2 Kaja iweꞌepí mékeka ipechu iꞌimaká, unká chiyó jemaꞌá Jesucristo jaꞌapiyá iꞌimaká. Riwakajé kajrú nakaje jenami iꞌimajika ijló ichiꞌinárikana ke Tupana apumí chojé. Unká nakaje jenami puraꞌaló, mapeja riká, eꞌiyonaja ipechu iꞌimaké rinaku: “Kewaka riká”, ke.

3 Ñakele chuwa nuwata iweꞌepika marí: Unká Tupana Pechu wakáraꞌala iná puraꞌakó puꞌuwaré Jesucristo nakú, ripechu palamane aú ja kalé iná weꞌepí Jesucristo iná wakáraꞌajeri. Raú iná kemá iná nakuwá: “Nuwakáraꞌajeri wani Jesucristo”.

4 Tupana Pechu aꞌarí keꞌiyapejé weꞌepíkaje raꞌapiyá jemaꞌajéñojlo.

5 Raú nalaꞌá keꞌiyapejé nakaje naweꞌepíkare nakojé apú, apú ke, Jesucrístojloja kalé walaꞌá nakaje palá riwakáraꞌaka ke.

6 Tupánaja kalé aꞌarí wañathé, nakaje walaꞌakare jáchoꞌokoloje palá rijló penaje.

7 Tupana Pechu aꞌarí weꞌepíkaje Jesucristo jaꞌapiyá jemaꞌajéñojlo, nalaꞌakáloje ajopana nanakiyánajlo nakaje palá.

8 Ripechu palamane pajluwa inakiyana weꞌepiri palá nakaje nakojé, raꞌapátakaloje riyukuna ajopánajlo. Apú kaꞌajná weꞌepiri kaja Ripechu palamane aú meke kemakánaka Tupana purákaꞌalo, riꞌimakáloje riyukuna ajopánajlo penaje.

9 Tupana Pechu kaja aꞌarí apujlo weꞌepíkaje, ripechu iꞌimakáloje kaphí Tupana chojé, raú rilaꞌakáloje ajopánajlo nakaje. Ripechu kaja aꞌarí apujlo weꞌepíkaje, ritejmoꞌótakaloje natámina penaje.

10 Ajopánajlo Ripechu aꞌarí weꞌepíkaje, nalaꞌakáloje ripalamane nakaje Tupánaja kalé weꞌepíkare laꞌakana. Ajopánajlo raꞌá kaja weꞌepíkaje, naꞌapátakaloje inaꞌukejlo Tupana purákaꞌalo raꞌapiyá ke penaje. Apujlo raꞌá weꞌepíkaje, riweꞌepíkaloje piyukeja purákaꞌaloji nakojé, raú riweꞌepí mékaje purákaꞌaloji jiñana liyaje, eyá mékaje purákaꞌaloji Tupana liyaje. Apujlo raꞌá weꞌepíkaje, ripuraꞌakóloje meꞌechuje purákaꞌaloji chu penaje. Eyá apujlo raꞌá kaja weꞌepíkaje, raꞌapátakaloje meke kemakánaka riká ajopánajlo.

11 Rikaja kalé Tupana Pechu aꞌarí Jesucristo jaꞌapiyá jemaꞌajeño nakiyánajlo keꞌiyapejé weꞌepíkaje numakare nakú. Raꞌá weꞌepíkaje apujlo, apujlo ke, riwátaka ke.

12 Re keꞌiyapejé iná napona nakiyana, eꞌiyonaja kalé pajluwa japi keja riká piyukeja. Ñaké kaja Jesucristo jaꞌapiyá jemaꞌajeño rijló: kajrú weká, eꞌiyonaja pajluwaja nakiyana japi keja weká rijwaꞌaté piyukeja.

13 Jesucristo jaꞌapiyá jemaꞌajeño iꞌimaño judíona nakiyana kaꞌajná, unká judíona nakiyana kalé kaꞌajná, ajopana waꞌaté jápajeño nakiyana kaꞌajná, najluwa jápajeño nakiyana kaꞌajná. Piyuke weká iꞌimaño pajluwaja waꞌatéjena, Tupana Pechu laꞌakale weká Jesucristo waꞌatéjenawa penaje. Tupana aꞌarí wajló Ripechu, ñakele rikaja kalé pajluwa Ripechu wajwaꞌaté, piyukeja.

14 Unká pajluwaja nakojé ke kalé iná napona, re kajrú iná napona nakiyana.

15 Iná jiꞌimá kemakela inajlo: “Unká piyátheꞌela kalé nuká, ñakele unká pinapona nakiyana kalé nuká”. Ilé ke rimakela inajlo, unká ráchoꞌolojla raú iná napona nakiyá.

16 Iná iꞌijwí kaꞌajná kemakela inajlo: “Unká pijlú kalé nuká, ñakele unká pinapona nakiyana kalé nuká”. Ilé ke rimakela inajlo, unká kaja ráchoꞌolojla raú iná napona nakiyá.

17 Piyuke iná napona iꞌimakela iná ijlú ke, unká na aú iná jemaꞌalajla. Piyuke iná napona iꞌimakela iná iꞌijwí ke, unká kaja na aú iná amálajla nakaje.

