Nawátaka Jesús patakana yukuna marí
22
Yewíchaja naleꞌejé fiesta Pascua iphaka rená chojé. Riwakajé najñake pan mamúraꞌatakanaru. a
San Lucas 22.1-38
2 Sacerdótena wakáraꞌajeño, eyá Tupana purákaꞌalo nakú jewíñaꞌatajeño, kajena iꞌimaño najwaꞌaté re. Neká puraꞌañó pajwaꞌatéchaka namákaloje mékeka nenókajla Jesús nakú. Nawata rinókana, eꞌiyonaja nakeroꞌó ajopana inaꞌukena piyá.
3 E Jiñá Chiꞌinárikana pechu jaꞌaró Judas Iscariote eꞌiyajé. Iyamá iphata jiꞌimaji nakojé (12) kele Jesús jaꞌapiyatéjena, nakiyana riꞌimaká.
4 Riká iꞌijnari ají ke sacerdótena wakáraꞌajeño ejo. Tupana ñakaré chiyá wakáraꞌajeño iꞌimaño kaja re najwaꞌaté. Najwaꞌaté ripuraꞌó mékeka raꞌajika najló Jesús nakú.
5 Riꞌimaká aú riyukuna najló, palá napechu iꞌimaká rinaku. Nemá rijló:
—Waꞌajé pijló liñeru, piꞌimichákale palá riyukuna wajló.
6 Reyá aꞌajná ñoꞌojó Judas aꞌakeri rinakojó Jesús ramákaloje mékeka raꞌajika najló riká, nekó neꞌemaká ee.
Jesús ajñaka fiesta aꞌajnená raꞌapiyatéjena waꞌaté yukuna marí
7 E kaja naleꞌejé fiesta Pascua iphari rená chojé. Riwakajé najñake pan mamúraꞌatakanaru. Riwakajé kaja nenoke Tupánajlo oveja iꞌirí puꞌuwaré nalaꞌajíkare chaya.
8 E Jesús kemari Pedro, Juanjlo waꞌaté, marí ke:
—Iꞌijná, iliꞌichá wajló Pascua aꞌajnená.
9 Nemá rijló:
—¿Méreke chi walaꞌajé riká?
10 Jesús kemari najló:
—Iꞌijná aꞌajná ñoꞌojó pajimila ejo. Iphájika rejo ee, iphátaje pajluwaja inaꞌuké. Juni riwakúlaꞌapa ke iphátajika riká. Eko iꞌijná rápumichu, ijmulúkaꞌachi pají chojé rijwaꞌaté.
11 Rejomi imaje pají minajlo: “Wewíñaꞌatajeri kemíchari pinaku: ‘¿Mere chi ukapú wajñákaloje Pascua aꞌajnená richu noꞌopiyatéjena waꞌaté?’ ”, ke imájika rijló nunaku.
12 Raú riyaꞌataje ijló ukapú ñópoꞌojlo yenú, lamáꞌatakeja piyuke wani nakaje iꞌimajika richu. Riká chu ilaꞌajé aꞌajnejí —ke rimaká najló.
13 Raú neꞌejná pajimila ejo, amaño ukapú iꞌimaká rimaká najló ke. Richu nalaꞌá Pascua aꞌajnená.
14 E kaja naꞌajnewá ajñakana iphari rená chojé. E Jesús, ajopana raꞌapiyatéjena waꞌaté, iphaño rejo. Riyaꞌo rajñákaloje Pascua aꞌajnená najwaꞌaté.
15 Rimá najló:
—Nuwata wani marí Pascua aꞌajnená ajñakana ijwaꞌaté kaja penaje nutakaꞌajika yámona.
16 Ñaké iꞌimakale, marí ejomi unká nojñálaje piño ijwaꞌaté riká marí ejaꞌawá chu. Rejomi nojñaje riká ijwaꞌaté jeꞌechú chu. Richu iꞌimajíkaño wakáraꞌajeri Tupana —ke rimaká najló.
