2 Eyá Siria teꞌeré eyájena wakáraꞌajeri ií iꞌimari Cirenio. Riwakajé nakeñoꞌó piyukeja inaꞌukena lapaꞌatákana.

3 Raú pajluwano ke napaꞌakó nachiꞌiná michuna ñakajelami ejo nayáꞌatakaloje neí papera chojé.

4 Raú José jáchoꞌoro pajimila Nazaret eyá. Galilea teꞌeré nakú Nazaret. Reyá riꞌijná ají ke Judea teꞌeré ejo, iphari pajimila Belén ejo. Re neꞌemakana David michú mothoꞌorí iꞌimaká. Rilakénami nakiyana José iꞌimaká, ñakele ripaꞌó Belén ejo.

5 José iphari rejo María, riyajalo penájeru iꞌimajíkayo, waꞌaté. Kanupá ruꞌumaká, iꞌijnayo rijwaꞌaté rejo nayáꞌatakaloje neí papera chojé.

6 Belén e neꞌemaká ee, María iphayo roná chojé ruwáꞌakaloje ruꞌurí penaje.

7 Riká iꞌimari paineko ruꞌurí. E ropoꞌotá riká ñani ritókaꞌaru aú, rejomi rotoꞌotá riká pirájina aꞌajné aꞌakuná chojé. Pirájina ñakarelana chuja nayuró, unkale napukuna iꞌimalá nakamátakoloje pají chu ajopana waꞌaté.

8 Belén awaꞌá re ovéjana waꞌaphé iꞌimakaño iꞌimaño desierto chu lapí.

9 E manaꞌí chiyó pajluwaja Tupana waꞌatéjeri, jeꞌechú chiyaje, yaꞌató najló. Waꞌató ke kajrú kamareji ke pataká nanakojé. Kajrú nakeroꞌokó raú.

10 Rimá najló: “Ikeroꞌoniño. Palani yuku nuphátiya majó ijló, piyukeja inaꞌukena pechu laꞌajiko puꞌují raú.

11 Wajé pajluwa kerákoꞌopa mothoꞌochaka David michú ñakajelami, pajimila Belén e. Inaꞌuké wakáraꞌajeri wani penaje riká mothoꞌochari. Tupana wakáraꞌari riká majó inaꞌuké iꞌimatájeri penaje.

12 Re amaje ritoꞌokó pirájina aꞌajné aꞌakuná chu, jepoꞌotákeja ritókaꞌaru aú. Amájika ee riká marí numaká ijló ke, e iweꞌepeje riká riká”, ke Tupana waꞌatéjeri kemaká najló.

13 Rejéchami kajrú ajopana Tupana waꞌatéjena, jeꞌechú chiyájena, yaꞌatakó najló. Jeꞌechú chiyá nawitúkaꞌa apú awaꞌajé, apú awaꞌajé ke. Palá wani napuraꞌakó Tupana nakú, nemá najló:

15 Rejomi Tupana waꞌatéjena paꞌañó napumí chuwá jeꞌechú chojé. E kaja ovéjana waꞌaphé iꞌimakaño kemaño pajlokaka:

16 Raú neꞌejná peyajwé rejo, iphaño nanaku, amaño María, José waꞌaté iꞌimaká re. Namá kaja kerákoꞌopa ñani toꞌokó pirájina aꞌajné aꞌakuná chu.

17 Rejomi náchoꞌo reyá ajopánajlo, ajopánajlo ke, kerákoꞌopa namákare yukuna iꞌimakana nakú. Neꞌemá kaja najló mékeka Tupana waꞌatéjeri, jeꞌechú chiyaje, kemaká najló rinaku yukuna.

18 Riyukuna jemaꞌajeño jemaꞌaká aú mékeka nemaká rinaku, napechu iꞌimá: “¡Meke piyuke wani Tupana laꞌalaka!”

19 María pechu nakuja kalé nakaje nemakare nakú iꞌimá.

20 E kaja ovéjana waꞌaphé iꞌimakaño paꞌañó piño napumí chuwá. Palá wani napuraꞌakó Tupana nakú, namákale Riꞌirí. Tupana waꞌatéjeri kemaká najló rinaku iꞌimaká, ke namaka riꞌimaká. Raú napuraꞌó Tupana nakú palá.

