Napuraꞌakó pajwaꞌatéchaka Jesús patakana nakú yukuna marí
14
Iyamá kala yuriro natukumá, nephákaloje naleꞌejé fiesta Pascua jená jaꞌapejé. Riwakajé najñake pan mamúraꞌatakanaru. E kaja sacerdótena wakáraꞌajeño, eyá Tupana purákaꞌalo nakú jewíñaꞌatajeño waꞌaté, iꞌijnataño napéchuwa meke napatakajla Jesús, nakulákatakaloje rinaku, ripachá nenókaloje riká penaje. a
San Marcos 14.1-16
—Unká wapatalaje riká fiesta eꞌiyá. Walaꞌakela riká ñaké reꞌiyá, kajrú wani inaꞌuké yúchaꞌakojla wachá raú.
Pajluwájaru akhoꞌoká nakaje jilá Jesús nakojé yukuna marí
3 Pajimila Betania e Jesús iꞌimari Simón ñakaré chu. Napona patákaꞌataro (lepra) rijló penájemi riꞌimaká. Naꞌajnewá ajñakana nakú neꞌemaká ee, pajluwájaru iphayo Jesús awaꞌajé. Nakaje jilami iꞌimari rukapi wíluru chu. Jipa alabastro nakiyá laꞌakanami wíluru iꞌimaká. Puꞌuthé richu nardo jilami iꞌimaká. Kawemini wani, puꞌumé amarí riꞌimaká. E ruphá Jesús awaꞌajé. Rujmeꞌetá riká wíluru chaya, rejomi rokhoꞌó Jesús wilá eꞌiyajé riká.
4 Re iꞌimakaño nakiyana amaka aú rulaꞌaká ilé ke, nayúchaꞌo ruchá, nemá pajlokaka:
—¡Naje rujlámaꞌata mapeja wani kele puꞌumé amarí!
5 Palani raꞌakana iꞌimakajla, kawemini wani riꞌimakale. Roꞌokela ajopánajlo riká, rujñaꞌajla liñeru riwemí kajrú, pajluwa jarechí ketana iná jápakaꞌala wemí ejé. Raú roꞌojla kamuꞌují laꞌakaño ñathé.
—Reja ruꞌumareja. ¿Naje chi ikaꞌá puꞌují kaje rupechu nakiyá? Palá ruliꞌichaka nuká raú.
7 Iwátajika ee kamuꞌují laꞌakaño ñathé aꞌakana, ñakeja neꞌemajika ijwaꞌaté, eyá nuká unká ñakeja kalé nuꞌumajika ijwaꞌaté maare.
8 Rupechu lokópaꞌala ruliꞌichaka nunaku palá. Rokhoꞌochá nardo jilá nuwilá eꞌiyajé, raú rulamáꞌatiya nunapona. Natoꞌotájika nutami támijimina toꞌotákelana chojé wakajejlo penaje riꞌimajé.
9 Jemaꞌá marí: Nujwaꞌatéjena iꞌijnajeño Tupana iꞌimataka inaꞌuké kapichákajo liyá yukuna iꞌimajé ajopánajlo, ajopánajlo ke. Riwakajé neꞌemajé kaja wajé ruliꞌichaje nuká yukuna najló, napechu kapicháñaaka piyá ruká —ke Jesús kemaká najló.
Judas aꞌaká ripinánajlo Jesús yukuna marí
10 Judas iꞌimari Jesús jaꞌapiyatéjena nanakiyana iꞌimaká. Iyamá iphata jiꞌimaje nakojé (12) kele neꞌemaká. Riká iꞌijnari ají ke sacerdótena wakáraꞌajeño ejo najló kemaje meke laꞌajémika raꞌakajla najló Jesús.
11 Riꞌimaká aú riyukuna najló, palá napechu iꞌimaká rinaku raú. Nemá rijló:
—Waꞌajé pijló liñeru, paꞌajika ee wañathé ripatakana aú.
Reyá aꞌajná ñoꞌojó Judas aꞌakeri rinakojó Jesús, ramákaloje mékechamika palani raꞌakana najló.
