Jesús lamáꞌataka kaja yátheꞌela aꞌamitakó rijló yukuna marí
3
Apú watánaꞌakaje iꞌimaká wakajé piño, Jesús mujlúkaꞌari nawakákaꞌalo ñakarelana chojé. Re rewíñaꞌata neká Tupana nakú. Re kaja najwaꞌaté pajluwaja iꞌimari, kaja yátheꞌela aꞌamitakó rijló.
San Marcos 3.1-19
2 Re kaja ajopana iꞌimaño Jesús kejílaꞌakana nakú, namákaloje e kaꞌajná rilamáꞌatajika rijló riyátheꞌela watánaꞌakaje jená wakajé, unká kaꞌajná. Rilamáꞌatajika ee riká riwakajé, nemakáloje rinaku: “Puꞌuwaré laꞌajerí riká”, ke.
3 E Jesús kemari yátheꞌela aꞌamitárojlo:
—Páchoꞌo majó wajimajo.
4 E rimá ajopánajlo:
—¿Meke chi Tupana purákaꞌalo lanaꞌakéjami kemaká watánaꞌakaje wakajé nakú? ¿E chi palani iná laꞌaká palá apú nakú riwakajé japi? ¿Chapú kaꞌajná chi laꞌakaná palani riwakajé japi? ¿E chi palani iná iꞌimataka inaꞌuké kapichákajo liyá riwakajé japi? ¿E iná yurika kaꞌajná inaꞌuké takaꞌaká mapeja riwakajé japi?
Eꞌiyonaja unká naꞌajipalá rijló.
5 Raú Jesús yakáꞌaro nachaje yuríkeꞌela. Kamuꞌují ripechu laꞌakó raú najwaꞌaté, ijnú nawátakale inaꞌuké muꞌují weꞌepíkana. E rimá ritámijlo:
—Piyaꞌatá nojló majó piyátheꞌela.
Raú riyaꞌataka rijló riká ejéchami, riyátheꞌela palaꞌakó rijló palá.
6 Ilé ke namaka aú, fariséona nakiyana jáchoꞌoño nawakákaꞌalo ñakarelana chiyá napuraꞌakóloje Herodes waꞌatéjena waꞌaté Jesús nókana nakú, ritejmoꞌótakale riká watánaꞌakaje iꞌimaká wakajé pachá.
Kajrú nawakako kaéja turenaje yukuna marí
7-8 E Jesús iꞌijnari raꞌapiyatéjena waꞌaté ají ke kaéja turenajo. Kajrú wani inaꞌukena iꞌijnaká rijwaꞌaté rejo. Marí kele pajimila eyájena neꞌemaká: Galilea, Judea, Jerusalén, Idumea, Jordán paꞌanajo pitá, Tiro, Sidón, kaje eyájena neꞌemaká. Kajrú wani neꞌemaká iꞌijnaño ramaje, nemaꞌakale piyuke nakaje rilaꞌakare yukuna.
9 Kajrú nawakako Jesús nakojé, raú rimá raꞌapiyatéjenajlo:
—Ijiꞌichá nojló wapuru majó, namajraꞌaká piyá nuká.
10 Kaja ritejmoꞌota kajrú natámina iꞌimaká, raú ajopana natámina iꞌimakaño iꞌijnaño kaja rejo najápakaloje rinaku, raú natejmoꞌotákoloje penaje.
11 Jiñana pechu iꞌimakárena eꞌiyá iꞌimaño kaja re. Jiñana pechu amaka aú Jesús, inaꞌuké neꞌemakárena eꞌiyá táraꞌakeño neꞌerúpachi aú rijimaje. Nawíyoꞌoko nemájika rijló:
—Piká, Tupana iꞌirí.
12 Raú Jesús wakáraꞌari neká kaphí, neꞌemaká piyá riyukuna ajopánajlo.
Jesús iꞌiwapaká iyamá iphata jiꞌimaji nakojé, kele achiñana neꞌemakáloje raꞌapiyatéjena yukuna marí
13 Jesús jáchoꞌoro yenuri jiꞌiwata nakojé. Re riꞌiwapá riwátakarena ajopana eꞌiyayá. Neká iꞌijnaño rawaꞌajé;
14 iyamá iphata jiꞌimaji nakojé kele (12) achiñana neꞌemaká. Najló rimá:
—Iká iꞌimajeño chuwa noꞌopiyatéjena. Chuwa nuwakáraꞌajika iká Tupana yukuna iꞌimajé ajopánajlo, ajopánajlo ke.