17 E rijñaꞌá tiyela rikápojo, kajmú jalá amúraꞌatakanami iꞌimakare chu. Rinaku rimá Tupánajlo:
—Palá pilaꞌaká weká marí aú.
E rimá raꞌapiyatéjenajlo:
—Itamákaꞌata ijluwa riká piyuke, iꞌirachi.
18 Numá ijló: unká nuꞌuralaje piño ijwaꞌaté marí kaje jalá chuwa maare. Noraꞌapá waꞌaté weꞌemajika jeꞌechú chu wakajé nuꞌurajé piño wajé kaje jalá ijwaꞌaté re.
19 Rejomi rijñaꞌá piño pan rikápojo, rimá Tupánajlo:
—Palá pilaꞌaká weká marí pan aú.
Rejomi ritupaꞌá rinakiyana, e ritamákaꞌata raꞌapiyatéjenajlo najñákaloje riká penaje. Rimá najló:
—Ajñá riká. Marí nunapona noꞌojíkare takaꞌakájejlo ichaya. Ñakele marí keja ajñájikano riká pajwaꞌatéchaka, ipechu kapicháñaaka piyá nuká.
20 Ñaké kaja rimaká kajmú jalá amúraꞌatakanami nakú, najñaka pan ejomi, rimá najló:
—Nutakaꞌajika ichaya wakajé, kajrú nura akhoꞌojiko nophú chiyá. Ripalamane aú iꞌimajé wajé purákaꞌaloji jaꞌapiyá.
21 E rimá piño najló:
—Aꞌajeri nuká nupinánajlo, maare wajwaꞌaté riká.
22 Inaꞌuké iꞌimakáloje nupalame penaje iꞌimaká nuká. Nuká takaꞌajeri Tupana pechu nakú riꞌimaká ke, eꞌiyonaja kalé chapú wani nakaje iꞌimajika aꞌajeri nuká nupinánajlo.
23 Raú nemá pajlokaka:
—¿Mékaje chi kele rimá nakú, wátari raꞌakana ripinánajlo?
Nacháꞌatajeri yukuna marí
24 E raꞌapiyatéjena puraꞌañó pajwaꞌatéchaka apú nakú. Nawata weꞌepíkana naka iꞌimari neꞌiyá nacháꞌatajeri ke nakaje laꞌakana aú.
25 E Jesús kemari najló: “Re ajopana teꞌeré eyájena wakáraꞌajeño, wakáraꞌaño kaphí wani najwaꞌatéjena. Raú nachaje wakáraꞌakaño kemaño nanaku: ‘Inaꞌukéjloje penaje nalaꞌá nakaje palá raú’.
26 Eꞌiyonaja unká ñaké kalé ijló riká. Re kaꞌajná pajluwaja inakiyana: apú ñathé, apú ñathé aꞌajeri ke riká. Riká iꞌimárijla icháꞌatajeri ke.
27 Ajopana wakáraꞌajeño kaꞌajná yáꞌaño naꞌajnewá ajñakana nakú. Najñaka naꞌajnewá ketana, najwaꞌaté jápajeño jaꞌapátaka najló nakaje nawátakare. Eyá maare nuká meꞌetení ijwaꞌaté iwakáraꞌajeri, eꞌiyonaja kalé ijwaꞌaté jápajeri keja nuká ijwaꞌaté, nuká laꞌakale ijló nakaje.
28 “Ñakeja ikano nujwaꞌaté, chapú kaje yajwé nomaka wakajé waꞌató.
29 Ñakele noꞌojé iká ajopana inaꞌukena wakáraꞌajeño penaje. Noraꞌapá aꞌaká nuꞌumaká inaꞌuké wakáraꞌajeri penaje iꞌimaká, ke kaja noꞌojika iká ajopana wakáraꞌajeño penaje.
