2 Iyamá iphata jiꞌimaji nakojé (12) kele riyaweꞌená iꞌimaká. Marí kele neꞌemaká: Simón. Apú rií Pedro. Andrés, Simón eꞌewé riꞌimaká. Eyá Santiago, reꞌewé Juan waꞌaté, Zebedeo yaní neꞌemaká.

3 Eyá Felipe, Bartolomé, Tomás, Mateo, liñeru ñaꞌajeri neꞌemakánajlo penájemi riꞌimaká, eyá apú Santiago, Alfeo iꞌirí riꞌimaká. Eyá Tadeo,

4 Simón, cananeo nakiyana riꞌimaká. Eyá kaja penaje Judas Iscariote. Nenoka Jesús wakajé, riká wáꞌari ripinana riꞌimaká ejo, napatakáloje riká penaje. Keleja riꞌiwapá rijluwa riyaweꞌená penaje iꞌimaká.

5 Jesús wakáraꞌaka riyaweꞌená iꞌijnaká yámona, rimá najló: “Iꞌijnaniña unká judíona kalé iꞌimakaño teꞌeré ewá. Imujlúkaꞌaniña kaja pajimila Samaria teꞌeré ejo.

6 Palani iꞌijnaká Israel lakénami chaje, kapichájeño penaje iꞌimakaño neꞌemakale.

7 Iꞌijná, iꞌimichá najló riyukuna: Yewicha riphaka rená chojé Tupana iꞌimakáloje inaꞌuké nakiyana wakáraꞌajeri.

8 Itejmoꞌótaje natámina; imakápoꞌotaje kaja takaꞌakaño; napona patákaꞌatakarojlo ipalaꞌataje napona; iwakáraꞌaje kaja jiñana pechu jáchoꞌoko neꞌiyayá. Ilé ke ilaꞌajika nupurákaꞌalo aú. Mapeja noꞌoká ijló péchuji, unká riwemí aú kalé. Ñakele unká kaja imalaje najló naꞌakáloje ijló nakaje ilaꞌajíkare najló wemí.

9 “Mapeja iꞌijnajika, unká ijñaꞌalaje ijwaꞌató liñeru.

10 Unká kaja ijñaꞌalaje ijwaꞌató itulané. Pajluwaja aꞌarumaká chuja iꞌijnajé. Unká kaja ijñaꞌalaje jiꞌimaꞌulaji, ikutiware, kaje ijwaꞌató. Nakaje ilaꞌajíkare najló wemí, naꞌajé ijló aꞌajnejí.

11 “Iphájika pajimila ejo wakajé, ikulaje palájneꞌeke inaꞌuké, iyuríkoloje rijwaꞌaté riñakaré chu. Rijwaꞌateja iyurejo re iꞌimajika ketana.

12 Imujlúkaꞌajika ee nañakaré chojé, ajalaka richu iꞌimakaño. Imá Tupánajlo rilaꞌakáloje palá napechu.

13 Palá péchuruna neꞌemajika ee, nakaje imájikare nakú najló iꞌimajeri ñaké najló. Eyá unká paala péchuruna neꞌemajika ee, imá Tupánajlo rilaꞌaká piyá neká palá.

14 “Eyá unkájika ee nañakaré chiyájena wátala iká, unká kaja kaꞌajná nawátalaje ipurákaꞌalo jemaꞌakana. E itakaꞌajé jiꞌimaꞌulá nakiyá muꞌupé najimaje, raú naweꞌepíkaloje puꞌuwaré laꞌajeñoka neká, unkale nawátala ipurákaꞌalo jemaꞌakana.

15 Tupana wajájika puꞌuwaré laꞌajeñó wakajé, kajrú riwajájika neká, unká wátalaño iká. Riwajaka Sodoma eyájena michuna, eyá Gomorra eyájena michuna waꞌaté iꞌimaká, puꞌuwaré laꞌajeñó wani neꞌemakale, chaje wani riwajájika neká unká wátalaño iká”, ke rimaká najló.

16 E kaja Jesús kemari piño najló: “Jemaꞌá marí: Mayuchéruna iká, eꞌiyonaja nuwakáraꞌa iká chapú péchuruna ejo, ñakele iꞌimá kapechú najwaꞌaté. Ilaꞌá manaꞌija ipéchuwa najwaꞌaté.

