejápaja teꞌerí iꞌimakare nakojé jaꞌakaro, ñaꞌarí panaku meketánaja riphaka ejomi, ke kaja neꞌiyajena jemaꞌañó palá Tupana purákaꞌalo. Puꞌují napechu laꞌakó raú. Meketánaja kalé napechu palá rinaku, eꞌiyonaja namákale chapú kaje yajwé, nayurí naliyó riká unkale napechu iꞌimalá kaphí richojé.
14 “Eyá richa ijí nakiyana puꞌuwareni jimichi eꞌiyajé jaꞌakaro, iphari meketana iꞌimajemi. Eꞌiyonaja riwajraꞌá reꞌiyajé, raú unká rarúkaꞌala. Ke kaja neꞌiyajena Tupana purákaꞌalo jemaꞌajeño. Nakeñoꞌó raꞌapiyá jemaꞌakana palá, eꞌiyonaja kajrú naꞌaká nanakojó nakaje marí ejaꞌawá chu iꞌimakare. Ñóꞌope liñeru, leꞌejepelaji, kaje maká nawata najluwa. Riká naweꞌepí natukumó. Ilé ke péchuruna neꞌemakale, unká naꞌalá nanakojó Tupana purákaꞌalo, nalaꞌakáloje palá raꞌapiyá iꞌimakana aú.
15 “Eyá richa ijí nakiyana palani teꞌerí eꞌiyajé jaꞌakaro, jeñoꞌorí palá. Inaꞌuké nakiyana ke kaja riká. Nemaꞌá Tupana purákaꞌalo; naweꞌepí kaja meke kemakánaka riká; naꞌá kaja nanakojó riká, raú nalaꞌá palá raꞌapiyá iꞌimakana aú”, ke Jesús jewíñaꞌataka neká.
Iná kamaré yukuna marí
16 Rimá piño najló: “Iná lukúnaꞌakachu iná kamaré, unká iná yáꞌatala riká iꞌichí lájmaꞌatakeja jaꞌapejé. Unká kaja iná yáꞌatala riká iná camané jaꞌapejé. Yenoje iná yáꞌata riká, pají chojé mujlúkaꞌakaño amákaloje piyukeja palá rikamaré chojé.
17 Re Tupana purákaꞌalo nakiyana, meꞌetení puwichani ke rinakojé weꞌepíkana inaꞌukejlo, rejomi kalé naweꞌepeje palá rinakojé.
18 “Ñakele jemaꞌá palá Tupana purákaꞌalo. Aꞌajeño nanakojó riká, rilaꞌajé pechu palá, naweꞌepíkaloje richaje, richaje ke, rinakojé. Eyá unká aꞌalájeño nanakojó riká, pechu nakiyá rikaꞌajé wejápaja naweꞌepíkare rinakojé, napechu iꞌimakale nanakuwá: ‘Waweꞌepíkare riyukuna’, ke, eꞌiyonaja unká ñaké kalé napechu nakú riká”, ke rimaká najló.
Jesús jaló, rejena waꞌaté iꞌijnaká ramaje yukuna marí
19 Jesús jaló, rejena waꞌaté, iꞌijnaño richaje rijwaꞌaté puraꞌajó. Kajrú inaꞌukena nakojé unká méñoꞌojo nephala rinaku.
20 E pajluwa kemari Jesusjlo:
—Paló iphíchayo pejena waꞌaté. Nawata pamákana, raú nawáꞌicha pimaná.
21 Rimá najló:
—Jemaꞌañó nupurákaꞌalo, eyá laꞌañó kaja nakaje Tupana wakáraꞌaka ke, neká noló, eyá nojena ke nojló —ke rimaká najló.
Jesús wakáraꞌaka karená jaꞌapaka yukuna marí
22 Muní ke Jesús witúkaꞌaka wapuru chojé raꞌapiyatéjena waꞌaté, rimá najló:
—Iꞌijná wakuwáꞌachi kaéja paꞌanajo pitá.
Raú nakuwaꞌa.
San Lucas 8.22-39
23 Nakuwáꞌaka ketana Jesús kamátako. Rejéchami manaꞌí chiyó karená iꞌimaká nachá kaphí wani. Riká yokoꞌorí kajrú juni, raú kajrú juni jamoꞌokó wapuru chojé, yewíchaja nejaká.
24 Wajé wani nakeñoꞌoká ejakaje ee, napota riká, nawíyoꞌoko nemaká rijló:
—Wewíñaꞌatajeri, ¡wejaká, chuwaka wakapichako junápeje!
Raú Jesús jáchoꞌoro, rimá karená, eyá juni yokólajlo:
—¡Paꞌapá!
Raú karená jaꞌapari, waꞌató ke unká juni yokoꞌoló. Manaꞌija riꞌimaká piño rapumí chuwá.