Jesús ajñaka fiesta aꞌajnená raꞌapiyatéjena waꞌaté yukuna marí
12 E kaja nakeñoꞌó fiesta Pascua jaꞌapátakana. Rikeñoꞌojiko wakajé najñákeno pan mamúraꞌatakanaru; nenoke kaja oveja iꞌirí Tupánajlo puꞌuwaré nalaꞌajíkare chaya. E Jesús jaꞌapiyatéjena kemaño rijló:
—¿Méreke chi piwata walaꞌaká fiesta Pascua aꞌajnená?
13 Rimá iyamá raꞌapiyatéjenajlo:
—Iꞌijná pajimila ejo. Re amaje pajluwaja, juni riwakúlaꞌapa ke iphátajika riká.
14 Eko iꞌijná rápumichu, imujlúkaꞌachi pají chojé rijwaꞌaté. Rejomi imaje pají minajlo: “Wewíñaꞌatajeri kemíchari pinaku: ‘¿Mere chi ukapú, wajñákaloje Pascua aꞌajnená richu noꞌopiyatéjena waꞌaté?’ ”, ke imájika rijló.
15 Raú riyaꞌataje ijló ukapú ñópoꞌojlo yenú, lamáꞌatakeja piyuke wani nakaje iꞌimajika richu. Riká chu ilaꞌajé wajló aꞌajnejí —ke rimaká najló.
16 Raú neꞌejná pajimila ejo, amaño ukapú iꞌimaká rimaká najló ke. Richu nalaꞌá Pascua aꞌajnená.
17 Lapichami Jesús iphaka rejo iyamá iphata jiꞌimaje nakojé (12) kele raꞌapiyatéjena waꞌaté.
San Marcos 14.17-31
Meꞌetení numá ijló: Pajluwaja inakiyana ajñari raꞌajnewá nujwaꞌaté maare, aꞌajeri nupinánajlo nuká.
19 Raú kamuꞌují napechu laꞌakó.
—¿Nuká chi kele pimá nakú? —ke nemaká rijló pajewémichaka.
20 Jesús kemari najló:
—Pajluwaja inakiyana aꞌajeri nuká nupinánajlo. Ilé ejátari pan nuparatune chojé nujwaꞌaté, numá nakú.
21 Inaꞌuké iꞌimakáloje nupalamane penaje iꞌimaká nuká. Nutakaꞌajé Tupana purákaꞌalo lanaꞌakéjami kemaká nunaku ke, eꞌiyonaja kalé chapú wani nakaje iꞌimajika ilé aꞌajeri nuká nupinánajlo. Unkákela rimothoꞌojla iꞌimaká, palani riꞌimakajla rijló, raú unká Tupana wajálajla riká kajrú wani —ke Jesús kemaká najló.
22 Najñaka naꞌajnewá ee, Jesús ñaꞌarí rikápojo pan, rimá Tupánajlo:
—Palá pilaꞌaká weká marí pan aú.
Rejomi ritupaꞌá rinakiyana, e ritamákaꞌata najló pan. Rimá najló:
—Ajñá riká. Marí nunapona.
23 Rejomi rijñaꞌá rikápojo tiyela, kajmú jalá amúraꞌatakanami iꞌimakare chu. Rimá Tupánajlo:
—Palá pilaꞌaká weká marí aú.
—Nura riká. Nura akhoꞌojero nophú chiyá kajrú inaꞌukena chaya penaje. Ripalamane aú Tupana amajo nachaje, puꞌuwaré nalaꞌakare liyá.
25 Numá ijló: Unká nuꞌuralaje piño ijwaꞌaté marí ejaꞌawá chu marí kaje jalá. Tupana waꞌaté weꞌemajika jeꞌechú chu wakajé, nuꞌurajé piño ijwaꞌaté marí kaje re —ke Jesús kemaká najló.
26 Natanika Tupana yale ejomi, neꞌejná yenuri Olivos ejo.
Pedro michoꞌotájika Jesús chaya yukuna marí
27 E Jesús kemari najló:
—Piyuke ipechu laꞌajiko ujwí nuliyá. Iyureje kaja nuká nokoja. Tupana purákaꞌalo lanaꞌakéjami kemari: “Nenoje ovéjana liyá nalamáraꞌajeri, raú makajmala neñáajika riká”, ke rimaká.
