Nakaje icha ijí ejátajeri yukuna marí
4
Rejomi Jesús iꞌijnari kaéja turenajo. Kajrú inaꞌukena awakako rinakojé rejé, raú riwitúkaꞌa wapuru chojé yáꞌajo, eyá neká yuriño keꞌepé nakú.
San Marcos 4.1-20
2 E riꞌimá najló yuku rewíñaꞌatakaloje neká Tupana nakú raú. Rimá najló:
3 “Jemaꞌá marí: Pajluwaja inaꞌuké iꞌijichari nakaje icha ijí ejátaje.
4 Teꞌerí mojyoꞌokéjami eꞌiyowá riꞌijichá rejátaje. Rikaꞌakana nakú riꞌijichá reꞌiyowá. Richa ijí rikiꞌichaje nakiyana jaꞌacharo iñeꞌepú chojé. Riká kupiraꞌaphana ajmíloꞌotiya piyuke.
5 Apú richa ijí rikiꞌichaje nakiyana jaꞌacharo jipa nakojé. Wejápaja teꞌerí iꞌimichákale rinaku aú
6 riphíchaka ejomi, meketana iꞌimajemi rimeríꞌicho, unkale raꞌapare iꞌimalacha palá.
7 Eyá apú richa ijí rikiꞌichaje nakiyana jaꞌacharo puꞌuwareni jimichi eꞌiyajé. Riká jimichi iphíchari nakaje icha ijí rejátiyaje waꞌaté. Riká tawáñaꞌichari riká, raú riwajriꞌichá reꞌiyajé, unká rarúkaꞌalacha.
8 Eyá apú richa ijí nakiyana rikiꞌichaje jaꞌacharo palani teꞌerí eꞌiyajé. Ilé iphíchari palá; palá kaja ritawáꞌichako; palá kaja rarúkiꞌichaka. Keꞌiyapé rarúkiꞌichaka: reꞌiyajé aꞌachari treinta kaꞌalá ewá richawá; reꞌiyajé setenta kaꞌalá ewá; eyá reꞌiyajé cien kaꞌalá ewá”.
9 Ilé ke riꞌimaká yuku najló, e rimá remaꞌajéñojlo: “Jemaꞌá palá, aꞌá inakojó riyukuna”.
Jesús kemari neꞌiyajénajlo nájeka riꞌimaká yuku najló. Riyukuna marí
10 Rikó Jesús iꞌimaká ee, yuku jemaꞌajeño nakiyana iꞌijnaño richaje riliyá riyukuna kejáꞌaje. Iyamá iphata jiꞌimaje nakojé (12) kele raꞌapiyatéjena iꞌimaño kaja re rijwaꞌaté. E nemá rijló:
—¿Meke kemakánaka chi kele yuku piꞌimichá yukuna wajló?
11 Rimá najló:
—Ijló Tupana aꞌarí puꞌuwaká nakaje meꞌechú iꞌimakare, iweꞌepíkaloje rinakojé penaje. Eyá ajopana unká jemaꞌalaño raꞌapiyajlo, yuku keja riká.
12 Kaja júpimi ñaké Tupana purákaꞌalo jaꞌapátajeri michú iꞌimaká nayukuna marí ke iꞌimaká:
“Namájejla nakaje, eꞌiyonaja kalé unká naweꞌepílaje meke kemakánaka nakaje namájikare iꞌimajika.
Nemaꞌajejla kaja riyukuna, eꞌiyonaja kalé unká naweꞌepílaje meke kemakánaka riꞌimajika.
Riphákela palá napechu nakojé, napajnoꞌotajla napéchuwa Tupana ejo puꞌuwaré nalaꞌakare liyá,
raú ramojla nachaje puꞌuwaré nalaꞌakare liyá”, ke rimaká nanaku iꞌimaká.
Jesús iꞌimaká najló meke kemakánaka riká yuku, riyukuna marí
13 E rimá piño najló: “Unkájika ee iweꞌepí kele yuku nuꞌumichaje ijló yukuna nakojé, unká kaja iweꞌepílaje apú yuku nuꞌumajíkare ijló nakojé. Marí ke kemakánaka riká:
14 Nakaje icha ijí ejátajeri, Tupana purákaꞌalo yukuna iꞌimajeri ke kaja riká.
15 Nakaje icha ijí iñeꞌepú chojé jaꞌakaro, ke kaja ripurákaꞌalo neꞌiyajénajlo. Nemaꞌá riyukuna, eꞌiyonaja kiñaja wani Jiñá Chiꞌinárikana kaꞌaká napechu nakiyá ripurákaꞌalo nemaꞌakare.
