2 Inaꞌuké wajákelana chu Juan el Bautista iꞌimaká wakajé, remaꞌá piyuke nakaje Jesús laꞌakare yukuna, raú riwakáraꞌa raꞌapiyatéjena nakiyana iꞌijnaká ramaje.

3 Nephaka Jesús nakú ee, nemá rijló:

4 Jesús kemari najló:

5 Eko imá rijló nunaku: “Mejluruna iꞌimakaño liyá raꞌapata mejlukaji, namákaloje palá penaje. Unká meke laꞌajé jaꞌapálaño, ritejmoꞌota kaja naꞌapákaloje palá; napona patákaꞌatakarojlo ripalaꞌatá kaja napona palá; unká jemaꞌalaño liyá raꞌapata kaja meꞌejwíkaji nemaꞌakáloje penaje; támijimina nakiyana rimakápoꞌota kaja; kamuꞌují laꞌakáñojlo riꞌimá Tupana iꞌimataka iná kapichákajo liyá yukuna. Ilé kaje laꞌakana nakú riká.

6 Puꞌují péchuruna unká laꞌalájeño ujwí napéchuwa nuliyá iꞌimajika”, ke imájika Juanjlo nunaku.

7 E napaꞌó. Rejomi Jesús kemari ripurákaꞌalo jemaꞌajéñojlo Juan nakú: “Iká iꞌijnakeño desierto ejo ripurákaꞌalo jemaꞌajé. Unká iꞌijnaké rejo, amákaloje iyamá chuwá péchuri penaje, unká iyamá chuwá péchuri kalé riꞌimakale.

8 ¿Amákaloje palá aꞌarumakari penaje chi iꞌijnaké rejo? Unká kaja palá aꞌarumakari kalé riꞌimaká. Kaja iweꞌepí palá mékajenaka palá aꞌarumakáruna. Nawakáraꞌajeño ñakaré chiyájena aꞌarumaká palá nojé.

9 Eta, ¿naje chi iꞌijnaké rejo ramaje? ¿Amákaloje Tupana purákaꞌalo jaꞌapátajeri penaje chi iꞌijnaké rejo? Riká joꞌó riꞌimaká. Ajopana, Tupana purákaꞌalo jaꞌapátajeño michuna iꞌimaká, chaje wani riká.

10 Tupana purákaꞌalo lanaꞌakéjami kemari rinaku:

11 Rimá piño najló: “Jemaꞌá marí: Marí ejaꞌawá chu unká na apú iꞌimalaje cháꞌatajeri Juan, riꞌimakáloje richaje penaje. Eyá jeꞌechú chu naꞌapejé wani iꞌimaká nakiyana iꞌimajeri Juan chaje.

12 “Juan iꞌimaká Tupana yukuna inaꞌukejlo wakajé, eyá maárejecha, wechi kajrú inaꞌukena wátaka Tupana waꞌatéjena iꞌimakana. Napechu lokópaꞌala nalaꞌá nakaje, neꞌemakáloje rijwaꞌatéjena penaje.

13 Tupana purákaꞌalo jaꞌapátajeño michuna, eyá Moisés michú, kele lanaꞌañó riyukuna iꞌimaká. Nemá: ‘Riká iꞌimajeri inaꞌuké wakáraꞌajeri penaje’, ke nemaká Juan nakú, unká chiyó riꞌimá.

14 Tupana kemari kaja rinaku: ‘Nuwakáraꞌaje piño majó nupurákaꞌalo jaꞌapátajeri Elías’. Juan el Bautista nakú rimá Elías, ke iꞌimaká.

15 Keꞌejwiruna iꞌimajika ee, aꞌá inakojó ilé numakare nakú”.

16 Rimá kaja najló: “Marí ke inaꞌuké meꞌetení iꞌimakaño: Yuwaná yáꞌaño leꞌejepelaji ñakarelana chu kátakajo nakú, keja neká. E nawaꞌá iꞌimakaño, najwákeꞌenajlo nemá:

17 ‘Waphoꞌó ijló kewirí chojé iꞌimaká, eꞌiyonaja unká arápaꞌala. Wataní kaja ijló jemakaji iꞌimaká, eꞌiyonaja unká ipechu laꞌaló kamuꞌují remaꞌakana aú’, ke nemaká najló”.

18 “Juan iphari majó iꞌimaká, riꞌitakó raꞌajné liyá ripechu iꞌimakáloje Tupana nakuja. Unká kaja riꞌiraké nakaje jalá amúraꞌatakanami, eꞌiyonaja imaké rinaku: ‘Jiñá pechu reꞌiyá’, ke.

19 Eyá nuká iphari majó inaꞌuké iꞌimakáloje nupalamane penaje. Ajñaka aꞌajnewá, ke kaja nojñaka noꞌojnewá. Ñaké kaja nuꞌuraká nakaje jalá amúraꞌatakanami, raú imá nunaku: ‘Kawaleꞌeké riká ta; iꞌirakachi kaja riká; unká inaꞌukélaruna wákeꞌewe kaja riká; liñeru ñaꞌajeño neꞌemakánajlo wákeꞌewe kaja riká’, ke imaká nunaku. Eꞌiyonaja iná weꞌepí nakaje Tupana laꞌakare jáchoꞌojiko palá”, ke Jesús kemaká najló.

