Jiñá Chiꞌinárikana kaꞌátakajla Jesús eꞌiyajé remaꞌakáloje raꞌapiyá penaje, yukuna marí
4
Juan laꞌaká bautizar Jesús iꞌimaká ejomi, Tupana Pechu wáꞌari riká ají ke desierto ejo, re Jiñá Chiꞌinárikana kaꞌátakaloje reꞌiyajé penaje.
2 Re riꞌimá iyamá inaꞌukena leꞌejé ke (40) kala ketana. Ñaketana unká rajñala raꞌajnewá, raú kewí wani meꞌepijí iꞌimaká rijló.
3 Rejéchami Jiñá Chiꞌinárikana iphaka Jesús nakú, rikaꞌátakaloje reꞌiyajé, rilaꞌakáloje puꞌuwaré penaje, e rimá rijló:
—Kewaka Tupana iꞌirí piꞌimajika ee, piwakáraꞌa marí jipa jewíñaꞌako aꞌajnejí penaje.
4 Raú Jesús kemari rijló:
—Tupana purákaꞌalo lanaꞌakéjami kemari: “Unká aꞌajnejí palamane aú ja kalé iná iꞌimajla. Piyukeja Tupana purákaꞌalo jaꞌapiyá jemaꞌakana aú iná iꞌimá kaja”.
5 Rejomi Jiñá Chiꞌinárikana wáꞌari riká pajimila Jerusalén ejo. Re riꞌijratá riká yenoje Tupana ñakaré jiꞌiwátaje,
6 reyá aꞌajemi rimá rijló:
—Kewaka Tupana iꞌirí piꞌimajika ee, peñoꞌó maáreya kawakaje teꞌerí eꞌiyajé. Tupana iꞌirí piꞌimajika ee, unká meke pilaꞌalajo, kaja Ripurákaꞌalo lanaꞌakéjami kemá pinaku:
“Tupana wakáraꞌajeri rijwaꞌatéjena, jeꞌechú chiyájena, aꞌaká nanakojó piká.
Neká patajeño piká, paꞌakó piyá kaphí wani jipa nakojé”.
7 Raú Jesús kemari rijló:
—Re kaja Tupana purákaꞌalo lanaꞌakéjami eꞌiyá kemari: “Pilaꞌaniña apoꞌojó wani nakaje, pamákaloje mékeka piwakáraꞌajeri Tupana aꞌaká piñathé raú”.
8 E kaja penaje Jiñá Chiꞌinárikana wáꞌari riká ají ke ipuré jiꞌiwátaje yenoje wani. Reyá aꞌajemi riyaꞌatá rijló piyuke ajopana teꞌeré, ajopana teꞌeré, ke; piyuke marí ejaꞌawá chu iꞌimakaño ñakajela riyaꞌatá rijló ipuré jiꞌiwátaya; piyuke nakaje, palá nojé reꞌiyá iꞌimakare waꞌató, riyaꞌatá rijló.
9 E rimá piño Jesusjlo:
—Noꞌojé pijló piyukeja nateꞌeré, piꞌimakáloje nawakáraꞌajeri penaje, piphájika ee noꞌopí, pitáraꞌajiko ee piꞌirúpachi aú nujimaje.
10 Raú Jesús kemari rijló:
—Paꞌapá nuliyá, Satanás, Tupana purákaꞌalo lanaꞌakéjami kemari: “Tupana jaꞌapija kalé iná iphá, iná wakáraꞌajeri wani riꞌimakale. Riká jaꞌapiyaja kalé iná jemaꞌá”.
11 Ilé ke rimaká rijló aú, Jiñá Chiꞌinárikana jaꞌapá riliyá. Rejomi Tupana waꞌatéjena, jeꞌechú chiyájena, iphaño Jesús ñathé aꞌajé.
Jesús keñoꞌoká rijápakaꞌala laꞌakana Galilea teꞌeré e yukuna marí
12 Jesús jemaꞌarí nakaꞌaká Juan inaꞌuké wajákelana chojé yukuna, raú riꞌijná ají ke Galilea teꞌeré ejo.
13 Unká riyurilo Nazaret e iꞌimaká. Reyá ranúkaꞌo pajimila Cafarnaúm ejo. Zabulón, eyá Neftalí, kele teꞌeré awaꞌá riꞌimaká.