30 Iká ajñájeño aꞌajnewá nujwaꞌaté, ajopana nujwaꞌatéjena waꞌaté, jeꞌechú chu. Ñákaꞌajori, nawakáraꞌajeñojlo penaje iꞌimakare, chu iyáꞌajo. Re iyamá iphata jiꞌimaji nakojé kele Israel lakénami, aꞌajútaya michuna. Nalakénami nakú imaje mékeka nalaꞌakana iꞌimajika. Nakaje, nalaꞌakare marí ejaꞌawá chu neꞌemaká ketana, nakú imaje meke riká: palá kaꞌajná nalaꞌaká, unká kaꞌajná”, ke Jesús kemaká najló.
Pedro michoꞌotájika Jesús chaya yukuna marí
31 Jesús kemari Simón Pédrojlo, ajopánajlo waꞌaté:
—Jemaꞌá, numaká ijló: Jiñá Chiꞌinárikana wátari rijluwa iká. Rikaꞌátaje eꞌiyajé, ilaꞌakáloje puꞌuwaré riwátaka ke penaje. Iná jeyoꞌoká trigo, iná kupákaloje reꞌiyayá rimujrumi, ke kaja Jiñá Chiꞌinárikana wátaka ikupákana Tupana liyá puꞌuwaré laꞌakaná aú.
32 E rimá Pédrojlo:
—Kaja nupuraꞌó Tupana waꞌaté pinaku, pipechu laꞌakó piyá ujwí nuliyá. Meketánaja pipechu laꞌajiko apú ke nuliyá, rejomi pipajnoꞌotaje piño pipéchuwa nuká ejo. Rejéchami paꞌajika pinakojó noꞌopiyá jemaꞌajeño, ñakeja napechu iꞌimakáloje kaphí nochojé.
33 Raú Pedro kemari rijló:
—Wawakáraꞌajeri, apala nakaꞌajé nuká inaꞌuké wajákelana chojé pijwaꞌaté; apala nenoje kaꞌajná nuká pijwaꞌaté, eꞌiyonaja unká wani nuyurílaje piká raú.
34 Jesús kemari piño rijló:
—Pedro, numá pijló, ñaano pani pimichoꞌotaje nuchaya. Unká chiyó kapere apó yakaꞌajé chuwajá lapí, kaja pimichoꞌotaje nuchaya weji ke pecha.
35 Jesús kemari piño najló:
—Apú wakajé iꞌimaká, nuwakáraꞌa iꞌijnaká kerámaꞌake apú pajimila nakuwá, apú pajimila nakuwá ke. Unká ijñaꞌaké ijwaꞌató iliñérute, jiꞌimaꞌulá kaje. ¿E chi ilaꞌaká kamuꞌují nakaje nakú riwakajé iꞌimaká?
—Unká —ke nemaká rijló.
36 Rimá piño najló:
—Chuwa ijñaꞌajika ijwaꞌató iwajure, iliñérute kaje maká. Unká jajalu iꞌimalare kapi, aꞌajeri raꞌarumaká nakiyana riwarúwaꞌakaloje rijluwa jajalu raú penaje.
37 Ilé ke numaká ijló, nalaꞌajíkale nuká chapú chuwaka. Tupana purákaꞌalo lanaꞌakéjami kemaká nunaku iꞌimaká ke nalaꞌajika nuká chapú. Rimá nunaku: “Nalaꞌajé riká unká inaꞌukélaruna nakiyana ke”. Tupana purákaꞌalo lanaꞌakéjami kemaká nunaku ke piyuke nakaje iꞌimajika.
38 E nemá rijló:
—Wawakáraꞌajeri, re maare iyamata jajalu.
Rimá najló:
—Reja riꞌimareja.
Jesús puraꞌakó Tupana waꞌaté Getsemaní e yukuna marí
39 E kaja Jesús jáchoꞌoro, iꞌijnari piño riꞌijnakela yenuri ejo. Yenuri ií iꞌimari Olivos. Raꞌapiyatéjena iꞌijnaño kaja rápumichu.
San Lucas 22.39-71
—Ipuraꞌó Tupana waꞌaté maare, Jiñá Chiꞌinárikana aꞌaká piyá imeꞌé rijluwa.
41 E riꞌijná aꞌajná ñoꞌojó pani naliyá, iná kaꞌaká wayajrú ketana jukaka riꞌijnaká. Rejé ritáraꞌo riꞌirúpachi aú ripuraꞌakóloje Tupana waꞌaté.
42 Rimá:
—Paꞌayú, piwátajika ee, piꞌimatá nuká marí chapú kaje yajwé amákana liyá. Riꞌimaniña kalé nuwátaka ke, nuwata riꞌimaká piwátaka ke.
43 Rejéchami pajluwaja Tupana waꞌatéjeri, jeꞌechú chiyaje, yaꞌatakó rijló raꞌakáloje riñathé penaje.
44 Kamuꞌují wani Jesús pechu laꞌakó, raú mawó rikejáꞌaka rikó Tupana liyá. Kajrú riñaphena iꞌijnaká. Rira nakiyana iꞌijnari kaja rijwaꞌaté, imujulá nojé kemachi rathupaka teꞌerí eꞌiyajé.
45 Ripuraꞌó Tupana waꞌaté, rejomi ráchoꞌo. Riꞌijná raꞌapiyatéjena iꞌimaká ejo, amari manaꞌija neꞌemaká kamátakajo nakú. Kamuꞌují wani napechu laꞌakó, raú kiñaja tapú cháꞌataka neꞌemaká, akuwanaja nakamato.
46 E Jesús kemari najló:
—¿Naje ikamato? Jáchoꞌo chuwa, ipuraꞌó Tupana waꞌaté ilaꞌaká piyá puꞌuwaré, Jiñá Chiꞌinárikana aꞌaká piyá imeꞌé rijluwa.
Napataká Jesús yukuna marí
47 Re joꞌó kaja Jesús puraꞌakó raꞌapiyatéjena waꞌaté ee, manaꞌí chiyó kajrú inaꞌukena iphaka nanaku. Judas iꞌijnatari nekó. Jesús jaꞌapiyatéjena nakiyana riꞌimaká. E kaja riꞌijná Jesús jimajo rijimá chiyá chiñoꞌojé.
48 Raú Jesús kemari rijló:
—Judas, ¿nujimá chiyá chiñoꞌokana aú chi paꞌá rená nupinánajlo, naweꞌepíkaloje nuká nenójika? Inaꞌuké iꞌimakáloje nupalamane penaje iꞌimaká nuká.
49 Eyá ajopana, rijwaꞌaté iꞌimakaño, amaño nephaka kajrú. Raú nemá Jesusjlo:
—Wawakáraꞌajeri, ¿Waꞌapata chi nanaku ta jajalu aú?
50 E pajluwaja Jesús waꞌatéjeri mataꞌarí sacerdótena wakáraꞌajeri waꞌaté jápajeri iꞌijwí. Kaꞌañá chojó pitari riꞌijwí rikaꞌá.
51 Raú Jesús kemari najló:
—Reja neꞌemareja; imataꞌaniña neká.
E Jesús jápari riꞌijwí pukunami chu, waꞌató ke riꞌijwí patoꞌokó piño rapumí chuwá.
52 Marí kele inaꞌuké iphaño Jesús pataje iꞌimaká: Sacerdótena, eyá Tupana ñakaré chiyá wakáraꞌajeño, ajopana pheñawilana kajena, kele neꞌemaká. E Jesús kemari piyuke ripataje iꞌijnakáñojlo:
—Iꞌijichá majó nupataje jajalu ikapi, kujyúwaꞌala ikapi ke. ¡Meke jataꞌakachi ke wani ilaꞌaká ijluwa nuká!
53 Weꞌechú kaꞌalá keja nuꞌumajika ijwaꞌaté Tupana ñakaré chu jewíñaꞌatakana nakú, eꞌiyonaja unká ipataké nuꞌumajika. Chuwajá riphicha rená chojé ijló, ilaꞌakáloje nuká Jiñá Chiꞌinárikana wakáraꞌaka iká ke penaje —ke rimaká najló.
Pedro michoꞌotaka Jesús chaya, yukuna marí
54 Reja napatá Jesús nawáꞌakaloje riká ají ke sacerdótena wakáraꞌajeri ñakaré ejo. Pedro iꞌijnari kaja nápumichu juká kemachi. Nephá rejo.
