Liñeru naꞌakare kamuꞌují laꞌakáñojlo yukuna marí
9
1-2 Marí ke numaká najló inaku iꞌimaká: “Apú jarechí iꞌimaká wakajé, Acaya teꞌeré nakú iꞌimakaño keñoꞌoñó liñeru awakátakana kamuꞌují laꞌakáñojlo”, ke. Riyukuna jemaꞌakana aú, neká kaja laꞌañó ñaké kaja ijewemi. Unká naje kalé numá ijló, aꞌakáloje liñeru ajopana Jesucristo jaꞌapiyá jemaꞌajeño, kamuꞌují laꞌakáñojlo, nuweꞌepíkale iwátaka raꞌakana najló. Palá nupechu iꞌimakale inaku aú, nuꞌumá Macedonia e iꞌimakáñojlo riyukuna.
3 Chuwa nuwakáraꞌaje wanakiyana kaꞌajnó liñeru ñaꞌajé iliyá. Ilé ke laꞌakana aú unká riꞌimalaje mapeja, numakare inaku najló iꞌimaká, numaká inaku keja kaꞌajná aꞌajika liñeru.
4 Apala Macedonia eyájena nakiyana iꞌijnajeño nujwaꞌaté ichaje, amájeño kaꞌajná unká awakátala liñeru wapé, raú nopáñaꞌakojla wani, nupechu iꞌimakale inaku: “Palá japi naꞌajika liñeru”. Ñaké kaja apáñaꞌakojla raú.
5 Marí ke riꞌimaká piyá, nuwakáraꞌaje wanakiyana iꞌijnaká watukumá ichaje. Neká ñapátajeño liñeru awakátakana wapé, imakare nakú wajló iꞌimaká. Iweꞌepíkale ajopana muꞌují, aꞌajé liñeru najlojé penaje, raú naweꞌepeje ikó iwátaka raꞌakana.
6 Iweꞌepí marí: Ejátari wejápaja nakaje icha ijí, ñaꞌarí kaja wejápaja richa. Ejátari kajrú nakaje icha ijí, ñaꞌarí kaja kajrú richa. Marí ke kemakánaka riká: Iná aꞌakachu wejapa liñeru kamuꞌují laꞌakáñojlo, ñaké kaja Tupana laꞌaká iná palá wejápaja. Iná aꞌakachu kajrú liñeru, rilaꞌá kaja iná palá kajrú.
7 Iná aꞌá liñeru, iná pechu nakú riꞌimaká ejé. Mamejajneja iná aꞌaká riká. Iná pechu iꞌimakachu ijnú raꞌakana nakú, unká paala Tupánajlo riká. Riká wátari íkiꞌija riká, aꞌakare puꞌují ripechu ke nakaje kamuꞌují laꞌakáñojlo.
8 Tupana weꞌepiri ñóꞌope nakaje aꞌakana ijló, raú unká ilaꞌalajo kamuꞌují nakaje nakú. Waꞌaté kaja ñóꞌope nakaje iꞌimajika ijló, aꞌakáloje ajopana ñathé raú penaje.
9 Marí ke Tupana purákaꞌalo lanaꞌakéjami kemaká kajrú nakaje aꞌajerí nakú:
“Mamejajneja raꞌaká kamuꞌují laꞌakáñojlo nakaje.
Unká Tupana pechu kapicháñaalaje palá rilaꞌakare
waꞌajini wani riweꞌepíjika riká”, ke rimaká.
10 Tupana palamane aú re nakaje icha ijí inajlo, iná ejátakaloje rinakiyana penaje. Ripalamane aú re kaja richa inajlo, iná ajñákaloje rinakiyana penaje. Rikaja kaja aꞌajeri ijló kajrú nakaje, ilaꞌakáloje palá wani ajopana inaꞌukena nakú raú penaje.
11 Ñaké iꞌimakale, kajrú nakaje iꞌimajika ijló, aꞌakáloje ñóꞌope najló. Weꞌejnataje liñeru, aꞌajíkare kamuꞌují laꞌakáñojlo, Jesucristo jaꞌapiyá jemaꞌajeño neká. Nakaje, waꞌajíkare najló aú, nemaje Tupánajlo: “Palá pilaꞌaká weká”, ke.
12 Liñeru, aꞌajíkare najló aú, aꞌajé nañathé, kamuꞌují nalaꞌakare nakú aú. Raú kaja palá napechu iꞌimajika Tupana nakú, kajrú nemájika rijló: “Palá pilaꞌaká weká”, ke raú.
13 Ilé ke aꞌajíkale nañathé ñóꞌope liñeru aú, naweꞌepeje palá wani jemaꞌaká Jesucristo jaꞌapiyá, raú napuraꞌajó kaja palá wani Tupana nakú.
14 Nañathé aꞌakana aú, palá napechu iꞌimajika inaku; napuraꞌajó kaja Tupana waꞌaté inaku, ripalamane aú aꞌakale nañathé.
15 Wemá Tupánajlo: “¡Palá wani pilaꞌalaka weká, íkiꞌija wani paꞌakale wañathé! Unká purákaꞌaloji iꞌimalá wajló riyukuna iꞌimakana lokópaꞌala”.