25 E rimá raꞌapiyatéjenajlo:
—¿Naje chi unká wani ipechu iꞌimalá kaphí nochojé?
Keroꞌokajo nakú joꞌó neꞌemaká, e nemá pajlokaka:
—¿Na kaꞌajná kari? Ripurákaꞌalo aú ja riwakáraꞌa karená, eyá juni yokola waꞌató jaꞌapaka. Palá kaja remaꞌaká raꞌapiyá —ke nemaká.
Jesús wakáraꞌaka jiñana pechu jáchoꞌoko inaꞌuké eꞌiyayá yukuna marí
26 E kaja nephá paꞌanajo pitá, Gerasa teꞌeré ejo. Galilea teꞌeré lokoꞌopani riꞌimaká.
27 Rejé narúkaꞌo. Jesús jáchoꞌoro wapuru chiyá, rejéchami pajluwa inaꞌuké iphaka rinaku, pajimila eyaje riꞌimaká. Kaja jupi cha jiñana pechu iꞌimaká reꞌiyá, raú richiraꞌakó maꞌarumakáruja. Unká kaja riꞌimaké pají chu. Támijimina kaꞌakelana ewaja riꞌimaké.
28 Riká penájemi iphari Jesús nakú. Ramaka aú Jesús, ritáraꞌo riꞌirúpachi aú rijimaje. Rawíyoꞌoko rimaká rijló:
—¿Naje pikawílaꞌa nunaku? Tupana, jeꞌechú churí iꞌirí piká. Jesús piká. Pijló numá, pilaꞌaniña nuká chapú wani meꞌetení.
29 Ilé ke rimaká Jesusjlo, riká kemakale jiñá péchujlo ráchoꞌokoloje reꞌiyayá penaje. Pulapé jiñá pechu patajika kele inaꞌuké. Yurí wani riꞌimajika raú, ñakele naꞌá ajopana ramájeri penaje. Nepoꞌotake riká kureti aú riyátheꞌela nakiyá, riꞌimá nakiyá waꞌató, eꞌiyonaja rimataꞌatake rinakojó riká. Rejomi jiñá pechu wáꞌake riká ají ke desierto chojé.
30 E Jesús kemari rijló:
—¿Na pií?
—Legión nuí.
—Piwakáraꞌaniña weká kawakala, ulawí unká tajákaꞌalo iꞌimalare chojé.
32 Aꞌajnare ke kajrú jeꞌeruna pirakana chiraꞌakó yenuri nakuwá naꞌajnewá kulákana nakú. Mawó jiñana pechu kemaká Jesusjlo:
—Aꞌajnáruna jeꞌeruna eꞌiyajé piwakáraꞌa weká.
—Ñaké riká —ke Jesús kemaká najló.
33 Raú jiñana pechu jáchoꞌoño reꞌiyayá, jaꞌañó jeꞌeruna pirakana eꞌiyajé. Naꞌakó aú neꞌiyajé, jeꞌeruna jechoꞌoñó yenuri jiꞌiwátaje, reyá naꞌó ají ke kaéja jakojé. Rejeja nakapichó piyukeja junápeje.
34 Nalamáraꞌajeño penájemina amaka aú nakapichako, neñaó reyá. E neꞌemá riyukuna rewá iꞌimakáñojlo, pajimila eyájenajlo waꞌaté.
35 Raú neꞌejná rejo, iphaño Jesús nakú, amaño kele inaꞌuké jiñana pechu iꞌimakare eꞌiyá penájemi yáꞌako Jesús jiꞌilá. Kaꞌarumakani riꞌimaká, palá kaja ripechu iꞌimaká. Ilé ke namaka aú riká, nakeroꞌó.
36 Re iꞌimakaño amaño maapami ke Jesús wakáraꞌaka jiñana pechu jáchoꞌoko reꞌiyayá. Neká penájena iꞌimaño wajé iphákañojlo riyukuna.
37 Piyukeja Gerasa teꞌeré eyájena keroꞌokó Jesús piyá kajrú, raú mawó nemaká rijló:
—Páchoꞌo wateꞌeré nakiyá.
Raú riwitúkaꞌa wapuru chojé ripaꞌakóloje.
38 Rejéchami riwakáraꞌakare eꞌiyayá jiñana pechu jáchoꞌoko penájemi, wátaka mawó rijwaꞌaté iꞌijnakana, eꞌiyonaja rimá rijló:
39 —Pipaꞌó piñakaré ejo piꞌimakáloje mékeka palá wani Tupana liꞌichaka pinaku yukuna najló rewá.
Raú ripaꞌó, iꞌijnari piyuke pajimila nakuwá riyukuna iꞌimakana nakú najló.