28 Nenoje nuká, eꞌiyonaja numakápoꞌojiko piño nopumí chuwá ejomi, nuꞌujnajé Galilea ejo itukumá.
29 E Pedro kemari rijló:
—Apala ajopana kaꞌajná pechu laꞌajero ujwí piliyá, nuká kalé unká wani pechu laꞌalajo ujwí piliyá.
30 Jesús kemari rijló:
—Pemaꞌá numaká pijló: Unká chiyó kapere yakaꞌá iyaampe chuwajá lapí, kaja weji ke pe cha pimichoꞌotájika nuchaya.
31 Eꞌiyonaja mawó Pedro kemaká rijló:
—Ewá kalé nenójika nuká pijwaꞌaté, eꞌiyonaja unká wani numichoꞌotálaje pichaya.
Ajopana raꞌapiyatéjena kemaño ñaké kaja.
Jesús puraꞌakó Tupana waꞌaté Getsemaní e yukuna marí
32 E kaja Jesús jáchoꞌoro raꞌapiyatéjena waꞌaté ají ke Getsemaní ejo. Re rimá najló:
—Maare iyaꞌo, nupuraꞌajiko Tupana waꞌaté ketana.
San Marcos 14.32-52
33 Riwaꞌa aꞌajná ñoꞌojó kemachi rijwaꞌató Pedro, Santiago, Juan, keleja. Rejéchami ripechu laꞌakó kamuꞌují wani.
34 E rimá najló:
—Kamuꞌují wani nupechu meꞌetení nujluwa, chapú kaje yajwé nomájikare piyá aú. Makaꞌaní nutakaꞌaká rakuwaná. Iyuró maare, ikamátaniño kalé.
35 E raꞌapáñaa neká aꞌajná ñoꞌojó pani. Rejé rijlámaꞌo teꞌerí jimaje. Ripuraꞌó Raraꞌapá waꞌaté, rimá rijló:
36 —Paꞌayú, piká weꞌepiri piyuke wani nakaje laꞌakana. Piwátajika ee, piꞌimatá nuká marí chapú kaje yajwé amákana liyá. Riꞌimaniña kalé nuwátaka ke; nuwata riꞌimaká piwátaka ke.
37 E ripaꞌó piño nachaje, amari nakamátako. Rimá Pédrojlo:
—Simón Pedro, ¿pikamátako chi? ¿Unká chi méñoꞌojo piꞌimalajla kajmuni nujwaꞌaté pajluwa kamú jená ketana?
38 Rimá najló:
—Ikamátaniño. Ipuraꞌó Tupana waꞌaté puꞌuwaré laꞌakaná aꞌaká piyá imeꞌé rijluwa. Re ipechu nakú ilaꞌakáloje palá penaje, eꞌiyonaja kalé unká méñoꞌojo ilaꞌalajla palá ikoja —ke rimaká najló.
39 E riꞌijná piño Tupana waꞌaté puraꞌajó. Ñakeja kaja rimaká rijló.
40 Ripaꞌó piño nachaje, amari neꞌemaká piño kamátakajo nakú, tapú cháꞌatakale neká. Nacháyomi riphá. Unká naweꞌepila mékeka nemakajla rijló.
41 E ripaꞌó piño Tupana waꞌaté puraꞌajó. Rejomi ripaꞌó piño nachaya, kaja weji ke pe laꞌaká nakú. E rimá najló:
—Chuwa ikamato, iwatánaꞌa chuwa. Kaja riphicha rená chojé nojló, naꞌakáloje nuká chapú nulaꞌajéñojlo. Inaꞌuké iꞌimakáloje nupalamane penaje iꞌimaká nuká.
