Apú pajimila ewá, apú pajimila ewá ke, Pablo iꞌijnajíkano Tupana purákaꞌalo yukuna iꞌimakana nakú. Kaja ewaja riphá pajimila Corinto ejo. Rejé riyuró meketánaja, riꞌimakáloje rewá najló Jesucristo yukuna, raú neꞌiyajena keñoꞌoñó Jesucristo jaꞌapiyá jemaꞌakana. Neká penájemina rewíñaꞌata palá Tupana purákaꞌalo nakú, nemaꞌakáloje richaje palá raꞌapiyá. Rewíñaꞌataka neꞌemaká ejomi, raꞌapá reyá riꞌimakáloje kaja riyukuna ajopánajlo penaje.

E ajopana iꞌimaño kaja re. Neká jewíñaꞌatakeño kaja neká Tupana nakú, eꞌiyonaja apoꞌojó newíñaꞌatajika, mapeja nemájika nanakuwá: “Jesucristo wakáraꞌakarena nakiyana weká”, ke. Nakaꞌátake neꞌiyajé, napechu iꞌimaká piyá palá Pablo nakú, ripurákaꞌalo nakú waꞌaté. Raú napechu iꞌimá Pablo nakú: “Mapéjari ta riká”, ke, raú unká nephake raꞌapí. Ilé ke napechu iꞌimakale, riwakáraꞌa najló purákaꞌaloji. Ripuraꞌó richayo, naweꞌepíkaloje raú Jesucristo wakáraꞌakarena riyukuna iꞌimajé ajopánajlo nakiyana wani riꞌimaká. Riwata naweꞌepika Tupana purákaꞌalo, raꞌapátakare najló iꞌimaká, unká ripechu keja kalé rimaká najló nakaje nakú iꞌimaká. Unká riwátala ajopana inaꞌukena apichátaka napechu kewákaje purákaꞌaloji liyá, íkiꞌija riwátakale neꞌemaká. Ñakele riwakáraꞌa najló marí purákaꞌaloji.