10
Jesucristo palamane aú mawó numaká ijló: Eꞌiyajena kemaño nunaku ilérowa: “Ujwí Pablo, maare riꞌimaká aú wajwaꞌaté. Eyá purákaꞌaloji, riwakáraꞌakare wajló yaꞌajnaya, chu rakhaꞌá weká”, ke.
2 Ñaké riká, mawó numaká ijló: Nuphájika inaku wakajé ilaꞌaniña nuká yurí najwaꞌaté, kemaño nunaku ilé ke; wapuraꞌajó rinaku pajwaꞌatéchaka. Unká nukeroꞌoló napiyá, kemaño nunaku: “Ripechu keja rimaká nakaje nakú”, ke.
3 Ajopana inaꞌuké ke kaja joꞌó weká; unká walaꞌalá nakaje Tupánajlo wapechu keja.
4 Nókakajo eꞌiyá keja weká marí ejaꞌawá chu. Unká lekareji inaꞌuké laꞌakare aú kalé wenókako. Nakaje Tupana laꞌakare wajló, lekareji ke kaja wajló riká, raú wapichata inaꞌuké liyá puꞌuwaré Jiña Chiꞌinárikana wátakare nalaꞌaká.
5 Neꞌiyajena puraꞌañó mapeja, weꞌepiño ke wani, apoꞌojó wani Tupana nakú, ñakele napurákaꞌalo jemaꞌajeño unká weꞌepílaño palá Jesucristo nakojé. Riká aꞌarí wañathé riyukuna iꞌimakana aú, napajnoꞌotákaloje napéchuwa Tupana ejo, nemaꞌakáloje raꞌapiyá raú penaje.
6 Wawajaje inakiyana unká aꞌalaño nanakojó iwakáraꞌajeño purákaꞌalo.
7 Iká kemaño inaꞌuké nakú mékajenaka neká namákana aú. Re inakiyana pechu nanakuwá: “Wekaja kalé Jesucristo waꞌaté jápajeño”, ke. Iweꞌepí marí: Weká kaja iꞌimaño Jesucristo waꞌaté jápajeño; rejenowaja weká rijwaꞌaté jápajeño.
8 Unká naje kalé numá ijló nunakuwá: Tupana aꞌarí nuká iwakáraꞌajeri penaje; apala raú ipechu iꞌimá nunaku: “¡Ajopana cháꞌatajeri ke wani rilaꞌaká rinakuwá ta!”, ke. Unká nopáñaꞌalojla raú, Tupana aꞌakale nuká noꞌokáloje iñathé, ipechu iꞌimakáloje richaje, richaje ke kaphí Tupana chojé. Unká nopichátakaloje ipechu penaje kalé raꞌá nuꞌumaká.
9 Unká nuwátalajla ijló keroꞌótakana lanaꞌakéjami nuwakáraꞌakare ijló iꞌimaká aú.
10 Inakiyana kemaño nunaku: “Kaphí Pablo wakáraꞌaka weká ripurákaꞌalo riwakáraꞌakare wajló aú. Wajwaꞌaté riꞌimaká wakajé, riliyómika ke ripechu iꞌimaká. Mapéjari puraꞌakó wajwaꞌaté, keja kaja ripuraꞌakó iꞌimaká”, ke.
11 Kemari ilé ke nunaku, nuwata riweꞌepika marí: Nakaje wemakare nakú lanaꞌakéjami, yaꞌajnaya wawakáꞌakare ijló chu weꞌemajika ijwaꞌaté wakajé, wemájika kaja ñakeja ijló ijimaji.
12 Unká wani wawátala wanakuwá puraꞌakano palá, puraꞌakaño nanakuwá puraꞌakó ke kaja. Nacháꞌata kaꞌajná nanakiyana, raú napechu iꞌimá nanakuwá: “Kajrú péchuruna weká”, ke. ¡Meke unká wani ta napechu iꞌimalá najló!
13 Unká wemalá wanakuwá wapechu keja; Tupana pechu nakú riꞌimaká ejeja walaꞌá nakaje. Rejeja kaja wemaká wanakuwá. Ripechu nakú riꞌimaká ke wephaka inaku Corinto ejo iꞌimaká.
14 Wemaká aú wanakuwá: “Iwakáraꞌajeño weká”, ke, unká mapeja kalé wemakajla. Ajopana piyá weꞌemá Jesucristo yukuna ijló iꞌimaká.
15 Nakaje ajopana inaꞌukena laꞌakare nakú, unká wemalá: “Weká laꞌañó riká”, ke. Ilé kaje unká wawátalare. Wawátaja Tupana purákaꞌalo jaꞌapátakana ijló, ipechu iꞌimakáloje richaje, richaje ke, kaphí Tupana chojé raú.
16 Kéchami wawátaka iteꞌeré yámajo iꞌijnakana yaꞌajnaje, weꞌemakáloje riꞌimataka inaꞌuké kapichákajo liyá yukuna najló penaje. Ajopana kaꞌajná jewíñaꞌataño neꞌemaká paineko rewá, raú unká wemalaje wanakuwá: “Weká jewíñaꞌataño neká”, ke.
17 Palá iná laꞌaká nakaje kaꞌajná, raú iná puraꞌó palá Tupana nakú, ripalamane aú iná laꞌakale palá riká.
18 Apala pajluwa kemari kaꞌajná rinakuwá: “Palá wani nujápaka Tupánajlo”, ke. Unká iná weꞌepila kewaka kaꞌajná riká rimakare rinakuwá. Eyá riká wawakáraꞌajeri Jesucristo kemakare nakú: “Palá rijápaka Tupánajlo”, ke, riká joꞌó jápari palá rijló.