42 Jáchoꞌo, chuwa iꞌijná weꞌejnachi. Kaja ilé aꞌajeri nuká puꞌuwaré laꞌajéñojlo waícha —ke rimaká najló.
Napataká Jesús yukuna marí
43 Re joꞌó kaja Jesús puraꞌakó raꞌapiyatéjena waꞌaté ee, Judas iphari rinaku. Iyamá iphata jiꞌimaji nakojé (12) kele raꞌapiyatéjena nakiyana riꞌimaká. Kajrú ajopana inaꞌukena waꞌaté riphá rejé. Jajalu, kujyúwaꞌala, kaje nakapi ke nephaka. Sacerdótena wakáraꞌajeño, eyá Tupana purákaꞌalo nakú jewíñaꞌatajeño, eyá pheñawilana, kele purákaꞌalo aú neꞌejná rejo ripataje.
44 Maapami ke Judas aꞌaká rijwaꞌaté iꞌijnakáñojlo jenaji, naweꞌepíkaloje mékajeka napatájika penaje. Rimá najló:
—Puꞌuwaká nuchiñoꞌojika rijimá chiyá, riká ipataje. Eko amata riká ijlú chuwaja.
45 E kaja riphá Jesús awaꞌajé, rimá rijló:
—Wewíñaꞌatajeri.
Rejéchami richiñoꞌoká rijimá chiyá.
46 E napatá Jesús, nawáꞌakaloje riká penaje.
47 Rejéchami pajluwaja re iꞌimakare jeroꞌoká rijajálune raꞌaruná chiyá. Riká aú rimataꞌá pajluwa sacerdótena wakáraꞌajeri waꞌaté jápajeri iꞌijwí.
48-49 Raú Jesús kemari najló:
—¿Naje chi iꞌijichá majó jajalu, kujyúwaꞌala, kaje waꞌaté nupataje? ¿Jataꞌakachi ke wani chi ilaꞌaká nuká ijluwa? Weꞌechú kaꞌalá keja nowíñaꞌatajika inaꞌuké Tupana ñakaré chu, eꞌiyonaja unká ipataké re nuꞌumajika. Eꞌiyonaja kalé ilaꞌajé nuká ilé ke meꞌetení, riꞌimakáloje júpimi Tupana purákaꞌalo lanaꞌakéjami kemaká nunaku iꞌimaká ke —ke rimaká najló.
50 Rejéchami piyukeja raꞌapiyatéjena jaꞌapáñaaka Jesús. Kaja neñaó reyá.
Pajluwaja walijímaka ñaakó yukuna marí
51-52 Wáꞌaño Jesús ápumichu pajluwa walijímaka jaꞌapari. Aꞌarumakaji mapíraꞌakeja rinaku ke raꞌapaka. E napatajla riká raꞌarumaká nakiyá, eꞌiyonaja raꞌarumakámija kalé yuriro nakapi, maꞌarumakaru riñaakó reyá.
Nakulákatako Jesús yukuna marí
53 E kaja nawaꞌa Jesús sacerdótena wakáraꞌajeri wani ejo. Riñakaré chojé sacerdótena wakáraꞌajeño, ajopana pheñawilana, eyá Tupana purákaꞌalo nakú jewíñaꞌatajeño, kele awakaño rijwaꞌaté.
San Marcos 14.53-72
54 Eyá Pedro jaꞌapari rápumichu juká kemachi, iphari riñakaré kópeje. Rejé riyaꞌo Tupana ñakaré waꞌaphé iꞌimakaño aꞌanapaká jiyá ejé.
55 Phachu sacerdótena wakáraꞌajeño iꞌimaño piyuke judíona wakáraꞌajeño waꞌaté. Neká kulaño mapeja puraꞌakajo Jesús nakojé, ripachá nawakáraꞌakaloje rinókana penaje. Eꞌiyonaja unká nephátala na puraꞌakajo rinakojé.
56 Kajrú inaꞌukena pajlaka rinaku. Mapeja nemaká Jesús nakú: “Puꞌuwaré laꞌajerí riká”, ke. Keꞌiyapé narukátaka najló riká, unká pajluwa chuwá kalé.
57 Neꞌiyajena pajlaño rinaku mapeja, nemá najló:
58 —Rimá rinakuwá: “Nukajyaꞌatajla Tupana ñakaré nalaꞌakare iꞌimaká. Rejomi weji ke kala iꞌimajemi nulaꞌajla piño riká rapumí chuwá. Unká inaꞌuké kalé laꞌajeri riꞌimajika”, ke rimaká —ke nemaká najló.
