Pablo akhaꞌaká ajopana maná yukuna marí
11
Nuwata ijñaꞌaká panaku nuká meketánaja, mapeja jewíñami ke numájikale nunakuwá.
2 Tupana palamane aú kajrú numejñátaka iká ajopana liyá; íkiꞌija kaja nuwátaka iꞌirakó Tupana nakojé. Pajluwájaru inaya wátakachu íkiꞌija pajluwaja achiñá, rumejñata rokó ajopana achiñana liyá, ruwáꞌakakoloje riká ruwátakare waꞌaté penaje. Ilé ke kaja nuwátaka imejñátaka ikó, iꞌimakáloje Jesucristo jaꞌapiyá jemaꞌajeño unká laꞌalaño puꞌuwaré.
3 Júpimi Jiñá Chiꞌinárikana pajlari Eva waꞌaté iꞌimaká; kapechú wani ripajlaka rujwaꞌaté iꞌimaká. Ñaké kaja kaꞌajná jemaꞌaká meꞌetení pajlaño ijwaꞌaté jaꞌapiyá, raú nowó kaꞌaró wani ijwaꞌaté. Jupejé Jesucristo jaꞌapiyá jemaꞌakánaja iweꞌepike itukumó, eꞌiyonaja chuwa kaꞌajná iyurika ajopana pajlaka ijwaꞌaté. Napurákaꞌalo nakú iꞌijnataka ipéchuwa meꞌetení: apoꞌojó riká, Jesucristo purákaꞌalo riyuríkare wajló iꞌimaká, liyá.
4 Ajopana iphaño inaku jewíñaꞌataje Jesucristo nakú: apoꞌojó neꞌemaká ijló riyukuna; apoꞌojó kaja neꞌemaká ijló Tupana Pechu yukuna. Unká weꞌemaká ijló riyukuna iꞌimaká, ke kalé neꞌemaká riyukuna ijló, eꞌiyonaja wechi jemaꞌaká naꞌapiyá; unká paala ilaꞌaká raú. Apoꞌojó kaja neꞌemaká ijló Tupana iꞌimataka inaꞌuké kapichákajo liyá yukuna. Unká weꞌemaká ijló riyukuna iꞌimaká ke kalé riká, eꞌiyonaja wechi kaja jemaꞌaká naꞌapiyá.
5 Ajopana chaje péchuruna ke iweꞌepika, kele iphaño inaku wayámajo iꞌimaká nakú; unká naꞌapejé kalé nuká.
6 Apala unká nupuraꞌaló palá napuraꞌakó ke, eꞌiyonaja unká nacháꞌatala nuká napechu aú. Piyuke nakaje numakare nakú ijló iꞌimaká aú iweꞌepí ñaké riká.
7 Re weꞌemaká ijwaꞌaté wakajé, nuꞌumá ijló palá Tupana iꞌimataka inaꞌuké kapichákajo liyá yukuna. Riwakajé unká nukejáꞌala iliyá liñeru nujluwa iꞌimaká. ¿Chapú chi nulaꞌaká iká raú?
8 Ajopana Jesucristo jaꞌapiyá jemaꞌajeño aꞌañó nojló liñeru iꞌimaká, nuꞌumajowa penaje nowíñaꞌataka iꞌimaká ketana. Ijnú iwátakale raꞌakana nojló, raú nujñaꞌá naliyá riká, nulaꞌakáloje iká palá raú penaje.
9 Nuꞌumaké ijwaꞌaté wakajé, unká nukawílaꞌala inaku nakaje kamuꞌují nulaꞌajíkare nakú aú. Riwakajé ajopana Jesucristo jaꞌapiyá jemaꞌajeño, Macedonia teꞌeré eyájena, iphaño nunaku iꞌimaká. Neká aꞌañó nojló nakaje, nulaꞌakare nakú kamuꞌují iꞌimaká, raú unká nukawílaꞌala inaku. Marí pumí chiyó, unká kaja nukawílaꞌalaje inaku.
10 Palá nuweꞌepika Jesucristo yukuna nakojé; numaká rinaku, ke riká. Unká wani nukejáꞌalaje liñeru iliyá; kaja keja nuwátaka riꞌimaká.
11 Apala unká kaꞌajná iweꞌepila nájeka numaká inaku ilé ke, raú kaꞌajná ipechu iꞌimajé nunaku: “Unká kaꞌajná riwátala weká”, ke. Unká ñaké kalé riká, íkiꞌija nuwátakale iká. Tupana weꞌepiri ñaké riká.
12 Neká, wayámojo iphákaño inaku, kemaño nanakuwá ijló: “Pablo laꞌaká nakaje, ke kaja walaꞌaká”, ke nemaká. Nakejaꞌa kaja liñeru iliyá najluwa, eyá weká unká laꞌalaño ñaké iꞌimaká.
13 Kele, numakárena nakú ijló, kemaño kaja nanakuwá: “Jesucristo wakáraꞌakarena nakiyana weká, waꞌapátakaloje riyukuna ajopánajlo”, ke. ¡Mapeja wani napajlaka ta ijwaꞌaté! Mapeja nalaꞌaká nekó riwakáraꞌakarena nakiyana ke.
14 Nuweꞌepí mékajenaka neká; Jiñá Chiꞌinárikana laꞌarí kaja rinakuwá Tupana waꞌatéjeri, jeꞌechú chiyaje, ke. Ñaké nalaꞌaká;
15 rijwaꞌatéjena laꞌañó ñaké nanakuwá. Kaja waweꞌepí mékajenaka neká, laꞌañó nekó palá laꞌajeñó ke inaꞌukejlo. Riphájika kaja penaje rená chojé wakajé, Tupana wajájeri neká puꞌuwaré nalaꞌakare lokoꞌopáneje.
Pablo amari kajrú chapú kaje yajwé iꞌimaká, Jesucristo wakáraꞌakarena nakiyana riꞌimakale. Marí riyukuna
16 Numá piño ijló: Ipechu iꞌimaniña nunaku: “Unká ta ripechu iꞌimalá”, ke. Nuweꞌepí ñaké ipechu nunaku, eꞌiyonaja jemaꞌá noꞌopiyá. “Unká pechu iꞌimalá purákaꞌalo ke”, ke kaꞌajná ijló nuká. Eꞌiyonaja jemaꞌá noꞌopiyá, nuꞌumachi ijló nulaꞌakare yukuna.
17 Unká nuwakáraꞌajeri Jesucristo wakáraꞌaka ke kalé numaká nunakuwá ijló meꞌetení. Chuwa mapechuru kemaká rinakuwá, keja numaká nunakuwá ijló.
18 Kajrú inaꞌukena kemaño nanakuwá palá nakaje nalaꞌakare aú; nemaká nanakuwá, ke kaja numájika chuwa nunakuwá palá.
19 Iká weꞌepiño inakuwá kapechúruna ke wani, ñakele ijñaꞌá panaku palá ipechu ke weká, mapechúruna iꞌimakaño.
20 Iwakáraꞌajeño ke neꞌemaká ijló, kaphí nawakáraꞌaka iká, nephá kaja naꞌapiwá ijló. Iminana keja kaja neꞌemaká ijwaꞌaté, laꞌañó kaja nawejáputenami iká ke; nañaꞌá iká pajimaya.
21 Nuká unká laꞌalajla iká ñaké, nowó laꞌakole ñaké laꞌakana jaꞌapí.
Unká nawó laꞌaló palá nanakuwá puraꞌakano jaꞌapí; unká kaja nowó laꞌaló ñaké nunakuwá kemakana jaꞌapí, eꞌiyonaja nopáñaꞌo ilé ke kemakana jaꞌapí.
Mapechuru kemaká nakaje nakú, keja numaká nakaje nakú ijló meꞌetení.
22 Nemá nanakuwá: “Hebreo jáꞌana weká”, ke. Hebreo jaꞌa kaja nuká. Nemá kaja: “Israel lakénami weká”, ke. Rilakemi nakiyana kaja nuká. Nemá kaja nanakuwá: “Abraham michú lakénami weká”, ke. Riká michú lakemi kaja nuká.
23 Nemá nanakuwá: “Jesucristo waꞌaté jápajeño weká”, ke. Rijwaꞌaté jápajeri joꞌó wani nuká, raú nucháꞌata neká. Mapechuru puraꞌakó rinakuwá, ke nupuraꞌakó nunakuwá meꞌetení. Najápaka chaje nujápaka. Kajrú ajopana ñaꞌataka nuꞌumaká, nuꞌumakale Jesucristo yukuna inaꞌukejlo. Richónaja kaja pulapé nakaꞌaká nuká inaꞌuké wajákajelana chojé; pulapé nakapichátakajla nuká riyukuna iꞌimakana jimaje.
