Juan el Bautista iphaka Tupana yukuna iꞌimajé inaꞌukejlo yukuna marí
3
Riwakajé nawakáraꞌajeri ií iꞌimari Tiberio. Pajluwa théꞌela kele iphata jiꞌimaji nakojé kele (15) jarechí cha riꞌimaká nawakáraꞌakana nakú. Eyá Poncio Pilato wakáraꞌakeri riwakajé Judea teꞌeré eyájena. Eyá Herodes wakáraꞌakeri Galilea teꞌeré eyájena. Reꞌewé Felipe wakáraꞌakeri Iturea teꞌeré, eyá Traconite, kele teꞌeré eyájena. Eyá Lisanías wakáraꞌakeri Abilinia teꞌeré eyájena.
San Lucas 3.1-20
2 Eyá Anás, Caifás waꞌaté, iꞌimaño sacerdótena wakáraꞌajeño. Ilé ke neꞌemaká. Riwakajé desierto chu Tupana yuriri Juan el Bautístajlo ripurákaꞌalo, raꞌapátakaloje riká inaꞌukejlo. Zacarías michú iꞌirimi riꞌimaká.
3 E kaja Juan iꞌijnari ají ke juni Jordán cha ñakajelárunajlo Tupana yukuna iꞌimajé. Rimaké najló: “Ipajnoꞌotá ipéchuwa Tupana ejo, puꞌuwaré ilaꞌakare liyá, raú Tupana amajo ichaje piyukeja riliyá. Kewaka ipajnoꞌotájika ee ipéchuwa, rejomi nulaꞌajé bautizar iká”, ke rimájikano najló.
4 Júpimi ke ripiyá Tupana purákaꞌalo jaꞌapátajeri Isaías michú lanaꞌaká riyukuna marí ke iꞌimaká:
“Nemaꞌajé pajluwaja inaꞌuké awíyoꞌoka desierto chu.
Rimaje piyukeja inaꞌukejlo: ‘Chuwa ipalaꞌatá ipéchuwa palá wawakáraꞌajeri pe.
Ipajnoꞌotá kaja ipéchuwa Tupana ejo, puꞌuwaré ilaꞌakare liyá’.
5 Piyukeja inaꞌuké, eyá nawakáraꞌajeño kajena waꞌató, palaꞌatájeño napéchuwa palá ripé.
Iyurí iliyó piyuke puꞌuwaré ilaꞌakare, raú iꞌimakáloje palá Tupánajlo.
Ilé ke ipalaꞌatájika ipéchuwa ripé.
6 Tupana wakáraꞌajeri majó pajluwaja, riꞌimatákaloje inaꞌuké kapichákajo liyá.
Piyukeja inaꞌuké jemaꞌajika riyukuna”, ke Isaías lanaꞌaká riyukuna ripiyá iꞌimaká.
7 Kajrú inaꞌukena iꞌijnajika Juan ejo, rilaꞌakáloje neká bautizar penaje. Neꞌiyajena unká yuríkeño naliyó puꞌuwaré laꞌakaná, eꞌiyonaja neꞌejnaké kaja najwaꞌaté, rilaꞌakáloje neká bautizar penaje. Neká iphaka rinaku ee, rimá najló:
—¡Pajlákachina ta wani iká! Íkiꞌija wani Tupana wajájika puꞌuwaré laꞌakaño. ¿Na kemari ijló iꞌimajiko riliyá, ke?
8 Ilaꞌá palá, raú iná weꞌepíkaloje kewaka kaja iyurika iliyó puꞌuwaré laꞌakaná. Imaniña kaja inakuwá: “Abraham michú lakénami nakiyana weká, ñakele unká kapichákajo penájena kalé weká Tupana liyá”, ke, unká ñaké kalé riꞌimajíkale ijló. Unká Tupana iꞌimatálaje iká kapichákajo liyá ilé kaje aú. Riwátakela, rewíñaꞌatajla marí jipa riꞌimakáloje Abraham lakénami nakiyana penaje.
9 Kaja puweꞌení wani meꞌetení peru, iná iꞌikatákaloje raú paijí mecharú iꞌimakare iná mená eꞌiyayá. Rimakáraꞌajiko ejomi, iná káraꞌataje riká piyuke raꞌapare waꞌató. Ñaké kaja Tupana wajájika puꞌuwaré laꞌajeñó.
10 Raú nemá Juanjlo:
—Eta, ¿meke chi walaꞌakajla?
