Jesús kemari nakajyaꞌatájika Tupana ñakaré. Riyukuna marí
24
E kaja Jesús jáchoꞌoro Tupana ñakaré chiyá. E raꞌapiyatéjena iꞌijnaño rijwaꞌaté puraꞌajó Tupana ñakaré nakú.
2 Rimá najló:
—Kele Tupana ñakaré amákare meꞌetení, jipa nakiyá laꞌakanami, unká iꞌimalaje piño maare, aꞌajná ñoꞌojó chami chapú péchuruna kajyaꞌatájikale riká piyukeja. Rejomi unká wani jipa yurílajo pacháaka rapukúnami chu.
Jesús iꞌimaká najló mékeka riꞌimajika yewicha ejaꞌawá kapichájiko yukuna marí
3 E neꞌejná yenuri Olivos ejo. Re neꞌemaká ee, Jesús jaꞌapiyatéjena iꞌijnaño rawaꞌajé rijló kemaje:
—Pimá wajló mékechamika kele, pimíchaje nakú wajló, iꞌimajika pimíchaka ke. ¿Na aú chi naweꞌepeje yewicha pipaꞌakó majó jená? ¿Na aú chi inaꞌuké weꞌepeje yewicha ejaꞌawá kapichako jená?
4 Rimá najló: “Amá ikó palá wani, ajopana pajlaka piyá ijwaꞌaté.
5 Ripiyá kajrú inaꞌukena iphájika majó nanakuwá kemaje: ‘Nuká Tupana wakáraꞌakare majó inaꞌuké iꞌimatájeri penaje’, ke. Kajrú wani kaja napajlájika inaꞌuké waꞌaté.
6 Jemaꞌajé kaja kajrú ajopana nókakako pajwaꞌatéchaka yukuna. Ikeroꞌoniño ilé kaje yukuna jemaꞌakana aú. Kaja keja riꞌimajika, eꞌiyonaja unká joꞌó wani ejaꞌawá kapichájiko jená iphálaje riwakajé.
7 Ajopana teꞌeré eyájena nókajeño ajopana teꞌeré eyájena waꞌaté; kajrú inaꞌukena takaꞌajika meꞌepijí nakú; kajrú kaja teꞌerí ñakaꞌajiko apú ewá, apú ewá ke.
8 Ilé kaje aú nakeñoꞌojé chapú kaje yajwé ñaꞌakana panaku.
9 “Rejéchami napatájika iká nalaꞌakáloje iká chapú penaje. Nenoje iká. Piyukeja inaꞌuké pechu iꞌimajika chapú inaku, jemaꞌakale noꞌopiyá.
10 Riwakajé kajrú neꞌiyajena pechu yuríjika nochojé iꞌimakana kaphí. Chapú namájika pekowáaka. Napuraꞌajó kaja chapú pekowáaka laꞌakana nakú.
11 Riwakajé kajrú neꞌiyajena kemájika mapeja nanakuwá: ‘Tupana purákaꞌalo jaꞌapátajeño weká’, ke. Kajrú napajlájika inaꞌuké waꞌaté.
12 “Kajrú kaja puꞌuwaré laꞌakaná iꞌimajika riwakajé. Raú neꞌiyajena yuréjeño ajopana wátakana kajrú.
13-14 Unká yurílajeño Tupana purákaꞌalo jaꞌapiyá iꞌimakana natakaꞌajika ejená, riꞌimataje kapichákajo liyá, riwátakale piyuke inaꞌuké wakáraꞌajeri iꞌimakana, neꞌemakáloje palá laꞌajeñó raú. Neꞌejnajé riyukuna iꞌimajé ajopánajlo, ajopánajlo ke piyuke ejaꞌawá chuwá. Ilé kaje aú ajopana teꞌeré eruna, ajopana teꞌeré eruna ke jemaꞌajeño riyukuna. Piyukeja inaꞌuké jemaꞌajíkaja riyukuna ejéchami, riphájika rená chojé ejaꞌawá tajnákoloje penaje.
15 “Natáraꞌataje nakaje puꞌuwareni wani Tupana ñakaré chojé. Tupana purákaꞌalo jaꞌapátajeri michú Daniel iꞌimari riyukuna júpimi iꞌimaká. (Marí lanaꞌakéjami amájeñojlo numá: Iweꞌepí meke kemakánaka riká.)
16 Ilé ke riꞌimajika wakajé, palani iká Judea teꞌeré nakú iꞌimakaño ñaakó ipuré eꞌiyajé.
17 Eyá iꞌimajeri kaꞌajná riwakajé riñakaré jiꞌiwata chu, palani riñaakó reyaja. Riwitúkaꞌaniña nakaje ñaꞌajé riñakaré chiyá paineko.
18 Riwakajé apú kaꞌajná iꞌimajeri rimena eꞌiyá. Palani riñaakó reyaja, unká meke laꞌajé ripaꞌalojla riñakaré ejo raꞌarumaká ñaꞌajé.
19 Riwakajé chapú wani riꞌimajika kanupana inaana iꞌimajíkañojlo. Chapú wani kaja riꞌimajika inaana kayanikérunajlo. Ñaké kaja riꞌimajika chapú wani re joꞌó kaja yaní iꞌirakaño chuꞌuchujlo.
20 Ipuraꞌó Tupana waꞌaté, riꞌimaká piyá ñaké ijló yawijá iꞌimajika japi kaꞌajná, watánaꞌakaje wakajé kaꞌajná.
21 Riwakajé kajrú wani inaꞌukena amájika chapú kaje yajwé. Tupana keñoꞌótaka ejaꞌawá iꞌimaká eyá maárejecha, unká joꞌó wani namala ñaké chapú kaje yajwé. Unká kaja namálaje ñaké reyá aꞌajná ñoꞌojó.
22 Tupana witúkaꞌatajeri najló rená, riꞌimaká piyá júpija wani najló, íkiꞌija riwátakale inaꞌukena, riꞌiwapakárena rijluwa iꞌimaká. Najló riwitúkaꞌataje rená. Unkákela rilaꞌajla ñaké, unká na kalé iꞌimarojla kapichákajo liyá.
23 “Apala nemaje kaꞌajná ijló: ‘Iyakaꞌo aꞌajná ñoꞌojó ke kaꞌajná, ají ñoꞌojó ke kaꞌajná, kele Tupana wakáraꞌakare majó inaꞌuké iꞌimatájeri penaje’. Ilé ke nemájika ee ijló, jemaꞌaniña naꞌapiyá.
24 Kajrú wani pajlákachina iꞌimajika. Mapeja nemájika nanakuwá apú, apú ke: ‘Inaꞌuké iꞌimatájeri nuká’, ke. Apú kaꞌajná kemájeri rinakuwá: ‘Tupana purákaꞌalo jaꞌapátajeri nuká’, ke. Nalaꞌajé kajrú nakaje unká méñoꞌojo ajopana laꞌalare kaje, raú napajlákaloje najwaꞌaté. Tupana iꞌiwapakárena rijluwa iꞌimaká waꞌaté napajlaje kaja, eꞌiyonaja unká nemaꞌalaje naꞌapiyá.
25 Iweꞌepí numakare nakú: Unká chiyó riꞌimá ñaké, numá ijló rinaku.
26 “Ñakele nemájika ee kaꞌajná ijló nunaku: ‘Re riká yaꞌajná desierto chu, amicha riká’, ke, iꞌijnaniña rejo. Unká nuká kalé riꞌimajika. Nemaje kaja kaꞌajná ijló: ‘Re riká ukapú chu, amicha riká’, jemaꞌaniña kaja naꞌapiyá.
27 Pichaní kamaré pataká jeꞌechú chiyá, ke kaja namájika nuphaka majó. Inaꞌuké iꞌimakáloje nupalamane penaje iꞌimaká nuká.
28 Méreka támijimi iꞌimaká ee, rejé wayuna awakaño. Ñaké kaja inaꞌuké weꞌepika nuphájika piño majó nakojé”, ke Jesús kemaká najló.
Jesús paꞌajiko piño majó yukuna marí
29 Jesús kemari piño najló: “Kajrú wani inaꞌuké amájika chapú kaje yajwé. Riwakajé unká kamú, eyá keri waꞌaté, kamaré amálajo. Iwijrina jaꞌajeño kaja majó jeꞌechú chiyá. Piyukeja nakaje jeꞌechú chu iꞌimakare ñakaꞌajiko.
30 Raú naweꞌepeje meketánaja iꞌimajemi Tupana iꞌirí iphájika. Kajrú wani nakeroꞌojiko, akuwaná kajrú neyájika. Rejéchami namájika nuwitúkaꞌaka majó jeꞌechú chiyá juni juwákaꞌala eꞌiyowá. Piyukeja inaꞌukena wakáraꞌajeri penaje nuphaje majó riwakajé. Kajrú mejámaꞌatani ke iꞌimajika nowaꞌó.
31 Tupana wakáraꞌajeri kaja rijwaꞌatéjena, jeꞌechú chiyájena, majó. Kajrú luwiluwí kaje mejé iꞌimajika. Nawakátaje piyukeja nujwaꞌatéjena, nuꞌuwapakárena nujluwa ajopana inaꞌukena eꞌiyayá iꞌimaká. Nawáꞌaje piyukeja neká neꞌemajika ewá.
32 “Kaja iweꞌepí meke newíñaꞌataka iká paijí higuera nakojé. Nemá rinaku: ‘Riꞌiché pitúkaꞌakachu ripaná mothoꞌokáloje rinakiyá penaje aú, iná weꞌepí yewíchaja jarechí iphaka rená chojé’, ke.
33 Ñaké kaja amájika wakajé nakaje numakare nakú ijló ke aú, iweꞌepeje yewíchaka riphaka rená chojé nupaꞌakóloje majó penaje.