16 Eyá richa ijí nakiyana jipa, wejápaja teꞌerí iꞌimakare nakojé jaꞌakaro, ñaꞌarí panaku meketánaja riphaka ejomi. Inaꞌuké nakiyana ke kaja riká. Palá nemaꞌaká Tupana purákaꞌalo, puꞌují napechu laꞌakó raú.
17 Meketánaja kalé napechu palá rinaku, eꞌiyonaja nawátakale ripurákaꞌalo jaꞌapiyá iꞌimakana, ajopana kaꞌajná laꞌañó neká chapú. Napuraꞌó kaja kaꞌajná nanaku puꞌuwaré. Chapú kaje yajwé kaꞌajná namá aú nayurí naliyó riká, unkale napechu iꞌimalá kaphí richojé.
18 “Eyá richa ijí nakiyana, puꞌuwareni jimichi eꞌiyajé jaꞌakaro, inaꞌuké nakiyana ke kaja riká. Nemaꞌá Tupana purákaꞌalo. Nakeñoꞌó raꞌapiyá iꞌimakana,
19 eꞌiyonaja kajrú naꞌaká nanakojó nakaje marí ejaꞌawá chu iꞌimakare. Ñóꞌope liñeru, leꞌejepelaji, kaje maká nawata najluwa. Riká naweꞌepí natukumó. Ilé ke péchuruna neꞌemakale, unká naꞌalá nanakojó ripurákaꞌalo, nalaꞌakáloje palá raꞌapiyá iꞌimakana aú.
20 “Eyá richa ijí nakiyana palani teꞌerí eꞌiyajé jaꞌakaro, jeñoꞌorí palá. Palá ritawáꞌako, palá kaja rarúkaꞌaka. Inaꞌuké nakiyana ke kaja riká. Nemaꞌá Tupana purákaꞌalo; naꞌá kaja nanakojó riká, raú nalaꞌá palá wani raꞌapiyá iꞌimakana aú. Apala nakaje icha ijí nejátakare arúkaꞌari treinta ewá kaꞌalá, apala sesenta ewá kaꞌalá, apala cien ewá kaꞌalá. Ke riká ripurákaꞌalo jaꞌapiyá iꞌimakáñojlo. Neꞌiyajena laꞌañó palá wani kajrú, eyá ajopana raꞌapejé kemachi, raꞌapejé ke nalaꞌaká palá”, ke Jesús jewíñaꞌataka neká.
Iná kamaré yukuna marí
21 Rimá piño najló: “Iná lukúnaꞌakachu iná kamaré, unká iná yáꞌatala riká iꞌichí lájmaꞌatakeja jaꞌapejé. Unká kaja iná yáꞌatala riká iná camané jaꞌapejé. Yenoje iná yáꞌata riká, pají chojé mujlúkaꞌakaño amákaloje piyukeja palá rikamaré chojé.
San Marcos 4.21-41
22 Re Tupana purákaꞌalo nakiyana, meꞌetení puwichani ke rinakojé weꞌepíkana inaꞌukejlo, rejomi kalé naweꞌepeje palá rinakojé.
23 Iká keꞌejwiruna, jemaꞌá palá riká”, ke rimaká najló.
24-25 Rimá piño najló: “Jemaꞌá palá Tupana purákaꞌalo. Aꞌajeño nanakojó riká, rilaꞌajé pechu palá, naweꞌepíkaloje richaje, richaje ke rinakojé. Eyá unká aꞌalájeño nanakojó riká, pechu nakiyá rikaꞌajé wejápaja naweꞌepíkare rinakojé”, ke rimaká najló.
Jesús iꞌimaká najló nakaje icha ijí ejátakanami tawáꞌako yukuna
26 Jesús kemari piño najló: “Inaꞌuké nakiyana wakáraꞌajeri Tupana. Chuwa nuꞌumajika yuku ijló iweꞌepíkaloje rinakojé penaje: Pajluwa iꞌijichari nakaje icha ijí ejátaje teꞌerí kaja lamáꞌatakejami eꞌiyajé.
