13
Chuwa nuꞌujnajika piño ichaje weji ke pe laꞌaká. Nuphájika kecha, palá wapuraꞌajiko pajwaꞌatéchaka rinaku. Iyamá kaꞌajná, weji kele kaꞌajná, kemájeño ñaké waja rinaku, raú waweꞌepeje mékeka rilamáꞌatakana. Tupana purákaꞌalo lanaꞌakéjami kemaká ke walamáꞌatajika riká.
2 Nuꞌumaká ichaje iyaampe laꞌaká iꞌimaká wakajé, numá ijló puꞌuwaré laꞌajeñó nakú marí ke: Unkaja ke nayurí naliyó riká, nuphájika piño inaku wakajé, nuwajaje neká. Chuwa numaká piño ñakeja kaja ijló: Laꞌañó re joꞌó kaja joꞌó puꞌuwaré, nawajákana iꞌimajeri.
3 Riwakajé iweꞌepeje numaká ijló, Jesucristo kemaká nojló ke. Unká maliyaru kalé Jesucristo; weꞌepiri wani riká piyukeja nakaje laꞌakana eꞌiyowá.
4 Nephaka riká aꞌawaná apiyákakanami nakojé itapuwa aú iꞌimaká wakajé, rilaꞌá rinakuwá najló poꞌoloni ke iꞌimaká. Riweꞌepí piyuke nakaje laꞌakana. Ritakaꞌá iꞌimaká ejomi, rimakápoꞌo piño rapumí chuwá, ñakele kajmuni riká meꞌetení. Rilaꞌaká rinakuwá najló maliyaru, ke kaja weꞌemaká ijló, eꞌiyonaja kalé Jesucristo chuwá iꞌimakana aú walaꞌá ijló nakaje Tupana Pechu aú.
5 Iꞌimá ikoꞌonó, amáijla mékeka ipechu Jesucristo nakú. ¿E chi kaꞌajná Jesucristo pechu ijwaꞌaté, ilaꞌakáloje raú riwátaka ke? Iweꞌepí palá meke kaꞌajná ijló riká: apala unká kaꞌajná Jesucristo jaꞌapiyá jemaꞌajeño kalé iká.
6 Nuwata iweꞌepika Jesucristo wakáraꞌakarena nakiyánaka joꞌó weká.
7 Wapuraꞌó Tupana waꞌaté inaku, ilaꞌaká piyá puꞌuwaré. Neꞌiyajena pechu kaꞌajná wanaku: “Mapeja napuraꞌakó”, ke.
8 Unká walaꞌalá nakaje apoꞌojó, kewákaje purákaꞌaloji kemaká liyá; rimaká ke wawátaka nakaje laꞌakana.
9 Nemaká aú wanaku: “Maliyáruna neká”, ke, palani wajló ñaké, raú waꞌakáloje iñathé penaje. Kaphí péchuruna iꞌimakela palá laꞌakaná nakú, nupechu laꞌakojla puꞌují raú. Pulapé wapuraꞌakó Tupana waꞌaté inaku, ilaꞌaká piyá puꞌuwaré.
10 Ñakele nulanaꞌá ijló marí meꞌetení, nuphájika inaku yámona. Unká nuwátala akhaꞌakana kajrú wani, nuphájika inaku kecha; unká kaja nuwátala inakiyana wajákana. Jesucristo aꞌarí nuꞌumaká, nulaꞌakáloje nakaje raꞌapiyá ke, ñakele nuwata inaku laꞌakana palá, ipechu iꞌimakáloje richaje, richaje ke, kaphí Tupana chojé.
11 Chuwa, nojena, marí aú nutajátaje marí lanaꞌakéjami. Eko ipechu iꞌimá palá. Iwata kaja ijluwa nakaje laꞌarí ipechu palá. Pajluwaja keja iꞌimá pajwaꞌatéchaka Tupana palamane, raú unká na nakojé kalé ikawílaꞌajo.
12 Ajalaka pekowáaka palá.
13 Piyuke Jesucristo waꞌatéjena, maárowa iꞌimakaño, kemaño inaku: “Eko palá najló kaꞌajnó”, ke.
14 Nuwata iꞌimaká wawakáraꞌajeri Jesucristo palamane. Íkiꞌija wani Tupana wátakarena iká. Nuwata iyuriko raꞌapiyaja; nuwata kaja Tupana Pechu iꞌimaká ijwákeꞌewe.
Kaja.