15 Nupurákaꞌalo aú iwakáraꞌaje jiñana pechu jáchoꞌoko inaꞌuké eꞌiyayá —ke rimaká najló.
16 Marí kele riꞌiwapakárena raꞌapiyatéjena penaje iꞌimaká: Simón, rejomi raꞌá rií Pedro, ke.
17 Apú ií iꞌimari Santiago, eyá riꞌiwapá kaja reꞌewé Juan. Zebedeo yaní neꞌemaká. Jesús aꞌarí neí Boanerges ke. “Inaꞌuké katejmúruna, pichaní ke katejmuka”, ke kemakana neí iꞌimaká napuraꞌakó chu.
18 Eyá ajopana ií iꞌimari: Andrés, Felipe, Bartolomé, Mateo, Tomás, Santiago. Apú Santiago, Alfeo iꞌirí riꞌimaká. Eyá Tadeo, Simón, kele. Riká Simón iꞌimari cananeo nakiyana.
19 Eyá kaja penaje Judas Iscariote. Nenoka Jesús wakajé, riká wáꞌari ripinana riꞌimaká ejo, napatakáloje riká penaje. Kele neꞌemaká.
Neꞌiyajena kemaño Jesús nakú: “Jiñá pechu waꞌateje riká”, ke. Riyukuna marí
20 Rejomi Jesús iꞌijnari piño pají chojé raꞌapiyatéjena waꞌaté. Richape piño kajrú inaꞌukena awakako rejé Jesús chaje. Nanakojé unká méñoꞌojo riká, raꞌapiyatéjena waꞌaté, ajñala naꞌajnewá.
San Marcos 3.20-35
21 Riká yukuna iphari rejena nakú, raú neꞌejná ripaꞌataje. Reꞌiyowá ke yuku iꞌimaká rewá: “Kaja rewíꞌicho”, ke.
22 Tupana purákaꞌalo nakú jewíñaꞌatajeño, Jerusalén eyá iphákaño, kemaño rinaku: “Beelzebú, jiñana wakáraꞌajeri pechu aú riwakáraꞌa jiñana pechu jáchoꞌoko inaꞌuké eꞌiyayá”, ke.
23 E Jesús wáꞌari najló neꞌejnakáloje rawaꞌajé penaje. Riꞌimá marí yuku najló rewíñaꞌatakaloje neká raú, rimá: “¿Meke laꞌajé chi jiñana wakáraꞌajeri Satanás kaꞌajla ripechu inaꞌuké eꞌiyayá?
24 Pajluwa waꞌatéjena nókakelo nekámika ke pajwaꞌatéchaka, nakapichátakajla kajrú pekowáaka.
25 Ñaké kaja iná ejena nókakelo pajwaꞌatéchaka, nakapichátajla kaja pekowáaka.
26 Ñaké kaja riká Jiñá Chiꞌinárikanajlo. Rijwaꞌatéjena piyuke jiñana pechu. Riwakáraꞌakela náchoꞌoko inaꞌuké eꞌiyayá, rilaꞌajla chapú rikó. Rejéchami unká meke rilaꞌalajla, unkale rijwaꞌatéjena iꞌimalajla”.
27 Rimá najló: “Unká na kalé mujlúkaꞌajla katejmuni inaꞌuké ñakaré chojé rinane ñaꞌajé riliyá. Apú richaje katejmuka iphákela rinaku, repoꞌotajla riká. Rejomi rijñaꞌatajla rinane riliyá”.
Ilé ke Jesús iꞌimaká yuku najló, naweꞌepíkaloje raú richáꞌataka Jiñá Chiꞌinárikana. Rimá piño najló:
28 “Tupana amaro inaꞌuké chaje piyukeja puꞌuwaré nalaꞌakare liyá, puꞌuwaré napuraꞌakaro liyá waꞌató.
29 Eyá puꞌuwaré nemakare Tupana Pechu nakú, riká liyaja kalé unká wani ramálajo nachaje. Ñaké riꞌimajika reyá aꞌajná ñoꞌojó iꞌimajíkañojlo”.
30 Ilé ke Jesús kemaká najló, Tupana purákaꞌalo nakú jewíñaꞌatajeño puraꞌakole puꞌuwaré rinaku. Nemaké rinaku: “Jiñá pechu reꞌiyá iꞌimakare aú riwakáraꞌa jiñana pechu jáchoꞌoko neꞌiyayá”.
Jesús jaló, rejena waꞌaté, iꞌijnaká ramaje yukuna marí
31 Jesús iꞌimari kajrú inaꞌukena waꞌaté phachu. E raló, rejena waꞌaté, iphaño pají kópeje. E nemá apujlo:
—Pimá rijló, riꞌijnachi majó.
32 Inaꞌuké phachu iꞌimakaño kemaño Jesusjlo:
—Paló iphíchayo pají kópeje, pejena waꞌaté. Nawata pijwaꞌaté puraꞌakano.
33 Raú rimá najló:
—¿Mékajena chi noló, nojena waꞌaté?
34 E riyakaꞌo rawaꞌá yáꞌakaño tujlá ke chaje. Rimá najló: