2-3 Paꞌu kele iphata jiꞌimaji nakojé kele (14) jarechí iꞌimaká wakajé, Tupana wáꞌari nuká weji kaꞌamá jeꞌechú chojé. Unká nuweꞌepila palá: nunapona waꞌaté kaꞌajná nuꞌumá re, nupéchuja kalé kaꞌajná iꞌimari re. Tupánaja kalé weꞌepiri mékeka nuꞌumaká re. Nuweꞌepí riwáꞌaka nuꞌumaká jeꞌechú chojé.

4 Re nomaꞌá purákaꞌaloji meꞌechuje joꞌó iꞌimakare inaꞌukejlo. Unká Tupana wátala nuꞌumaká riyukuna; unká kaja purákaꞌaloji iꞌimalá inaꞌukejlo, neꞌemakáloje riyukuna raú penaje.

5 Nakaje re nomákare nakuja kalé nupuraꞌajó palá; unká nupuraꞌalajo nunakuwá palá. Nakaje numakare nunakuwá numá ijló, iweꞌepíkaloje raú poꞌoloni nuká.

6 Nuwátakela nunakuwá puraꞌakano palá, unká mapechuru puraꞌakó rinakuwá ke kalé riꞌimakajla, kewaka riꞌimakale. Unká nupuraꞌaló nunakuwá palá, apala raú inaꞌuké pechu iꞌimajla palá nunaku. Ñakele nakaje nulaꞌakare aú, eyá nakaje numakare nakú kaje aú ja nuwata inaꞌuké pechu iꞌimaká palá.

7 Nomá palá nojé wani nakaje jeꞌechú chu, re nuꞌumaká wakajé. Nupechu iꞌimaká piyá nunakuwá weꞌepiri ke wani, nomaka meꞌetení kewini yajwé. Jiñá Chiꞌinárikana liyaje riká, raú rilaꞌakáloje chapú nuká. Ñaké nojló nakaje meꞌetení, nulaꞌaká piyá nunakuwá cháꞌatajeri ke wani, nakaje nomákare iꞌimaká aú.

8 Weji ke pe numaká Tupánajlo, raꞌapátakaloje nuliyá kewini yajwé nomákare,

9 eꞌiyonaja unká raꞌapátala nuliyá riká. Rimá nojló: “Íkiꞌija nuwátaka piká. Kewini yajwé waꞌaté piyurejo, raú piweꞌepeje maliyaru piká. Pipechu iꞌimá palá ilé kaje nakojé weꞌepíkana aú; ajopana weꞌepiño kaja raú Jesucristo palamane aú pilaꞌaká nakaje”, ke rimaká nojló. Ñakele puꞌují nupechu nunakuwá, maliyaru nuꞌumakale.

10 Kaja poꞌoloni kaje yawaꞌachó nojló. Marí ke nojló poꞌoloni kaje numakare nakú: Puꞌuwaré napuraꞌakó nunaku; kamuꞌují nulaꞌaká kajrú nakaje nakú; chapú ajopana laꞌaká nuká; nulakaꞌaphé nulaꞌaká nakaje Jesucristo wátaka ke. Kaja ilé ke laꞌakana aꞌá renó nunaku. Maliyaru wani nuꞌumakachu, nulaꞌá kajrú nakaje, Tupana wátakare kaje, ripalamane aú.

11 Unká pechu iꞌimalare, puraꞌaró rinakuwá palá; ñaké kaja numaká nunakuwá palá. Ipachá ilé ke numaká nunakuwá; palani riꞌimakela, iká puraꞌakelo nunaku palá. Eꞌiyonaja ajopana iꞌimaño ijló Jesucristo wakáraꞌakarena nakiyana keja. “Ajopana chaje péchuruna weká”, ke naweꞌepika nanakuwá. Unká nacháꞌatala nuká napechu aú; majopéjari wani nuká, eꞌiyonaja nucháꞌata neká.

12 Nuꞌumaké ijwaꞌaté wakajé, kachuwa nakuja nowíñaꞌatajika iká Tupana purákaꞌalo nakú, raú iweꞌepíkaloje riká palá. Unká nulaꞌaló ujwí iliyá, unkale iweꞌepila riká kiñaja iꞌimaká. Nulaꞌaké Tupana palamane aú nakaje eꞌiyowá rikaja kalé weꞌepiri laꞌakana. Noná keꞌená penaje riꞌimaká, iweꞌepíkaloje nuká raú penaje, raú iweꞌepí Jesucristo wakáraꞌakarena riyukuna iꞌimajé nakiyana nuká.

