Jesús tejmoꞌótaka romano nakiyana waꞌaté jápajeri yukuna marí
7
Jesús ñapátaka newíñaꞌatakana ejomi, riꞌijná pajimila Cafarnaúm ejo.
San Lucas 7.1-10
2 Re pajluwa romano nakiyana, suráana wakáraꞌajeri iꞌimaké. Riká waꞌaté jápajeri, íkiꞌija wani riwátakare, iꞌimari ritami wani.
3 Eꞌiyowá ke yuku iphaka rikariwate nakú: “Jesús iphíchari majó”, ke. Raú riwaꞌa Jesús maná, riꞌijnakáloje rejo rijwaꞌaté jápajeri tejmoꞌótaje. E riwakáraꞌa pheñawilana judíona nakiyana iꞌijnaká riwáꞌaje.
4 Raú neꞌejná rejo, iphaño Jesús nakú. Nawata wani riꞌijnaká najwaꞌaté rejo, ritejmoꞌótakaloje nawakáraꞌajeri waꞌateje, raú mawó nemaká rijló:
—Palájneꞌeke wani wawakáraꞌajeri, ñakele palani paꞌaká riñathé.
5 Íkiꞌija riwátaka wekáꞌana, raú raꞌá liñeru najló iꞌimaká, nalaꞌakáloje wawakákaꞌalo ñakarelana raú —ke nemaká Jesusjlo.
6 Raú Jesús iꞌijnari najwaꞌaté rejo. Juká joꞌó neꞌemaká riñakaré awaꞌayá ee, nawakáraꞌajeri wakáraꞌari iyamá rijwaꞌatéjena Jesús jimajo. Palá péchuruna rinaku neꞌemaká. Rimá najló:
—Marí ke imájika nunaku rijló: “Wawakáraꞌajeri, unká nuwátala pinaku kawílaꞌakana, unká kaja nuwátala pimujlúkaꞌaka nuñakaré chojé, mapeja iꞌimaká nuká.
7 Raú unká nuꞌujnalá nokó pijwaꞌaté puraꞌajó. Ñakele iléreya iꞌimajémija piwakáraꞌa ritejmoꞌotako.
8 Re kaja nuwakáraꞌajeño. Suráana wakáraꞌajeri nuká, ñakele numakachu pajlúwajlo: ‘Piꞌijná ají ñoꞌojó’, ke, riꞌijná rejo. Eyá numakachu apujlo: ‘Majó piꞌijná’, ke, riꞌijná nuká ejo. Nuwakáraꞌakachu nujwaꞌaté jápajeri laꞌaká nakaje, rilaꞌá riká numaká rijló ke”, ke rimaká najló, nemakáloje ñaké Jesusjlo.
9 Raú neꞌejná Jesús jimaje. Nemá rijló nawakáraꞌajeri wakáraꞌaka nemaká rijló ke, raú Jesús pechu iꞌimá rinaku: “¡Meke kaphí wani ripechu Tupana chojé!” E riyakaꞌo riyámojo rápumichu chiraꞌajeño chaje, rimá najló:
—Kaphí wani ripechu Tupana chojé, raꞌakáloje riñathé penaje. Unká nuphátala apú Israel lakénami nakiyana eꞌiyá riká ke wani péchuri.
10 Reyá napaꞌó piño napumí chuwá nawakáraꞌajeri ñakaré ejo, amaño kaja rijwaꞌaté jápajeri tejmoꞌotako.
Jesús makápoꞌotaka iwakajílomi iꞌirí michú yukuna marí
11 Rejomi Jesús jaꞌapari ají ke pajimila Naín ejo raꞌapiyatéjena waꞌaté; kajrú kaja ajopana iꞌijnaká najwaꞌaté rejo.
San Lucas 7.11-35
12 E kaja riphá pajimila ejé. Re ramá nawákoꞌoka támijimi kaichama kaje chu, ají ke támijimina toꞌotákelana ejo. Kajrú pajimila eyájena jaꞌapaka najwaꞌaté pajñakani. Pajluwájaru iwakajílomi iꞌirí takaꞌañáari ruꞌumaká. Rikaja kalé, pajluwaja ruꞌurí iꞌimaká.
13 Jesús amari kajrú wani ruyaka ruꞌurí michú, raú riweꞌepí runaku kamuꞌují, rimá rojló:
—Piyániña.