34 Unká chiyó inaꞌuké marí ejaꞌawá chu iꞌimakaño tajnó, riꞌimajé ilé numaká ijló ke.
35 Jeꞌechú, ejaꞌawá waꞌaté tajnájero, eyá nupurákaꞌalo unká tajnálajo. Numaká rinaku keja nakaje iꞌimajika.
36 “Unká na weꞌepila na wakajeka riꞌimajika ñaké, na kamú jená jápika. Tupana waꞌatéjena, jeꞌechú chiyájena, unká kaja weꞌepílaño mékechamika riꞌimajika. Nuká, Tupana iꞌirí, unká kaja weꞌepila riká. Rikaja kalé Noraꞌapá Tupana weꞌepiri mékechamika riꞌimajika”, ke rimaká najló.
37 E rimá piño najló: “Noé michú iꞌimaké wakajé, ke kaja riꞌimajika nupaꞌajiko yámona. Inaꞌuké iꞌimakáloje nupalamane penaje iꞌimaká nuká
38 Riꞌimaké wakajé Tupana wakáraꞌari kajrú juni jaꞌakó, puꞌuwaré laꞌajeñó kapichákoloje rakojé penaje. Unká chiyó riwakáraꞌa kajrú juni jaꞌakó wakajé, manaꞌija neꞌemajika naꞌajnewá ajñakana nakú. Nakaje jalá iꞌirakana nakú neꞌemaké. Naꞌaké kaja nayani pajlokaka nawáꞌakakoloje penaje. Ilé kaje nakuja neꞌemaké Noé mujlúkaꞌaka riwapúrune chojé ejená.
39 Unká naweꞌepila nakapichako jená. Kajrú wani juni jaꞌakó iꞌimaká aú rakojé nakapichó iꞌimaká. Ñaké kaja riꞌimajika inaꞌukejlo nupaꞌajiko majó piyá. Unká kaja naweꞌepílaje mékechamika nupaꞌajiko piño majó. Inaꞌuké iꞌimakáloje nupalamane penaje iꞌimaká nuká.
40 Iyamá inaꞌukena kaꞌajná iꞌimajeño namena eꞌiyá. Jeꞌechú chiyájena wáꞌajeño pajluwaja nanakiyana. Apú yuréjero, unkale remaꞌalá noꞌopiyá.
41 Riwakajé kaja iyamá inaana tujlaꞌajeño nakaje pajñakani kaꞌajná nakaje tujlákaꞌaruna chu. Nawáꞌaje pajluwájaruja, nujwaꞌatéjeru ruꞌumakale. Apaꞌawelo yuréjeyo, unkale romaꞌalá noꞌopiyá.
42 “Ilamáꞌata palá ipéchuwa nupé, unkale iweꞌepílaje mékechamika nupaꞌajiko piño majó.
43 Jemaꞌá marí: Paminá weꞌepíkela mékechamika piroꞌokeji iphájika nakaje jataꞌajé riñakaré chiyá lapí, unká rikamátalojla. Kajmuni riꞌimakajla aꞌajná ramaka riphaka ejená. Unká riyurílajla rimujlúkaꞌaka riñakaré chojé nakaje jataꞌajé.
44 Ñaké kaja ilamáꞌataka ipéchuwa nupé, unkale iweꞌepílaje noná. Manaꞌí chiyó nuphaje inaku majó”, ke Jesús kemaká najló.
Pajluwaja jápajeri laꞌarí palá, apú laꞌarí chapú. Riyukuna marí
45 Jesús iꞌimari najló marí yuku: “Re kaꞌajná pajluwa waꞌaté jápajeri. Rikariwate iꞌijichaka yaꞌajnajo yámona, raꞌachá riká aꞌajnejí tamákaꞌatajeri rijwaꞌaté jápajeñojlo penaje riphaka rená chojé kewá. Palá riliꞌichaka rijápakaꞌala palá, remiꞌichákale raꞌapiyá. Kapechuni riꞌimichaka.
46 Rikariwate iphíchaka rinaku wakajé, ramicha rilaꞌaká piyuke palá, riwakáraꞌaka riká ke. Palá rilaꞌajika riká raú.
47 Raꞌajé kaꞌajná riká piyukeja rinane amájeri penaje.
48 Eyá apala unká inaꞌukélari riꞌimakela, rimajla rikariwate nakú yaꞌajná riꞌimaká ketana: ‘Meke júpija wani nuwakáraꞌajeri maláraꞌataka rikó rewá, unká riphálaje kiñaja’.
49 Ilé ke ripechu iꞌimakela, rikeñoꞌojla rikariwate waꞌaté jápajeño laꞌakana chapú. Kajrú raꞌajnewá ajñakana nakú kaꞌajná riꞌimajla; yuwéraꞌakajo nakú riꞌimajla ajopana yuwéraꞌakachona waꞌaté.
50 Wajátakajo rikariwate iphákela rinaku, riwajajla riká kajrú wani.
51 Riwakáraꞌajla riká yaꞌajnaje, rijñaꞌakáloje chapú kaje yajwé panaku pajlákachina waꞌaté penaje. Re kaja riyajla kajrú; rajmaꞌajla raiwá kajrú, kewini yajwé akuwaná”, ke Jesús iꞌimaká najló riyukuna rewíñaꞌatakaloje neká raú penaje.