GÁLATAS
Jesucristo jaꞌapiyá jemaꞌajeño, Galacia teꞌeré nakú iꞌimakáñojlo Pablo wakáraꞌari marí purákaꞌaloji
1
Jesucristo yukuna iꞌimajeri nuká, raꞌakale nuká, raraꞌapá waꞌaté, unká inaꞌuké purákaꞌalo aú kalé. Riká makápoꞌotari Jesucristo iꞌimaká.
2 Nuká, eyá nojena maare iꞌimakaño waꞌaté, kemaño inaku piyukeja: “Eko palá najló kaꞌajnó”, ke.
3 Wawakáraꞌajeri wani Jesucristo. Nuwata riká, eyá Raraꞌapá Tupana, laꞌaká iká palá.
4 Puꞌuwaré walaꞌakare chaya Jesucristo takaꞌarí iꞌimaká, raú ráchoꞌotakaloje weká puꞌuwaré laꞌakaná chiyá. Ilé ke laꞌakana aú, rilaꞌá weká palá laꞌajeñó ke Tupánajlo. Wachiꞌinárikana, waraꞌapá Tupana, wátaka ke rilaꞌaká raú.
5 Palá wani Tupana laꞌaká inaꞌuké, palá wani kaja wapuraꞌajiko rinaku waꞌajínija.
Mékeka Tupana iꞌimataka inaꞌuké rijluwa kapichákajo liyá yukuna marí
6 Marí ke nupechu inaku: “¡Meke kiñaja wani nayurílaka naliyó Tupana jaꞌapiyá jemaꞌakana!” Riká jáchoꞌotarijla iꞌimaká kapichákajo liyá Jesucristo palamane aú. Eꞌiyonaja kaja iyurí Ripurákaꞌalo, jemaꞌakare iꞌimaká iliyó, iꞌimakáloje apú purákaꞌaloji jaꞌapiyá. Apoꞌojó wani neꞌemaká ijló mékeka iná iꞌimakó kapichákajo liyá yukuna.
7 Unká na apú yuku iꞌimalá kewaka, pajluwa chuwaja mékeka Tupana iꞌimataka inaꞌuké kapichákajo liyá yukuna. Re neꞌiyajena ijwaꞌaté kawílaꞌaño inaku; nawata ijló Jesucristo yukuna apiyákakana apoꞌojó, napurákaꞌalo aú. Tupana iꞌimatari iná kapichákajo liyá, iná pechu iꞌimakachu kaphí Jesucristo chojé. Riká yukuna nawata apiyákakana ijló.
8 Apala pajluwa kaꞌajná iꞌimari ijló riyukuna, eꞌiyonaja apoꞌojó riꞌimaká riyukuna, weꞌemaká ijló liyá. Ilé kaje cha nuwata Tupana yerúkaꞌaka. Nuwátajla kaja ñaké riyerúkaꞌaka nuchaje, unkaja ke nuꞌumá riyukuna richuwano ke ijló. Tupana waꞌatéjeri, jeꞌechú chiyaje, iphákela inaku, eyá unkaja ke riꞌimá richuwano ke riyukuna ijló, nuwata kaja Tupana yerúkaꞌaka richaje.
9 Kaja numá ijló rinaku iꞌimaká, eꞌiyonaja numá piño ñakeja kaja: Pajluwa kaꞌajná iꞌimajika ee apoꞌojó ijló Tupana iꞌimataka inaꞌuké rijluwa kapichákajo liyá yukuna, nuꞌumakare ijló yukuna iꞌimaká liyá, nuwata Tupana yerúkaꞌaka richaje.
10 Marí kaje numakare nakú aú, iweꞌepeje mékajeka nuká. Unká numalá nakaje nakú, inaꞌuké pechu iꞌimakáloje palá nunaku; Tupana péchuja kalé nuwata iꞌimaká nunaku palá. Nuwátakela inaꞌuké pechu iꞌimaká palá nakaje numakare nakú, unká méñoꞌojo nuꞌumalajla Jesucristo waꞌaté jápajeri.
