Oveja kapichako yukuna marí
15
Kajrú liñeru ñaꞌajeño neꞌemakánanajlo awakako Jesús nakojé tujlá ke ripurákaꞌalo jemaꞌajé. Ajopana, nemakárena nakú: “Unká inaꞌukélaruna”, ke, waꞌató awakaño kaja rejé.
San Lucas 15.1-10
2 Fariséona, eyá Tupana purákaꞌalo nakú jewíñaꞌatajeño waꞌaté, amaño natáraꞌako Jesús awaꞌá, raú nachapújraꞌo rinaku. Nemá pajlokaka:
—¡Amá riká, unká inaꞌukélaruna ta waꞌaté! Eꞌiyonaja unká meke rimalá najló. Manaꞌija rajñaka raꞌajnewá najwaꞌaté.
3 Raú Jesús iꞌimari najló marí yuku rewíñaꞌatakaloje neká penaje:
4 “Re kaꞌajná pajluwa inaꞌuké pirana cien ovéjana. Nanakiyana kaꞌajná kapicharo pajluwaja. Paminá amíchaka aú unká pajluwa iꞌimalacha najwaꞌaté, riyuricha ajopana noventa y nueve ovéjana naꞌajnewá ajñakana nakú riꞌijnakáloje kapicharo neꞌiyayá kulaje riphátajika riká ejená.
5 Riphátiyaka riká aú puꞌují wani ripechu liꞌichako. Rejomi rikiꞌichá riwakúlaꞌapajo riká ripaꞌatákaloje riká rapumí chuwá.
6 E kaja ripiꞌichó rijwaꞌaté riñakaré ejo. Rejomi rawakátiya rijwákeꞌena, palá ripechu iꞌimakárena nakú, piyuke riñakaré awaꞌá iꞌimakaño waꞌaté, rimakáloje najló: ‘Iꞌimá keyajupa nujwaꞌaté. Kaja nuphátiya nupirá kapicharo iꞌimaká’, ke rimaká”.
7 Rejomi Jesús kemari piño najló: “Ñaké kaja Tupana waꞌatéjena, jeꞌechú chiyájenajlo riká. Puꞌují wani napechu laꞌakó pajluwaja puꞌuwaré laꞌajerí pajnoꞌotákachu ripéchuwa puꞌuwaré rilaꞌakare liyá Tupana ejo. Eyá ilé noventa y nueve yuriño manaꞌija waꞌaté, unká ñaké kalé napechu iꞌimaká puꞌují”.
Liñeru kapichako yukuna marí
8 E riꞌimá piño yuku najló marí ke: “Pajluwájaru inanaru iꞌimichayo. Iyamá théꞌela keta (10) ruliñérute kawemí nojé wani iꞌimichaka. Pajluwata rinakiyana kapiícharo, raú rulukúniꞌicha rukamaré. Rolákicha ruñakaré chiyá aꞌajná ruphátiyaka riká ejená.
9 Ruphátiyaka riká ejomi, rowakátiya inaꞌuké, palá rupechu iꞌimakárena nakú, ruñakaré awaꞌá iꞌimakaño waꞌaté. Rumicha najló: ‘Iꞌimá keyajupa nujwaꞌaté. Kaja nuphátiya nuliñérute nakiyana kapicharo iꞌimaká’, ke”.
10 E Jesús kemari najló: “Puꞌují rupechu iꞌimaká, ruphátakale ruliñérute. Numá ijló, ñakeja kaja Tupana waꞌatéjena, jeꞌechú chiyájena, pechu laꞌakó puꞌují pajluwaja puꞌuwaré laꞌajerí pajnoꞌotákachu ripéchuwa Tupana ejo”.
Pajluwa amako riꞌirí chaje yukuna marí
11 Jesús iꞌimari piño yuku najló marí ke: “Pajluwaja inaꞌuké iꞌimichari. Iyamá riyani iꞌimichaka.
El Hijo Perdido (Lucas 15.11-32)
San Lucas 15.11-32
12 E kaja najmeremi kemíchari raraꞌapajlo: ‘Paꞌayú, chuwata nuwata paꞌaká nojló pinane nakiyana, pimakare nakú nojló penaje iꞌimajíkare’. Raú ritamákaꞌatiyaka pajñakani riyánijlo rinane nakiyana.
13 Rejomi neꞌemichá meketánaja. E najmeremi awakátiyari rileꞌejépela piyuke raꞌakáloje riká ajopánajlo riwemí aú. E kaja riꞌijichá reyá ají ke yaꞌajnaje ajopana teꞌeré ejo. Unká wani paala riliꞌichaka rewá. Piyuke rikupátiyaka riliñérute mapeja.
14 E kaja waja riliñérute tajnáñaichari riká. Waꞌató ke kamuꞌují naliꞌichaka rewá aꞌajnejí nakú. E nakeñoꞌochá meꞌepijí nakú takaꞌakana. Ñaké kaja rikeñoꞌochaka meꞌepijí ñaꞌakana panaku.
15 Akuwaná rikulicha jápakaje rijluwa rewá, raú reyaje aꞌachari rijló jápakaje. Jeꞌeruna pirakana lamáraꞌakana nakú riꞌimichá.
16 Najicha aꞌajnejí mujrumi kupákejami raꞌapiyá. Kakámeꞌe riꞌimichaka naꞌajné ajñakana nakú, unkale na aꞌalacha rijló aꞌajnejí.
17 “E kaja waja riꞌijnatiya ripéchuwa: ‘Yaꞌajná, paꞌayú waꞌaté jápajeño ajñaño palá naꞌajnewá meꞌetení. Unká kaja aꞌajnejí tajnáñaala neká, eyá maare nutakaꞌá meꞌepijí ta nakú.
18 Ñakele chuwa nupaꞌajiko paꞌayú ejo. Nuphájika rejo ee, numaje rijló: Puꞌuwaré wani nulaꞌaká Tupana. Ñaké kaja nulaꞌaká chapú piká.
19 Unká inaꞌukélari nuká, ñakele unká piꞌirí ke kalé nuꞌumajika. Pijwaꞌaté jápajeri keja nuꞌumajika, ke numájika rijló’, ke riꞌijnatíyaka ripéchuwa.
20 Raú ráchoꞌocho reyá, ripaꞌakóloje ají ke raraꞌapá ñakaré ejo. E kaja ripiꞌichó. Juká riꞌimanoja, raraꞌapá amicha riká waíchaka majó. E riweꞌepicha kamuꞌují rinaku, raú rechoꞌochó rijimaje, iphíchari rinaku. E rimawíloꞌocha riká, richiñoꞌochá kaja rijimá chiyá.
21 “Rejéchami riꞌirí kemíchaka rijló: ‘Paꞌayú, puꞌuwaré wani nulaꞌaká Tupana, ñaké kaja nulaꞌaká piká chapú. Unká inaꞌukélari nuká, ñakele unká piꞌirí ke kalé nuꞌumajika chuwa’.
22 Eꞌiyonaja unká raraꞌapá jemaꞌalacha raꞌapiyá. Rimicha rijwaꞌaté jápajeñojlo: ‘Ijiꞌichá kiñaja majó aꞌarumakaji patá nojé, aꞌachí nuꞌurí nakú riká. Ijiꞌichá kaja anillo aꞌakáloje riyatewana nakojé. Ijiꞌichá kaja jiꞌimaꞌulaji, aꞌachí riꞌimá nakojé riká.
23 Rejomi ikulicha jema pirakana iꞌirí peꞌiyochá tawáꞌako ñópoꞌojlo. Inochi riká wajñákaloje riꞌimi. Keyajupa wajñájika waꞌajnewá pajwaꞌatéchaka.
24 Kaja takaꞌaká ke kaji nuꞌurí iꞌimaká nuliyá, eyá chuwa nuphátiya piño riká’, ke rimíchaka rijwaꞌaté jápajeñojlo.
“Riꞌirí iphíchaka aú keyajupa neꞌemichaka pajwaꞌatéchaka.
25 Aꞌapona ke reꞌewé pheꞌejrí iphíchaka namena eꞌiyayá nañakaré kópeje, jemiꞌichari kajrú narápiꞌichaka.
26 Raú riwáꞌicha pajluwa raraꞌapá waꞌaté jápajerijlo. Rimicha rijló: ‘¿Meke chi ilaꞌaká kele?’
27 Rimicha rijló: ‘Pijmeremi iphíchari aú paraꞌapá wakáriꞌicha wenoka jema pirakana iꞌirí ñópoꞌojlo peꞌiyochá tawáꞌako, palá riphíchakale rinaku peyajweni’, ke rimíchaka.
28 “Raú reꞌewé yúchiꞌicharo kajrú wani, unká riwátalacha pají chojé mujlúkaꞌakana. Raú raraꞌapá iꞌijichá rijwaꞌaté puraꞌajó rimujlúkaꞌakaloje penaje.
29 Rimicha raraꞌapajlo: ‘Palá piweꞌepika meketana júpichaka nujápaka pijwaꞌaté maare. Palá nomaꞌaká paꞌapiyá, eꞌiyonaja unká na paꞌalá nojló nuꞌumakáloje nujwákeꞌena waꞌaté keyajupa raú. Ñaké kaja, paꞌakela nojló kawayá pirakana, palani riꞌimakajla nojló.
30 Eyá kele piꞌirí ta iphíchari. Kaja rikupata piyukeja piliñérute inaana ñujuꞌukéruna waꞌaté, eꞌiyonaja piwakáriꞌicha jema pirakana iꞌirí ñópoꞌojlo nókana rijló riphíchaka aú’, ke rimíchaka raraꞌapajlo.