11 Rimá najló:
—Iyamá ikamichare iꞌimajika ee, aꞌá pajluwaja unká leꞌejé iꞌimalájejlo. Kajrú aꞌajnejí iꞌimajika ee ijló, aꞌá rinakiyana unká leꞌejé iꞌimalájejlo.
12 E liñeru ñaꞌajeño neꞌemakánajlo iꞌijnaño kaja Juan ejo, rilaꞌakáloje kaja neká bautizar. Nephaka rinaku ee, nemá rijló:
—Wewíñaꞌatajeri, ¿na walaꞌajla, weꞌemakáloje lamáꞌatakejana ke Tupánajlo raú?
13 Rimá najló:
—Ikaꞌaniña mapeja inaꞌuké liyá kajrú liñeru. Ilé iwakáraꞌajeri kemaká ijló ejenaja ijñaꞌá naliyá riká.
14 Suráana nakiyana kemaño kaja rijló:
—¡Eta weká! ¿Meke walaꞌajika?
Rimá najló:
—Ilaꞌaniña chapú ajopana, ijñaꞌakáloje naliyá ijluwa nakaje. Imaniña kaja mapeja nanaku: “Puꞌuwaré nalaꞌaká”, ke, naꞌakáloje ijló liñeru, multa wemí raú. Ipechu iꞌimá palá liñeru naꞌakare ijló ijápakaꞌala wemí waꞌaté.
15 Unká naweꞌepike palá naka Juan iꞌimajika. Napechu iꞌimaké rinaku: “Apala riká kaꞌajná Tupana wakáraꞌakare majó inaꞌuké iꞌimatájeri penaje”, ke.
Raú Juan kemari najló:
16 —Nuká laꞌarí bautizar inaꞌuké juni aú, kewaka napajnoꞌotákachu napéchuwa Tupana ejo puꞌuwaré nalaꞌakare liyá, raú ajopana weꞌepíkaloje mékajenaka neká. Riká penaje nulaꞌá bautizar neká. Rejomi apú iphaje nopumí chojé. Íkiꞌija wani nuphákare jaꞌapí riká, nuchaje wani riꞌimakale. Riká aꞌajeri inaꞌukejlo Tupana Pechu, nalaꞌaká piyá puꞌuwaré raꞌapiyá iꞌimakana aú. Rikaja kaja wajájeri puꞌuwaré laꞌajeñó ejaꞌawá tajnájiko jená wakajé.
17 Nopumí chojé iphájika laꞌajeri trigo aꞌarú kaꞌajeño laꞌaká ke. Teꞌerí ichajona kaje aú náchoꞌota trigo, karená aphoꞌokáloje raꞌarumi reꞌiyayá penaje. Rejomi paminá lamáꞌata riká wani riñakarelana chojé. Raꞌarumi rikupá keraꞌathani chojé. Ilé ke kaja nopumí chojé iphájika laꞌajika inaꞌuké nakiyana. Palá laꞌajeñó iꞌimajeño rijwaꞌaté, eyá puꞌuwaré laꞌajeñó rikaꞌajé keraꞌathani unká yakálare chojé.
18 Ilé ke Juan iꞌimajika najló Tupana iꞌimataka iná kapichákajo liyá yukuna.
19 Reꞌiyowá ke Juan akhaꞌaká neꞌemakana Herodes, rikaꞌakale rijmeremi liyá riyajalo. Herodías ruí iꞌimaká. Apú rimanáicho rilaꞌakare, eyá puꞌuwaré rilaꞌakare, kaje chona waꞌató rakhaꞌá riká.
20 Eꞌiyonaja unká Herodes aꞌalá rinakojó riká. Kaja ewaja rikaꞌá Juan inaꞌuké wajákelana chojé. Ilé ke rilaꞌaká riká aú rilaꞌá piño richaje puꞌuwaré.
Juan laꞌaká bautizar Jesús yukuna marí
21 Unká chiyó nakaꞌá Juan inaꞌuké wajákelana chojé, rilaꞌaké bautizar kajrú inaꞌukena. Jesús waꞌató rilaꞌá bautizar. Jesús iphari rinaku rejé, rilaꞌakáloje bautizar riká. E Jesús puraꞌaró Tupana waꞌaté, rejéchami jeꞌechú meꞌetako.
San Lucas 3.21-38
22 Riká chiyá Tupana Pechu witúkaꞌari ají ke majó. Túkuꞌuchi witúkaꞌaka nakaje nakojé, ke riwitúkaꞌaka Jesús nakojé. E Tupana kemari jeꞌechú chiyá: “Piká Nuꞌurí, íkiꞌija wani nuwátakare, puꞌují wani nupechu pinaku”, ke rimaká rijló.