13 Nuꞌumaká ijwaꞌaté wakajé, noꞌoká iñathé, noꞌoká ajopana Jesucristo jaꞌapiyá jemaꞌajeño ñathé ke kaja. Unká nukejáꞌala iliyá liñeru nujluwa nuꞌumajowa penaje; ajopana Jesucristo waꞌatéjena liyá nukejaꞌa liñeru iꞌimaká. Ilé ke laꞌakana aú ja kalé nulaꞌá iká apoꞌojó. Amó nuchaje, unkale nulaꞌalá iká rejenowaja najwaꞌaté iꞌimaká.

14 Chuwa nuꞌujnajika piño ichaje weji ke pe laꞌaká. Riwakajé unká kaja nukejáꞌalaje iliyá liñeru nujluwa nuꞌumajowa penaje. Unká nakaje ikapi iꞌimakare chaya kalé nuꞌujnajé ichaje; nuꞌujnajé ichaje iñathé aꞌajé. Jaraꞌapá ke nuká ijló, nukeñoꞌokale Jesucristo yukuna iꞌimakana ijló paineko iꞌimaká. Unká nayani kalé awakátaño liñeru nachiꞌinajlo; nachiꞌiná awakátaño nayánijlo liñeru. Ñakele unká nukejáꞌala iliyá liñeru nujluwa.

15 Palani nojló piyukeja nakaje nukapi iꞌimakare aꞌakana ijlojé penaje, nuwátakale iñathé aꞌakana. Marí ke nupechu inaku: Nuwátaka aú iká richaje, richaje ke, rilanakiya iká wátaño nuká raꞌapejé, raꞌapejé ke.

16 Kaja iweꞌepí unká nukawílaꞌala inaku liñeru kejáꞌakana iliyá nujluwa aú, eꞌiyonaja eꞌiyajena pechu nunaku: “Palá raꞌaká wameꞌé rijluwa, rejomi rataꞌakáloje weká penaje”.

17 Nuwakáraꞌa inaꞌuké iꞌijnaká ichaje iꞌimaká. Unká kaja nataꞌalá iká. Ñaké riꞌimaká, ¿ke joꞌó chi?

18 Numá Títojlo iꞌimaká, riꞌijnakáloje ichaje penaje. Nuwakáraꞌa kaja apú Jesucristo jaꞌapiyá jemaꞌajeri rijwákeꞌewe penaje. Unká kaja Tito jataꞌalá iká liñeru kejáꞌakana iliyá aú. Nupechu ke kaja péchuri riká.

19 Apala ipechu iꞌimá wanaku: “Nachayo nemá wajló ilé ke”. Unká riká penaje kalé wemá wanakuwá ñaké; Jesucristo wátaka ke wemaká ijló nakaje nakú. Tupana ijlú chu weká. Nojena, íkiꞌija nuwátakarena, piyukeja nakaje wemakare nakú, ijlojé penaje riká, ipechu iꞌimakáloje richaje, richaje ke, kaphí Tupana chojé raú.

20 Nuphájika rejo wakajé, unká kaꞌajná nomálaje ilaꞌaká palá nuwátaka ke; unká kaja kaꞌajná amálaje nulaꞌaká iwátaka ke. Apala nomaje kaꞌajná iká pajwaꞌatéchaka akhaꞌákakano nakú; nomaje kaja kaꞌajná chapú iwó pacháaka ke, inakiyana cháꞌatakale ikó; nomaje kaꞌajná yuriná iká pajwaꞌatéchaka; nomaje kaja kaꞌajná inakiyana laꞌaká napechu keja wani; apala nomaꞌajé kaꞌajná ichapújraꞌako panakuwáaka; nomaꞌajé kaja kaꞌajná ipuraꞌakó puꞌuwaré panakuwáaka. Apala nomaje kaꞌajná inakiyana laꞌaká nekó cháꞌatajeño ke eꞌiyowá; nomaje kaja kaꞌajná unká paala iꞌimaká pajwaꞌatéchaka. Ilé kaje nakú nukawílaꞌako wani.

21 Nowó kaꞌaró nojló. Nuphájikaja rejo ichaje apala nopáñaꞌajo iká jaꞌapí; kajrú kaꞌajná nuyájika, puꞌuwaré laꞌajeñó iꞌimakale. Kaja jupi cha wani eꞌiyajena iꞌimaño puꞌuwaré laꞌakaná nakú. Unká joꞌó napajnoꞌotala napéchuwa namanáicho laꞌakana liyá; ñujuꞌukena wani eꞌiyajena. Ilé kaje laꞌakana unká joꞌó eꞌiyajena yurila iliyó.