Jesús wakáraꞌaka setenta y dos inaꞌukena iꞌijnaká apú ewá, apú ewá ke, yukuna marí
10
E kaja Jesús iꞌiwapari achiñana eꞌiyayá iyamano ke, riwakáraꞌakaloje neká ritukumó penaje. Kaja riwata wani pajimila ejo iꞌijnakana, raú riwakáraꞌa neká, setenta y dos inaꞌukena iꞌijnaká ritukumó.
San Lucas 10.1-24
2 Rimá najló: “Re kajrú wani inaꞌukena marí ejaꞌawá chu jemaꞌañojla Tupana jaꞌapiyá, ajopana iꞌimakela riyukuna najló, eꞌiyonaja unká riyukuna iꞌimajeño iꞌimalá. Re neká wejápaja. Ipuraꞌó Tupana waꞌaté riwakáraꞌakaloje inaꞌuké riyukuna iꞌimajé ajopánajlo, ajopánajlo ke.
3 Chuwa iꞌijná. Mayuchéruna iká, eꞌiyonaja nuwakáraꞌa iꞌijnaká yuriná iꞌimakaño ejo.
4 Ijñaꞌaniña ijwaꞌató liñeru, itulané, jiꞌimaꞌulá kaje. Imaláraꞌataniña kaja ikó iñeꞌepú chuwá ajopana ajalákana nakú.
5 Imujlúkaꞌajika ee nañakaré chojé, ajalaka richu iꞌimakaño. Imá Tupánajlo, rilaꞌakáloje palá napechu.
6 Palá péchuruna inaku neꞌemajika ee, nakaje palá imájikare nakú najló iꞌimajeri ñaké najló. Eyá unká paala péchuruna neꞌemajika ee inaku, ñaké péchurunaja neꞌemajika.
7 Palá péchuruna inaku iꞌimajíkaño ñakaré chu iyurejo najwaꞌaté. Ajñaje aꞌajnejí naꞌajíkare ijló. Iꞌirajé kaja iꞌirakaje naꞌajíkare ijló. Nakaje ilaꞌajíkare najló wemí, naꞌajé ijló aꞌajnejí. Iphájika ee palá péchuruna inaku ñakaré chojé, re iyurejo najwaꞌaté. Iꞌijnaniña apú chojé, apú chojé ke.
8 Iphaje kaꞌajná apú pajimila ejo, palá kaꞌajná reyájena pechu iꞌimajika ee inaku, iyurejo najwaꞌaté. Ajñaje kaja aꞌajnejí naꞌajíkare ijló.
9 Natámina iꞌimajika ee re, itejmoꞌótaje neká. Marí ke imájika najló: ‘Meketana iꞌimajemi Tupana iꞌimajeri inaꞌuké nakiyana wakáraꞌajeri’, ke.
10 “Iphaje kaꞌajná apú pajimila, chapú péchuruna inaku iꞌimakaño, ejo. Ilé ke neꞌemajika ee, jaꞌapaje pajimila nakuwá. Marí ke imájika najló:
11 ‘Muꞌupé, marí pajimila nakú patakaro weꞌemá nakojé, watakaꞌá weꞌemá nakiyá ijimaje, raú iweꞌepíkaloje puꞌuwaré ilaꞌaká, unkale iwátala weká’, ke imájika najló. Imaje kaja najló: ‘Iweꞌepí kalé marí: Meketana iꞌimajemi Tupana iꞌimajeri inaꞌuké nakiyana wakáraꞌajeri’.
12 Tupana wajájika puꞌuwaré laꞌajeñó wakajé, kajrú riwajájika neká unká wátalajeño iká. Kajrú riwajaka pajimila Sodoma eyájena michuna iꞌimaká, puꞌuwaré laꞌajeñó neꞌemakale. Richaje riwajájika neká unká wátalajeño iká”, ke rimaká najló.