14 E riꞌijná kaichama kaje awaꞌajé, rijapa rinaku, raú riwákoꞌojeño tajnaño, e rimá támijimijlo:
—Walijímaka, páchoꞌo.
15 Raú kaja takaꞌaká penájemi iꞌimaká jáchoꞌoro yáꞌajo, rejéchami rikeñoꞌoká puraꞌakajo. E Jesús paꞌatari ralojlo riká.
16 Ilé ke namaka aú piyuke re iꞌimakaño keroꞌokó, rejomi palá napuraꞌakó Tupana nakú. Neꞌiyajena kemaño rinaku pajlokaka:
—Ajopana Tupana purákaꞌalo jaꞌapátajeño chaje wani kari wajwaꞌaté meꞌetení, kaja Tupana iphá chuwá majó rileꞌejena inaꞌukena ñathé aꞌajé.
17 Rejéchami kajrú wani Jesús yukuna jemaꞌakó Judea teꞌeré eꞌiyowá. Rawaꞌá iꞌimakaño, eyá ajopana teꞌeré eꞌiyowá iꞌimakaño ewá waꞌató, riyukuna jemaꞌó.
Juan el Bautista wakáraꞌaka iyamá raꞌapiyatéjena Jesús chaje yukuna marí
18 Juan iꞌimaká inaꞌuké wajákelana chu wakajé, raꞌapiyatéjena iꞌimaño rijló piyuke nakaje Jesús laꞌakare yukuna, raú riwakáraꞌa iyamá nanakiyana, neꞌejnakáloje Jesús ejo.
19 Rimá najló:
—Eko ikejaꞌa nojló riliyá palá riyukuno, imá rijló: “¿Piká chi riká kele nemakare nakú iꞌimaká, iphájeri majó weꞌematájeri penaje, wawátaje kaꞌajná re joꞌó kaja apú? ¿Meke chi riká?”, ke imájika rijló.
20-21 Raú neꞌejná rejo, iphaño Jesús nakú. Kajrú natámina iꞌimaká re. Neká tejmoꞌótakana nakú riꞌimá; riwakáraꞌa kaja jiñana pechu jáchoꞌoko kajrú inaꞌukena eꞌiyayá; raꞌapata kaja mejlukaji mejluruna liyá. Ilé kaje laꞌakana nakú riꞌimaká ee, nephá rinaku, nemá rijló:
—Juan el Bautista wakáriꞌichari weká majó pichaje. Rimicha pinaku: “¿Piká chi riká kele nemakare nakú iꞌimaká, iphájeri majó? Wawátaje kaꞌajná re joꞌó kaja apú. ¿Meke chi riká?”, ke rimíchaka pinaku.
22 Jesús kemari najló:
—Ipaꞌó Juan ejo, iꞌimá rijló mékeka amíchaka nulaꞌaká nakaje yukuna. Nakaje nowíñaꞌatakare nakú yukuna waꞌató iꞌimá kaja rijló. Eko imá rijló nunaku: “Mejluruna iꞌimakaño liyá raꞌapata mejlukaji, namákaloje palá penaje. Unká meke laꞌajé jaꞌapálaño ritejmoꞌota, naꞌapákaloje palá. Napona patákaꞌatakarojlo ripalaꞌatá napona palá. Unká jemaꞌalaño liyá raꞌapata kaja meꞌejwíkaji, nemaꞌakáloje palá. Támijimina nakiyana rimakápoꞌota kaja. Kamuꞌují laꞌakáñojlo riꞌimá Tupana iꞌimataka iná kapichákajo liyá yukuna. Ilé kaje laꞌakana nakú riká”, ke imájika rijló nunaku.
23 “Puꞌují péchuruna neká, unká laꞌalaño ujwí napéchuwa nuliyá”, ke imájika Juanjlo.
24 E napaꞌó. Rejomi Jesús kemari ripurákaꞌalo jemaꞌajéñojlo Juan nakú: “Iká iꞌijnakéñono desierto ejo ripurákaꞌalo jemaꞌajé. Unká iꞌijnaké rejo, amákaloje iyamá chuwá péchuri penaje, unká iyamá chuwá péchuri kalé riꞌimakale.
25 ¿Palá aꞌarumakari amákaloje penaje chi iꞌijnaké rejo? Unká kaja palá aꞌarumakari kalé riꞌimaká. Kaja iweꞌepí palá mékajenaka palá aꞌarumakáruna. Nawakáraꞌajeño ñakaré chiyájena aꞌarumaká palá nojé.
