2 Iweꞌepí khaí wanaku. Unká na kalé walaꞌá chapú; unká kaja wakaꞌalá apú liyá rinane wajluwa; unká kaja na waꞌaté kalé wapajlá.

3 Ilé ke numaká inaku aú, unká numalá inaku: “Puꞌuwaré nalaꞌaká”, ke. Numaje piño ijló, numaká iꞌimaká ke: Khaí nuweꞌepika inaku; watakaꞌajika kaꞌajná waꞌató nuwátaje iká íkiꞌija.

4 Inakojé nupechu watánaꞌa; puꞌují kaja nupechu inaku. Kajrú nomaka chapú kaje yajwé, eꞌiyonaja kalé kaphí, waꞌaté puꞌují joꞌó nupechu.

5 Wephaka majó Macedonia teꞌeré ejo eyá, unká joꞌó wawatánaꞌala chapú nalaꞌakare weká liyá. Keꞌiyapejé chapú kaje yajwé wamá: neꞌiyajena wátaño wajwaꞌaté akhaꞌákakano; keroꞌokajo nakú weká maare.

6 Eꞌiyonaja Tupana weꞌepiri kamuꞌují péchuruna pechu laꞌakana palá. Tito iphaka aú majó, rilaꞌá wapechu palá.

7 Unká rikaja kalé laꞌarí wapechu palá, rimá kaja wajló inaku: “Kajrú nawátaka amákana. Kamuꞌují kaja napechu nanakuwá, unká paala nalaꞌakare iꞌimaká pachá. Pichaya napuraꞌó chapú péchuruna pinaku waꞌaté”, ke rimaká wajló inaku, raú kaja puꞌují wani nupechu laꞌakó.

8 Purákaꞌaloji lanaꞌakéjami, nuwakáraꞌakare ijló iꞌimaká, laꞌarí ipechu kamuꞌují iꞌimaká, eꞌiyonaja unká nupechu laꞌaló kamuꞌují raú, kamuꞌují rilaꞌaká ipechu eꞌiyonaja. Paineko chiyó, nupechu iꞌimá kamuꞌují richona iꞌimaká. Meketánaja kalé ipechu iꞌimá kamuꞌují, nokhaꞌakale iká iꞌimaká. Rejomi kaja iyurí iliyó puꞌuwaré laꞌakaná, ñakele chuwa unká kamuꞌují kalé nupechu.

9 Chuwa puꞌují nupechu. Unká puꞌují kalé nupechu, kamuꞌují ipechu laꞌakole; puꞌují nupechu, ipajnoꞌotákale ipéchuwa puꞌuwaré ilaꞌakare liyá. Kamuꞌují ipechu iꞌimaká, puꞌuwaré ilaꞌakale pachá, palani Tupánajlo ilé kaje. Unká walaꞌalá chapú iká, wakhaꞌaká aú iká puꞌuwaré ilaꞌakare pachá.

10 Tupánajlo palani wapechu iꞌimaká aú kamuꞌují, walaꞌakale puꞌuwaré, raú wapajnoꞌotákaloje wapéchuwa Tupana ejo, puꞌuwaré walaꞌakare liyá, weꞌemakóloje richiyá penaje. Unká naje kalé iná pechu iꞌimaká chapú iná nakuwá raú. Unká ñaké kalé riká unká jemaꞌalaño Tupana jaꞌapiyajlo. Apala kamuꞌují napechu laꞌakó, nalaꞌakale puꞌuwaré, eꞌiyonaja unká napajnoꞌotala napéchuwa Tupana ejo, riꞌimatákaloje neká kapichákajo liyá raú.

11 Kaja iweꞌepí mékeka ráchoꞌoko ijló, Tupana laꞌakale ipechu kamuꞌují. Ñakele iwata purákaꞌaloji lamáꞌatakana ijluwa iꞌimaká; iwata kaja nojló kemakana: “Kaja walamáꞌata riká,”, ke. Apáñaꞌakajo puꞌuwaré rilaꞌakare iꞌimaká ijló; keroꞌokajo nakú iꞌimá kaja. Chuwa iwata nuꞌujnaká amaje; iwata kaja nuweꞌepika palá ilaꞌakare nakojé. Richuwaja iwajaka riꞌimaká, laꞌarí puꞌuwaré; iwata kaja nuweꞌepika: unká ipachá kalé rilaꞌaká puꞌuwaré.

12 Nuwakáraꞌa ijló purákaꞌaloji lanaꞌakéjami, iwajákaloje laꞌarí puꞌuwaré iꞌimaká. Unká rikaja kalé penaje nuwakáraꞌa ijló riꞌimaká. Tupana weꞌepiri mékeka aꞌaká inakojó nuká.

13 Chuwa waweꞌepí palá ipechu iꞌimaká wanaku, raú puꞌují wapechu.

14 Riꞌijnaká ichaje yámona, numá rijló inaku: “Palá péchuruna neká kaꞌajnó”. Numaká rijló iꞌimaká, keja iꞌimaká. Nuꞌumaká ichaje kaꞌajnó wakajé, kewaka numaká ijló. Ñaké kaja numaká inaku Títojlo.

15 Rꞌimaká ijwaꞌaté wakajé, iká aꞌañó inakojó ripurákaꞌalo iꞌimaká, palá wani kaja iphaka raꞌapí iꞌimaká.

16 Puꞌují nupechu, nuweꞌepíkale palá péchuruna iká.