59 Unká kaja richuwá kalé nemá rinaku.
60 Ilé kaje aú sacerdótena wakáraꞌajeri wani táraꞌaro neꞌiyajé, rimá Jesusjlo:
—¿Unká chi papiyákalaje pinakojó neká? ¿Meke chi kele nemá nakú pinaku?
61 Unká Jesús aꞌajipalá rijló, raú rimá piño rijló:
—¿Piká chi kele Tupana wakáraꞌakare majó inaꞌuké iꞌimatájeri penaje? ¿Ilé wephákare jaꞌapí iꞌirí chi piká?
62 Jesús kemari rijló:
—Aꞌa, ilé pimaká nunaku, keja nuká, inaꞌuké iꞌimakáloje nupalamane penaje iꞌimaká nuká. Iká amájeño nuká Tupana awaꞌá. Piyuke laꞌaká riká. Rijwaꞌaté nuwakáraꞌaje inaꞌuké. Iká amájeño nupaꞌakó piño majó jeꞌechú chiyá juni juwákaꞌala eꞌiyowá.
63 Ilé ke rimaká aú, sacerdótena wakáraꞌajeri wani yúchaꞌaro kajrú wani, akuwaná rijiyoꞌotá raꞌarumaká rinaku iꞌimakare, rimá najló:
—Puꞌuwaré wani ilé ta puraꞌakó Tupana nakú. Unká na penaje kalé wakulá ajopana, nemakáloje wajló mékeka rimaká penaje.
64 Kaja wemiꞌichá mékeka rimíchaka ta wajló puꞌuwaré wani Tupana nakú. ¿Meke ijló riká?
Raú piyukeja re iꞌimakaño kemaká rinaku:
—¡Piwakáraꞌa rinókana ta ilé kaje pachá!
65 E neꞌiyajena athupaño nawi Jesús nakojé. Napáraꞌa rijimá. Rejomi nañaꞌatá riká, nemá rijló:
—¿E piweꞌepíchaka naka iꞌichari piká?
Ñaké kaja pají waꞌaphé iꞌimakaño ñaꞌataka riká pajimaya nayátheꞌela aú.
Pedro michoꞌotaka Jesús chaya yukuna marí
66 Ilé ke nalaꞌaká Jesús ee, Pedro iꞌimari nañakaré kopi ajopana waꞌaté. E apaꞌawelo iphayo nanaku. Sacerdótena wakáraꞌajeri waꞌaté jápajeyo ruꞌumaká.
67 Ruká iphayo nanaku, amayo Pedro aꞌanapaká najwaꞌaté, raú ruyakaꞌo richaje, rumá rijló:
—Nuweꞌepí ilé Jesús, Nazaret eyaje waꞌateje piká.
68 Eꞌiyonaja Pedro michoꞌotari richayo, rimá rojló:
—Unká nománaꞌapa kalé riká. Unká nuweꞌepila na nakuka pipuraꞌakó nujwaꞌaté kele.
E raꞌapá ají ke rinumaná ejo. Rejéchami kapere yakaꞌaká.
69 Rejomi apaꞌawelo amayo piño riká, rumá kaja najló:
—Ilé Jesús, Nazaret eyaje waꞌateje riká.
70 Rimichoꞌotá piño richayo. Meketánaja iꞌimajemi re iꞌimakaño kemaño piño rijló:
—Rijwaꞌatéjena nakiyana joꞌó piká. Galilea eyaje riká, reyaje kaja piká.
71 Ilé kaje aú rimá najló kaphí:
—Nuwata Tupana wajaka nuká, unkájika ee numá kewaka. ¡Unká wani nománaꞌapa kalé kele ta, imá nakú nojló!
72 Rejéchami kapere yakaꞌaká piño, iyaampe laꞌaká nakú, raú riphá Pedro pechu nakojé mékeka Jesús kemaká rinaku maapami ke. Rimá rijló iꞌimaká: “Kapere yakaꞌajika piyá iyaampe, piká michoꞌotájeri nuchaya weji ke pe”. Remaꞌaká aú kapere yakaꞌaká, jupejeno riyaka.