Jesús akhaꞌaká inaꞌuké unká jemaꞌalaño Tupana jaꞌapiyá yukuna marí
13 Jesús akhaꞌarí pajimila eyájena maná marí ke: “Chapú wani nakaje iꞌimajika pajimila Corazín eyájenajlo. Ñaké kaja riꞌimajika pajimila Betsaida eyájenajlo. Kajrú namaka nulaꞌaká Tupana Pechu aú nakaje rewá, rikaja kalé weꞌepíkare laꞌakana. Nulaꞌakela ñaké kaja nakaje pajimila Tiro ewá, pajimila Sidón ewá waꞌaté, reyájena pajnoꞌotajla napéchuwa raú puꞌuwaré nalaꞌakare liyá. Naꞌajla nanakuwá puꞌuwaré nojé aꞌarumakaji. Nakaꞌajla kaja nachó paꞌilá, raú inaꞌuké weꞌepíkaloje kaja napajnoꞌotaka napéchuwa puꞌuwaré nalaꞌakare liyá Tupana ejo.
14 Tupana wajájika puꞌuwaré laꞌajeñó wakajé riwajaje richaje wani Corazín eyájena, ñaké kaja Betsaida eyájena. Kajrú riwajaka pajimila Tiro eyájena michuna, Sidón eyájena michuna waꞌaté iꞌimaká, puꞌuwaré laꞌajeñó wani neꞌemakale. Chaje wani riwajájika Corazín eyájena, Betsaida eyájena waꞌaté.
15 Eyá pajimila Cafarnaúm e iꞌimakaño pechu iꞌimá nanakuwá: ‘Jeꞌechú chu iꞌimajíkaño penájena weká’, ke, eꞌiyonaja unká ñaké kalé neꞌemajika. Kawakala ejo nakaꞌajé neká nakapichákoloje rejé penaje”, ke Jesús kemaká nanaku.
16 E rimá raꞌapiyatéjenajlo: “Jaꞌapátaje kaꞌajná ajopánajlo nupurákaꞌalo. Puꞌuwaká nemaꞌajika ee jaꞌapiyá, nemaꞌajé kaja noꞌopiyá. Eyá unká wátalajeño iká, unká kaja wátalajeño nuká. Unká wátalaño nuká, unká kaja wátalaño Tupana, wakáraꞌari nuꞌumaká majó”.
Jesús wakáraꞌakarena paꞌakó piño napumí chuwá yukuna marí
17 E kaja setenta y dos inaꞌukena, Jesús wakáraꞌakarena iꞌimaká neꞌejnakáloje apú ewá, apú ewá ke penaje, paꞌañó piño napumí chuwá. Puꞌují napechu iꞌimaká, nemá Jesusjlo:
—Wawakáraꞌajeri, pipurákaꞌalo aú palá jiñana pechu jemaꞌaká waꞌapiyá. Palá wawakáraꞌaka náchoꞌoko inaꞌuké eꞌiyayá.
18 Rimá najló:
—Nuká amari Jiñá Chiꞌinárikana jaꞌakó jeꞌechú chiyá iꞌimaká. Pichaní kamaré jaꞌakó ke kaja raꞌakó kawakaje.
19 Nuká cháꞌatari inaꞌukejlo Jiñá Chiꞌinárikana. Jeí ajmaꞌajika iká wakajé unká meke ilaꞌalajo raú. Eyá ipijí iꞌirajika ee iká, unká kaja meke ilaꞌalajo raú.
20 Puꞌují ipechu meꞌetení, iwakáraꞌakale jiñana pechu jáchoꞌoko inaꞌuké eꞌiyayá. Ipechu iꞌimaniña puꞌují ilé kaje aú ja. Ipechu iꞌimá puꞌují, iꞌimajíkale Tupana waꞌaté jeꞌechú chu. Kaja lanaꞌakeja ií ripapérane chu, re iꞌimajeño penájena iꞌimakale —ke rimaká najló.
