Iwakajílomi aꞌaká liñeru Tupánajlo yukuna marí
21
Jesús iꞌimari liñeru aꞌakuná awaꞌá Tupana ñakaré chu. Re ramá kajrú liñérutena kaꞌaká liñeru raꞌakuná chojé.
San Lucas 21.1-28
2 Eyá ramá kaja apaꞌawelo iwakajílomi. Kamuꞌují laꞌakayo wani ruꞌumaká. Ruká kaꞌayó iyamata ñánija liñeru richojé, wejápaja wani rawakako.
3 Raú Jesús kemari rawaꞌá iꞌimakáñojlo:
—Jemaꞌá marí: Ilerú iwakajílomi, kamuꞌují laꞌakayo wani ruká. Ilé liñeru, wejápaja rukiꞌichaje richojé, aú rucháꞌatiya ajopana, raú ruliꞌichá palá nachaje.
4 Ajopana kiꞌichaño naliñérute lupemí richojé. Eyá ilerú, kamuꞌují laꞌakayo, kiꞌichayo piyuke ruliñérute richojé, aꞌajnejí warúwaꞌajona penaje iꞌimichákajla —ke rimaká najló.
Nakajyaꞌatájika Tupana ñakaré yukuna marí
5 Jesús jaꞌapiyatéjena nakiyana puraꞌañó Tupana ñakaré nakú. Nemá rinaku:
—Meke palani wani riká. Palá nojé jipa nakiyana laꞌakanami riká. Palani kaja nakaje patoꞌoró rinaku, naꞌakare Tupánajlo.
6 E Jesús kemari najló:
—Kele Tupana ñakaré, amákare meꞌetení, unká iꞌimalaje piño maare, aꞌajná ñoꞌojó chami chapú péchuruna kajyaꞌatájikale riká piyukeja. Rejomi unká wani pajlúwaꞌala ñani jipa yurílajo pacháaka rapukúnami chu —ke rimaká najló.
Jesús iꞌimari najló mékeka riꞌimajika yewicha ejaꞌawá kapichájiko wakajé. Riyukuna marí
7 Nemá Jesusjlo:
—Wewíñaꞌatajeri, ¿mékechami chi riꞌimajika, kele pimíchaje nakú wajló iꞌimajika, pimíchaka ke? ¿Na aú chi inaꞌuké weꞌepeje yewicha riphaka rená chojé?
8 Rimá najló: “Jemaꞌaniña ajopana purákaꞌalo, napajlájikare aú ijwaꞌaté, jaꞌapiyá. Kajrú wani inaꞌuké iphájika majó nanakuwá kemaje: ‘Tupana wakáraꞌari nuká majó inaꞌuké iꞌimatájeri penaje. Kaja noná iphá rená chojé’, ke nemájika nanakuwá ajopánajlo, ajopánajlo. ¡Pa! jemaꞌaniña ilé kajena jaꞌapiyá.
9 Jemaꞌajé kaja kajrú ajopana nókako pajwaꞌatéchaka yukuna. Nanaku nemaje: ‘Kajrú nenókako pajwaꞌatéchaka nekámika’, ke. Ikeroꞌoniño ilé kaje yukuna jemaꞌakana aú. Kaja keja riꞌimajika, eꞌiyonaja unká joꞌó wani ejaꞌawá kapichájiko jená iphálaje riwakajé”.
10 Rimá piño najló: “Ajopana teꞌeré eyájena nókajeño ajopana teꞌeré eyájena waꞌaté; ajopana iꞌimakana waꞌatéjena nókajeño ajopana iꞌimakana waꞌatéjena waꞌaté.
11 Aꞌapona ke, riwakajé kajrú teꞌerí ñakaꞌajiko apú ewá, apú ewá ke. Kajrú kaja inaꞌuké takaꞌajika meꞌepijí nakú riwakajé; kajrú wani yaripu nójika inaꞌuké riwakajé. Jeꞌechú chiyá amaje kajrú nakaje, riká keroꞌótajeri ijló.
12 “Ilé ke riꞌimajika wakajé piyá, nalaꞌajé iká chapú. Napataje iká, rejomi nawáꞌaje iká awakákaꞌalo ñakarelana chojé. Re nemaje inaku: ‘Puꞌuwaré laꞌajeñó neká’, ke. Rejomi nakaꞌajé iká inaꞌuké wajákelana chojé. Nawáꞌaje iká iꞌimakánana ejo. Nachaje wakáraꞌajeño ejo waꞌató nawáꞌaje iká, narukátakaloje najló iká mapeja penaje. Ilé ke nalaꞌajika iká chapú, noꞌopiyá jemaꞌajeño iꞌimakale.
13 Raú iꞌimajé nuyukuna najló.
14 Iꞌijnatániña ipéchuwa: ‘¿Meke chi wapuraꞌajiko wachayo, nawajaka piyá weká?’, ke.
15 Nuká aꞌajeri ijló purákaꞌaloji, raú kapechú imájika najló, nemaká piyá inaku: ‘Mapeja napajlaka’, ke.
16 Ñaké kaja ejena nakiyana laꞌajika iká chapú. Ichiꞌiná kaꞌajná, ejena nakiyana kaꞌajná, eꞌewelona nakiyana kaꞌajná, ijwákeꞌena nakiyana kaꞌajná, aꞌajeño iká ajopánajlo, chapú inaku péchurunajlo. Neká nójeño inakiyana.