24 Pajluwa théꞌela ke pe apú wakajé, apú wakajé ke, judíona nakiyana ñaꞌataka nuká treinta y nueve laꞌaká pe, nuꞌumakale Jesucristo yukuna chona.
25 Weji ke pe nañaꞌataka nuꞌumaká aꞌawaná aú; pajluwa pe nakaꞌá kajrú jipa nuchá, nenókaloje nuká penaje; weji ke pe laꞌaká wapuru, noꞌopákare chu, jaꞌakó waꞌapiyá iꞌimaká. Raú pajluwa kala, eyá lapí ketana, nokúwaꞌako juni jalomi jakú iꞌimaká.
26 Kajrú nuꞌujnajika ajopana ñakajela ejo, ajopana ñakajela ejo ke, iꞌimajika. Kapichákajo eꞌiyowá nuꞌumaká, juni chuwá noꞌopájika ketana; jataꞌakáchina eꞌiyowá noꞌopá kaja iꞌimaká. Nuteꞌeré eyájena, ajopana teꞌeré eyájena waꞌaté, amákeño nuká chapú; pajimila eꞌiyowá chiraꞌakano nakú ajopana laꞌakeño kaja nuká chapú. Ñaké kaja phuꞌuteni chuwá chiraꞌakano ewá, iná iphátaka chapú péchuruna. Ilé kaje eꞌiyowá nuchiraꞌajiko; ñaké kaja nuchiraꞌajiko juni jalomi chuwá. Rewá iná amá kaja chapú kaje yajwé, eyá neꞌiyajena kemaño nanakuwá: “Jesucristo waꞌatéjena weká”, ke, eꞌiyonaja unká ñaké kalé neꞌemaká.
27 Reꞌiyowá ke lakaꞌapheji nulaꞌajika nakaje; jápakaje yajwé nomake; meꞌetájemi ke nuꞌumajika reꞌiyowá; nujñaꞌaké kaja meꞌepijí panaku; nunúrupi chu makáraꞌatako kaja nuꞌumajika ewá. Reꞌiyowá ke nulaꞌaké kamuꞌují aꞌajnejí nakú, pajreji nakú, aꞌarumakaji kaje nakú; piyuke nakaje nakú nulaꞌaké kamuꞌují iꞌimajika. Ilé ke nomájika chapú kaje yajwé iꞌimajika.
28 Re kaja joꞌó ñóꞌope nakaje unká numalare nakú ijló. Weꞌechú kaꞌalá keja noꞌoká nunakojó Jesucristo jaꞌapiyá jemaꞌajeño, ajopana, ajopana ke, nuwátakale nemaꞌaká palá Tupana jaꞌapiyá, raú noꞌó nunakojó neká.
29 Re kaꞌajná pajluwa Jesucristo jaꞌapiyá jemaꞌajeri, wejápaja ripechu kaphí Tupana chojé, raú kamuꞌují nupechu laꞌakó. Apú kaꞌajná kaꞌátari pajluwaja Jesucristo jaꞌapiyá jemaꞌajeri eꞌiyajé, rilaꞌakáloje puꞌuwaré penaje. Ilé kaje yúchaꞌatari wani nuká.
30 Unká nuwátala nokó laꞌakana: ajopana cháꞌatajeri ke. Nuwata iweꞌepika poꞌoloni nuká, eꞌiyonaja palá nulaꞌaká Tupana palamane aú.
31 Wawakáraꞌajeri Jesucristo jaraꞌapá Tupana; palá laꞌajerí riká, ñakele rinaku wapuraꞌakó palá wani ñakeja; riká weꞌepiri kewaka riká numakare nakú ijló meꞌetení.
32 Nuꞌumaká pajimila Damasco e wakajé, nawakáraꞌajeri iꞌimari neꞌemakana Aretas jaꞌapiyateje. Nuꞌumaká re wakajé, nawakáraꞌajeri wakáraꞌari inaꞌuké jaꞌakó nupé pajimila numanaje, napatakáloje nuká nóchoꞌoko reyá ejéchami, nakaꞌakáloje nuká inaꞌuké wajákelana chojé penaje.
33 Kurara yenoje, jipa nakiyá laꞌakanami, chipúkaꞌari pajimila nakojé tujlá ke pajimájechaka. Ajopana wanakiyana witúkaꞌataño nuká kuwáꞌala kajruni chu kurara aphú chiyá ají ke riyámajo.