26 Eta ¿naje chi iꞌijnaké rejo ramaje? ¿Amákaloje Tupana purákaꞌalo jaꞌapátajeri penaje chi iꞌijnaké rejo? Riká joꞌó riká. Ajopana Tupana purákaꞌalo jaꞌapátajeño michuna iꞌimaká chaje wani riká.
27 Tupana purákaꞌalo lanaꞌakéjami kemari rinaku:
‘Nuwakáraꞌaje pajluwaja inaꞌuké iꞌijnaká pitukumá,
rilamáꞌatakaloje inaꞌuké pechu pipé, puꞌuwaré nalaꞌakare liyá’,
ke Tupana kemaká Juan nakú iꞌimaká, unká chiyó riꞌimá iꞌimaká”, ke Jesús kemaká najló.
28 Rimá piño najló, “Jemaꞌá marí: Marí ejaꞌawá chu unká na iꞌimalaje cháꞌatajeri Juan, riꞌimakáloje richaje penaje. Eyá jeꞌechú chu, naꞌapejé wani iꞌimaká nakiyana iꞌimajeri Juan chaje.
29 “Juan iꞌimaká Tupana yukuna najló wakajé, kajrú inaꞌukena jemaꞌajika ripurákaꞌalo. Liñeru ñaꞌajeño neꞌemakánajlo waꞌató jemaꞌakeño kaja ripurákaꞌalo. Neká aꞌakeño nanakojó Tupana purákaꞌalo, ñaké kaja ajopana iꞌimajika, raú Juan laꞌaké neká bautizar.
30 Eyá fariséona nakiyana, Tupana purákaꞌalo nakú jewíñaꞌatajeño nakiyana waꞌaté, unká wátakeño nakaje Tupana laꞌakare aꞌakana nanakojó. Raú unká nemaké Juanjlo, rilaꞌakáloje bautizar neká penaje”, ke Jesús kemaká najló.
Rimá piño najló:
31-32 “Marí ke inaꞌuké meꞌetení iꞌimakaño: Yuwaná yáꞌaño leꞌejepelaji ñakarelana chu kátakajo nakú, keja neká. E nawaꞌá iꞌimakaño, najwákeꞌenajlo nemá: ‘Waphoꞌó ijló kewirí chojé iꞌimaká, eꞌiyonaja unká arápaꞌala. Wataní kaja ijló jemakaji iꞌimaká, eꞌiyonaja unká ipechu laꞌaló kamuꞌují remaꞌakana aú’, ke nemaká najló. Ñaké kaja inaꞌuké nakiyana laꞌaká meꞌetení. Mapeja nakhaꞌaká wamaná, kayukújneꞌekena wani neꞌemakale.
33 “Paineko Juan iꞌimaké ijló Tupana yukuna. Riꞌitakó kaja raꞌajné liyá ripechu iꞌimakáloje Tupana nakuja penaje. Unká kaja riꞌiraké nakaje jalá amúraꞌatakanami, eꞌiyonaja imaké rinaku: ‘Jiñá pechu reꞌiyá’, ke.
34 Eyá nuká iphari majó inaꞌuké iꞌimakáloje nupalamane penaje. Ajñaka aꞌajnewá ke kaja nojñaka noꞌojnewá. Ñaké kaja nuꞌuraká nakaje jalá amúraꞌatakanami, raú imá nunaku: ‘Kawaleꞌeké ta wani riká; iꞌirakachi ta kaja riká; unká inaꞌukélaruna wákeꞌewe kaja riká; liñeru ñaꞌajeño neꞌemakánajlo wákeꞌewe kaja riká’, ke imaká nunaku.
35 Eꞌiyonaja iná weꞌepí piyukeja nakaje Tupana laꞌakare jáchoꞌojiko palá”, ke Jesús kemaká najló.
Jesús iꞌimaká Simón ñakaré chu yukuna marí
36 Pajluwaja fariséona nakiyana kemari Jesusjlo riꞌijnakáloje rijwaꞌaté raꞌajnewá ajñaje. Raú riꞌijná rijwaꞌaté. Re riyaꞌo raꞌajnewá ajñakana nakú rijwaꞌaté.
