Liñeru aꞌakana kamuꞌují laꞌakáñojlo yukuna marí
8
Nojena, nuwata iweꞌepika mékeka Tupana laꞌaká palá wani Jesucristo jaꞌapiyá jemaꞌajeño, Macedonia teꞌeré e iꞌimakaño nakú.
2 Kajrú namaka chapú kaje yajwé rewá, eꞌiyonaja puꞌují napechu. Kamuꞌují kaja nalaꞌaká nakaje nakú, eꞌiyonaja naꞌá kajrú naliñérute nakiyana, naꞌakáloje ajopana kamuꞌují laꞌakaño ñathé raú. Kajrú liñérutena, ke naꞌaká liñeru ajopana kamuꞌují laꞌakáñojlo.
3 Nuweꞌepí liñeru iꞌimaká nakapi lokópaꞌala ejé, naꞌá kamuꞌují laꞌakaño ñathé raú. Unká na kalé wakáraꞌa nalaꞌaká ñaké, nekó nawátaka raꞌakana.
4 Mawó nemaká nojló iꞌimaká, nuyuríkaloje naꞌaká ajopana Jesucristo jaꞌapiyá jemaꞌajeño, kamuꞌují iꞌimakaño ñathé.
5 Unká nuweꞌepila ilé ke wani nalaꞌajika nanaku palá iꞌimaká. Paineko naꞌá nekó wawakáraꞌajeri Jesucrístojlo, rejomi naꞌá kaja nekó wajló, raú nalaꞌakáloje wajwaꞌaté nakaje pajñakani, Tupana wátaka ke.
6 Tito keñoꞌorí paineko liñeru ñaꞌakana iliyá iꞌimaká, ñakele rikaja kaja wawakáraꞌa piño ichaje, riñapátakaloje piyukeja liñeru ñaꞌakana iliyá.
7 Ilé ke ilaꞌaká aú, ilaꞌá palá iꞌimaká. Piyukeja ilaꞌaká nakaje palá, kaphí ipechu iꞌimakale Jesucristo chojé. Palá kaja inakiyana weꞌepika inaꞌuké jewíñaꞌatakana Tupana nakú. Iweꞌepí kaja kajrú nakaje nakojé; wechi ilaꞌaká Tupánajlo nakaje iꞌimaká. Chuwa nuwata icháꞌataka kaja ajopana, liñeru aꞌakana aú kamuꞌují laꞌakáñojlo.
8 Unká nuwakáraꞌala aꞌaká liñeru, nuwata kalé iweꞌepika meke wechi ajopana aꞌaká kamuꞌují laꞌakáñojlo naliñérute nakiyana. Ñaké kaja aꞌajika ee iliñérute nakiyana najló, wapechu iꞌimajé inaku: “Kewaka, íkiꞌija joꞌó nawátaka neká”, ke.
9 Kaja iweꞌepí palá wawakáraꞌajeri Jesucristo nakojé: íkiꞌija riwátaka weká. Jeꞌechú chu riꞌimaká wakajé, kajrú nakaje iꞌimaká rijló, eꞌiyonaja marí ejaꞌawá chu riꞌimaká wakajé, unká na iꞌimalá rijló, kamuꞌují laꞌaká ke riꞌimaká. Rilaꞌá inaꞌuké nakú palá, neꞌemakáloje Tupana palamane jaꞌapiyá. Kamuꞌují laꞌajerí riꞌimaká ijló, lanakiya iká iꞌimakáloje kajrú laꞌajeñó ke ripalamane aú. Ñakele kajrú laꞌakaño ke iká meꞌetení, ripalamane iꞌimakale.
10 Apú jarechí iꞌimaká wakajé eyá, ikeñoꞌó liñeru awakátakana ajopana piyá iꞌimaká, makaꞌaní iwátakale ajopana ñathé aꞌakana, ñakele numá ijló chuwa:
11 Wechi ipechu ke iñapata rawakátakana piyukeja, ipechu iꞌimaká ikeñoꞌoká rawakátakana iꞌimaká wakajé ke kaja. Eko aꞌá piyukeja riká liñeru, aꞌakaje penaje iꞌimakare ikapi.
12 Iná kapi ejé, iná aꞌaká najló liñeru, ilé ke laꞌakana palani Tupánajlo. Unká rikejáꞌala iná liyá nakaje, unká iꞌimalare iná kapi.