21 Weji ke kuwáꞌata ke kala cha neꞌemaká kerákoꞌopa mothoꞌoká iꞌimaká ejomi wakajé namataꞌá richinuma. Naꞌá rií Jesús. Kaja unká chiyó rimothoꞌó, Tupana waꞌatéjeri kemari Maríajlo iꞌimaká, naꞌakáloje ñaké rií.

22 E kaja riphá rená chojé Josejlo riyajalo María waꞌaté laꞌakáloje Moisés michú purákaꞌalomi kemaká ke, raú neꞌemakáloje lamáꞌatakejana ke Tupánajlo. Raú neꞌejná ají ke Jerusalén ejo. Nawaꞌa kaja kerákoꞌopa najwaꞌató rejo naꞌakáloje riká Tupánajlo.

23 Tupana purákaꞌalo lanaꞌakéjami kemakeri kaja kerákoꞌopana chiꞌiná nakú, naꞌakáloje Tupánajlo naleꞌejé kerákoꞌopana achiñana, paineko mothoꞌokaño, neꞌemakáloje Tupánajlo penaje. Raú neꞌejná rejo ñaké laꞌajé.

24 Neꞌejná kaja nakaje aꞌajé Tupánajlo. Ripurákaꞌalo lanaꞌakéjami kemari kaja wajé iꞌirí mothoꞌokaño chiꞌiná nakú, naꞌakáloje iyamá ukuꞌukúrina, iyamá kaja túkuꞌuchina waꞌaté, Tupánajlo. Ilé kaje laꞌajé neꞌejná rejo.

25 Re pajluwaja inaꞌuké iꞌimari Jerusalén e, rií iꞌimari Simeón. Palájneꞌeke wani riꞌimaká; palá kaja ripechu iꞌimajika Tupana nakú. Riweꞌepí Tupana wakáraꞌajika pajluwaja inaꞌuké, Israel lakénami iꞌimatájeri penaje. Riká wátakana nakú riꞌimaké. Tupana Pechu iꞌimakeri rijwaꞌaté.

26 Kaja Ripechu kemari rijló iꞌimaká: “Pitakaꞌajika piyá, pamaje kele, Tupana wakáraꞌajikare majó, inaꞌuké iꞌimatájeri penaje”, ke.

27 E Tupana Pechu kemari kaja rijló riꞌijnakáloje Tupana ñakaré ejo, raú riꞌijná rejo riwakajé. Re riphákaꞌako Jesús chiꞌiná waꞌaté. Rejo neꞌejná nalaꞌakáloje Tupana purákaꞌalo lanaꞌakéjami kemaká ke.

28 Simeón amaka aú kerákoꞌopa, riwaꞌa rikápojo riká. E ripuraꞌó palá Tupana nakú, rimá rijló:

33 Ilé ke Simeón kemaká rinaku aú José, Jesús jaló waꞌaté, pechu iꞌimá: “¡Meke palá wani ripuriꞌichako kerákoꞌopa ñani nakú!”, ke.

34 Eyá Simeón kemari kaja nanaku Tupánajlo rilaꞌakáloje nanaku palá.

35 Napuraꞌajó rinaku puꞌuwaré. Ñaké napuraꞌajiko aú, iná weꞌepeje mékajena inaꞌukeka neká. Chapú nalaꞌajíkare penaje riꞌimajika. Kamuꞌují wani pipechu laꞌajiko raú; kajrú piwajwé majákaꞌajiko rakuwaná —ke Simeón kemaká rojló.

36 Apaꞌawelo inanaru iꞌimayo kaja re. Tupana purákaꞌalo jaꞌapátajeyo ruꞌumaká. Ruí iꞌimari Ana, Fanuel michú ítumilomi ruꞌumaká. Aser runamana ií iꞌimaká. Kaja phíyuꞌukeru wani ruꞌumaká. Inaya ruꞌumaká wakajé ruwáꞌako iꞌimaká, eꞌiyonaja kalé meketánaja ruꞌumaká ruyajná michú waꞌaté. Iyamá kuwáꞌata kele jarechí ketánaja neꞌemaká pajwaꞌatéchaka, ejéchami ritakaꞌañáaka ruꞌumaká.