Puꞌují Jesús pechu laꞌakó yukuna marí
21 Rejéchami Tupana Pechu laꞌaká Jesús pechu puꞌují, raú rimá Tupánajlo: “Noraꞌapá, ejaꞌawá, jeꞌechú waꞌaté minárikana piká. Palá pilaꞌaká nuká, pilaꞌakale inaꞌuké nakiyana pechu palá. Yuwaná pechu keja péchuruna neká, pilaꞌakale napechu palá. Naweꞌepí kewákaje purákaꞌaloji numakare nakú najló nakojé. Eyá kajrú jewíñaꞌakaño, kapechúrunajlo meꞌechuje joꞌó riká, kaja keja piwátakale najló riꞌimaká”, ke rimaká Tupánajlo.
22 Rimá piño re iꞌimakáñojlo: “Noraꞌapá kemari nojló piyukeja purákaꞌaloji nakú. Unká na kalé weꞌepiri na wánika nuká, Tupana iꞌirí. Noraꞌapaja kalé weꞌepiri naka nuká. Unká kaja na kalé weꞌepiri na wánika Noraꞌapá. Nuká, Riꞌirija kalé, weꞌepiri naka riká. Nuꞌumá nuwátakarenajlo riyukuna naweꞌepíkaloje naka riká penaje”, ke rimaká najló.
23 Eyá ripajnoꞌó ají ke raꞌapiyatéjena ejo. Najloja kalé rimá marí ke: “Meke palá wani ijló nakaje amákale palá, nakaje nulaꞌakare eꞌiyowá.
24 Ñaké kaja kajrú Tupana purákaꞌalo jaꞌapátajeño michuna, eyá neꞌemakánana michuna waꞌaté, wátakajla nakaje amákana neꞌemaká marí ejaꞌawá chu iꞌimaká wakajé, eꞌiyonaja unká méñoꞌojo namala riꞌimaká riwakajé iꞌimaká. Ñaké kaja nawátakajla nupurákaꞌalo jemaꞌakana, jemaꞌaká riká meꞌetení ke kaja, eꞌiyonaja unká nemaꞌalá riꞌimaká ñaké riwakajé”, ke Jesús kemaká najló.
Samaria eyaje laꞌaká palá wani pajluwa inaꞌuké nakú yukuna marí
25 E kaja pajluwaja Tupana purákaꞌalo nakú jewíñaꞌatajeri iphari Jesús nakú. Riwata nakaje yukuna kejáꞌakana riliyá, ramákaloje mékeka rimájika rijló penaje. Raú rimá rijló:
—Wewíñaꞌatajeri, ¿meke chi nulaꞌakajla nuꞌumakáloje matajnako jeꞌechú chu penaje?
San Lucas 10.25-42
26 E Jesús kemari rijló:
—¿Meke Tupana purákaꞌalo lanaꞌakéjami chu kemaká? ¿Meke pipechu rinaku?
27 Raú Tupana purákaꞌalo nakú jewíñaꞌatajeri kemari rijló:
—Ripurákaꞌalo lanaꞌakéjami chu kemari: “Wawakáraꞌajeri Tupana. Rikaja kalé pajluwa iná Chiꞌinárikana wani. Ñakele piwata riká íkiꞌija; piwajwé kaja riꞌimare; piꞌijnatá kaja pipéchuwa rinákuja; pewíñaꞌo kaja Ripurákaꞌalo nakú pilaꞌakáloje palá raú. Pilaꞌá rijló piyukeja nakaje palá, íkiꞌija piwátakale riká. Piwata kaja íkiꞌija piyuke inaꞌuké, piwátaka pikó ke kaja”.
28 Raú Jesús kemari rijló:
—Palá pimíchaka nojló. Pilaꞌá ilé pimíchaka nojló ke, raú piꞌimajé matajnako jeꞌechú chu.
29 Tupana nakú jewíñaꞌatajeri pechu iꞌimari rinakuwá: “Palá laꞌajerí nuká”, ke. Raú rimá piño Jesusjlo:
—¿Mékajena inaꞌukena chi iná wátajla íkiꞌija, iná ikó ke kaja?