55 Re naphoꞌotá jiyá peꞌiyó nañakaré kópeje. Re nayaꞌo tujlá ke jiyá jiꞌilaje aꞌanapajé; Pedro yáꞌaro kaja re najwaꞌaté.
56 Re apaꞌawelo iꞌimayo, pají chiyá jápajeyo ruꞌumaká. Ruká amayo jiyá kamaré chojé Pedro yáꞌako najwaꞌaté. E ruyakaꞌo richaje, rumá najló:
—Ilé yáꞌaro ijwaꞌaté, Jesús waꞌateje riká.
57 Eꞌiyonaja Pedro michoꞌotari richayo, rimá rojló:
—Unká nománaꞌapa kalé kele pimá nakú nojló.
58 Meketánaja iꞌimajemi, apú amari piño riká, rimá rijló:
—Nuweꞌepí Jesús wákeꞌena nakiyana piká.
Raú rimá rijló:
—Unká wani ta nanakiyana kalé nuká.
59 Pajluwaja kamú jená iꞌimajemi, apú kemari piño najló:
—Rijwaꞌatéjena nakiyana joꞌó riká kele. Galilea eyaje Jesús; reyaje kaja kele yáꞌaro jiyá jiꞌilá.
60 Raú Pedro kemari rijló:
—Unká wani ta nuweꞌepila naka kele pimá nakú nojló.
Ilé ke Pedro kemaká ejéchami, kapere yakaꞌaká.
61 Waꞌató ke Jesús pajnoꞌokó riyámajo yakáꞌajo, amari Pedro iꞌimaká aꞌajnare ke. Raú riphá ripechu nakojé mékeka Jesús kemaká rijló maapami ke iꞌimaká: “Ñaano pani pimichoꞌotaje nuchaya. Unká chiyó kapere apó yakaꞌajé, kaja pimichoꞌotaje nuchaya weji ke pe”.
62 Ilé ke riphaka ripechu nakojé aú Pedro jáchoꞌoro reyá. Jupejeno riyaka.
63 Aꞌapona ke Jesús iꞌimaká apaꞌalá chu. Re riwaꞌaphé iꞌimakaño laꞌañó namákaja riká. Nañaꞌatá kaja riká.
64 Napáraꞌaka yami rijimá, nañaꞌatá riká pajimaya, kéchami nemaká rijló:
—¿E piweꞌepíkajla naka iꞌichari piká?
65 Kajrú napuraꞌakó rinaku puꞌuwaré; nakátajowa keja nalaꞌaká riká.
Jesús táraꞌako nawakáraꞌajeño jimaje yukuna marí
66 E muní ke lapiyami kajrú pheñawilana, eyá sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, piyukeja awakaño rejé. E nawaꞌa Jesús najimaje, nemá rijló:
67 —¿Piká chi kele Tupana wakáraꞌakare majó inaꞌuké iꞌimatájeri penaje? Pimá wajló.
Raú rimá najló:
—Numájika ee aꞌa ke ijló, unká jemaꞌalaje noꞌopiyá.
68 Nukejáꞌajika ee nakaje yukuna iliyá, unká kaja iꞌimalaje nojló riyukuna, unká kaja jáchoꞌotalaje nuká.
69 Inaꞌuké iꞌimakáloje nupalamane penaje iꞌimaká nuká. Tupana waꞌaté wakáraꞌajeri penaje iꞌimaká nuká, piyukeja weꞌepika nakaje laꞌakana riká.
70 Nemá piño rijló:
—¿Piká chi Tupana iꞌirí?
—Aꞌa, imaká nunaku ke nuká.
71 Raú nemá ajopánajlo:
—Unká naje kalé wemá ajopánajlo neꞌemakáloje wajló palá riyukuna. Kaja wemiꞌichá mékeka rimíchaka wajló rinakuwá. Puꞌuwaré wani ta ripuraꞌakó Tupana nakú.