2 CORINTIOS
Purákaꞌaloji Pablo wakáraꞌakare Jesucristo jaꞌapiyá jemaꞌajeño Corinto e iꞌimakáñojlo
1
Nuká, Timoteo waꞌaté, wakáraꞌaño ijló marí purákaꞌaloji. Jesucristo jaꞌapiyá jemaꞌajeño iká pajimila Corinto e. Tupana jaꞌapiyá jemaꞌajeri kaja Timoteo. Piyukeja Tupana leꞌejena inaꞌukena, Acaya teꞌeré ewá iꞌimakáñojlo waꞌaté, wawakáraꞌa marí purákaꞌaloji. Tupana iꞌiwapari nuꞌumaká, nuꞌumakáloje Jesucristo yukuna ajopánajlo penaje. Kaja keja riwátaka nuꞌumaká.
2 Nuwata waraꞌapá Tupana, eyá wawakáraꞌajeri Jesucristo waꞌaté, laꞌaká ipechu palá ikawílaꞌako piyá nakaje nakú.
Palá Tupana laꞌaká Pablo yukuna marí
3 Palani Tupana nakú puraꞌakano palá. Wawakáraꞌajeri Jesucristo jaraꞌapá riká. Riweꞌepí wamuꞌují, ñakeja raꞌapátaka wapechu nakiyá ujwí kaje.
4 Wamaka chapú kaje yajwé kewá ripalaꞌataka wapechu wajló. Ripalaꞌatá wajló wapechu, ñaké kaja wapalaꞌatákaloje ajopánajlo napechu, chapú kaje yajwé namaka wakajé
5 Kajrú Jesucristo amaka chapú kaje yajwé wachaya iꞌimaká; Ripechu chuwá weꞌemakale, wamá kaja kajrú chapú kaje yajwé. Rilokoꞌopáneje kaja ripalaꞌatá wapechu.
6 Chapú nalaꞌaká weká, weꞌemakale Tupana purákaꞌalo yukuna ajopánajlo, ajopánajlo ke. Ijló waꞌaté weꞌemá riyukuna iꞌimaká. Jemaꞌakale raꞌapiyá, iꞌimaó kapichákajo liyá. Riyukuna iꞌimakana jimaje nalaꞌá weká chapú. Tupana palaꞌatá wapechu palá, chapú kaje yajwé wamákare liyá.
7 Apala ijñaꞌajé kaja chapú kaje yajwé panaku, wajñaꞌaká panaku riká ke kaja. Tupana palaꞌataka wapechu, ke kaja ripalaꞌatájika ipechu riliyá. Ilé ke riꞌimajíkale ijló, waweꞌepí palá iꞌimajika.
8 Nojena, wawata iweꞌepika meke wamaka kajrú wani chapú kaje yajwé Asia teꞌeré e weꞌemaká wakajé. Kaja unká méñoꞌojo wajñaꞌalá panaku riká. Rijimaje wapechu iꞌimá wanakuwá: “¿Maárejeja kaꞌajná wakapichájiko?”
9 Inaꞌuké, nenókare puꞌuwaré rilaꞌakare pachá, keja waweꞌepíjika wanakuwá. Ilé ke riꞌimaká wajló, Tupana chojeja kalé wapechu iꞌimakáloje kaphí penaje. Riká weꞌepiri kaja takaꞌakaño makápoꞌotakana, raú richojeja kalé wapechu iꞌimá kaphí, unká wachojó kalé.
10 Tupana iꞌimatari weká inaꞌuké liyá, nenoka piyá weká. Riꞌimataje piño weká ñaké kaja, richojeja kalé wapechu iꞌimá kaphí, riꞌimatákaloje piño weká naliyá.
11 Ipuraꞌó Tupana waꞌaté wanaku. Kajrú inaꞌukena puraꞌajiko ee rijwaꞌaté wanaku, kajrú kaja nemájika rijló: “Palá pilaꞌaká neká, pilaꞌakale neká palá”.