37 Reyá aꞌajná ñoꞌojó ruyuró iwakajilo. Riwakajé ochenta y cuatro jarechí cha ruꞌumaká. Unká róchoꞌoloja Tupana ñakaré chiyá; ríchuja ruꞌumaké weꞌechú, eyá lapí waꞌató. Tupana nakuja rupechu iꞌimaké; rijwaꞌaté puraꞌakano nakuja ruꞌumaké; roꞌojné liyá iꞌitakano nakuja kaja ruꞌumaké.

38 Ruká iphayo Jesús chiꞌiná nakú Tupana ñakaré chojé. Paineko rumá Tupánajlo: “Palá pilaꞌaká weká”, ke. Rejomi ruꞌumá rowaꞌá iꞌimakáñojlo, kerákoꞌopa Jesús yukuna. Naweꞌepí Tupana wakáraꞌajika pajluwa inaꞌuké Jerusalén eyájena iꞌimatájeri penaje. Riká wátakana nakú neꞌemaké.

39 E kaja Jesús chiꞌiná ñapátaño Tupana purákaꞌalo lanaꞌakéjami kemaká ke laꞌakana. Raú náchoꞌo Jerusalén eyá napaꞌakóloje piño napumí chuwá ají ke pajimila Nazaret ejo. Galilea teꞌeré nakú riꞌimaká.

40 E Jesús keñoꞌorí tawáꞌakajo. Ewá richaje, richaje ke ripechu iꞌimaká rijluwa. Kapechuni wani riꞌimaká. Palá wani Tupana laꞌajika rinaku.

41 E kaja naleꞌejé fiesta, Pascua rií, iphari rená chojé najló. Raú Jesús chiꞌiná iꞌijnaño Jerusalén ejo fiesta jaꞌapátaje ajopana inaꞌukena waꞌaté. Jarechí keja neꞌejnajíkano rejo raꞌapátaje.

42 Riwakajé iyamá iphata jiꞌimaji nakojé kele (12) jarechí cha Jesús iꞌimaká. Riwakajé riꞌijná najwaꞌaté fiesta jaꞌapátaje richape. Re neꞌemá meke kálaja.

43 Fiesta tapúrenami napaꞌó piño napumí chuwá, eꞌiyonaja Jesús yuriro Jerusalén e, unká richiꞌiná weꞌepílaja.

44 Kaja napechu iꞌimá: “Ajopana waꞌateja pi riká wápumi chu”, ke. Ají ke naꞌapaka pajluwa kala ketana, ejéchami namaka rapumí. Raú nakeñoꞌó rikulákana nejena eꞌiyowá, rijwákeꞌena kajena eꞌiyowá.

45 Unká nephátala riká, raú napaꞌó piño napumí chuwá ají ke Jerusalén ejo rikulaje.

46 Kaja ewaja nephata riká weji ke kala iꞌimajemi. Tupana ñakaré chu riyaꞌo Tupana purákaꞌalo nakú jewíñaꞌatajeño waꞌaté. Napuraꞌakó jemaꞌakana nakú riyaꞌo nawaꞌá. Rikejaꞌa kaja naliyá nakaje yukuna.

47 Ajopana jemaꞌañó palá Jesús kejáꞌaka nakaje yukuna naliyá, raú napechu iꞌimá rinaku: “¡Meke kapechuni wani riká! Palá rikejáꞌaka riyukuna, palá kaja rapiyákaka neká”.

48 E richiꞌiná amaño riká najwaꞌaté, kaja nejlú jeñoꞌotó richaje yakáꞌakano nakú. E raló ajalákayo riká, rumá:

49 Jesús kemari najló:

50 Unká naweꞌepila meke kemakánaka kele rimakare nakú najló iꞌimaká.

51 Raló pechu nakuja kalé riꞌimá. Raú ripaꞌó najwaꞌaté Nazaret ejo. Palá remaꞌajika richiꞌiná jaꞌapiyá.

52 Palá ritawáꞌako, ewá richaje ke, richaje ke ripechu iꞌimaká rijluwa. Palá Tupana pechu iꞌimaká rinaku, ñaké kaja inaꞌuké pechu iꞌimajika rinaku.