13 Unká nuwátala iyuriko kamuꞌují ajopana ñathé aꞌakana aú.
14 Rejenowaja nuwátaka nakaje iꞌimaká ijló najwaꞌaté. Re ijló chuwa ñóꞌope nakaje, aꞌakáloje ajopana ñathé, nakaje nalaꞌakare nakú kamuꞌují aú. Apala iká piño laꞌajeño kamuꞌují nakaje nakú iꞌimajika. Riwakajé kaꞌajná ñóꞌope nakaje iꞌimajika najló, raú neká penájemina aꞌajeño iñathé nakaje ilaꞌajíkare nakú kamuꞌují. Ilé ke ilaꞌajika pekowáaka palá, rejenowaja nakaje iꞌimakáloje ijló.
15 Ñaké laꞌakana aú ilaꞌajé Tupana purákaꞌalo lanaꞌakéjami kemaká ke. Riká kemari: “Apú kapi kaꞌajná ñóꞌope nakaje. Raꞌajika ee rinakiyana kamuꞌují laꞌakáñojlo aú, unká ñóꞌope wani yurílajo rijló, eyá unká kaja kamuꞌují laꞌakaño laꞌalaje kamuꞌují wani nakaje nakú raú”, ke rimaká.
Tito, rijwákeꞌena, kele yukuna marí
16 Palá Tupana laꞌaká weká. Rilaꞌá Tito pechu khaí inaku, nupechu iꞌimaká inaku ke kaja.
17 Nupuraꞌó rijwaꞌaté iꞌimaká, riꞌijnakáloje ichaje.
Khaí wani riweꞌepika inaku, raú riwata ichaje iꞌijnakana. Kaja keja ripechu nakú riꞌimaká.
18 Rijwaꞌaté wawakáraꞌaje apú Jesucristo jaꞌapiyá jemaꞌajeri. Piyuke Jesucristo jaꞌapiyá jemaꞌajeño awakaño apaꞌalá chojé, apaꞌalá chojé ke, puraꞌañó palá rinaku, palá riꞌimakale Tupana iꞌimataka inaꞌuké kapichákajo liyá yukuna ajopánajlo, ajopánajlo ke.
19 Jesucristo jaꞌapiyá jemaꞌajeño, ajopana, ajopana ke, kemaño kaja rinaku, riꞌijnakáloje wajwaꞌaté liñeru aꞌajé kamuꞌují laꞌakáñojlo, waweꞌepíkale khaí nanaku. Ñaké walaꞌajika, napuraꞌakóloje palá Tupana nakú raú, waꞌaté wayaꞌataje najló wechi waꞌaká nañathé.
20 Waꞌakáloje kamuꞌují laꞌakaño ñathé penaje wakejaꞌa liñeru ajopana liyá, ajopana liyá ke. Unká wawátala inaꞌuké chapújraꞌako wanaku rijimaje.
21 Ñakele wawata nakaje walaꞌakare iꞌimaká palá Tupana jimaje ke. Unká rikaja kalé, waꞌató riꞌimaká kaja palá inaꞌuké jimaje ke.
22 Wawakáraꞌaje kaja najwaꞌaté apú wanakiyana. Palá laꞌajerí riká, raú iná weꞌepí palá péchuri riká. Palá kaja ripechu iꞌimaká inaku.
23 Nakejáꞌajika ee Tito yukuna iliyá, eko imá najló: “Pablo wákeꞌewe riká, rijwaꞌaté rijapa ijlojé penaje”, ke. Iyamá, ajopana Tupana jaꞌapiyá jemaꞌajeño, iꞌijnajeño kaja najwaꞌaté. Nakejáꞌajika ee piño rijwákeꞌena yukuna, eko imá najló: “Jesucristo jaꞌapiyá jemaꞌajeño, maárowa iꞌimakaño, wakáraꞌaño neká wajwaꞌaté wañathé aꞌajeño penaje. Inaꞌuké pechu iꞌimakáloje palá Jesucristo nakú penaje nalaꞌá piyuke nakaje”, ke imájika najló.
24 Ñakele ilaꞌá nanaku palá, ajopana Jesucristo jaꞌapiyá jemaꞌajeño, nawakáraꞌajeño, kele jemaꞌakáloje íkiꞌija iwátaka neká yukuna. Iwátajika ee neká íkiꞌija, naweꞌepeje raú nájeka wapechu iꞌimaká palá inaku.