Nájeka unká Pablo iꞌijnalá nachaje Corinto ejo yukuna marí
12 Palá wapechu wanakuwá, waweꞌepíkale walaꞌaká palá inaꞌuké nakú marí ejaꞌawá chu. Weꞌemaká ijwaꞌaté wakajé, palá kaja walaꞌajika eꞌiyowá, Tupana aꞌajíkale wañathé. Unká wapechu palamane aú kalé walaꞌá palá; unká kaja waweꞌepíkare nakojé aú kalé walaꞌá iká palá.
13 Marí purákaꞌaloji lanaꞌakéjami wawakáraꞌa ijló, ipuraꞌakóloje waꞌaté, raú iweꞌepíkaloje numakare nakú ijló nakojé.
14 Kaja iweꞌepí wanakojé wejápaja. Jesucristo iphájika majó wakajé ipechu iꞌimajé palá wani wanaku, wapechu iꞌimaká inaku ke kaja.
15 Nuweꞌepí palá wapechu iꞌimaká panakuwáaka, raú nuwátajla piño ichaje iꞌijnakana iyaampe laꞌaká, ipechu iꞌimakáloje puꞌují raú penaje.
16 Nupechu nakú ichaje iꞌijnakana iꞌimá, Macedonia teꞌeré ejo nuꞌujnajika wakajé. Reyá nunakuwá nuwata kaja amákana piño, aꞌakáloje nuñathé Judea teꞌeré ejo iꞌijnakana aú.
17 Ilé ke nuwátakajla ichaje iꞌijnakana, raú apala marí ke ipechu nunaku: “Mapeja ripajlaka ta”. Unká iyamá chuwá péchuri kalé nuká, numakáloje “aꞌa, nuꞌujnajé”, ke kaꞌajná, “unká nuꞌujnalaje”, ke kaꞌajná.
18 Tupana weꞌepiri mékeka wapechu nakú riká; riweꞌepí unká wemalá iyamá chuwá rikaja kaja nakú.
19 Unká Tupana iꞌirí Jesucristo kemalá rikaja kaja nakaje nakú iyamá chuwá. Rilaꞌá rimaká ke. Silvano, Timoteo, nuká, kele iꞌimaño riyukuna ijló iꞌimaká.
20 Jesucristo palamane Tupana aꞌarí wajló nakaje rimakare nakú raꞌapiyá jemaꞌajéñojlo iꞌimaká. Rimá wanaku iꞌimaká, ke rilaꞌajika weká palá Jesucristo palamane aú. Weꞌemaká aú riyukuna ajopánajlo, weꞌemá kaja palá Jesucristo laꞌakare weká yukuna najló.
21 Tupana laꞌarí wapechu kaphí richojé; rilaꞌá kaja wapechu kaphí Jesucristo chojé. Raꞌá kaja weká rileꞌejena penaje ijwaꞌaté.
22 Wená keꞌená penaje Tupana aꞌarí wajló Ripechu, raú waweꞌepíkaloje rileꞌejénaka weká. Raú kaja waweꞌepeje raꞌajika wajló piyuke nakaje wajló penaje iꞌimajíkare.
23 Unká joꞌó nuꞌujnalá ichaje Corinto ejo, nupechu nakú riꞌimaká ke. Tupana weꞌepiri nájeka unká nuꞌujnalá ichaje. Unká nuwátala inakiyana wajákana, puꞌuwaré nalaꞌakare pachá, raú unká joꞌó nuꞌujnalá ichaje.
24 Unká wawátala ijló kemakana: “Marí ke ipechu iꞌimajika nakaje nakú”. Unká wawátala ilé ke kemakana ijló, waweꞌepíkale ipechu iꞌimaká Tupana purákaꞌalo chojé kaphí. Wawata iñathé aꞌakana, ipechu iꞌimakáloje puꞌují, meꞌetení ipechu iꞌimaká chaje.