Jesucristo wakáraꞌakarena nakiyana Pablo iꞌimaká. Riyukuna marí
11 Nojena, nuwata iweꞌepika marí: Ilé Tupana iꞌimataka rijluwa iná kapichákajo liyá yukuna, nuꞌumakáreno inaꞌukejlo, unká inaꞌuké liyaje weꞌepíkanami kalé riká.
12 Unká inaꞌuké kalé iꞌimari nojló riyukuna iꞌimaká; unká kaja na kalé jewíñaꞌatari nuꞌumaká rinaku, Jesucrístoja kalé iꞌimari riyukuna nojló iꞌimaká.
13 Kaja iweꞌepí chapú wani nulaꞌajika Jesucristo jaꞌapiyá jemaꞌajeño, judíona purákaꞌalo jaꞌapiyá nuꞌumaké wakajé. Riwakajé nuwátake nakapichátakana.
14 Judíona purákaꞌalo jaꞌapiyá nuꞌumaké wakajé, nucháꞌatake ajopana nojena rinakojé weꞌepíkana aú. Nuká kéchajena iꞌimajíkaño phíyuꞌuke, nucháꞌatake kaja raú. Ajopana chaje nulaꞌajíkano nakaje rimájika ke, raú nucháꞌatakeno ajopana.
15 Unká chiyó nomothoꞌó, Tupana iꞌiwapari nuꞌumaká rijluwa, nulaꞌakáloje riwakáraꞌaka ke, íkiꞌija riwátakale nuká. Kaja ewaja rená iphá rijló, riꞌiwapakáloje rijluwa nuká ajopana inaꞌukena eꞌiyayá.
16 Rejéchami ripalaꞌataka nupechu palá, nuweꞌepíkaloje Riꞌirí nakojé, nuꞌumakáloje riyukuna ajopánajlo, ajopánajlo ke penaje; unká judíona kalé iꞌimakáñojlo kalé nuꞌumá riyukuna. Ilé ke rilaꞌaká nupechu iꞌimaká wakajé, unká nupuraꞌaló ajopana inaꞌukena waꞌaté nakú.
17 Unká kaja nuꞌujnalá Jerusalén ejo neꞌiyajena, Jesucristo wakáraꞌakarena riyukuna iꞌimajé ajopánajlo, amaje. Nupiyá neꞌemá Jesucristo wakáraꞌakarena nakiyana iꞌimaká. Paineko nuꞌujná Arabia teꞌeré ejo iꞌimaká, Tupana jewíñaꞌatakaloje nuká palá penaje, rejomi nupaꞌó piño nopumí chuwá Damasco ejo.
18 Weji kele jarechí jaꞌapaka iꞌimaká ejomi, nuꞌujná Jerusalén ejo Pedro amaje. Iyamá jápakaje ketánaja nuꞌumaká rijwaꞌaté re.
19 Pedro, Santiago (wawakáraꞌajeri Jesús meremi), keleja nomá re iꞌimaká, eyá ajopana, Jesucristo wakáraꞌakarena nakiyana, unká nomala re.
20 Meꞌetení, Tupana ijlú chuwá ke numaká ijló marí, kewaka nakaje numakare nakú.
21 Jerusalén e nuꞌumá meketánaja, rejomi noꞌopá Siria teꞌeré ejo, reyá noꞌopá piño Cilicia teꞌeré ejo.
22 Jesucristo jaꞌapiyá jemaꞌajeño, Judea teꞌeré ewá iꞌimakaño, unká amánaꞌapa kalé nuꞌumaká.
23 Raú yuku iꞌimá rewá: “Riká Pablo laꞌakeri wanakiyana chapú iꞌimajika, Jesucristo jaꞌapiyá jemaꞌajeño neꞌemajíkale. Penájemi iꞌimari chuwa Tupana iꞌimataka iná kapichákajo liyá yukuna, iná pechu iꞌimakáloje raú kaphí Jesucristo chojé”, ke nemaká nunaku.
24 Raú palá napuraꞌakó Tupana nakú, rapiyákakale nupechu iꞌimaká.