27 Lapí rikamátiyo, eyá weꞌechú riliꞌichá rijápakaꞌala. Weꞌechú kaꞌalá keja riliꞌichaka rijápakaꞌala. Júpichami nakaje icha ijí rejátiyaje keñoꞌochaka iphákaje. Unká riweꞌepílacha naka tawáꞌatiyaka riká.
28 Teꞌerija kalé tawáꞌatari nakaje. Paineko riwirulá jeñoꞌorí, riká wichoꞌoró ripaná penaje. Rejomi riwí jeñoꞌorí, riká chiyá richa iꞌimakáloje.
29 E kaja penaje richa iphari rená chojé, paminá ñaꞌakáloje richa penaje, raú riꞌijná rijñaꞌajé”, ke riꞌimaká najló riyukuna.
Mostaza icha ijí yukuna marí
30 Jesús iꞌimari piño najló yuku marí ke: “Inaꞌuké nakiyana wakáraꞌajeri Tupana. Wejápaja rijwaꞌatéjena meꞌetení; aꞌajná ñoꞌojó chami richaje neꞌemajika. Chuwa nuꞌumajika ijló marí yuku iweꞌepíkaloje mékeka riká:
31 Mostaza icha ijí, nejátakare neꞌekakapere eꞌiyowá, ke neká. Kapajé nojé wani richa ijí. Unká na apú icha ijí iꞌimalá marí ejaꞌawá chu, riká ke kapajé nojeka.
32 Rejátakana ejomi, rikeñoꞌó iphákaje, rejéchami rikeñoꞌoká tawáꞌakajo. Jímaꞌalami yenuna nojé ketana kaja ritawáꞌako, kajrú kaja riꞌiché. Ripaná eꞌiyowá kupiraꞌaphana laꞌañó nañakaró”, ke riꞌimaká yuku.
33 Ilé ke yuku kaje aú Jesús jewíñaꞌatake neká kajrú Tupana nakú. Aꞌajná, palá naweꞌepíjika rinakojé ejená, riꞌimaké najló yuku.
34 Nekámika ke neꞌemajika ee raꞌapiyatéjena waꞌaté, rimaké najló meke kemakánaka riꞌimajika.
Jesús wakáraꞌaka karená jaꞌapaka yukuna marí
35 E kaja najúwaꞌa, raú rimá raꞌapiyatéjenajlo:
—Iꞌijná, wakuwáꞌachi kaéja paꞌanajo pitá.
36 Raú neꞌemá nayukuno inaꞌukejlo, rejomi nawitúkaꞌa wapuru, Jesús yáꞌakaro chu, chojé. E nakeñoꞌó kaéja kuwáꞌakana paꞌanajo pitá. Ajopana re iꞌimakaño kuwáꞌaño kaja nawapúrune chu najwaꞌaté.
37 Rejéchami, manaꞌí chiyó karená iꞌimaká nachá kaphí wani. Riká yokoꞌorí kajrú juni, raú kajrú juni jamoꞌokó wapuru chojé, yewíchaja nejaká.
38 Eꞌiyonaja manaꞌija Jesús kamátako riꞌipala chu, riwílaꞌaru jaꞌapí aꞌajona eꞌiyá rikamato. Wajé nakeñoꞌoká ejakaje ee, napota riká, nawíyoꞌoko nemaká rijló:
—¡Wewíñaꞌatajeri! ¿Naje unká paꞌalá pinakojó wakapichako?
39 Raú Jesús jáchoꞌoro, rimá karenajlo, juni yokola waꞌaté:
—¡Paꞌapá!
Raú karená jaꞌapari, waꞌató ke unká juni yokoꞌoló. Manaꞌija riꞌimaká piño rapumí chuwá.
40 E rimá raꞌapiyatéjenajlo:
—¿Naje chi ikeroꞌó kajrú wani? ¿Naje unká wani ipechu iꞌimalá kaphí nochojé?
41 Keroꞌokajo nakú joꞌó neꞌemaká, e nemá pajlokaka:
—¿Na kaꞌajná kari? Karená, eyá juni yokola waꞌató jemaꞌarí raꞌapiyá palá.