San Lucas 7.36-50
37 Rikaja kaja pajimila e pajluwájaru ñujuꞌukeru iꞌimayo. Ruká jemaꞌayó Jesús ajñaka raꞌajnewá fariséona nakiyana waꞌaté yukuna, raú ruꞌujná rejo, iphayo Jesús nakú. Wíluru iꞌimari rukapi, jipa alabastro nakiyá laꞌakanami riꞌimaká. Nakaje jilami, puꞌumé amarí, iꞌimari richu.
38 Ruká iphayo Jesús awaꞌajé, e rujlámaꞌo riꞌimá nakojé. Kaja rojata riꞌimá rujlú jalá aú. Kéchami rolákaka rinakiyá ruwilá aú, rejomi ruchiñoꞌó riꞌimá nakiyá. Rokhoꞌó kaja nakaje jilá, puꞌumé amarí, riꞌimá nakojé.
39 Ilé ke fariséona nakiyana yukupéraꞌari Jesús iꞌimaká, amaka aú mékeka rulaꞌaká riká, ripechu iꞌimá: “Tupana purákaꞌalo jaꞌapátajeri riꞌimakela, riweꞌepijla mékajeruka kelerú inanaru ta. Ñujuꞌukeru, unká inaꞌukélaru ta ruká”.
40 Jesús weꞌepiri mékeka riꞌijnataka ripéchuwa rinaku, raú rimá:
—Simón, nuwata nakaje nakú kemakana pijló.
Rimá Jesusjlo:
—Wewíñaꞌatajeri, pimá nojló.
41 Raú Jesús iꞌimari rijló yuku:
—Iyamá inaꞌukena lewérichaño kajrú wani nakariwátejlo. Pajluwa lewérichari rijló ñóꞌope wani liñeru. Iyamá jarechí ketana kaꞌajná rijápichakajla raꞌatakáloje rilewérikare rijló wemí. Eyá apú lewérichari rijló wejápaja kemachi. Riká jápicharijla iyamata keri ketánaja kaꞌajná raꞌatakáloje rilewérikare rijló wemí.
42 Unká méñoꞌojo naꞌalacha rijló liñeru nalewérichaje wemí, raú nakariwate lamáꞌatiyari neká raú.
Ilé ke riꞌimaká rijló yuku ejomi, rimá Simonjlo:
—Iyamá neꞌemaká. ¿Mékaje pechu laꞌaró puꞌují wani rikariwate nakú raú?
43 —Kaapí, apala kele kajrú wani lewérika iꞌimaká rijló kaꞌajná, pechu laꞌaró puꞌují rinaku.
—Ke joꞌó —ke Jesús kemaká rijló.
44 E riyakaꞌo kelerú inanaru chaje, rimá Simonjlo:
—¿E pamíchaka meke marirú liꞌichaka? Nuphíchaka piñakaré chojé ee, unká paꞌalacha nojló juni nupákaloje nuꞌumá nakiyá raú penaje. Eyá marirú ejátiyayo nuꞌumá rujlú jalá aú, kéchami rolákichaka riká ruwilá aú.
45 Unká kaja pajalákalacha nuká nujimá chiyá chiñoꞌokana aú. Eyá marirú iphíchayo, chiñoꞌochayo nuꞌumá nakiyá kajrú. Nuꞌumá nakiyá chiñoꞌokana nakuja ruꞌumichá.
46 Unká kaja pakhoꞌolacha nakaje jilá nuwilá eꞌiyajé. Eyá marirú akhoꞌochayo nuꞌumá nakojé nakaje jilá, puꞌumé amarí.
47 Ilé ke ruliꞌichaka nuyájlepana, nomíchakole ruchaje kajrú wani rumanáicho rulaꞌakare liyá. Ñakele puꞌují wani rupechu nunaku. Re kaꞌajná ajopana, nalaꞌá puꞌuwaré wejápaja. Nomó kaja nachaje puꞌuwaré nalaꞌakare liyá. Neká penájena laꞌañó wejápaja kaja nuyájlepana, wejápaja kaja puꞌují napechu nunaku —ke Jesús kemaká rijló.
48 E Jesús kemari rojló:
—Kaja nomicho pichaje puꞌuwaré pilaꞌakare liyá.
49 Raú rijwaꞌaté yáꞌakaño nakiyana kemaño pajlokaka:
—¿Na kaꞌajná riká kaji amaro iná chaje puꞌuwaré iná laꞌakare liyá?
50 Jesús kemari piño rojló:
—Kaja Tupana iꞌimatiya piká kapichákajo liyá, pipechu iꞌimakale kaphí nochojé. Chuwa piꞌijná palá kaꞌajnó.