18 Tupana puwíchaꞌari wanapona, rilaꞌakáloje apú nakaje, apú nakaje ke, Tupana wátaka ke.

19 Piyuke iná napona iꞌimakela pajluwaja rinakiyana ke, unká iná napona iꞌimalajla.

20 Re kajrú iná napona nakiyana iná nakú, eꞌiyonaja pajluwaja iná napona. Ñaké kaja, re kajrú Jesucristo jaꞌapiyá jemaꞌajeño, eꞌiyonaja pajluwa japi keja weká rijwaꞌaté.

21 Unká meke laꞌajé iná ijlú kemalajla iná yátheꞌelajlo: “Unká na penaje piꞌimalá nojló”, ke. Unká kaja meke laꞌajé iná wílaꞌaru kemalajla iná jiꞌimajlo: “Unká na penaje piꞌimalá nojló”, ke.

22 Unká ilé ke kalé riká. Re kaꞌajná wanapona nakiyana, wapechu iꞌimakare nakú: “Unká na penaje riꞌimalá”, ke. Apú wanapona nakiyana chaje riká, iná iꞌimakáloje palá raú.

23 Re kaꞌajná kaja rinakiyana, wapechu iꞌimakare nakú: “Mapéjari keja riká”, eꞌiyonaja apú wanapona nakiyana chaje waꞌaká wanakojó riká. Unká palani kalé ramako kaꞌajná, ñakele wapáraꞌa riká aꞌarumakaji aú.

24 Eyá wanapona nakiyana palá amákaro, unká waꞌalá ñaké wanakojó riká, unká na penaje kalé iná aꞌakale iná nakojó riká. Tupana puwíchaꞌari wanapona, raú iná pechu iꞌimakare nakú: “Mapéjari riká”, ke, riwata kaja waꞌaká palá wanakojó riká.

25 Ilé ke ripuwíchaꞌaka wanapona wajló, riꞌimakáloje pajluwa japi keja wajló. Ñaké kaja weká, Jesucristo jaꞌapiyá jemaꞌajéñojlo riká: Tupana wátari wapechu iꞌimaká palá panakuwáaka; riwata kaja waꞌaká pañathéchaka; riwata kaja waꞌaká wanakojó pekowáaka.

26 Pajluwaja wanapona nakiyana chapátakachu weká, unká waja paala piyuke wanapona raú. Ñaké kaja Jesucristo waꞌatéjenajlo riká: apala pajluwa wanakiyana kaꞌajná amari chapú kaje yajwé, raú piyuke weká unká waja paala, wanakiyana kaja riꞌimakale. Apala ajopana kaꞌajná puraꞌañó palá pajluwaja wanakiyana nakú, raú palá kaja riꞌimaká wanaku, wanakiyana riꞌimakale.

27 Jesucristo waꞌatéjena iká. Piyukeja iká, pajluwano, pajluwano ke, rijwaꞌatéjena nakiyana waja, ilaꞌakáloje ripechu nakú iꞌimaká ke.

28 Tupana iꞌiwapari weꞌemaká, weꞌemakáloje Jesucristo jaꞌapiyatéjena, rejomi riwakáraꞌakaloje weká keꞌiyapejé nakaje laꞌajé. Wanakiyana raꞌá Ripurákaꞌalo jaꞌapátajeño penaje, naꞌapátakaloje raꞌapiyá ke Ripurákaꞌalo ajopánajlo. Raꞌá kaja wanakiyana inaꞌuké jewíñaꞌatajeño penaje, newíñaꞌatakaloje neká Ripurákaꞌalo nakú. Raꞌá kaja wanakiyana, nalaꞌakáloje Ripechu palamane nakaje, rikaja kalé weꞌepíkare laꞌakana. Raꞌá kaja ajopana, natejmoꞌótakaloje natámina penaje. Raꞌá kaja ajopana, neꞌemakáloje inaꞌuké ñathé aꞌajeño penaje. Raꞌá kaja ajopana, neꞌemakáloje Jesucristo jaꞌapiyá jemaꞌajeño wakáraꞌajeño penaje. Eyá kaja penaje raꞌá kaja ajopana, napuraꞌakóloje meꞌechuje purákaꞌaloji chu.

29 Unká piyukeja kalé weká, Jesucristo iꞌiwapakárena nakiyana, riwakaraꞌakáloje weká keꞌiyapejé nakaje laꞌajé. Unká kaja piyuke kalé weká Tupana purákaꞌalo jaꞌapátajeño; unká kaja piyukeja kalé weká inaꞌuké jewíñaꞌatajeño; unká kaja piyukeja kalé weká laꞌalaño Tupana Pechu palamane nakaje rikaja kalé weꞌepíkare laꞌakana;

30 unká kaja piyukeja kalé weká tejmoꞌótaño natámina; unká kaja piyukeja kalé weká puraꞌañó meꞌechuje purákaꞌaloji chu; unká kaja piyukeja kalé weká weꞌepiño napurákaꞌalo jaꞌapátakana naꞌapiyá.

31 Iwata ijluwa weꞌepíkaje Tupana aꞌakare, apú nakaje chaje palaka riꞌimakale. Chuwa numájika ijló rinaku.