Jesús makápoꞌoka Jairo itu yukuna marí
40 E kaja Jesús kuwáꞌari piño rapumí chuwá ají ke kaéja paꞌanajo pitá. Re kajrú inaꞌukena iꞌimaká riwátakana nakú. Puꞌují napechu iꞌimaká namaka aú riká.
San Lucas 8.40-56
41 E manaꞌí chiyó Jairo iphari Jesús nakú. Nawakákaꞌalo ñakarelana chiyá wakáraꞌajeri riꞌimaká. Riká iphari Jesús nakú, e rijlámaꞌo Jesús jiꞌimá nakojé. Mawó rimaká rijló:
—Pilaꞌá nojló nakaje. Piꞌijná nujwaꞌaté nuñakaré ejo, pitejmoꞌótachi nutu nojló.
42 Akíchajeru wani ruká. Unká apaꞌawelo nutu iꞌimalá, rukaja kalé pajluwájaru. Iyamá iphata jiꞌimaji nakojé kele jarechí cha ruká.
Raú Jesús iꞌijnari rijwaꞌaté. Kajrú ajopana iꞌijnaká rápumichu, unká meke laꞌajé raꞌapala palá nanakojé.
43 Najwaꞌaté apaꞌawelo jaꞌapayo kaja. Iyamá iphata jiꞌimaji nakojé kele (12) jarechí ketana cha ruꞌumaká rutami. Jirá jaꞌapákeri runakiyá. Rukaꞌaké piyuke ruliñérute rupujánaꞌakana wemí nakojé, eꞌiyonaja ñakeja ruꞌumajíkano.
44 Ajopana waꞌaté roꞌopá Jesús ápumichu. Inaꞌukena jiwami chiyaja rujapa raꞌarumaká jiꞌimá nakú rupechu iꞌimakale: “Raꞌarumaká nakú jápakana aú ja nutejmoꞌotajo”. E rujapa rinaku, rejeja jirá yurí runakiyá jaꞌapákana.
45 E Jesús kemari najló:
—¿Na pajaká jápichari nunaku?
—Unká nuká kalé —kewaja nemaká piyukeja.
Eyá Pedro kemari rijló:
—Wewíñaꞌatajeri, kajrú inaꞌukena jaꞌapaka pijwaꞌaté, eta naje chi pimá: “¿Na jápichari noꞌorumaká nakú?”, ke.
46 Eꞌiyonaja Jesús kemari najló:
—¿Na pajaká jápichayo nunaku? Nuweꞌepí nutejmoꞌótiyaka pajluwájaru inanaru nupechu aú.
47 Jápayo rinaku pechu iꞌimá: “Kaja riweꞌepicha mékeka nuká”, ke. Kajrú rukurúkaka, waꞌaté rutáraꞌo ruꞌurúpachi aú rijimaje. Re piyuke iꞌimakaño awaꞌá ruꞌumá riyukuna rijló nájeka rujápicha raꞌarumaká nakú. Rumá kaja najló mékeka rutejmoꞌotíyako raú.
48 E Jesús kemari rojló:
—Kaja pitejmoꞌotiyo pitami kaje chiyá, pipechu iꞌimakale kaphí nochojé. Chuwa piꞌijná palá kaꞌajnó.
49 Ilé ke rimaká rojló eꞌiyowá ke, apú iphaka nanaku, Jairo ñakaré chiyaje riꞌimaká. Rimá Jáirojlo:
—Kaja pitu takiꞌichá maapami, ñakele unká na penaje kalé pikawílaꞌa wewíñaꞌatajeri nakú ruchaya.
50 Jesús jemaꞌarí mékeka rimaká rijló, raú rimá Jáirojlo:
—Piwó kaꞌaniño, pilaꞌá pipéchuwa kaphí nochojé. Pitu iꞌimajeyo piño.
51-53 E naꞌapá ají ke riñakaré ejo. Unká Jesús yurila ajopana mujlúkaꞌaka rijwaꞌaté richojé. Pedro, Santiago, Juan, roraꞌapami, rolomi, keleja riyurí mujlúkaꞌaka rijwaꞌaté. Kajrú nalaꞌaká naminano. E rimá najló:
—Iyániña ruká. Unká rutakaꞌalacha, rukamátakoja.
Raú neꞌechá rinaku naweꞌepíkale kaja rutakiꞌichaka.
54 E rimujlúkaꞌa ukapú támijimi iꞌimakare chojé. Riphá támijimi awaꞌajé. Ripatá rutami ruyátheꞌela nakiyá, rimá támijimijlo:
—Yuwaló, páchoꞌo.
55 Raú ja róchoꞌo. E rimá ajopánajlo:
—Aꞌá rojló aꞌajnejí, rojñachi.
56 Ruchiꞌiná pechu iꞌimá: “¡Meke piyuke wani laꞌalaka riká!” E rimá najló:
—¡Pa! Iꞌimaniña riyukuna ajopánajlo.