17 Ilé ke riꞌimajika ijló, jemaꞌakale noꞌopiyá. Nemaje inaku: ‘Puꞌuwaré laꞌajeñó neká’, ke. Raú nawáꞌaje iká iwakáraꞌajeño ejo. Awakákaꞌalo ñakarelana chu nañaꞌataje iká.

18 Yaꞌajná, ajopana chaje wakáraꞌajeño ejo, nawáꞌaje kaja iká nawajákaloje iká rejo penaje. Noꞌopiyá jemaꞌajeño iꞌimaká jimaje nawajaje iká. Palani ijló ñaké ilaꞌakana, iꞌimakáloje najló nuyukuna rewá. Unká judíona kalé iꞌimakáñojlo iꞌimajé kaja nuyukuna.

19 Nawáꞌajika ee iká iwakáraꞌajeño ejo nawajákaloje iká penaje, iwó laꞌaniño mékeka imájika najló jaꞌapí. Riphájikaja rená chojé ijló ipuraꞌakóloje ichayo penaje ee, Tupana kemaje ijló mékeka imájika najló.

20 Unká ipechu keja kalé imájika najló. Jaraꞌapá Pechu kemájika ijló, ke imájika najló.

21 “Neꞌiyajena aꞌajeño nejena ajopánajlo nenókaloje neká penaje, noꞌopiyá jemaꞌajeño neꞌemakale; neꞌiyajena aꞌajeño kaja nayani ajopánajlo nenókaloje neká; ñaké kaja neꞌiyajena aꞌajika nachiꞌiná ajopánajlo nenókaloje neká, noꞌopiyá jemaꞌajeño neꞌemakale.

22 Kajrú inaꞌukena pechu iꞌimajika chapú inaku, jemaꞌakale noꞌopiyá. Ñaꞌajeri panaku ilé ke nalaꞌajíkare iká, nuꞌumataje kapichákajo liyá.

23 Nalaꞌajika ee iká chapú, iñaajó naliyá pajimila ejo, eyá apú pajimila ejo ke, iꞌimakáloje rewá nuyukuna najló. Unká chiyó iñapata nuyukuna iꞌimakana piyuke Israel teꞌeré nakuwá, wakajé nuphaje majó. Inaꞌuké iꞌimakáloje nupalamane penaje iꞌimaká nuká, paꞌajero piño majó.

24 “Unká meke laꞌajé jewíñaꞌajero pechu iꞌimalajla rewíñaꞌatajeri chaje; unká kaja meke laꞌajé apú waꞌaté jápajeri iꞌimalajla rikariwate chaje.

25 Palá pipechu iꞌimá nakaje pewíñaꞌakaro nakú waꞌaté, pewíñaꞌatajeri pechu ke kaja pipechu iꞌimakale raú. Ñaké kaja apú waꞌaté jápajeri pechu iꞌimajika rikariwate pechu ke kaja. Jewíñaꞌatajeri nuká, iwakáraꞌajeri kaja nuká, nemá nakú: ‘Jiñana pechu wakáraꞌajeri riká’, ke. Ñaké kaja richaje wani napuraꞌajiko inaku puꞌuwaré, nujwaꞌatéjena nakiyana iꞌimakale.

26 “Numá ijló: ikeroꞌoniño inaꞌuké piyá, unká na kalé iꞌimajeri meꞌechuje, unká iná weꞌepílare nakojé. Piyukeja nakaje inaꞌuké laꞌakare iꞌimajika puꞌuwaká.

27 Nakaje numakare nakú ijló wekámika ke, eko iꞌimá riyukuna puꞌuwaká kajrú inaꞌukénajlo.

28 Ikeroꞌoniño inaꞌuké nójeño piyá. Iná napónaja kalé nakapichata, eyá iná pechu unká meke laꞌajé nakapichátalajla. Tupana piyá ikeroꞌó. Riká kapichátarijla iná napona, iná pechu waꞌaté, keraꞌathani unká yakálare chojé, iná takaꞌaká ejomi. Ñakele ripiyá ikeroꞌó.

29 Mawemiru iyamá kupiraꞌaphana wemí, eꞌiyonaja unká natakaꞌalá unkachu jaraꞌapá Tupana yurila natakaꞌaká.

30-31 Kupiraꞌaphana chaje wani íkiꞌika riwátaka iká. Piyukeja wani Tupana weꞌepika nakaje nakojé. Riweꞌepí kaja mekeleka iná wilá iná wílaꞌaru nakú. Ñakele ikeroꞌoniño ajopana inaꞌukena piyá, raꞌakale rinakojó iká”, ke rimaká najló.