30 Raú Jesús iꞌimari marí yuku rijló:
—Pajluwaja inaꞌuké jáchoꞌocharo Jerusalén eyá ají ke iñeꞌepú chuwá kawakajo, pajimila Jericó ejo. Iñeꞌepú chuwá riphákiꞌicho ajopana jataꞌakáchina waꞌaté. Neká jatiꞌiyaño riliyá piyuke rinane, raꞌarumaká waꞌató. Kajrú nañaꞌatíyaka riká rinane chona. Rejomi naꞌapáñaicha riká. Rejeja nayuricha ritami iñeꞌepú turenaje. Ujú kaje chiyó nenóchajla riká.
31 E rikaja kaja iñeꞌepú chuwá apú inaꞌuké jaꞌapíchari ají ke ritami lokoꞌopani. Sacerdote riꞌimichaka. Ramicha ritami toꞌokó, e raꞌapicha puꞌukuja rawaꞌayá.
32 E apú piño jaꞌapíchari rikaja kaja iñeꞌepú chuwá. Leví michú lakénami nakiyana riꞌimichaka. Nañathé aꞌajeri Tupana ñakaré chu riꞌimichaka. Riká jaꞌapíchari ají ke, amíchari ritami toꞌokó re. Riyakáꞌicho richaje meketánaja, ejomi raꞌapicha piño.
33 E apú piño iꞌijichari rikaja kaja iñeꞌepú chuwá. Samaria teꞌeré eyaje riꞌimichaka. Riká weꞌepíchari rinaku kamuꞌují ramíchaka aú ritami toꞌokó.
34 Ritajicho ritami nakojé. Eyá ripujániꞌicha riká. Rakhoꞌochá nakaje jilami raphú chojé, nakaje jalá amúraꞌatakanami waꞌaté. Rejomi repoꞌotiya raphú aꞌarumakaji jítami aú, e ráchoꞌotiya riká ají ke rikawarute janapeje. Rinaku riwáꞌicha riká aꞌajná ñoꞌojó apú ñakaré chojé. Re riwojítiya riká.
35 E muní ke raꞌapíchaka yámona, raꞌachá pají minajlo liñeru. Rimicha rijló: “Eko piwojita marí inaꞌuké. Marí liñeru chaje pikaꞌajika ee rinakojé, nunakuwá nupaꞌataje pijló rapumí chojé”, ke rimíchaka rijló.
36 Marí kaje aú Jesús kemari piño kele Tupana purákaꞌalo nakú jewíñaꞌatajerijlo:
—Weji kele neꞌemaká amaño chapú jataꞌakáchina laꞌakare tami toꞌokó. ¿Mékaje chi wátari riká íkiꞌija, riwátaka rikó ke kaja?
37 Raú rimá rijló:
—Ilé weꞌepiri rinaku kamuꞌují, wátari riká, riwátaka rikó ke kaja.
Jesús kemari rijló:
—Palá piweꞌepíchaka rinakojé. Chuwa pilaꞌá kaja palá ajopana inaꞌukena nakú, rilaꞌaká rinaku palá iꞌimaká ke kaja.
María, Marta waꞌaté yukuna marí
38 Jesús jaꞌapari piño raꞌapiyatéjena waꞌaté ají ke pajimila Marta ñakaré iꞌimakare ejo. Ruká wátayo Jesús iꞌijnaká nachaje nañakaré ejo, raú riꞌijná rejo.
39 Re María, Marta eꞌeweló, yáꞌayo Jesús jiꞌilá romaꞌakáloje ripurákaꞌalo penaje.
40 Eyá Marta kawílaꞌayo rujápakaꞌala nakojé, raú ruꞌujná Jesús awaꞌajé, rumá rijló:
—Wewíñaꞌatajeri, ¿meke pijló kelerú? Unká roꞌolá nuñathé, nuchaja ruyurí kajrú jápakaje aú. Piwakáraꞌa roꞌoká nuñathé.
41 Raú rimá rojló: