Jiñá Chiꞌinárikana kaꞌátakajla Jesús eꞌiyajé, remaꞌakáloje raꞌapiyá penaje, yukuna marí
4
Juan laꞌaká bautizar Jesús juni Jordán jakojé iꞌimaká ejomi, Tupana Pechu wáꞌari riká ají ke desierto ejo.
San Lucas 4.1-30
2 Re riꞌimá iyamá inaꞌukena leꞌejé ke (40) kala ketana. Ñaketana unká rajñala raꞌajnewá, raú kewí wani meꞌepijí iꞌimaká rijló.
3 Rejéchami Jiñá Chiꞌinárikana iphaka rinaku rikaꞌátakaloje reꞌiyajé, rilaꞌakáloje puꞌuwaré penaje. Rimá rijló:
—Kewaka Tupana iꞌirí piꞌimajika ee, piwakáraꞌa marí jipa jewíñaꞌako aꞌajnejí penaje.
4 Raú Jesús kemari rijló:
—Tupana purákaꞌalo lanaꞌakéjami chu kemari: “Unká aꞌajnejí palamane aú ja kalé iná iꞌimajla. Piyukeja Tupana purákaꞌalo jaꞌapiyá jemaꞌakana aú iná iꞌimá kaja”.
5 Rejomi Jiñá Chiꞌinárikana wáꞌari riká ají ke ipuré jiꞌiwátaje, yenoje wani. Reyá aꞌajemi riyaꞌatá rijló ajopana teꞌeré, ajopana teꞌeré ke. Piyuke marí ejaꞌawá chu iꞌimakaño ñakajela riyaꞌatá rijló reyá iꞌimajemi.
6 E rimá piño Jesusjlo:
—Noꞌojé pijló piyukeja mariruna teꞌeré piꞌimakáloje nawakáraꞌajeri penaje. Reyá kaja piyuke nakaje yuréjero pijló marí ejaꞌawá chu iꞌimakare. Nuleꞌejé waja riꞌimakale, noꞌojla riká nuwátakarenajlo.
7 Piphájika ee noꞌopí, pitáraꞌajiko ee piꞌirúpachi aú nujimaje, noꞌojé pijló riká piyuke.
8 Raú Jesús kemari rijló:
—Tupana purákaꞌalo lanaꞌakéjami kemari: “Tupana jaꞌapija kalé iná iphá, iná wakáraꞌajeri wani riꞌimakale. Riká jaꞌapiyaja kalé iná jemaꞌá palá”.
9 Rejomi Jiñá Chiꞌinárikana wáꞌari riká Jerusalén ejo ají ke Tupana ñakaré jiꞌiwátaje. Re rimá rijló:
—Kewaka Tupana iꞌirí piꞌimajika ee, peñoꞌó maáreya kawakaje teꞌerí eꞌiyajé.
10 Riꞌirí piꞌimajika ee, unká meke pilaꞌalajo. Kaja Ripurákaꞌalo lanaꞌakéjami kemari pinaku:
“Tupana wakáraꞌajeri rijwaꞌatéjena, jeꞌechú chiyájena, aꞌaká nanakojó piká.
11 Neká patajeño piká paꞌakó piyá kaphí wani jipa nakojé”, ke ripurákaꞌalo kemaká pinaku —ke Jiñá Chiꞌinárikana kemaká rijló.
12 Raú Jesús kemari rijló:
—Re kaja Tupana purákaꞌalo lanaꞌakéjami eꞌiyá kemari: “Pilaꞌaniña apoꞌojó wani nakaje, raú pamákaloje mékeka piwakáraꞌajeri Tupana aꞌaká piñathé”.
13 Jiñá Chiꞌinárikana amárijla mékeka rikaꞌatákajla Jesús eꞌiyajé, eꞌiyonaja unká remaꞌalá raꞌapiyá. Raú riyurí riká manaꞌija meketánaja.
Jesús keñoꞌoká rijápakaꞌala laꞌakana yukuna marí
14-15 E kaja Jesús paꞌaró piño Galilea teꞌeré ejo. Tupana Pechu kemájikano rijló ke rilaꞌajíkano nakaje. Rewíñaꞌatake inaꞌuké Tupana nakú nawakákaꞌalo ñakarelana chu. Apú chojé, apú chojé ke rewíñaꞌatajika neká rewá. Piyuke rewá iꞌimajíkaño puraꞌajiko rinaku palá. Kajrú riyukuna jemaꞌajiko piyuke nateꞌeré ewá.
Jesús iꞌimaká Nazaret e yukuna marí
16 E Jesús iꞌijnari Nazaret ejo. Re ritawaꞌo iꞌimaká. E watánaꞌakaje iꞌimaká wakajé, riꞌijná piño nawakákaꞌalo ñakarelana chojé, re ritáraꞌo ripuraꞌakóloje Tupana purákaꞌalo lanaꞌakéjami waꞌaté najló.