14 Tupana purákaꞌalo jaꞌapátajeri Isaías michú kemaká júpimi rinaku iꞌimaká, keja riꞌimaká. Riká lanaꞌarí iꞌimaká:
15 “Zabulón, eyá Neftalí, kele teꞌeré juni Jordán paꞌanojo pitá, juni jalomi turená awaꞌá Galilea teꞌeré. Re kajrú inaꞌukena rewá, unká judíona kalé iꞌimakaño.
16 Inaꞌukena, unká weꞌepílaño Tupana nakojé iꞌimaká, kalajeruni chu iꞌimakaño keja neká, amaño chuwa mejámaꞌatani, naweꞌepíkale rinakojé.
Kapichájeño penájena neꞌemaká, jemaꞌañó chuwa neꞌematájeri yukuna”, ke rilanaꞌaká riyukuna iꞌimaká.
17 Rejéchami Jesús keñoꞌoká Tupana yukuna iꞌimakana najló rewá. Rimaké najló: “Chuwa ipajnoꞌotá ipéchuwa puꞌuwaré ilaꞌakare liyá Tupana ejo, yewicha riphaka rená chojé Tupánajlo, riꞌimakáloje inaꞌuké nakiyana wakáraꞌajeri”.
Jesús kemari paꞌu kele jiña janaꞌajéñojlo, neꞌejnakáloje rijwaꞌaté raꞌapiyatéjena penaje. Riyukuna marí
18 E kaja Jesús chiraꞌaró ají kaéja Galilea turenawa, re ramá Simón Pedro, reꞌewé Andrés waꞌaté. Jiña janaꞌajeño wená chojé neꞌemaká. Nawenare kaꞌakana junápeje nakú neꞌemá, ejé riphá nanaku, rimá najló:
19 —Iꞌijná nujwaꞌaté. Jiña janaꞌakana ijápakaꞌala, chuwa noꞌojika ijló apú jápakaje. Iwáꞌaje nojló inaꞌuké, neꞌemakáloje noꞌopiyá jemaꞌajeño penaje.
20 Raú nayurí rejeja nawenare, iꞌijnaño rijwaꞌaté.
21 E Jesús jaꞌapari piño reyá aꞌajná ñoꞌojó kemachi, amari ajopana janaꞌajeño: Santiago, reꞌewé Juan waꞌaté, Zebedeo yaní neꞌemaká. Nawapúrune chu neꞌemá nawenare lamáꞌatakana nakú. Ramaka aú neká, rimá najló:
22 —Iꞌijná nujwaꞌaté.
Raú nayurí nawapúrune naraꞌapá waꞌaté, e kaja neꞌejná rijwaꞌaté.
Jesús jewíñaꞌataka kajrú inaꞌukena Tupana nakú yukuna marí
23 Jesús jaꞌapari piyuke Galilea teꞌeré eꞌiyowá Tupana yukuna iꞌimakana nakú. Rewíñaꞌatake neká nawakákaꞌalo ñakarelana chu; riꞌimaké najló Tupana iꞌimatájika inaꞌuké kapichákajo liyá yukuna; raꞌapátake kaja natámina liyá nayaripune keꞌiyapejé.
24 Ilé ke rilaꞌajíkale rewá aú, kajrú riyukuna mothoꞌoká Siria teꞌeré eꞌiyowá. E nawaꞌa richaje kajrú natámina. Kewini yajwé amájeño neꞌemaká; keꞌiyapejé nayaripune iꞌimaká; neꞌiyajena nakú jiñana pechu kawílaꞌake; neꞌiyajénajlo nanapona kurúkakeri; eyá neꞌiyajénajlo nanapona takaꞌakeri kamachá. Piyukeja ilé kajena riwakáraꞌake tejmoꞌotako natami kaje liyá
25 Kajrú inaꞌukena Galilea eyájena, Decápolis eyájena, Jerusalén eyájena, eyá Judea teꞌeré eyájena, kajena iꞌijnajika rijwaꞌaté. Juni Jordán paꞌanajo pitá iꞌimakaño waꞌató iꞌijnakeño kaja rijwaꞌaté.