32 E Jesús kemari piño najló: “Re kaꞌajná pajluwa nujwaꞌateje, unká apáñaꞌalo noꞌopí ajopana inaꞌukena eꞌiyá. Raú rimá najló nunaku: ‘Rijwaꞌateje nuká’, ke. Ñaké kaja numájika rinaku Noraꞌapá, jeꞌechú chu iꞌimakárejlo: ‘Nujwaꞌateje riká’, ke. Ñaké waja numájika rijló unká michoꞌotálaño nuchaya nakú.

33 Eyá apú nujwaꞌateje kaꞌajná apáñaꞌaro noꞌopí ajopana inaꞌukena eꞌiyá, raú kaꞌajná rimá najló nunaku: ‘Unká rijwaꞌateje kalé nuká’, ke. Ñaké kaja numájika rinaku Noraꞌapá jeꞌechú chu iꞌimakárejlo: ‘Unká nujwaꞌateje kalé riká’, ke. Ñaké waja numájika rijló piyuke michoꞌotaño nuchaya nakú”, ke rimaká najló.

34 E rimá piño najló: “Apala ipechu nunaku: ‘Majó riphá raꞌakáloje wañathé, weꞌemakáloje palá pajwaꞌatéchaka, wapechu iꞌimaká piyá chapú panakuwáaka’, ke. Unká ilé kaje penaje kalé nuphá majó.

35 Apala nupurákaꞌalo jaꞌapiyá jemaꞌakana jimaje kaꞌajná riꞌirí pechu iꞌimajé chapú raraꞌapá nakú; ñaké kaja kaꞌajná rutu pechu iꞌimajé roló nakú chapú. Apala nupurákaꞌalo jaꞌapiyá jemaꞌakana jimaje ruꞌurinó pechu iꞌimajé chapú ruyajneru nakú.

36 Ilé ke kaꞌajná neꞌiyajena iꞌimajika pajwaꞌatéchaka nejena waꞌaté, naꞌakale nanakojó nupurákaꞌalo.

37 “Wátari raraꞌapá kaꞌajná, raló kaꞌajná, nuchaje íkiꞌika, unká meke laꞌajé riꞌimalajla nujwaꞌateje. Wátari riꞌirí kaꞌajná, ritu kaꞌajná, nuchaje íkiꞌika, unká kaja meke laꞌajé riꞌimalajla nujwaꞌateje.

38 Eyá keroꞌoró noꞌopiyá jemaꞌakana piyá, nenoka piyá riká, unká kaja meke laꞌajé riꞌimalajla nujwaꞌateje.

39 Inaꞌuké nakiyana weꞌepiño khaí nanakuwá. Ilé ke weꞌepíkaño nanakuwá khaí, kapichájeño Tupana liyá. Eyá unká weꞌepílaño khaí nanakuwá, neꞌemakáloje nujwaꞌatéjena penaje, iꞌimajeño matajnako nujwaꞌaté jeꞌechú chu.

40 “Palá pechu iꞌimaká noꞌopiyá jemaꞌajeño nakú, pechu palá kaja nunaku. Wátari nuká, wátari kaja wakáraꞌari nuꞌumaká majó.

41 Ilaꞌakachu palá Tupana purákaꞌalo jaꞌapátajeri nakú, palá ilaꞌaká raú. Tupana aꞌajika ripurákaꞌalo jaꞌapátajerijlo riwemí, ke kaja raꞌajika palá ilaꞌakare riká wemí. Ilaꞌakachu nakaje apujlo, palá laꞌajerí riꞌimakale, palá kaja ilaꞌaká raú. Tupana aꞌajika palá laꞌajerijlo rilaꞌakare wemí, ke kaja raꞌajika ijló riwemí.

42 Apala pajluwa laꞌarí apú nakú palá, noꞌopiyá jemaꞌajeri riꞌimakale. Raꞌá kaꞌajná rijló juni ipeꞌélani riꞌirakáloje penaje. Ilé ke rilaꞌakale riká palá, Tupana aꞌajé rijló riwemí”, ke Jesús jewíñaꞌataka raꞌapiyatéjena iꞌimaká.