17 Naꞌá rijló riká, Ripurákaꞌalo jaꞌapátajeri Isaías michú lanaꞌakare iꞌimaká. E riphata purákaꞌaloji kemari marí ke:
18 “Nujwaꞌaté Tupana Pechu. Riwakáraꞌa nuká,
nuꞌumakáloje palani yuku unká weꞌepílaño Tupana nakojejlo.
Riwakáraꞌa kaja nuká, nupalaꞌatákaloje kamuꞌují péchurunajlo napechu.
Tupana jáchoꞌotari inaꞌuké puꞌuwaré laꞌakaná chiyá.
Riwakáraꞌa kaja nuká riyukuna iꞌimajé najló.
Riwakáraꞌa kaja nuká, noꞌopátakaloje mejluruna liyá mejlukaji.
Riwakáraꞌa kaja nuká, nuꞌumatákaloje inaꞌuké chapú nalaꞌajeño liyá.
19 Riwakáraꞌa kaja nuká, nuꞌumakáloje najló palá Tupana laꞌajíkare neká yukuna”,
ke riká purákaꞌaloji ripuraꞌakaro waꞌaté kemaká. a
20 Riñapátakaja rijwaꞌaté puraꞌakano ee, riphilaꞌá piño panakojéchaka kele papera kaje. Raꞌá nawakákaꞌalo ñakarelana chu jápajerijlo riká, rejomi riyaꞌo. Piyuke richu iꞌimakaño yakáꞌako richaje.
21 Raú riꞌimá riyukuna najló, rimá:
—Chuwajá Tupana purákaꞌalo lanaꞌakéjami, wajé nupuriꞌichajo waꞌaté, iphíchaka rená chojé, ñaké riꞌimakáloje penaje. Rimíchaka ke riꞌimajika eꞌiyowá chuwaka —ke rimaká najló.
22 Palá wani napechu iꞌimaká Jesús nakú, ñaké kaja ripurákaꞌalo nakú. Neꞌiyajena kemaño pajlokaka rinaku:
—¿Unká chi José iꞌirí kalé riká?
23 E Jesús kemari najló:
—Apala imaje kaꞌajná nojló nakaje nakú imakano maárowa pajlokaka ke: “Pujánaꞌajeri piká, eko pitejmoꞌota pikó”, ke. Imaje kaja kaꞌajná nojló: “Wemaꞌá nakaje pilaꞌakare yukuna Cafarnaúm e piꞌimaká wakajé. Chuwa wawata kaja pilaꞌaká maare piteꞌeré nakú ñaké kaja”, ke kaꞌajná imájika nojló.
24 Eꞌiyonaja numá ijló:
—Piyuke inaꞌukena, ajopana teꞌeré eyájena, iphaka Tupana purákaꞌalo jaꞌapátajeri jaꞌapí. Nekaja kalé, riteꞌeré eyájena, eyá rejena, riñakaré chiyájena waꞌaté, kele unká iphálaño raꞌapí —ke rimaká najló—.
25 Tupana purákaꞌalo jaꞌapátajeri Elías michú iꞌimaké wakajé, kajrú Israel lakénami nakiyana inaana iꞌimaká iwakajílomina. Riwakajé unká juni jaꞌaló weji kele jarechí, eyá apú peꞌiyojé ketana, raú kajrú wateꞌeré ewá iꞌimajíkaño michuna ñaꞌajika meꞌepijí panaku.
26 Riwakajé unká Tupana wakáraꞌala Elías aꞌaká iwakajílomina, wateꞌeré ewá iꞌimakaño ñathé. Riwakáraꞌa riꞌimaká apaꞌawelo ejo, rimakápoꞌokaloje rojló ruꞌurí michú, ajopana nakiyana ruꞌumaká eꞌiyonaja. Pajimila Sarepta e, Sidón awaꞌá ruñakaré iꞌimaké.
27 Eyá apú Tupana purákaꞌalo jaꞌapátajeri iꞌimari. Rií iꞌimari Eliseo. Riwakajé ñaké kaja kajrú natámina iꞌimajika lepra nakú Israel teꞌeré ewá. Unká Eliseo tejmoꞌótala neꞌemaká. Rikaja kalé, Naamán, ritejmoꞌota iꞌimaká. Ajopana teꞌeré, Siria eyaje riꞌimaká. Rikaja kalé iꞌimaró ritami kaje liyá —ke Jesús iꞌimaká riyukuna najló.
28 Ilé ke rimaká najló aú, piyuke nawakákaꞌalo ñakarelana chu iꞌimakaño yúchaꞌako richá.
29 Akuwaná náchoꞌo Jesús pataje. Napataká riká ejomi, nawaꞌa riká ají ke pajimila yámojo yenuri jiꞌiwátaje, reyá nakaꞌakáloje riká ají ke kawakaje.
30 Eꞌiyonaja raꞌapá puꞌukuja neꞌiyowá. Reyá raꞌapáñaa neká.
Jesús kaꞌaká jiñá pechu pajluwa inaꞌuké eꞌiyayá yukuna marí
31 Jesús jaꞌapari reyá ají ke pajimila Cafarnaúm ejo, Galilea teꞌeré ejo. Watánaꞌakaje iꞌimaká wakajé rewíñaꞌatake re neká Tupana nakú.
San Lucas 4.31-44
32 “¡Meke palá wani rewíñaꞌatalaka weká! Palá wani kaja riweꞌepika rinakojé”, ke napechu iꞌimajika rinaku.
33 Re kaja nawakákaꞌalo ñakarelana chu pajluwaja iꞌimari najwaꞌaté. Jiñá pechu iꞌimakeri reꞌiyá,
34 raú rawíyoꞌoko rimaká Jesusjlo:
—Jesús, Nazaret eyaje, ¿naje chi pikawílaꞌa wanaku? ¿Wakapichátaje chi piphá majó? Nománaꞌapa piká, unká laꞌalá puꞌuwaré. Tupana iꞌirí piká.
35 —Pimanúmaꞌo, páchoꞌo ilé inaꞌuké eꞌiyayá —ke Jesús akhaꞌaká jiñá pechu.
Rejéchami jiñá pechu kaꞌaká kele inaꞌuké kawakaje teꞌerí nakojé najimaje, waꞌató ke ráchoꞌoko reꞌiyayá. Unká rilaꞌalá riká chapú, ráchoꞌoko reꞌiyayá ejomi.
36 “¡Meke piyuke wani rilaꞌalaka kari!”, ke ramájeño pechu iꞌimaká Jesús nakú. Nemá pajlokaka:
—¡Meke ripurákaꞌalo aú ja riwakáraꞌa jiñana pechu jáchoꞌoko inaꞌuké eꞌiyayá!.
37 Ilé ke rilaꞌaká ejomi, kajrú riyukuna jemaꞌakó rewá.
Jesús tejmoꞌótaka Pedro yajneru yukuna marí
38 E Jesús jáchoꞌoro nawakákaꞌalo ñakarelana chiyá, reyá riꞌijná Simón Pedro ñakaré ejo. Re Simón Pedro yajneru toꞌoyó jeloꞌokajo nakú. E nemá Jesusjlo:
—Rutami wani ruká.
39 Raú riꞌijná rowaꞌajé. Riwakáraꞌa jeloꞌokajo jaꞌapaka ruliyá, ejéchami jeloꞌokajo mataꞌaká runakiyá. E róchoꞌo rutamákaꞌatakaloje najló aꞌajnejí.
Jesús tejmoꞌótaka kajrú natámina yukuna marí
40 Kaja najúwaꞌa re. Kamú jaꞌakó ejéchami nawáꞌaka piyuke natámina iꞌimakaño Jesús ejo. Keꞌiyapejé nayaripune waꞌaté neꞌemaká. E ritoꞌotá nanakojé riyátheꞌela apú nakojé, apú nakojé ke, raú piyukeja natámina iꞌimakaño tejmoꞌotako natami kaje liyá.
41 Neꞌiyajena eꞌiyá jiñana pechu iꞌimá. Neká riwakáraꞌa kaja jáchoꞌoko neꞌiyayá, raú nawíyoꞌoko nemaká rijló:
—¡Tupana iꞌirí piká!
Jesús kemari jiñana péchujlo, neꞌemaká piyá nakaje rilaꞌakare yukuna. Unká riyurila napuraꞌakó, naweꞌepíkale Tupana wakáraꞌakare riꞌimaká inaꞌuké iꞌimatájeri penaje.
Jesús iꞌimaká Tupana yukuna Galilea eyájenajlo, yukuna marí
42 E muní ke lapiyami luwíchiphika iná meꞌetaka ee, Jesús jáchoꞌoro ají ke pajimila yámojo, re riꞌimakáloje rikoja penaje. Aꞌapona ke neꞌiyajena iꞌijnaká rikulaje. Kaja ewaja nephata riká, nemá rijló:
—Piꞌijnañáaniña weká, maare piyuró wajwaꞌaté.
43 Jesús kemari najló:
—Chuwa nuꞌujnajika apú ewá, apú ewá ke, Tupana iꞌimataka inaꞌuké kapichákajo liyá yukuna iꞌimajé najló. Riká penaje nuphá majó iꞌimaká.
44 E raꞌapá reꞌiyowá nawakákaꞌalo ñakarelana chojé, apaꞌalá chojé, apaꞌalá chojé ke, Tupana yukuna iꞌimakana nakú najló.