Jesús aꞌajútaya michuna yukuna marí
23 Jesús keñoꞌoká Tupana purákaꞌalo jaꞌapátakana wakajé riꞌimá treinta jarechí cha. Nemaké rinaku: “José iꞌirí riká”, ke, rilamáraꞌakale riꞌimaká. Elí iꞌirimi José iꞌimaká.
24 Elí jaraꞌapá iꞌimari Matat. Eyá Matat iꞌimari Leví iꞌirí. Leví iꞌimari Melquí iꞌirí. Melquí iꞌimari Janai iꞌirí. Janai iꞌimari José iꞌirí.
25 José iꞌimari Matatías iꞌirí. Matatías iꞌimari Amós iꞌirí. Amós iꞌimari Nahúm iꞌirí. Nahúm iꞌimari Eslí iꞌirí. Eslí iꞌimari Nagai iꞌirí.
26 Nagai iꞌimari Máhat iꞌirí. Máhat iꞌimari Matatías iꞌirí. Matatías iꞌimari Semeí iꞌirí. Semeí iꞌimari José iꞌirí. José iꞌimari Judá iꞌirí.
27 Judá iꞌimari Johanán iꞌirí. Johanán iꞌimari Resá iꞌirí. Resá iꞌimari Zarobabel iꞌirí. Zarobabel iꞌimari Salatiel iꞌirí. Salatiel iꞌimari Nerí iꞌirí.
28 Nerí iꞌimari Melquí iꞌirí. Melquí iꞌimari Adí iꞌirí. Adí iꞌimari Cosam iꞌirí. Cosam iꞌimari Elmadam iꞌirí. Elmoda iꞌimari Er iꞌirí.
29 Er iꞌimari Josué iꞌirí. Josué iꞌimari Eliezer iꞌirí. Eliezer iꞌimari Jorim iꞌirí. Jorim iꞌimari Matat iꞌirí.
30 Matat iꞌimari Leví iꞌirí. Leví iꞌimari Simeón iꞌirí. Simeón iꞌimari Judá iꞌirí. Judá iꞌimari José iꞌirí. José iꞌimari Jonan iꞌirí. Jonan iꞌimari Eliakim iꞌirí.
31 Eliaquim iꞌimari Meleá iꞌirí. Meleá iꞌimari Mená iꞌirí. Mená iꞌimari Matatá iꞌirí. Matatá iꞌimari Natán iꞌirí.
32 Natán iꞌimari David iꞌirí. David iꞌimari Jesé iꞌirí. Jesé iꞌimari Obed iꞌirí. Obed iꞌimari Booz iꞌirí. Booz iꞌimari Sélah iꞌirí. Sélah iꞌimari Nahasón iꞌirí.
33 Nahasón iꞌimari Aminadab iꞌirí. Aminadab iꞌimari Admín iꞌirí. Admín iꞌimari Hesrón iꞌirí. Hesrón iꞌimari Fares iꞌirí. Fares iꞌimari Judá iꞌirí.
34 Judá iꞌimari Jacob iꞌirí. Jacob iꞌimari Isaac iꞌirí. Isaac iꞌimari Abraham iꞌirí. Abraham iꞌimari Térah iꞌirí. Térah iꞌimari Nacor iꞌirí.
35 Nacor iꞌimari Serug iꞌirí. Serug iꞌimari Ragau iꞌirí. Ragau iꞌimari Péleg iꞌirí. Péleg iꞌimari Éber iꞌirí. Éber iꞌimari Sala iꞌirí.
36 Sala iꞌimari Cainán iꞌirí. Cainán iꞌimari Arfaxad iꞌirí. Arfaxad iꞌimari Sem iꞌirí. Sem iꞌimari Noé iꞌirí. Noé iꞌimari Lámec iꞌirí.
37 Lámec iꞌimari Matusalén iꞌirí. Matusalén iꞌimari Enoc iꞌirí. Enoc iꞌimari Jared iꞌirí. Jared iꞌimari Mahalaleel iꞌirí. Mahalaleel iꞌimari Cainán iꞌirí.
38 Cainán iꞌimari Enós iꞌirí. Enós iꞌimari Set iꞌirí. Set iꞌimari Adán iꞌirí. Tupana keñoꞌótakare Adán iꞌimaká. Kele iꞌimaño Jesús aꞌajútaya michuna nakiyana.