17 Piyukeja inaꞌukena wo iꞌimajika chapú ichá, jemaꞌakale noꞌopiyá.
18 Unká na kalé ilaꞌajiko.
19 Unkájika ee jáchoꞌo noꞌopiyá jemaꞌakana chiyá, Tupana iꞌimatájeri iká kapichákajo liyá.
20 “Puꞌuwaká amájika kajrú suráana itaká pajimila Jerusalén cha aú, iweꞌepeje meketánaja iꞌimajemi nakajyaꞌatájika riká pajimila.
21 Raú Judea teꞌeré eyájena ñaajeño ipuré eꞌiyajé; Jerusalén eyájena jáchoꞌojeño kaja reyá. Puꞌutheni chu iꞌimajíkaño unká paꞌalájeño piño pajimila ejo. Ilé ke nalaꞌajika iká.
22 Wajákejana ke iꞌimajika riwakajé. Tupana purákaꞌalo lanaꞌakéjami kemaká inaku iꞌimaká, keja riꞌimajika.
23 Chapú wani kaja riꞌimajika inaana kanupana iꞌimajíkaño riwakajejlo. Chapú wani kaja riꞌimajika inaana kayanikérunajlo, re kaja joꞌó yaní iꞌirakaño chuꞌuchujlo. Riwakajé, kajrú inaꞌukena amájika chapú kaje yajwé iteꞌeré nakuwá. Riwakajé, kajrú Tupana wajájika inaꞌuké.
24 Nenoje neꞌiyajena nókakajo eꞌiyá. Ajopana nawáꞌaje nakaꞌakáloje neká inaꞌuké wajákelana chojé penaje. Ajopana kajyaꞌatájeño pajimila Jerusalén, unká judíona nakiyana kalé neꞌemajika. Tupana yuríjika najló riká ketánaja nalaꞌajika ñaké”, ke Jesús kemaká najló.
Jesús paꞌajiko piño majó yukuna marí
25 Jesús kemari piño najló marí ke: “Apoꞌojó kamú, keri, iwijrina kaje waꞌaté amájiko riwakajé. Kajrú kaja juni jalomi aꞌajika rimejewa riwakajé; kajrú wani kaja riyokola iꞌimajika.
26 Keroꞌokajo nakuja neꞌemajé, namájikale mékeka ejaꞌawá laꞌakó. Jimaje napojloꞌojó. Piyuke nakaje jeꞌechú chu iꞌimakare ñakaꞌajero.
27 Ilé ke riꞌimajika, namájika nuphaka majó juni juwákaꞌala eꞌiyowá wakajé. Inaꞌuké iꞌimakáloje nupalamane penaje iꞌimaká nuká. Nuꞌumakáloje piyukeja inaꞌukena wakáraꞌajeri penaje nuphaje majó riwakajé. Kajrú mejámaꞌatani ke iꞌimajika nowaꞌó.
28 Amájika ee nakaje, meꞌetení numakare nakú ijló ke, wakajé ilaꞌá kaphí ipéchuwa, meketánaja kalé riꞌimajika ijló. Rejomi Tupana iꞌimatájeri iká kapichákajo liyá”, ke Jesús kemaká najló.
29 Rejomi rewíñaꞌata piño neká marí ke: “Kaja iweꞌepí paijí higuera nakojé.
San Lucas 21.29-38
30 Kajrú riꞌiché pitúkaꞌaka, ripaná mothoꞌokáloje rinakiyá penaje aú iná weꞌepí yewíchaja jarechí iphaka rená chojé.
31 Ñaké kaja iweꞌepíjika nupaꞌajiko majó nakojé. Amájika wakajé nakaje, numakare nakú ijló ke aú, iweꞌepeje yewíchaja riphaka rená chojé, Tupana iꞌimakáloje piyuke inaꞌuké wakáraꞌajeri penaje.
32 “Jemaꞌá marí: ilé numakare nakú ijló iꞌimajeri re kaja joꞌó inaꞌuké iꞌimanoja.
33 Jeꞌechú, ejaꞌawá waꞌaté, tajnájero, eyá nupurákaꞌalo unká tajnálajo. Numaká rinaku keja nakaje iꞌimajika.
34-35 “¡Pa! Iꞌimaniña kajrú aꞌajnewá ajñakana nakú; iꞌimaniña kaja kajrú nakaje jalá kewini kaje iꞌirakana nakú; iwó kaꞌaniño nakaje marí ejaꞌawá chu iꞌimakare waꞌaté. Apala wajátakaje ilé numíchaje nakú ijló iꞌimajika. Maweꞌepíkanaru ke kamejérina jaꞌakó napatákaꞌaruna chojé. Ñaké kaja riꞌimajika piyuke inaꞌukena ejaꞌawá chu iꞌimakáñojlo. Wajátakaje nuꞌumajika nachá.
36 Ilamáꞌata palá ipéchuwa nupé maare. Ipuraꞌó Tupana waꞌaté weꞌechú kaꞌalá keja, iꞌimakóloje chapú kaje iꞌimajíkare liyá penaje, itáraꞌakoloje nujimaje rejomi. Inaꞌuké iꞌimakáloje nupalame penaje iꞌimaká nuká”, ke Jesús kemaká najló.