2 Nojena, palá nupuraꞌakó inaku, re joꞌó kaja iweꞌepíkale nuká. Re joꞌó kaja ipechu nakú nakaje nowíñaꞌatakare nakú iꞌimaká.

3 Jesucristo wakáraꞌari achiñana. Tupana iꞌimaká Jesucristo wakáraꞌajeri, ke kaja achiñá iꞌimaká inanaru wakáraꞌajeri.

4 Inaꞌuké nakiyana kaꞌajná awakaño Tupana purákaꞌalo jemaꞌajé, re kaꞌajná pajluwa jaꞌapátari najló mékeka Tupana kemaká rijló yukuna. Apala ripuraꞌakó Tupana waꞌaté, eyá raꞌapátaka najló Ripurákaꞌalo yukuna, ketana kaꞌajná re rijapéwane richá. Ilé ke rilaꞌaká aú, unká riphala riwakáraꞌajeri Jesucristo jaꞌapí.

5 Re kaja kaꞌajná pajluwájaru inanaru neꞌiyá, puraꞌayó kaja Tupana waꞌaté. Ruꞌumákaja najló Tupana purákaꞌalo yukuna, rimaká rojló ke. Unkachu roꞌolá ruwílaꞌaru pajré, unká paala rulaꞌaká ruyajná raú, ruwakáraꞌajeri riꞌimakale. Inaana, unká inaꞌukélaruna wilá napiroꞌó. Ñaké ruká, unkachu ruwílaꞌaru pajré iꞌimalá ruchá, rupuraꞌakó Tupana waꞌaté ketana kaꞌajná, roꞌopátaka ripurákaꞌalo yukuna ketana kaꞌajná.

6 Unkachu roꞌolá ruwilá pajré, palani ruwilá piroꞌokana; piroꞌokeja ruꞌumakela, ropáñaꞌojla. Ñaké kaja napáñaꞌako, jaraꞌakeja newílaꞌaru iꞌimakachu. Ilé ke riꞌimakale najló, iwakáraꞌa napáraꞌaka newílaꞌaru ripajré aú.

7 Eyá achiñá, unká apáraꞌala riwílaꞌaru, ripuraꞌakó ketana Tupana waꞌaté; unká rapáraꞌala riká, Tupana keja kaja riꞌimakale inaana wakáraꞌajeri. Tupana wakáraꞌari achiñana, eyá achiñá wakáraꞌari inaana.

8 Paineko chiyó Tupana keñoꞌótari achiñá iꞌimaká. Ñakele unká inanaru napona nakiyana aú kalé rikeñoꞌota riꞌimaká. Inanaru rikeñoꞌota achiñá napona nakiyana aú iꞌimaká.

9 Unká kaja rikeñoꞌótala achiñá inanárujlo penaje; rikeñoꞌota inanaru achiñajlo, riñathé aꞌajeyo penaje.

10 Ilé ke riꞌimakale, inanaru apáraꞌayo ruwílaꞌaru ripajré aú. Ruwílaꞌaru pajré iná amaka aú, iná weꞌepí achiñana jaꞌapiyá jemaꞌajeyo ruká. Palani kaja Tupana waꞌatéjena, jeꞌechú chiyájenajlo, ñaké laꞌakana.

11 Achiñana, inaana waꞌaté, iꞌimaño papalamánechaka pajwaꞌatéchaka, ke wajló riká Jesucristo jaꞌapiyá jemaꞌajéñojlo. Unká weꞌemalá weꞌemajowa paliyáaka.

12 Kewaka achiñá napona nakiyá keñoꞌótakanami inanaru, eyá inaana palamane achiñana iꞌimaká; Tupana palamane waja piyukeja nakaje.

13 Iká kemájeño naka palani inaana laꞌakajla, unkachu newílaꞌaru pajré iꞌimalá awakako Tupana waꞌaté puraꞌajó ejéchami.

14 Inaꞌuké weꞌepika aú achiñana pitúkaꞌataka newilá aú, ajopana inaꞌukena apáñaꞌo naꞌapí.

15 Newilá chojé inaana amó palá; newílaꞌaru pajré keja newilá. Ilé ke numaká ijló rinaku aú, inakiyana wátaño

16 nujwaꞌaté akhaꞌákakano rijimaje. Iweꞌepí marí: Meꞌetení weká keja weꞌemaká, wawakako wakajé Tupana purákaꞌalo jemaꞌajé. Ñaké waja piyukeja ajopana Jesucristo waꞌatéjena laꞌaká. Unká waja inaana puraꞌaló Tupana waꞌaté, unkachu newílaꞌaru pajré iꞌimalá. Kaja keja weꞌemaká.

17 Nakaje, numájikare nakú ijló meꞌetení aú, unká numalaje inaku: “Palá nalaꞌaká”, ke. Jesucristo waꞌatéjena awakaño pajwaꞌatéchaka, palá napechu iꞌimakáloje Tupana nakú. Eyá ijló unká ñaké kalé riká, chapú ilaꞌakale ikó awakako kewá.

18 Numá inaku ilé ke, ajopana kemakale nojló inaku marí ke: “Nawakákochu Tupana purákaꞌalo jemaꞌajé, neꞌiyajena akhaꞌákañono pajwaꞌatéchaka”, ke. Nuweꞌepí kewaka nemaká inaku ñaké.

19 Kaja keja riká, raú iná weꞌepíkaloje mékajenaka eꞌiyowá jaꞌapaño palani purákaꞌaloji chuwá.

20 Awakono aꞌajnewá ajñaje pajwaꞌatéchaka, raú iweꞌepíkaloje nakaje Jesucristo laꞌakare iꞌimaká, eꞌiyonaja unká wani ñaké kalé ijló riká.

21 Riphaka rená chojé ejéchami, iká ajñaño aꞌajnewá pajwaꞌatéchaka ikámika ke ajopana liyá. Aꞌapona ke, ajopana ñaꞌaká meꞌepijí panaku, eyá ajopana yuwéraꞌaño kaja nawaꞌá.

22 Re iñakaré, ajñákaloje aꞌajnewá richu penaje, unká naje kalé ilaꞌá mapéjaruna ke ajopana Jesucristo jaꞌapiyá jemaꞌajeño, ijwaꞌaté awakákaño. Iká apáñaꞌataño kamuꞌují laꞌakaño nakú. ¿Meke iwátaka numaká ilé kaje nakú? ¿E iwátaka nupuraꞌakó inaku palá ilé kaje aú? Ilé ke ilaꞌaká pachá, unká méñoꞌojo nupuraꞌaló inaku palá.

23 Wawakáraꞌajeri Jesucristo laꞌaká iꞌimaká, ke walaꞌakano. Riwakajé lapí Judas aꞌaká ripinánajlo riꞌimaká yámona, Jesucristo ajñari pan nakiyana raꞌapiyatéjena waꞌaté. Rijñaꞌá rikápojo riká.

24 E rimá Tupánajlo: “Palá pilaꞌaká weká marí pan aú”.

25 Rejomi najñá naꞌajnewá rijwaꞌaté. Pan rijñaꞌaká rikápojo, ke kaja rijñaꞌaká rikápojo tiyela. E rimá najló: “Marí nura. Ripalamane Tupana laꞌajé wajé nakaje inaꞌukéjloje, neꞌemakáloje raꞌapiyá penaje. Marí ke kaja iꞌirajika riká pajwaꞌatéchaka nuyámijo, raú iweꞌepíkaloje ichaya nutakaꞌá”, ke rimaká najló.

26 Ilé ke Jesucristo laꞌakale iꞌimaká, wajñá kaja pan pajwaꞌatéchaka, najñaka riꞌimaká ke kaja, raú weꞌejnatákano wapéchuwa rinaku. Weꞌerá kaja kajmú kaje jalá pajwaꞌatéchaka, neꞌeraká riꞌimaká ke kaja. Weꞌejnatá kaja wapéchuwa rinaku. Ilé ke ilaꞌajika Jesucristo takaꞌaká wachaya weꞌepéjona penaje. Aꞌajná riphájika piño majó ejená, walaꞌajé ñaké.

27 Iná ajñákachu mapeja riká pan, riweꞌepéjona penaje iꞌimakare, iná laꞌá puꞌuwaré, unká pachá iná iphala palá Jesucristo jaꞌapí. Raꞌá rinapona wachaya, weꞌemakóloje kapichákajo liyá. Iná iꞌirakachu kaja mapeja kajmú kaje jalá, ñaké kaja iná laꞌaká puꞌuwaré, unká pachá iná iphala palá raꞌapí.

28 Paineko iná iꞌimá iná pechu koꞌoná, iná weꞌepíkaloje e kaꞌajná iná ajñákajla riká, e kaꞌajná iná iꞌirakajla kaja kajmú kaje jalá.

29 Jesucristo takaꞌarí wachaya iꞌimaká. Wajñá pan, weꞌerá kaja kajmú kaje jalá pajwaꞌatéchaka riweꞌepéjona penaje. Unkachu iná weꞌepila na penájeka inajlo riká, unká iná laꞌalá palá raú, ñaké kaja riꞌirakana aú, ripachá Tupana wajájeri iná.

30 Mapeja inakiyana ajñaka pan, ñaké kaja neꞌeraká kajmú jalá. Unká naweꞌepila na penájeka riká, pachá kajrú nalaꞌakó natámina. Neꞌiyajénajlo nanapona pojloꞌó, jimaje neꞌiyajena takaꞌá.

31 Weꞌemakachu wapechu koꞌoná wajñaka riká yámona ee, unká na pachá Tupana wajálaje weká, ilé ke walaꞌaká pachá.

32 Puꞌuwaré walaꞌakare pachá Tupana wajaje weká, walaꞌaká piyá ñakeja piño. Ilé kaje aú unká weꞌemalaje kapichájeño ke riliyá; unká weꞌemalaje unká jemaꞌalaño Tupana jaꞌapiyá, kapichájeño penájena iꞌimakaño ke.

33 Ñakele, nojena, awakájiko ee aꞌajnewá ajñaje pajwaꞌatéchaka riweꞌepéjona penaje, iwata pekowáaka, ajñákaloje pajñakani riká penaje.

34 Kewí meꞌepijí iꞌimakárenajlo ajñájeño naꞌajnewá nañakaré chu. Ilé ke laꞌakana aú, unká Tupana wajálaje iká, unká pachá ilaꞌalá palá pajwaꞌatéchaka awakako wakajé.