20 Kajrú Jesús laꞌajika nakaje pajimila ewá Tupánaja kalé weꞌepíkare laꞌakana, eꞌiyonaja unká rewájena pajnoꞌotake napéchuwa, puꞌuwaré nalaꞌakare liyá, raú rakhaꞌá namaná marí ke:

21 “Chapú wani nakaje iꞌimajika pajimila Corazín eyájenajlo, ñaké kaja riꞌimajika pajimila Betsaida eyájenajlo. Kajrú namaka nulaꞌaká nakaje rewá Tupana Pechu aú, rikaja kalé weꞌepíkare laꞌakana, eꞌiyonaja unká nemaꞌalá noꞌopiyá. Unká kaja napalaꞌatala napéchuwa, puꞌuwaré nalaꞌakare liyá. Tupana laꞌakela ñaké kaja nakaje pajimila Tiro ewá, pajimila Sidón ewá waꞌaté, kajrú rewájena pajnoꞌotákajla napéchuwa, puꞌuwaré nalaꞌakare liyá, riká ejo. Naꞌajla nanakuwá puꞌuwaré nojé aꞌarumakaji. Nakaꞌajla kaja nachó paꞌilá, raú inaꞌuké weꞌepíkaloje kaja napajnoꞌotaka napéchuwa, puꞌuwaré nalaꞌakare liyá, Tupana ejo.

22 Tupana wajájika puꞌuwaré laꞌajeñó wakajé, riwajaje richaje wani Corazín eyájena, ñaké kaja Betsaida eyájena. Kajrú riwajaka pajimila Tiro eyájena michuna, eyá Sidón eyájena michuna iꞌimaká riwakajé. Chaje wani riwajájika neká.

23 Eyá pajimila Cafarnaúm e iꞌimakaño pechu nanakuwá: ‘Jeꞌechú chu iꞌimajíkaño penájena weká’, ke, eꞌiyonaja unká ñaké kalé neꞌemajika. Kawakala ejo nakaꞌajé neká, nakapichákoloje rejé penaje. Kajrú nulaꞌaká nakaje rewá iꞌimaká. Nulaꞌakela ñaké kaja pajimila Sodoma ewá, re joꞌó kaja riꞌimakajla meꞌetení.

24 Tupana wajájika puꞌuwaré laꞌajeñó wakajé, pajimila Sodoma eyájena michuna riwajaka iꞌimaká, chaje wani riwajájika iká”, ke Jesús kemaká najló.

25 Jesús puraꞌaró Tupana waꞌaté, rimá rijló: “Noraꞌapá, ejaꞌawá, jeꞌechú waꞌaté, minárikana piká. Palá pilaꞌaká nuká, pilaꞌakale inaꞌuké nakiyana palá. Yuwaná pechu, ke kaja péchuruna neká. Naweꞌepí kewákaje purákaꞌaloji, numakare nakú najló, nakojé. Eyá kajrú jewíñaꞌakañojlo, kapechúrunajlo meꞌechuje joꞌó riká.

26 Noraꞌapá, kaja keja piwátaka najló riꞌimaká”, ke rimaká rijló.

27 E rimá piño re iꞌimakáñojlo: “Noraꞌapá aꞌarí nuká nuꞌumakáloje piyukeja wakáraꞌajeri penaje. Unká na kalé weꞌepiri na wánika nuká, Riꞌirí. Rikaja kalé, Noraꞌapá, weꞌepiri naka nuká. Unká kaja na kalé weꞌepiri na wánika Noraꞌapá. Nuká, Riꞌirija kalé, weꞌepiri naka riká. Nuꞌumá nuwátakarenajlo riyukuna, naweꞌepíkaloje naka riká penaje.

28 Nakaje neꞌiyajena wakáraꞌakare ilaꞌaká, riꞌimakáloje palá Tupana nakú penaje, lakaꞌapheji rilaꞌakana ijló. Kaja jayaꞌó rinaku. Ijló numá: Iyurí ichó nojló nuꞌumakáloje iñathé aꞌajeri, iwatánaꞌakaloje nakaje lakaꞌapheji ilaꞌakare liyá.

29 Ilaꞌá nujwaꞌaté nakaje nuwakáraꞌaka iká ke; jewíñaꞌo kaja nupurákaꞌalo nakú. Unká nuyúchaꞌalo ijwaꞌaté; unká kaja nulaꞌalá nokó kajrú laꞌaká ke. Ilé kaje aú palá ipechu iꞌimajika.

30 Nakaje, nuwátakare ilaꞌaká nujwaꞌaté, unká lakaꞌapheji kalé riká; unká kaja jayaꞌalajo rilaꞌakana nakú”, ke Jesús kemaká najló.