3 Unká wawátala nakaje laꞌakana apoꞌojó, ajopana puraꞌakó piyá puꞌuwaré wajápakaꞌala nakú.

4 Wawata naweꞌepika Tupánajlo riká walaꞌakare, raú naweꞌepeje rijápajeño weká. Naweꞌepeje keꞌiyapejé chapú kaje yajwé amájeño weká, eꞌiyonaja unká wapechu laꞌaló ujwí raú; naweꞌepeje kaja kamuꞌují laꞌakaño weká nakaje nakú. Lakaꞌapheji kaja nakaje laꞌakana iꞌimaká wajló.

5 Naweꞌepeje kaja nañaꞌatake weká rijimaje; nakaꞌaké kaja weká inaꞌuké wajákajelana chojé; kajrú kaja inaꞌukena awakájiko wanakojé tujlá ke, nayúchaꞌakole wachá; wamake kaja jápakaje yajwé; reꞌiyowá ke weꞌemaké meꞌetájeñomi; wajñaꞌaké meꞌepijí panaku. Ilé kaje waꞌaté walaꞌaké wajápakaꞌala.

6 Palá walaꞌakare aú, naweꞌepeje Tupana Pechu jaꞌapiyá ke walaꞌakano nakaje rijló. Palá waweꞌepika kewákaje purákaꞌaloji nakojé; unká wapechu iꞌimalá ujwí inaꞌuké nakú; kachuwa kaje nakuwaja wapalaꞌataka najló napechu; inaꞌuké wani weká najwaꞌaté; íkiꞌija wawátaka neká Tupana Pechu palamane aú; unká walaꞌalá mapeja nawátakana jenami.

7 Kewaka wapurákaꞌalo; weꞌepíkaje Tupana aꞌakare wajló aú walaꞌá nakaje palá. Ilé ke walaꞌaká aú naweꞌepí mékajenaka weká; palá walaꞌakare aú wapichata chapú wanaku péchuruna purákaꞌalo. Raú naweꞌepí Tupana nakojé, nemaꞌakáloje raꞌapiyá penaje.

8 Palá neꞌiyajena pechu wanaku, eyá ajopana laꞌañó weká nawejáputenami ke najluwa. Neꞌiyajena puraꞌañó kaja wanaku palá, eyá ajopana puraꞌañó wanaku puꞌuwaré. Neꞌiyajena kemaño wanaku: “pajlákachina neká”, ke, eyá ajopana kemaño wanaku: “kewaka nemaká”, ke.

9 Neꞌiyajena pechu wanaku: “Unká wamánaꞌapana kalé neká”, ke, eyá ajopana kemaño: “Wamákarena neká”, ke. Kapichákajo eꞌiyá weká, eꞌiyonaja kalé re joꞌó kaja weká; nawajákarena keja weká, eꞌiyonaja kalé unká joꞌó nenola weká.

10 Kajrú wamaka chapú kaje yajwé, eꞌiyonaja palá wapechu. Kamuꞌují laꞌakaño weká, eꞌiyonaja Tupana purákaꞌalo aú walaꞌá palá ajopana nakú, neꞌemakáloje ripalamane penaje. Unká kaja waliñérute iꞌimalá, eꞌiyonaja weꞌemakale Tupana yukuna najló aú, raꞌapiyá jemaꞌajeño iꞌimaño kajrú laꞌakaño ke.

11 Nojena, Corinto e iꞌimakaño, numá nunakuwá mékeka nupechu iꞌimaká inaku, íkiꞌija nuwátakarena iká.

12 Unká na kalé itajla waliyá rapu, waweꞌepika piyá khaí inaku, ikaja kalé laꞌañó ipéchuwa ujwí waliyá.

13 Naraꞌapá puraꞌakó riyani waꞌaté, ke kaja nupuraꞌakó ijwaꞌaté meꞌetení. Khaí iweꞌepika wanaku, waweꞌepika inaku ke kaja.

14 Ilaꞌaniña ijwákeꞌewe, unká jemaꞌalaño Jesucristo jaꞌapiyá, unká panakojéchaka ke kalé wapechu najwaꞌaté. Unká kalajeruni iꞌimalajla pajñakani mejámaꞌatani waꞌaté; unká méñoꞌojo kaja palá laꞌakaño iꞌimalajla puꞌuwaré laꞌakaño wákeꞌena.

15 Unká Jesucristo pechu iꞌimalá, Jiñá Chiꞌinárikana pechu iꞌimaká ke. Unká méñoꞌojo napechu iꞌimalajla rejenowaja ñaké laꞌakana nakú; unká kaja Jesucristo jaꞌapiyá jemaꞌajeño pechu iꞌimalajla ajopana, unká jemaꞌalaño raꞌapiyá, pechu ke. Apoꞌojó napechu paliyáaka nakaje laꞌakana nakú.

16 Unká kaja rejenowaja kalé Tupana ñakaré, nakaje jenami nemakare nakú: “Wachiꞌinárikana jenami riká”, ke, ñakaré waꞌaté. Kajmuni, kapechuni Tupana, unká nakaje jenami laꞌakanami kalé riká. Weká, raꞌapiyá jemaꞌajeño eꞌiyá, re Ripechu. Marí ke rimaká raꞌapiyá jemaꞌajeño nakú: