Jesús wakáraꞌaka jiñana pechu jáchoꞌoko inaꞌuké eꞌiyayá yukuna marí
5
E kaja nephá paꞌanajo pitá, Gerasa teꞌeré ejo.
San Marcos 5.1-20
2 Rejé narúkaꞌo. Jesús jáchoꞌoro wapuru chiyá, rejéchami pajluwa inaꞌuké iphaka rinaku. Jiñana pechu iꞌimaño reꞌiyá. Támijimina kaꞌakelana, jipa eꞌiyowá iꞌimakare, eyá riphá.
3 Rewá riꞌimaké. Katejmuni wani riꞌimaká. Pulapé nepoꞌotákajla riꞌimaká kureti aú, eꞌiyonaja rimataꞌatake rinakojó riká.
4 Naꞌaké kaja pejruꞌuwá raꞌanapitá nakojé, ritajné nakojé waꞌató. Piyukeja rimajákaꞌatajika rinakojó riká, rijítamija kalé yuríkero. Unká na kalé iꞌimakeri ritejmú eꞌewé, unká kaja na kalé cháꞌatakeri riká.
5 Weꞌechú, eyá lapí waꞌató richiraꞌakó awíyoꞌokaje nakú ipuré eꞌiyowá, támijimina toꞌotákelana eꞌiyowá waꞌató. Jipa aú ritujlaꞌatake rikó.
6 Ramaka aú jukaya Jesús, rechoꞌó rilokoꞌopani. Riphaka rinaku ee, ritáraꞌo riꞌirúpachi aú rijimaje.
7-8 E Jesús kemari jiñá pechu reꞌiyá iꞌimakárejlo:
—Páchoꞌo reꞌiyayá.
E rawíyoꞌoko jiña pechu kemaká rijló:
—Jesús, Tupana jeꞌechú churí iꞌirí, ¿naje pikawílaꞌa nunaku? Mawó numaká pijló: Pilaꞌaniña nuká chapú meꞌetení.
9 Jesús kemari rijló:
—¿Na pií?
—Legión nuí, íkiꞌiruna weꞌemakale.
10 Mawó rimaká Jesusjlo, riwakáraꞌaka piyá neká reyá.
11 Aꞌajnare ke kajrú jeꞌeruna pirakana chiraꞌakó yenuri nakuwá naꞌajnewá kulákana nakú.
12 Raú jiñana pechu kemaño Jesusjlo:
—Aꞌajnáruna jeꞌeruna eꞌiyajé piwakáraꞌa weká.
—Ñaké riká —ke Jesús kemaká najló.
13 Raú jiñana pechu jáchoꞌoño reꞌiyayá, jaꞌañó dos mil jeꞌeruna pirakana eꞌiyajé. Naꞌakó aú neꞌiyajé, jeꞌeruna jechoꞌoñó yenuri jiꞌiwátaje, reyá naꞌó ají ke kaéja jakojé. Rejeja nakapichó piyukeja junápeje.
14 Nalamáraꞌajeño penájemina amaka aú nakapichako, neñaó reyá. E neꞌemá riyukuna pajimila eyájenajlo, ajopana rewá iꞌimakáñojlo waꞌaté. Raú kajrú neꞌejnaká rejo ramaje,
15 iphaño Jesús nakú, amaño kele inaꞌuké jiñana pechu iꞌimakare eꞌiyá penájemi yáꞌako Jesús jiꞌilá. Kaꞌarumakani riꞌimaká, palá kaja ripechu iꞌimaká. Ilé ke namaka riká aú, nakeroꞌó.
16 Re iꞌimakaño amaño maapami ke Jesús wakáraꞌaka jiñana pechu jáchoꞌoko reꞌiyayá. Namá kaja jeꞌeruna kapichako junápeje. Neká penájena iꞌimaño riyukuna wajé iphákañojlo.
17 E mawó nemaká Jesusjlo:
—Páchoꞌo wateꞌeré nakiyá.
18 Raú riwitúkaꞌa wapuru chojé. Rejéchami riwakáraꞌakare eꞌiyayá jiñana pechu jáchoꞌoko penájemi wátaka mawó rijwaꞌaté iꞌijnakana, eꞌiyonaja rimá rijló:
19 —Pipaꞌó piñakaré ejo piꞌimakáloje pejena waꞌaté. Palá wani Tupana liꞌichaka pinaku, kajrú riweꞌepíchaka pimuꞌují yukuna piꞌimajé najló.
20 Raú ripaꞌó, iꞌijnari piyuke pajimila nakuwá. Iyamá théꞌela kele reꞌiyowá pajimila iꞌimaká. Rewá riꞌimá palá Jesús laꞌaká riꞌimaká yukuna najló. Riyukuna jemaꞌajeño jemaꞌaká aú riyukuna, napechu iꞌimá Jesús nakú: “¡Meke piyuke wani rilaꞌalaka!”, ke.
Jesús makápoꞌotaka Jairo itu yukuna marí
21 E kaja Jesús kuwáꞌari piño rapumí chuwá ají ke kaéja paꞌanajo pitá. Narúkaꞌako ejé kajrú inaꞌukena iphaka.
San Marcos 5.21-43
22 E pajluwa iphari rinaku, Jairo rií iꞌimaká. Nawakákaꞌalo ñakarelana chiyá wakáraꞌajeri riꞌimaká. Riká táraꞌaro riꞌirúpachi aú Jesús jimaje.
23 Mawó rimaká rijló:
—Akíchajeru wani nutu, yewíchaja rupechu kapichako, raú nuwata piꞌijnaká nujwaꞌaté nuñakaré ejo pijápakaloje runaku piyátheꞌela aú, rupalaꞌakóloje raú penaje.
24 Raú Jesús iꞌijnari rijwaꞌaté riñakaré ejo. Kajrú inaꞌukena iꞌijnaká rápumichu, unká meke laꞌajé raꞌapala palá nanakojé.
25 Najwaꞌaté apaꞌawelo jaꞌapayo kaja. Iyamá iphata jiꞌimaji nakojé kele (12) jarechí ketana cha ruꞌumaká rutami. Jirá jaꞌapákeri runakiyá.
26 Kaja pujánaꞌajeño atáꞌakeñojla rupujánaꞌakana. Kajrú wani romájika kewini yajwé. Rukaꞌaké piyuke ruliñérute rupujánaꞌakana wemí nakojé, eꞌiyonaja ñakeja ruꞌumajíkano. Richaje, richájeno ke romájika kewini yajwé.
27-28 Ruká jemaꞌayó Jesús yukuna, raú ruꞌujná rejo ramaje. Ajopana waꞌaté roꞌopá rápumichu. Inaꞌukena jiwami chiyaja rujapa raꞌarumaká jiꞌimá nakú, rupechu iꞌimakale: “Raꞌarumaká nakú jápakana aú ja nutejmoꞌotajo”.
29 E rujapa rinaku, rejeja jirá yurí runakiyá jaꞌapákana. Rejéchami peyajweru ruꞌumaká, e ruweꞌepí runapona tejmoꞌotako rojló.
30 Jesús weꞌepiri ritejmoꞌótaka ruká ripechu aú, raú ripajnoꞌó riyámojo nachaje yakáꞌajo, rimá najló:
—¿Na pajaká jápichayo nunaku?
31 E raꞌapiyatéjena kemaño rijló:
—Kaja pamá kajrú inaꞌukena majriꞌichaka piká. Eta, ¿naje chi pimá?: “¿Na jápichari noꞌorumaká nakú?”.
32 Raú Jesús yakáꞌaro neꞌiyowá piyukeja, ramákaloje naka jápichaka raꞌarumaká nakú.
33 Ilerú inanaru weꞌepiyo kaja rutejmoꞌotako, raú ruꞌujná rilokoꞌopani keroꞌokajo nakú. Kajrú rukurúkaka. E rutáraꞌo ruꞌurúpachi aú rijimaje. Ruꞌumá rijló piyuke rutami kaje yukuna.
34 Raú Jesús kemari rojló:
—Kaja pitejmoꞌotiyo pitami kaje chiyá, pipechu iꞌimakale kaphí nochojé. Chuwa piꞌijná palá kaꞌajnó.
35 Ilé ke rimaká rojló eꞌiyowá ke, ajopana iphaka Jairo nakú. Riñakaré eyá nawakáraꞌakarena neꞌemaká, nemá rijló:
—Kaja pitu takiꞌichá maapami, ñakele unká na penaje kalé pikawílaꞌa wewíñaꞌatajeri nakú ruchaya.
36 Eꞌiyonaja unká Jesús aꞌalá rinakojó napurákaꞌalo, rimá Jáirojlo:
—Piwó kaꞌaniño, pilaꞌá pipéchuwa kaphí nochojé.
37 E rimá ajopana inaꞌukénajlo:
—Unká iꞌijnalaje nujwaꞌaté rejo, maáreja iyurejo.
Pedro, Santiago, eyá reꞌewé Juan, keleja riwaꞌa rijwaꞌató.
38 E nephá riñakaré ejo, jemaꞌañó kajrú namejé iꞌimaká re nawinano laꞌakana nakú.
39 Jesús mujlúkaꞌari richojé, rimá najló:
—¿Naje ilaꞌá iwinano kajrú wani maare? ¿Naje chi iyá ruká? Unká rutakaꞌalacha, rukamátakoja.
40 Raú neꞌechá rinaku. E rimá re iꞌimakáñojlo, náchoꞌokoloje reyá piyuke aꞌajná ñoꞌojó. E riwaꞌa rijwaꞌató roraꞌapami, rolomi, eyá rijwákeꞌena, keleja. Nekaja kalé mujlúkaꞌaño ukapú támijimi iꞌimakare chojé.
41 E ripatá rutami ruyátheꞌela nakiyá. Rimá támijimijlo:
—Talita kumi —ke.
Napuraꞌakó chu rimá rojló: “Yuwaló, pijló numá, páchoꞌo”, ke.
42 Raú ja róchoꞌo, e ruchiraꞌó. Iyamá iphata jiꞌimaji nakojé kele (12) jarechí cha ruꞌumaká. Najwaꞌaté iꞌimakaño re pechu iꞌimá Jesús nakú: “¡Meke piyuke wani rilaꞌalaka!”.
43 Mawó rimaká najló, neꞌemaká piyá rimakápoꞌotaka piño ruká yukuna ajopánajlo. E rimá najló:
—Aꞌá rojló aꞌajnejí, rojñachi.